Wonkele Iyyesus Kristoose Markʼoose Tooxi
Erko Shoxampakko Yohannise
1
Wonkele a Miʼaye Haallikkito Iyyesus Kristooseb paayyoote thiisi.
2 Qhamossi hxuumampakkoc Issayaasettayd hasa payamtipa thooxamo kula:
“Haadhi erkampakko haayyu ho hoosi onke gharisna
ho mandhonu ikkitto dhammattay hasa payipa isi riira:
‹Onke Pogholhitoosi gharisa:
onkaadhdhe takkumma uso na ashshiniisikka gheteʼisanku.›”e
4 Hussa maallay Shoxampakko Yohannise hasi payipa isi saluyapa mandhikki okayu:
“Qhama hxurakko tayadhintennu cʼuppito karo Haallikkito holapa shoxatte shoxadhanku.”
5 Koro piyye Yihutanapa kathama Iyyerusalamenna kaasakki uso kula okayapa cʼuppo huusundhiisikka isi hela puutʼapa usokka kolle Yortanoosessa shoxatte isi usundhe shoxa.
6 Laalle Yohanniseesi ufurkko kaalannaka kodhdhi,
kuudheʼitakka theepko ishshapadhi,
yiʼo huusukka ayyakkopa taantatte.
7 Erko huusutakka hasi payipa saluyu:
“Kahhepa hxopaadhdhe huusuna suro ishshighekakki yeye gheeqasti ho yeesi uuma ghula ye kaleema okayna.
8 Ano qandhettakki an hune shoxatte shoxni,
naqharray Uso Nasso Kʼulkʼullottakki hune shoxatte shoxni.”
Shoxatte Shoxadhepa Temmame Iyyesuse
9 Xinkisana Iyyesuse kathamassi piyye Kalilanna kittatte qagha Nazrate ana payinukki okayipa kolle Yortanoosessa Yohannise Usoosi shoxatte shoxu.
10 Haattay qandheete kittatte lighnittay moontho iqhqhaashamipa Nasso Kʼulkʼullokka lighno qalalakkitottay kodhdhupa isina saappa oodhdhana hiʼa.
11 Ikkitto hasa payikka moonthonu okayu:
“Miʼayessi haayyu an cʼikadhi Ato,
hottay hxaso ye dhakaadha!”
12 Hattay Nasso Haallikkito Iyyesusessi iʼakkipa karo mandhto ashshottay.
13 Mandhusanakka Seetʼanattay inni themmamana kuyyaqako 40 oladhu.
Aaghe mandhito qalekka isi qaaka,
erkampatadhdhe Haallikkitoka nu kodhadhonki.
Iyyesuse Kodhmo Wonkelateesi Qhamu Piyye Kalilassa Paayyi
(Maat. 4:14-17; Lukʼ. 4:14-15)
14 Yohannisekka ishshapami tupettay Iyyesuse wonkele Haallikkitoosi inni torruyanaki karo piyye Kalila kula okayi.
15 Ikkollisanakka hasi payi:
“Perre idhdhikadhe,
Ahxase Haallikkitoka iʼitʼtʼuytiye cʼuppito kala holapa ote xeesattay dhukkaysadhanku.”
Iyyesuse Qhawho Salax Hehxaare Ghappasaasi Ooqi
16 Iyyesuse ippaso Kalilanna kaaʼitha lighghana Simiʼoonepa qaso huusu Intriyaaseesi usundheka koro hxaare ghappa qhooti kodhdhe maallay ippasooma marapaadhdhe ghaasanaki usundhe hiʼi.
17 Iyyesusekka hasi napayi:
“Ye kaleema okayama qhamo he ahhxaare ghappaste kula he koro ye ghappasaka an hune konniye.”
18 Usundhdhekka hattakki marapaadhdhe huusundhiisi hela hxureppa nakala ashshonki.
19 Xaysanaka takkassaki itha tahxina dhelle Zeptiwoose Yaykʼoopepa qaso huusu Yohannise he konkito saappeete marapadhdhe gharsadhasiaki hiʼi.
20 Iyyesusekka haattay iʼusundhe ooqina paappo huusundhi Zeptiwooseesi kodhampawhe illi konko saappeemi hxureppa Uso kaleema ashshonki.
Dhinko Qhawhossi Nasso Maghatta Ghapamina
21 Illighgheppa kathama Kʼifrinahoomenna hxafonkina kuyyaqako hxaysinko koro Ayhutattena Iyyesuse haattakki manne huusundhi ghissootatte kulakki xullipa kollise paayyu.
22 Iyyesuse ikkollisana qhamo qhawho kollisampawhe Hikkate kula ye kodhdhuma qhamo qhawho humna rafisatte sheegha kula qhooti kollisi maallay waarsho kollise thuusuttay idhdhahxhxi.
23 Qhawho tookko ho nasso maghattay ghapamipa mannisa ghissoote koro Ayhutattena kala isi qagha hasi payipa riiru:
24 “Atho Iyyesuse Nazrate,
man hola sheeghini?
Ine patisenukka okayti?
Atho qhama yaxa kodhdhitisa an ara,
Atho Kʼulkʼullito Haallikkito!”
25 Iyyesusekka nassossi maghana hasina payipa qheeru:
“Kʼampayipa qhawhuna lighay!”
26 Nassossi maghakka qhawhossiisi piyyeemi kʼuripa dhiththansisu tupettay ikkitto dhammatta riirupa na lighu.
27 Waarsho kaasay idhdhahxhxipa isi ille kakasqadha:
“Ii!
Ata husi kollinko qhawthitu ho maallay?
Nassidhdhe maghumaasikkaki humna rafisatte huusuttay hayi,
usundheka innu hayamanki.”
28 Haattay ote Iyyesuse ghodhdhadhisa piyye Kalila kaaʼitha qagha kaasakki qhaskatti.
Iyyesuse Koro Kisha Ho Udhdhamaasiki Dhinnisi
29 Hattay Iyyesuse mannessi ghissoote koro Ayhutattena illighipa Yaykʼoopepa Yohannise illay ho Simiʼoonepa Intriyaasenna manne kula ashshoppa xullu.
30 Mannisanakka sookitte Simiʼoone ippawwaqatipa isi rafay.
Hattay Iyyesusenu qhamu pawwaqatiisi innu qalle.
31 Iyyesusekka xaytossi inna rafti kulaki itʼtʼuyipa xargho na ghapuppa haqisunna pawwaqosika iʼise hxurri,
haqippa olho usundhe gheeqasa nukkodhi.
32 Oqhqhayekka ixxullitipa xaytokka awnuyunna koro udhdhamapa koro nassidhdhe maghoomattay ghappami kaasasiki Iyyesuse kula okaase.
33 Koro kathamisana qaaka kaasay iʼokayipa ghinteema illaa holu.
34 Iyyesusekka koro udhanko pile pilettay qootʼuyama ho kishasikki dhinnisi,
nassidhe maghooma kishaasikki lihhaso.
Naqharray nassidhdhisa maghooma Uso qhamu yaxa kodhdhisa qhooti are maallay qhamu qallanenu Iyyesuse yena payu.
Iyyesuse Xayto Ghinaqakko Kulaki Ghissootenu Ashshi
35 Kuyyaqako nakala qagha ye qhaayyuna Iyyesuse ihhaqi lighuppa xayto koro yena qaghi kula ghissootenu ashshoy.
36 Simiʼoonepa hesi na qale qaaghakka Uso gheeqenu lighonkippa nakala ashshonki.
37 Ittayennakka hasinna paye:
“Koro kaasakki ho gheeqa.”
38 Iyyesusekka hasi payipa nu holasu:
“Ano qhoota kollisenu okayi maallay qhama korossi wonkele kollisninu ghodhdhadhi itʼtʼooma kula ashshini.”
39 Hussa maallay iʼashshipa mannaadhdhessi ghissoote koro Ayihutattena isi kollisapa Nassidhdhe maghoomaasikka isi lihasapa ghodhdhadhe piyye Kalilanna qagha kaasanna isi lallaghama.
Iyyesuse Qhawho Udhanko Lemtʼatte Naqakiisiki Dhinisi
40 Qhawho udhanko lemtʼattef annapayi naqaghiki Iyyesuse kula okayipa nakala kilipuppa hasana payuppa waathadhu:
“Awwoʼa payni,
ye alheesesi aʼalkasnay.”
41 Iyyesusekka iqhararrsadhipa xarghottay shokku ghappadhupa hasana payu:
“Anwwoʼaye,
alheesam!”
42 Qhawhossikka haattay udhankosi lamtʼattena alheesammu.
43 Iyyesusekka qhawhossina hasinna payipa uuma dhihamuppa laghghu:
44 “Oliisi yaxanukka qhama athu qallintinu he tiqithadha.
Naqharray ashshapa kʼeesittonu he hiʼaasay,
misikkire qhamo innu kodhdhininu alheesame thaahuusi hiʼasenukka teexakkosi Muuse hayiisi itʼtʼoosayg.”
45 Naqharray qhawhossi haahanu lighnittay iʼashshipa dhine huusuusi xayto kaasa thorruye paayyu.
Qhootisanu Iyyesuse kattamaadhe kaasanna liqqakkoʼita xulle ye alkasukka.
Naqharray kathamana seetottay xayto koro yena qaghinaki qaaki,
ikkodhdhitama kapay koro xayta xaytanukki Uso kula okayi.