Kolladhampawhessi Payyooteema Ooqame
5
Kuyyaqko tookko Iyyesuse paso Kenseretʼenna a hinaseemi shikkaarina koro kishakki Uso kula okayipa Kʼaale Haallikkito apaqhasenu isi dhudhdhukama.
2 Kuyyaqkusana Iyyesuse konko lakki he pasito hinaseete shikkaarakki hiʼi;
he hxaare ghappakka konkidhessinna iʼoʼodhdheppa marapadhdhesi hxaarettay ghappeesi isi shoxadha.
3 Iyyesuse konkadhisana ho Simʼoonessa ihhadhdhi.
Simiʼoonena napayu konkusi hinaasenu paso kula okotto ye xighghisi.
Xaysanu konkosi sappeema qakkadhuppa waarshosi kollise paayyu.
4 Iththorresiisi dhikkisi tupettay Simiʼoonena inna payi:
“qandheete karo kittissa dhamma kula xighghipa marapadhdhessi haahundhi ahxarettay ghappiteesi pullonkuy.”
5 Simiʼoonekka inna payi:
“Kollisampakko haayyu,
kulay awne kaasay inna gheeqaninakka tardhnippa ina qhayippa olhanghapni isiye qaghi naqharray atho payi payni marapadhdheesi anpullinaani.”
6 Marapadhdheesi ipullenna haaki kakaqamne saasa hxaare kishay ghapponki.
7 Hessi ille qale kodhe konko pilete qaghakka qhamu okayneppa usundhe kʼarkʼaronkinnu xamisathottay ooqonki,
usundhekka iʼokayeppa konkidhdhe lakkissasa hoqhqhashoonki,
konkadhesikka loqhadhe payyonki.
8 Simiʼoonessi ana Petʼiroose payi iʼolissa hiʼina Iyyesuse miinteemi kilipipa hasa na payu:
“Pogholho,
ano qhawho cʼuppolakkoye,
yelakanta ashsha.”
9 Olhu na maallay hasa payi usopa hesi uso qale qagha kaasay kishno hxaaressi ghappennakki usundhe dhahxhxisi maallay.
10 Holuppa dhelle Zeptiwoose he Simiʼoone illay kodhadha Yaykʼoopepa Yohannisekka.
Iyyesuse Simiʼoonenna inna payi:
“Olo ghaapi,
xaynu koru ho koro ghappasa akkodhinti.”
11 Usundhdhekka konkaadhdhesiisi karo kappe kulakki hela xighghiseppa olho kaasay hela hxuronkippa nakala ashshonki.
Iyyesuse Qhamu Qhawho Lemtʼe Naqaktiisi Dhinisi
12 Iyyesuse kuyyaqko tookko kathama tookito iqqaghana qhawho udhanko lemtʼe anapayi na qaghikki uso kula okayi;
Iʼiyyesuseesi hiʼina na miintemi ranipa hasa payuppa waatadhu:
“Pogholho haayyu,
awwoʼa payni ye alheesesi aʼalkasnay!”
13 Iyyesusekka xarghghotakki shokki ghappadhuppa hasa na payu:
“Awoʼaye alheesama.”
Lammi lamtʼesikka miinakalte iʼuso hxurriti.
14 Iyyesusekka hasinna payipa hayu:
“Oliisi yaxanukka inna qallu,
naqharray ashshapa kʼeesitonu he hiʼaasay,
alheesame thaahu koronu qhamu misikkire kodhdhintinu teexakkossi Muuse hayiisi itʼtʼoosay.”
15 Ikkodhdhitama kapay ote Iyyesuse xayto kaasay qhooti qhaskatti maallay olhu Uso qalliisi apaqhasepa udhanko huusundinakka dhinenu koro uuma kisha Uso kula okayi.
16 Naqharray Iyyesuse kuyaqqe kishana xayto koro yena qaghi kulakki ashshipa isi ghissadha.
Iyyesuse Qhamu Qhawho Thoththoniisi Dhinisi
17 Iyyesuse kuyyaqko tookko ikkollisatte qaghana Feresawaadhdhepa kollisampawhe hikkatte xaytusanakki qakkadhe.
Usundhissakka he ghodhdhe Kalilapa ghodhdhe Yihuta kaasannuppa qhamussa kula kathama Iyyerusaalemenukki okaye,
Usokka he udhdhama dhinnisenu humna Pogholhito na qale.
18 Kuyyaqkussana koro qhawho thoththooniisi tʼarfettay dhooqhipa Iyyesuse kula okayuttay.
Xaytossi Uso qaghi kula xulleesepa na miinta xawwadhe isi woʼa.
19 Naqharray waarsho qhooti uuma naqi maallay qhawhossi thoththooniisi manne kaleema xullese qhooti ye alkasonki maallay manne sappeemi hadhdheppa xoloxko pootonkippa thonnakkossiisi tʼarfe illay oodhasonkippa Iyyesuse miinta xawwadhonki.
20 Iyyesusekka dhukkaysadhe thuusundhisikki inna hiʼipa hasa na payu:
“Atho,
qhawhu cʼuppo haahu ihho hxurami.”
21 Kollisampawhe hikke Muusenapa Feresawaadhdhe hasi payeppa isi dhihadhanki:
“Ata qhawhu yaxa kʼaale dhaksathitoosi Haallikkooma qalladha?
Haallikko thoʼoko malettay ho koronu cʼuppo hxurase alkasa yaxa?”
22 Iyyesusekka olhu dhihadhdheesi inna aripa hasa napayu:
“Moʼonukka saqqe haahundhina kittekata olissaasi dhihatte?
23 Keenni ‹Cʼuppo haahu ihhohxurami› paye taaki ‹Haqpa ashshoy!›
Payeete qallithisanna thinkakki nawoyya?
24 Naqharray olhu anna maallay hasa payi Ano Miʼaye Qhawhitonu piyyinna qhama cʼuppo hxurasenu humna sheeghisa qhama arttenu” hatupekki thonnakkosinna hasa payu:
“Anhola payana haqpa tʼarfe thaahuusi dhooqhadhoppa manne haahu kula qaakkoy.”
25 Qhawho tonnakkossikka miina kalte koro kaasa miinteema haqipa tʼarfessi adhoqhittay hadhdhasadhuppa inni Haallikko kaanasana manne huusu kula qaakoy.
26 Kuyyaqkusana koro xaytusana qagha kaasay idhdhahxhxipa ghaapkottay hoqhqhu:
“Kuyyu dhahxhxootaadhe an hiiniye!”
Payonkippa Haallikkoosi kaanasonki.
Iyyesuse Qhamu Maathiwoosessi Ana payi Lewisi Ooqi
27 Xaysa tupettay Iyyesuse ixxaytusana lighghana qhawho Lewi ana payi ho xayto kʼaratʼitona qakkadhasikki hiʼipa hasa na payu:
“Yekala okay.”
28 Usokka olho kaasaasi hela hxuruppa haquppa na kala ashshoy.
29 Lewikka manne huususakki Iyyesusenu yiʼo dhamma gharisi.
Yiʼusana koro kʼaratʼtʼo sooqapa koro pile ho kishakki na okay.
30 Feresawaadhdhepa hessi koro huusundhi kodhdhe Hikke Muuse kollisa hasi payeppa kolladhampawhe Iyyesusessa qhurumrumonki:
“Moʼo mallaka koro kʼaratʼtʼo sooqapa cʼuppolawhe qale yiʼo yiiteppa isa qukanku?”
31 Iyyesusekka hasi payipa nu holasu:
“Akimito koro udhdhamanu dhiishay koro xeesoomanu ye gheeqasi;
32 Ano cʼuppolawheesi karo Haallikkito holasenu dhiishay hepare qaghaasi ooqenu qandhikka.”
Kasqo Qhoota Yiʼo Male Oladhe Kaaʼita itʼtʼuyi
33 Usundhdhekka Iyyesusena inna paye:
“Kolladhampawhe Yohannise kuyyaqqe kishakki yiʼo male gheyyipa isi ghissadha,
kolladhampawhe Feresawaadhdheetekka qhamussa kulakki kodhe;
kolladhampawhe haahu kapay kuyaqqe kaasakki yiʼeppa isi quka.”
34 Iyyesusekka inna payi:
“Akkampakko iʼusundhe qale qaghana uyyathiine mali yiʼo male ghayye alkasne?
35 Naqharray kuyyaqku akkampakko usundhena kaalla akkamnikki okayna;
xinkisana yiʼo male ighghayyina.”
36 Holuppa lighnottay hasa payuppa qalladhu:
“Qhawho laalle qhawthitte kaaqapa isi laalle keshshatteema muuqhadhi yaxakka ye qaghi,
hasi kodhi payni laalle qhawithiteesi ikkaqna muuqhatte laalle qhawthittissanna,
laalle keeshshatenu yegharinti.
37 “Qhamusa kula qhawho yaxakka ho tʼayye woynate madhdheesi surpo b keeshshakkoma tiigha ye qaghi.
Hasi kodhi payni tʼayye woynatte madhdhissay surpussaasi ikkʼoʼosnay,
tʼayye woynattekka ituqhamnay,
surpokka ixarkishamna.
38 Hussa maallay tʼayye woynatte madhdheesi surpo qhawtitooma tiighe gheeqasa.
39 “Lammi qhawho tʼayye woynatte awshitiisi quki madhdheesi quke ye woʼi,
moʼo maalla payni thissa awshiti iwoyyay qhooti payi maallay.”