Orriththo Qhamu Iyyesusesi Maghnottay Theemmi
4
Iyyesuse Nasso Kʼulkʼullottakki hoqhqhipa kolle Yortanoosennu holuppa Nasso Kʼulkʼullo mandho kula ashshottay;
2 haamakka kuyyaqko 40 Orriththo Uso theemmu,
kuyyaqqissana olho thoʼokokka ye yiʼu maallay dhikkattatte ippuffi.
3 Orriththokka Iyyesusena inna payi:
“Atho Miʼaye Haallikkito akkodhdhiti payni,
into awruku qhamu dhilantakko kodhdhininu hay!”
4 Iyyesusekka hasina payipa nu holasu:
“‹Qhawho yiʼotta patta ye qaaki›a kippayamtipa tooxamoy!”
5 Nakalakka Orriththossi Iyyesusesi karo ghupo uuma ghula kulakki hadhdhasipa Ahxasaadhdhe piyye qhaatʼete qagha kaasay haattay nu hiʼaasu
6 Hasakka napayu:
“Humnapa kaanaste mankistaadhdhi kaasanna yeesikki teexame;
anokka qhawho awoʼinu teexe qhoota alkasni maallay hoosikki an teexni.
7 Hussanu athokka ayye sakatti payni hussa kaasay hoosikki kodhdhini.”
8 Iyyesuse innu hollesipa na payu:
“‹Waako Pogholho haahunu sakat,
usoosi patta kaanas› b kippayamtipa tooxamoy!”
9 Xaysa tupettay Orriththo hantuka Iyyesusesi karo Iyyerusaaleme kulakki ashshittappa Manne kʼulkʼullawhatte qharo sappeema shikkaarashuppa hasa na payu:
“Atho Miʼaye Haallikkito akkodhdhiti payni into,
xaysanu kalasa he kʼur;
10-11 moʼo maalla payni hasi payamtipa tooxamoy:
‹Awrughghe lughghe haahu qhamu ye kuththumnennu
xarghghe huusundhittay qhamu ho hellenu Haallikko erkampatadhdhe huusuusikki iʼho hayni.›” c
12 Iyyesusekka hasinna payipa nu holasu:
“‹Waako Pogholho haahusi olo thethemmi› d kippayamtipa tooxamoy.”
13 Orriththossi themmattissa kaasay idhdhikkisi tupettay kuyyaqko nu gharra haaki tayanni saasa ihxuripa nakaanta ashshoy.
Iyyesuse Qhamu Piyye Kalilassa Kodhmo Kollisatteesi Paayyi
14 Iyyesusekka humna Nasso Kʼulkʼulitotakki hoqhqhipa karo piyye Kalila kula holu;
ote thuusukka piyyaadhdhe xaysa kaaʼita qagha kaasannaki qhaskatti.
15 Iyyesusekka mannaadhdhe ghissoote koro Ayhutattena isi usundhe kollisapa koro kaasakka isi Uso kaanasa.
Iyyesusesi Kathama Naazrathenna A’uso Iishi
16 Xasa tupettay Iyyesuse kathamassi inna kaani Nazrate kulakki ashshi;
qhamossi qharro kodhi kula kuyyaqko hxaysinkitona manne ghissoote koro Ayhutatte kala xulluppa napapenukka shikkaaru.
17 Matʼaafa marankossi hxuumampakko Issayaasesi anu teexu,
matʼaafasiisi iqhqhashina xayto ahsa payipa atooxosikki natayi:
18-19 “Nasso Pogholhito yela saappeete,
Xiyyawhenu qhama ote xeesa torruynukki yeshiinie,
heshappamanu ishshighame,
hetaafennu eemadhe qhamanu qallininu,
hessi
apirtawsadhina qhama alke miisninu;
holuppa Haallikko Perresi huusu hxurakkito
inna waarsho huusu dhinisni arasenukkif iyye eraki.”
20 Xaysa tupettay matʼaafasiisi immaripa kodhampakkonu teexuppa qakkadhdhu;
hessi manne ghissoote koro Ayhutattena kalla qagha kaasay Usoosi uumi eemeppa isi apaqhqhasa.
21 Usokka hasinna paye paayyi:
“Haadhi kʼaali Matʼaafa Kʼulkʼullito annappapipa qhamettay apaqhanku kuyyu idhdhikkatti.”
22 Koro kaasay qhoota huusu kaaʼitha olho xeesasikki qalladhi;
holuppa kʼaale teexakkito qhoti pakeete nalighti maallay isi dhahxhxettay hasa paya:
“Husi miʼaye Yoosefe qaandhi?”
23 Iyyesusekka hasinna payi:
“Qhamu allighnottay yela paytenna ‹Atho qhawho kʼorishay,
into pukkaqte thaahu dhinis;
olhossi appiyye Kʼifrnahoomessa kottipa apaqhaanisi hassa kathama haahunakka kodhsi an ara.›”
24 Ihholipa hasa na payu:
“Dhuke an hunena payi,
hxuumampakko piyye thuusuna ye kaanasami.
25 Dhuke an hune qalli,
perressi Eliyaasenna perko izzaxpa leeqqo tappi moontho kʼupamipa irrawo isi ye dhipu maallay laaqe maghatte piyye Israʼeelatte kaasassa lighi,
perrisana piyyissanna xiske tʼiirena farre hekishakki qagha.g
26 Usundhisana kittatte Eliyaase karo xiskaththo toʼotte kula kakki ye erkamu,
naqharray kathama Sitoonana ghodhdhe thana Sarapta payina xiskaththo the tʼiirakko na fari kulakki erkami.
27 Perre hxuuma Eliyaasenna piyye Israʼeelattena he kisha he udhanko maghakko lemtʼe ana payitta h ghappamekki qagha.
Naqharray qhawho piyye Sooriya Niʼimaane malettay usundhena qhawho thoʼokokka ye alheesamu.”i
28 Koro Ayihutatte manne huusundhi ghissootattena kaalla iqqaghankinna olhossi Iyyesuse qalladhi iʼapaqhenna uumi miiroodhe.
29 Qhamu poollekata sukasnenukki woʼeppa haqonki Uso siitonkippa kathamana lihasonki;
ghupossi kathama huusundhiina ghupadhe sappeema ashshonkittay.
30 Naqharray Uso na kittaʼita illighghipa ashshoy.
Iyyesuse Qhamu Qhawho Nasso Maghata Ghapami Dhinisi
31 Xaysa tupettay Iyyesuse kathamassi piyye Kalilanna kittatte qagha Kʼifrnahoome kulakki ashshipa kuyyaqko hxaysinko Ayhutattenaj korosi kollise paayyu.
32 qhoti ghulnottay qalladhi maallay kollise thuusuttay idhdhahxhxe.
33 Xaytusana qhawho tookko ho nasso maghattay ghapami manne ghissoote koro Ayhutattena kalla qagha,
usokka uumi riiripa hasa payu:
34 “Waay!
Atho Iyyesuse Naazrate,
moʼo an hola sheeghni?
Aʼine patisnanukka okayti?
Atho qhama yaxa kodhdhitisa anho ara.
Atho Kʼulkʼullito Haallikkito.”
35 Iyyesusekka nassossi maghana hasina payipa qheeru:
“Kʼampayipa qhawhunna lighay!”
Nasso makakkossi qhawhosiisi korossi miinta iranisipa ye qhararasunna nalighu.
36 Koro kaasay idhdhahxhxipa hasa payu:
“Husi dhahxhxoote moyto?
Poghlunko humna dhammattakki nassidhdhe lokmadheesi hayi,
usundhekka eeʼe kippayeppa isi lighanki.”
37 Ote thuusu piyyaadhdhessi hakaʼitha qagha kaasakki qhaskati.
Iyyesuse Koro Kisha He udhdhamaasikki dhinnisi
38 Iyyesuse manne ghissoote koro Ayhutattena illighipa ho Simiʼoonenna manne kula ashshoy;
haaha sooghitte Simiʼoonekki pawwaqqadhipa pishko isina qawdhapa Iyyesuse qhamu dhinisninu waatadhonki.
39 Iyyesusekka inna kula itʼtʼuyipa xaytossi raftisa kata kahuppa udhankossi ise thorisaasi qheeru;
thornossikka,
hattakki na patipa haqippa olho usundhe gheeqasa nu kodhi.
40 Oqhqhaye ixullanna koro udhaanko qawni qawnittay udhamaasikki Iyyesuse kula okaase,
Usokka qhawho kaasay sappeema xarghgho huusu ghappadhuppa dhinnisoy.
41 Nassidhdhessi maghoomakka:
“Atho Miʼaye Haallikkito!”
Kippayeppa riirettay koro kishana isi ligha.
Uso qhamu Kristoosek kodhdhisa qhooti are maallay qhamu qallanenu yenu payu.
42 Iqhaytina Iyyesuse xayto koro yena qaghi kulakki ashshi.
Koro isi Uso gheeqapa xaytossi iqqaghisa inna hxafina ye holli nakanta ashsho maallay waathadhonki.
43 Iyyesuse kapay hasinna payi:
“Ano ghodhdhadhe pile kula ashshepa otessi xeesa Ahxase Haallikkitona thorruye ye gheeqasa,
olho anna maallay erkamikka hussa.”
44 Hussanu piyye Yihutanna mannadhdhe ghissootattena isi otessi xeesa thorruya.