Hxuumampako Piyye Thuusuna Ye Kaanasami
6
Iyyesuse haahanu ihhaqipa piyye thuusu kula okayu,
kolladhampawhe huusukka Uso kaleemi okaye.
2 Kuyyaqako hxaysinkitona manne ghissoote koro Ayhutattena kalla ikkollisana koro kisha apaqhipa dhahxhxupa isi hasa paya:
“Ata dhahxhxootaadhdhi hasa lighomaasi xankanaki akki?
Husi arrnane moyto nu teexami?
Dhahxhxootaadhikka isi Usottay kodhdhamadha?
3 Husi miʼayessi Mariyaame kaare hxasha qaandhi?
Qharunko Yaykʼoopeppa ho Yoosapa ho Yihutapa ho Simioone qandhi?
Alawwe huusukka hasa ine qali qaghe qandhi?”
Kinna payeppa dhafkottay ye Uso akkadhonki.
4 Iyyesusekka hasi payipa nu holasu:
“Hxuumampako piyye pileete ikkaanasama naqharray dhaliththopa ahxke huusuna kittatte ye kaanasamikka.”
5 Xaytusana koro qhacʼa ho udhdhama saappeema xarghgho huusu ghappadhepa dhinnise male dhahxhxootaadhe pileesi kodhe ye alkasukka.
6 Ye Uso dhukkaysadhonki maallay Iyyesuse inna dhahxhxi.
Xaysa tupetta Iyyesuse ghodhdhadhe iththa iʼaʼashshipa isi kollisa.
Iyyesuse Qhamu Erkampawhe 12 Kollisenu Eraki
7 12 siisi he kulakki ooqipa lakki lakki kodhdhuppa eraku,
nassidhdhe maghuuma saappeemakka ghulno nu teexu.
8 Iyyesuse iʼusundhe dhihamana hasina payi:
“A’onkeema haqankunna tollakko malettay kalqe taaki porsa taaki kodhaththe kiiseema olo sheeghadhe.
9 Hxope qadhdhadhama laalle oohadhatte kaki olo dhooqhadhe.
10 Xayto hunkanakka manne anna xullitena,
haka kathamassana lighinte saasa haama ghayyindha.
11 Xaytu koro ye hune akkadhipa isi ye hune apaqhqhasi kaasanna kittatte alighankunna thullupakko lughghe haahundhina hela hisshisapa ashshonku,
olisa usundhe qhamu hetiqitanenukki misikkire na kodhdhiniye.”
12 Kolladhampawhessi huusu iʼerakikka haahanu illigheppa koro kaasay qhamu cʼuppito karo Haallikkito hollinukka kollisonki.
13 Nassidhdhe maghooma kishaasikka illihasonkippa koro udhdhamaasikka zaytettay shiinonkippa dhinnisonki.
Shoxampakko Yohannisena Amo Ana Ghoxi
14 Ote Iyyesuse qhooti xayto kaasay qhaskati maallay nukusa Herotiisekka a qhoota Huususi iʼapaqhi,
koro tookko ippayana:
“Shoxampakko Yohannise fartatte haqipa dhahxhxootadhisa kaasay isi usottay kodhdhamadha.”
15 Koro tookkoka ippaya:
“Eliyaase”,
tookekka ippaya “Hxuumampawhe kedhdhanna tookko ikkodhdhini.”
16 Naqharray Herotiise iʼolisa kaasa apaqhina hasi payi:
“Yohannisessi anona pukkaqate ghoxasiki fartatte haqi!”
17,18 Herotiise naxaye qaso huusu Filpoose Herotiyatasiki akki.
Hussa maallay Yohannise qhooti napayi “Naxaye qaso haahuna akke Hikke ye payu” b maallay Yohanniseessi ighapasipa shapupa manne shappeetesa xulleesu.
19 Herotiyatakka Yohanniseesi ihhommosattipa isi poghase na woay,
naqharray ye nu kodhdhu.
20 Yohannise qhawho pare qaghapa kʼulkʼullito qhamu kodhdhiisi Herotiise qhooti ari maallay inna qharay ghaapapa isi fartatte kallakka tiqadha.
Herotiise xinki qalliithe Yohannise apaqhi kaasanna icʼcʼannakʼama,
ikkodhdhitama kapay olhunnu thorruyiisi hxasotakki na apaqhqhasi.
21 Herodhiise kuyyaqako inna dhaladhisi kaanasenu inthawampawhe Ahxasatepa he orxankito pana koro ho aramana tookko tookko ho piyye Kalilanna qaakanuki yiʼo dhamma gharisi.
Herotiyatanukka kuyyakussa ho ghari innu kodhdhi.
22 Shette Herotiyatakka mannessi anna yiʼo gharisi kaleemi xullitipa isi hiripana Herotiise pana korossi na qale qakkadhaasi ihxhxasesti.
Nukusassi shettisana hasina payipa nu akutadhu:
“Olho awwooti kaasaasi yela kasqadhma anhe teexnaye.
23 Ahxase thayyuna karokkakki kodhdhinti payni olho akasqatti kaasaasi anhe teexnaye.”
24 Iseka yaaye thiisi kulakki ashshitipa hasana payi:
“Moʼo anna kasqani?”
Yayye thiisika inna payti:
“‹Pukaqate Shoxampakko Yohannise iyye teexamta› na paypa kasqadhay.”
25 Shettesikka minakalte waatipa nukusasi kula holippa hasa na payippa kasqadhi:
“Pukaqate Shoxampakko Yohannise qhamu hantu thaankottay ayye teexinti an woʼi!”
26 Ihhasa paytina nukusasi uumi nu dhakaati,
ikkodhdhitama kapay qhooti korossi yiʼonu ooqami minteema nu akutadhi maalla olhossi ikkasqattiisi dhawre ye alkasukka.
27 Hussa maallay nukusitosi hattay foolisito tookko ho manne shappeete tiqadha qhamu pukkaqate shoxampako Yohanniseesi qhaqhnipa okayuttanukki eraki.
Foolisitosikka karo manne shappeete kula ashshopa pukkaqate shoxampako Yohanniseesi qhaqhuy.
28 Pukaqatessi aqhaqhisikka thaankottay okayuttapa shettesinu teexu,
shettesikka yaaye thiisinuki teexti.
29 Kolladhampawhe shoxampako Yohannisekka iʼolisaasi apaqhenna iʼokaye pukkaqosiisi akkonkippa maayonki.
Iyyesuse Qhawho Kuma Hxupiki Yiʼashi
30 Erkampawhe Iyyesuse Uso kapeemi illa holleppa,
olhu kodheppa olhu kollise kaasaasi nu thorruyonki.
31 Koro usundhe kula okayapa ho ashsha qhooti uuma naqi maallay yiʼo yiʼesikkakki ye alkasonki,
Usokka inna payi:
“Hune patta okayapa ille qale ashshinipa ghinaqakooma okoto hxaysadhanku.”
32 Hussa maallay konkoomi hadhdhepa xayto koro yena qaghi kula ashshonki.
33 Iʼashshankinna koro kisha usundhe hiʼipa qhamu usundhe kodhdhesa aroppa kathamaadheete lighuppa hermatottay na inthawuppa usundhe kapeema illa holu.
34 Iyyesuse ikkonkito oodhana waarsho kishasiki hiʼi;
qhooti qeemme koshshito dhape kula kodhdhe maallay iqhararsadhipa olho kisha kollise paayyu.
35 Xayto qhooti awnuyeema tahxi maallay,
kolladhampawhe huusu Uso kulakki itʼtʼuyeppa hasa na payonki:
“Mandhito an qaghni,
xaytokka iʼawnuya.
36 Koru olhu yiinesi qhooti ye sheeghi maallay qhamu ashshineppa ghodhdhadhi xayna kaaʼitha qaghana yiʼo piththmadhonkinu hela haqis.”
37 Naqharray Uso hasi payipa nu holasu:
“Olhu yiineesi hune nu teexa.”
Usundhekka hasi payeppa nu holasonki:
“Kati an ashshinaanipa yiʼo pirre tinaare c dhippa lakkittay nu pithamaanippa nu teexaani?”
38 Usokka inna payina:
“Into ashshindhapa eemonku;
dhilanttakko meʼeka sheeghte? ”
Usundhekka iʼashshe eemonkippa napayonki:
“Dhilantakko hxupinpa hxaaritte lakki qagha.”
39 Iyyesusekka waarshossiisi qhamu tulta tulta illena kala qhootneppa qashkussa kʼartaxxasa qakkatteesonkinukki kolladhampawhe huusuusi hayi.
40 Hussa maallay waarshosikka xayto tokko tokkooma qhawho 100 xayto tokko tookkooma qhawho 50ki kodhdhippa qakkadhu.
41 Iyyesusekka dhilanttakko hxupinpa hxaaritte lakkisikki akkipa montho qila eemmadhupa Haallikko kaanasu,
dhilanttakkosiisi ghoodhuppa waarshosinnu qhamo qhoonennu kolladhampawhe huususa teexu.
Holuppa hxaaritte lakkisiiskka waarshossi kaasannu qhootoy.
42 Waarshossi kaasakka yiʼoppa dhalaxu.
43 Kolladhampawhe huusukka ghodhdhanessi dhilankitopa hxaarate waarshosinna kalla haqhe kʼunna 12 hoqhqhashesiki nakala haqise.
44 He dhilankussa yiʼe tʼiire qhawho 5000.
Iyyesuse Paso Sappaʼithi Oghadhi
45 Haattay Uso iwwaarsho hela haqisatte qaghana,
kolladhampawhe qhamu konkooma hadhdhineppa karo afe kathama Peethesayta kula tahxhxonkippa intawonkinukki usundhe hayi.
46 Haahanu ihhaqipa ghissootenu ghupo kula hadhdhu.
47 Xayto iʼawnuyana konko passito kittati qaghi;
naqharray Uso patakki qawinkki piyyatte qagha.
48 Uruure qhooti naqati maallay kolladhampawhe huusu iʼolhosi amarkapettay dhaani qale ohxmamanaki usundhe hiʼi.
Awnate saate kollanpa haka hudhdhanpa lakki saasa paso sappaʼitha ashshopa usundhena kaanta hxafoy.
Ahxay iʼusundhe kaaʼitha illighghippa isi ashsha.
49 Naqharray usundhe ippaso sappaʼitha ashshappa ihhiʼonkinna he karaadhdhe hiʼekki nu lighipa murrukonki.
50 Toʼoteema Uso hiʼenna immurruke.
Naqharray Uso hattakki hasa napayi:
“Haay!
Kula Anoye olo ghaape!”
51 Okayuppa konko saappeema usundhe kapa hadhdhuna ururesikka issalti;
kolladhampawhe huusukka uuma dhahxhxonki;
52 saqqe huusundhiki nafafipa dhahxhxootessi dhilankito hela thaaye malaalonki dhiishoy olisa ahxay ye usundhe dhahxhxisni.
Iyyesuse Piyye Kenseretʼesa Koro Udhdhamaasi Dhinnisi
53 Passosina ittahxhxeppa piyye Kenseretʼena hxafonki.
Konkosiisi piyyeema iththa xighghisonkippa shikkarasonki.
54 Konkusana iʼodhdhena koro Iyyesuse qhamu kodhdhisa iʼupadhi.
55 Hissa hiʼekka koro piyyisana kaaʼitha qaaka kaasay kulakki hermatottay ashsheppa koro udhdhamaasi tʼarfadhdhettay isi dhodhoqhapa xayto Iyyesuse qaghi kula okaasse payoonki.
56 Xaytu ashshi kaasay ghodhdhadheetepa kathamaadheete pana xayto kathama ye kodhdhunakka koro udhdhamaasi isi dhodhoqhankipa mooriteema lihasonkippa Uso miinteema isi itʼtʼoosapa hessi udhamakka kayle laalle thuusuna qhamu ghappaadhdhenu isi waathadhanki,
he ghappadhdhe kaasakka idhdhinna.