Qhoota Aata Appadheete
7
Xaysa tupettay Feresawaadhdhepa kollisampawhe Hikke Muusenna kittatte tookke tookke kathama Iyyerusaalemennu okayipa Iyyesuse kapeema illa holonki.
2 Kolladhampawhe Iyyesusenna kittatte tookke tookke xarghghe lokmadhe hussa payyo xarghghe ye alheesamonkitakki yiʼo yiʼanaki usundhe hiʼe.
3 Moʼo maalla payni Feresawaadhdhepa koro Ayhutatte kaasay tampe appadhdheete tiqadhe maallay xarghghe ye shoxomonkina ye yiʼe.
4 Immooruyeppa holonki kakki payni ye shoxomoonkinna ye yiʼekka;
holuppa maahxhxadhessi ana olo qukipa sighghepa maahxhxessi siple naasattena akodhdhipa hooresikka ishshoxanki,
holuppa tampadhdhe pileesikka ittiqthadhe.
5 Hussa maallay Feresawaadhdhepa kollisampawhe Hikke Muusena hasi payeppa Iyyesuse kasqadhonki:
“Kolladhampawhe haahu moʼo malakki tampe appadhdheete hxurepa xarghghe ye alheesamonkittay isi yiʼo yiʼa?”
6 Usokka hasi payipa nu holasu:
“Haayosi Issayaase qhoota he paseese taahundhi kaaʼitha hasa payipa tooxoy pare:
‹Waarshu hxibhbhetta pattaki ye kaanasi,
naqharray saqqe huusu iyyela kanta sikaapa.
7 Aata koritoosikki hikke Haalikkito kodhdhepa isi kollisankipa isi thaythe ye kaanasa!›a
8 Hunekka hayo Haallikkitoosi ahela hxurteppa isa aata qhawhitoosi tiqadhanku.”
9 Ihholi hasana payu:
“Tampe thaahundhi tiqithadhe maallaka hayo Haallikkito pulte.
10 Muuse hasi payi:
‹Paappopa yaaye thaahuusi kaanasb› holuppa ‹qhawho paappo taakinti yaaye thuusuusi dhaghisi mooka payni iffara.›c
11 Hune kapay appayankunna qhawho tookko paappo taakinti yaayye thuusu kʼarkʼare kapeema olhu paappo huusupa yaayye thuusuttay kʼarkʼare gheeqasti kaasay Haallikkonuki teexakko teexi kapayteppa
12 Hune qhawho qhamu ye paappo huusupa yaaye thuusunu olho tookko konni isa dhawrasanku.
13 Hussa maalla tampessi thaahundhi adhdhalathanu alikkastetakki Akʼkʼaale Haallikkitoosi pulte,
holuppa olho pile ho hasa lighoomasikka isa kodhanku.”
Olho Qhawho Loka
14 Iyyesuse waarshosiisi hekulaki ooquppa hasa na payu:
“Hune kaasay ye apaqhqhasindha,
hela thaayyaka.
15 Olho toʼokkokka ho settonu qhawho kitteema xullapa isi loka ye qaghi;
laadhdhi olho qhawhossi loka ho qhawhito kittatte seetto kula ligha.
16 [Hussa maallay qhawho qhaame apaqha sheegha iʼapaqha.]”
17 Iyyesusekka waarshossiisi ihxhxuripa manne kula qaakko tupettay kolladhampawhe huusu qhoota lighnussa kaaʼita Iʼuso kasqadhe.
18 Usokka hasi payipa nu holasu:
“Peri hunekka huni hela thaayte?
Olho seetikki qhawho kitteema xulla kaasay qhamu ye qhawho lokisaama yehune xulti?
19 Yiitho karqito kitteemi xullipa isi seeto kula lighama saqako kula ye ashshi.”
Iyyesuse hasa payettay yiʼo kaasay ho alheesami qhamu kodhdhi hiʼaasi.
20 Nakaleemakka hasi payi:
“Olho qhawhito kittatte ligha uso qhawhossi loka.
21 Olho saqakko qhawhitona kittatte ligha:
dhihadhe maghapa paalakumepa kerquntepa qhawho poghepa
22 maasopa yuyuʼuntepa maghnopa koro tatakepa palakuntenu ille ghaghapadhepa yokuntepa hxashattopa peepo pana sanafunko.
23 Oli magha kaasay saqakko qhawhitona kittatte lighipa isi qhawhossi loka.”
Dhukkaysadhe Xiskatho Toʼonna
24 Iyyesusekka haahanu ihhaqipa ghodhdhessi kathama Tʼiroosena kaanta qagha kula ashsho,
qhamu haaha qaghisa koro qhamu ye arri qhooti woʼi maalla manne toʼon kaleema xullu;
ikkodhdhitama kapay bhadhdhame ye alkasu.
25 Hattay xiskathakko toʼon the miayye thiisi takkassay nasso maghattay naghapamti ote Iyyesusessi apaqhipa Uso kula okayippa lughghe kaleema narani.
26 Xiskathusakka Ayhutitte qandhikka,
ise the sanynye Sirofinakʼatena dhalatti,
Iyyesuse qhamu miʼaye thiisina Nassidhdhe magha lihasninuki Uso waathati.
27 Naqharray Uso hasi napayi:
“Yiʼo miʼaadheetesi akkepa harrenu teexe ye gheeqasti maallay qharitteema miʼaadhe iyyiʼepa dhalaxoonki qhari.”
28 Issekka innu holastipa hasa napayi:
“Ee Pogholho haayyu,
harre kulay xayto anna yiʼo yiʼi kapeemi itʼtʼuyepa ghodhdhanaadhdhe miʼaadhete hayyeesi isi yiʼa.”
29 Hussa maallay Iyyesuse inna payi:
“Qhoota hasa paytinu nassossi magha miʼaye thaahina inna lighiye karo manne haahi kula qaaka.”
30 Isekka ikkaro manne hiisi kula holtina nassossi maghakka miʼaye thiisina kittatte ina lighipa thexeesa kodhdhippa isi hoorate saappeete rafanna nahxafoy.
Iyyesuse Qhawho Dhakkoodhipa Mumuusiki Dhinisi
31 Iyyesusekka Kathama Tʼiroosenukki haqipa kathama Sitoonappa piyyessi Kathama-Hudhdhan ana payittay lighghupa karo paso Kalila kula okayu.
32 Xaysanakka koro qhawho toʼon dhakakko ho muumittay Uso kula okayi,
qhamu na saappa xarghghe huusu ghapanipa dhinisunukka waathadhonki.
33 Iyyesusekka qhawhosiisi korito kittatte qawniki lighitappa ghoqqe huusuusi qhaame kata nayakuppa,
waawe natufupa qarrapko huusuusikka nasaʼadhu.
34 Moontho qila eemmadhuppa hihadhuppa qhawhossina napayu:
“Efftah” aʼishigha payni qhaasham payyo.
35 Qhaame huusukka minakalte inna qhaashameppa qarrapko huusukka na ishghamuppa tomooma qalladhe paayyu.
36 Iyyesuse olisaasi yaxanukka qhamu ye qallinenu inna dhawrasi.
Usundhe kapay hossi na payina ghutakki ghulaseppa thorruyonki.
37 He apaqhe kaasay uumatti dhahxhxepa hasa payonki:
“Ata dhahxhxooteye,
Olho kaasay ho xeesa ikkodhdhi!
He dhakkoodhe qhamu apaqhne heye qalladhekka qhamu qallaneki kodhi.”