Iyyesuse Qhawho Kuma Salaxki Yiʼashshi
8
Xinkisana Waarshu kisha holipa Uso kapeema illa holu,
olho yiini qhooti ye sheeghi maallay Iyyesuse kolladhampawhe huusuusikki ooqipa hasana payu:
2 “Waarshu kuyyaqako izzaxki ye qale oladhipa olhu yiini isi ye sheeghi maallay iyye ghadhasa;
3 ye yiʼo yiʼonkinaki an mannaadhdhe huusundhi kula laaghghini payni usundhisa na kittatte koro tookko tookko qhooti xayto sikaapanu okayi maallay onkadhdheemi xirkinipa mallaloy.”
4 Kolladhampawhekka hasi payeppa nu holasonki:
“Emma,
mandhuna yaxa yiitho waarshunu hxafna tayna?”
5 Usokka hasi payipa usundhe kasqadhu:
“Dhilantakko meʼeka sheeghte?”
Usundhekka inna paye:
“Dhilantakko taxxanki an sheeghni”.
6 Usokka waarsho qhamu piyyeema qakkanninuki hayipa dhilantakko taxxanisiisi akkuppa Ihhaallikko kalataysadhi tupettay ghoodhdhoppa waarshonu qhamu qhoonnenu kolladhampawheema teexuppa usundhekka waarshossinu qhootonki.
7 Holuppa hxaare takkumma theye waantiki shsheeghe,
Haallikko kaanasuppa qhamu hxaarisasa waarshossinu qhoonennu kolladhampawheema teexu.
8 Waarshokka yiʼoppa dhalaxu,
kolladhampawhekka ghodhanaadhessi haqhe kʼunna taxxan nakalla haqisonki.
9 Lammi waarshossi yiʼikka qhawho kuma salax kula ghaqqi;
Iyyesusekka usundheesi ihhela laaghghi tupettay,
10 kolladhampawhe huusu illi konko saappeemi hadhipa piyye Dhalmanuta kula ashshoy.
Feresawaadhdhe Dhahxhxooti Hiʼe Woʼe
11 Feresawaadhdhekka illigheppa Iyyesusees tamakkadhe payyonki,
qhooti Uso theeemme woʼe maallay qhamu moonthito olho koro dhahxhxisa nu hiʼasninu kasqadhonki.
12 Usokka nasso Huusuttay uumi hihadhipa hasa payu:
“Dhalathi moʼo maallakki dhahxhxoote hiʼe woʼi?
Dhuke an hune qalli dhalathinu dhahxhxoote toʼottekakki olonu hiʼaasni.”
13 Xaysa tupettay haama usundhe hxuruppa konko sappeema hadhdhuppa afe koray tahxhxu.
Kollinko Feresawadheetepa Ho Koro Herotiisena He Tiqithadhindha
14 Kolladhampawhe dhilanko kalqoosadhe qhooti thaymoodhe maallay konkito saappeete dhilantakko toʼoko malettay pile ye sheegheka.
15 Iyyesusekka hasi payipa usundhe hayu:
“Haqasiso Feresawaadhdheetepa ho koro Herotiisenna kala he tiqithadhindha.”
16 Usundhdhekka hasi illena papaye:
“Peri qhooti ini dhilanko sheeghadhooni maallakki hasa inena payina.”
17 Iyyesusekka dhihattootte thuusundhisiki na upadhipa hasa na payu:
“Moʼo maallaka paytenna qhoota ini dhilanko sheeghadhooni maallaki hasa innena payipa isa dhihadhanku?
Hannaka huni hela thayte?
Ye hune xulliti naʼa?
Atam saqqe hunena lule?
18 Inna ehxhxe sheeghankunna huni hiite?
Inna qhaame sheeghankunna huni apaqhte?
Ata moonukki huni hela taayte qhari?
19 Keenni dhilantakko hxupinisi qhawho kuma hxupinnu an qhootina ghodhanaadhe nakala haqhe kʼunna meʼeki ana kala haqiste?”
Usundhekka inna payenna:
“Kʼunna hudhdhanpa lakki.”
20 “Dhilantakko taxxan qhawho kuma salaxanu an qhootina ghodhanaadhe takkumma nakala haqhe kʼunna hoqhqhashe meʼeki anna kala haqiste?”
Usundhdhekka inna paye:
“Kʼunna taxxan.”
21 Iyyesusekka ina payi:
“Emma hantukka huni hela thaayte naʼa?”
Iyyesuse Qhamu Katama Peethesaytanna Qhawho Taafakko Dhinisi
22 Usundhdhekka ikatama Peethesaytana hxafe tupettay koro toʼonki qhawho taafakkottay nakula okayipa qhamu ghappadhininu Uso waathadhonki.
23 Taafakkossinakka xargho inna ghapipa ghodhdhate kittatte lighuttay,
ehxhxe huususakka waawe na tufuppa xargho nasaappa ghabhadhuppa hasa na payuppa kasqadhu:
“Olho ahiiti igqagha?”
24 Qhawho taafakkosikka haqila iʼemmadhipa hasa payu:
“Ee,
koro ashsha anhiʼi naqharray qhamo kaareti lelleehi.”
25 Iyyesuse ihholi laanka qhawhossina ehxhxema xargho ghapadhu xinkisana qhawhossi idhdhinipa tomooma emmadhuppa olho kaasaasi pareema hiʼe paayyu.
26 Iyyesuse karo manne huusu kulakki hela laaghghipa napayu:
“Oliisi yaxanukka qhamu athu qallintinu ghodhdhisa kula intaa ashshu.”
Petʼiroose Iyyesuse Qhamu Kristoose Kodhdhisa Iqqalli
27 Iyyesusekka kolladhampawhe illi ghodhdhadhessi piyye Filipʼoos Kʼesariya kulakki ashshi,
iʼonkatte qaghana hasi payipa kolladhampawhe kasqadhu:
“Koro yaxa Yela payi?”
28 Usundhdhekka hasi napaye:
“Koro tookko ‹Shoxampakko Yohannise›,
koro hubhay ‹Eliyaase›,
koro hubhakka ‹Hxuumampawhatte kittatte tookko› Ihhola payi.”
29 Nakaleemakka ina payi:
“Emma hune yaxa Ayyela payte?”
Petʼiroosekka ina payina “Ato Kristoose.”
30 Iyyesusekka qhoota huusuusi yaxanukka qhamu ye qallinenuki usundhe hayi.
Iyyesuse Payyoteemi Fartepa Haqe Huusu Qalli
31 Nakalakka hasi payipa kollise paayyu:
“Ano Miʼaye Qhawhito rakko dhamma akkadhe ye gheeqasa,
xaadhighghe piyyattepa intawampawhe kʼesadhdheete pana kollisampawhe Hikkatekka Iyyedhafnanki,
Iyyepoghna,
ikkodhdhitama kapay kuyyaqako izzxanna fartatte Anhaqana.”
32 Usokka olisaasi tomoomi nu qalli,
xinkisana Petʼiroose Iyyesuseesi qawniki ghinaqakkooma ooqipa qheeru.
33 Naqharray Iyyesuse illaghghammipa kolladhampawhessiisi emuppa Petʼiroosena hasa payuppa dheehu:
“Ato Seetʼana,
yela kaanta pat.
Ato olho qhawhito dhiishoy ho Haallikkitoosi athu dhihatti.”
Iyyesuse Kaleema Ashshenu Olho Qhawhito Gheeqama
34 Xaysa tupettay waarshopa kolladhampawheesiki he kula ooqipa hasa na payu:
“Qhawho ye kala ashshe woʼa qagha payni ihhe marmadhipa maskʼalakko huusukka dhooqhadhoppa ye kaleema okayu.
35 Qhawho napse thuusuusi pehsadhe woʼa kaasay ihhela patisa;
naqharray qhawho qhoota Haayyupa Wonkelatte maallay qagho huusuusi hela likkasipa teexu ippehsadha.
36 Qhawho piyye qhaatʼe kaasakki thuusu kodhdhinapa napse thuusuusi dhapu payni moʼonu gharra?
37 Taakinti qhawho olhu napse thuusu kapa hela mure alkasni moʼo?
38 Qhawho,
helhu mammaasapa cʼuppolaku miinteema yettapa Kʼaale thayyuttay palama kaasay Ano Miʼaye Qhawhitokka kaanaste Paappo Hayyuttay erkampatadhdhe kʼulkʼullawhe illi okaayana an usottay palamna.”