Erkampawhessi 12 Iyyesuse Qhoota Huusu Kapa Eraki
10
Iyyesuse kolladhampawhessi huusu 12 he kula ooqipa nassidhdhe lokmadheesi qhamu lihhasneppa udhankopa qharaaro kaasannakka koro dhinnisonkinukki nu humna teexi.
2 Erkampawhessi 12 na makaxxe huusundhi:
Simoonessi ana pay Petʼiroosepa qaso huusu Intriyaasepa dhelle Zeptiwoose Yaykʼoopepa Yohannisepa
3 Filipoosepa Pertʼelemewoosepa Maathiwoosessi kʼaratʼtʼo sooqapa Thomaasepa miʼaye Ilfiyoose Yaykʼoopepa Tatewoosepa
4 Simoonessi piyye tuusunu yooka pana Yihutassi Askʼoroottay Iyyesusessi likkasipa teexu.
5 Iyyesuse 12 iqhqhoota huusu kapa erakiisi hasi payipa hayu:
“Koro ye koro Ayhutatte kodhdhu kula olo ashshe,
kathama Semariyadhdheete kulakka olo xulle.
6 Hussana kaanta waarshossi Israeelatte qhamo qeemmeete patti kula
7 ashshindhapa:
‹Ahxase moonthito iʼitʼuyti!›
paayyankuppa nu thorruyanku.
8 Koro udhdhamaasikka dhinnisindha,
koro farriisikka haqisa,
koro udhakko lamtʼate naqaghiisikka alheesidha,
nassidhdhe maghoomaasikka korito lihhasindha,
qhoota ahasa akkatte maallay ashshindhapa hasa teexanku.
9 Workʼe taaki kodhatte taaki naasesi inna kiiseema sheeghadhonku.
10 Aʼonkeema haqankunna porsapa laalle aʼoohadhi taakki hxope aʼoohadhipa thollakko olo dhooqhadhe.
Moʼo malla payni qhawho kodhadha yiʼo uso gheeqasa.
11 Kathama taaki ghodhdhe thinkannakka axxullite payni qhawho hune akkadhe alkasna hunka qhamu kodhdhissa kasqadhhapa ihhune eeʼesadhi payni haama hxaysadhankuppa haaka ashshshnte saasa haama ghayyonku.
12 Manne anna xullite kaasannu xasa.
13 Apayni mannissa he nakayho haahundhinu gheeqasa payni nakayhussa haahundhi innu kodhdha,
naqharray yenu gheeqasi payni nakayhussa haahundhi ihhune kula hola.
14 Apayni koro ye hune akkadhipa Kʼaale anu qalliiteesika isi ye apaqhi payni mannissa taakinti katamissa anna qaghtenna kittatte alighankunna tullupako lughghe haahundhina qaghaasi hela hishisapa ashshonku.
15 Dhuke an hune qalli,
kuyyaqako qhaqhittattena katamisana kaanta qhaqhittatte koro piyye Setoomeppa Kemoranna iwwoyyinay.
16 “Haadhi qhamo qeemmeete an ooshe kittaʼita hune erakniye,
lammi qhamo tawwito qalmalaadhe,
qhamo qalalakito laalawhe kodhdha.
17 Hune pukkaqate thaahundhina he tiqthadhindha he qhaqhitte qhaqhanukki likkasnepa hune teexonki,
mannaadhdhe huusundhi ghissootattena kallakka ihune thuthubhbina.
18 Qhoota Haayyu maallay rafisampawhepa nukusaadhdhe miinteema ahunettay ashshini,
usundhepa koro ye koro Ayhutatte kodhdhu miinteemakka he qhoota Haayyu masakaraka kodhdhinte.
19 Xinke koro hune ghappipa qhaqhitte miinteema hune itʼtʼoosunna olo payenna ‹Moʼo an qallannani?›
Taaki ‹Moʼo an hela holasnaanipa?›
Issa rakkadhanku.
Moʼo malla payni xinkisana olha qallante ihune teexamnaye.
20 Ho hune kitta kodhdhinapa isa qalladhanku Nasso Paappo haahundhi Moonthitona dhiishay hune qandhikka.
21 Dhelle appa thoʼokito fartenukki ille lilikasneppa teexonki,
paappokka miʼaye huusuusi,
miʼaadhekka ahxkaadhdhe huusundhisa immaghno haqisneppa paaxonki.
22 Qhoota makaxko Haayyu maallay koro kaasakki hune shikkina,
naqharray qhawho haka dhikkatte saasa kokkisadhi uso dhinna.
23 Apayni kathamissa anna qaghtenakki rakko huna haqise payni kathama pile kula ghoradha,
dhuke an hune qalli,
Ano Miʼaye Qhawhitokka haka an holipa okaya saasa kathamaadhe Israʼeelatte kaasay huni hxafasinte.
24 Ho kolladha kollisampakito ye ghuli,
aylittokka pogholho huusunu ye ghuli.
25 Hussa maallay kolladhampako qhamo kollisampakko huusu kula,
aylithoka qhamo pogholho huusu kulakki kodhdhi payni iʼuso hxafna.
Apayni Paappo manneetenaki ‹Pielzepule› payeppa ooqonki payni ahxke huusuusi saqqi malaalaki ye ghulasneppa ooqonki!
Yaxaasi Qhamu Ghaape Gheeqasti
26 “Lammi koroosi olo ghaape,
moʼo maalla payni ho bhadhamipa isi ye armadhi,
hohe mughisipa isi ye arami mooka ye qaghi.
27 Hussa maallay olho atukankito kittatte hune qalli hune hammakkoʼitha thorruya,
olho axash-xashatettay hune qallikka liqqakkoʼitha torruya.
28 He sakanko patta poghapa napsesi isi ye poghe alkasesi olo ghaape,
hussana kaanta hossi napsepa sakankoosi haththe ye ime sheeghitisa kʼure alkasasi ghaapindha.
29 Purrayitte lakkissi pakkanaama alasi qaandhi?
Ikkodhdhitama kapay usundhissana kittatte purrayitte thoʼoththekaki wo’oko Paappo haahundhi moontito malettay piyyeema ye puqqitikka.
30 Naqharray hunena kasusa pukkaqate kakki ho dhihami.
31 Lammi hune olo ghaapemma xorto haahundhi purraye kishanu ighulaye.
Qhoota Kristoose qalle Olho Gheeqasa
32 “Qhawho qhoota haayyu koro miinteema qalla kaasaasi Anokka Paapposi hayyu moonthito qagha miinteema qhoota huusu an qallina.
33 Naqharray qhawho koro miinteema ye marmadhaasi Anokka Paapposi hayyu Moonthito qagha miinteema An uso marmanna.
34 Ano piyyissa ho nakayho okaassenu okayi inna hune lighu.
Orxanko qhipasenu dhiishay nakayho okasenu qandhikka.
35 Ano olho annu okayi,
shanbhopa paappo,
sheththepa yaaye,
xaantepa xaghghiteesi illena kaalla reehenu.
36 Hussa maallay paarakaradhe qhawhito ahxke huusu manneete ikkodhine.
37 Yaxakka ho Yela kaanta paappo huusu taaki yaaye thuusu ghulasipa isi cʼikadha Haayyu kodhdhe ye alkasni;
yaxakka ho Yela kaanta shambho taakinti sheththe thuusu ghulasipa isi cʼikadha Haayyu kodhdhe ye alkasni.
38 Qhawho ye maskʼalakko huusu dhoqhadhuppa isi yeye kala okaayi Haayyu kodhdhe ye alkasni.
39 Qhawho napse thuusu pinnisadhe woʼa kaasay ihela patisa,
naqharray qhawho napse thuusuusi ye maallay hela patisa kaasay idhinsadha.
40 Qhawho huneesi akkadha Yeesiki akkadhi,
qhawho Yeesi akkadhakka ho Yeesi erakisiki akkadhi.
41 Qhawho hxuumampakkoosi makaxko hxuumampakitotay akkadha hxayye hxuumampakitoosikki akkanni,
qhawho qhawho pare qaghaasi akkadhakka hxaayye qhawhusa pare qaghanaki akkanni.
42 Hussa maallay dhuke an hune qalli,
yaxakkaki hisi takkumma qhooti kolladhampawhe Hayyu kodhdhe maallay usundhena kittate qhawho tookkonu qandhe shalala teexi payni hxaayye huusu ye dhapnikka”.