Kasqo Kuyyaqako Hxaysinko Koro Ayhutattena Kaaʼita itʼtʼuyi
6
Iyyesuse kuyyaqko hxaysinkitona pasho kaspito kitteʼitha illighghi,
kolladhampawhe huusu tishe iqhutʼadheppa mughghuradhonkippa isi qhuma.
2 Feresawaadhdheete kittatte tookke tookke ina payenna:
“Moonukka olho kuyyaqko hxaysinkitona kodha olo payuusi kotte?”
3 Iyyesusekka hasi payipa nu holasu:
“Taawithe axinkessi ippuffina korossi uso qale qagha illi olhu kodhiisi huni napaponku intaa?
4 Manne Haallikkito kala ixxullipa dhilankossi kʼulkʼulawwi kʼeesadhdhe patta iʼyyiʼe payamiisi b yiʼoppa he uso qale qaghanukka teexu.”
5 Holuppa hasa na payu:
“Ano Miʼaye Qhawhito Pogholho kuyyaqko hxaysinkitona.”
Iyyesuse Qhamu Qhawho Xarghgho Na Thooniisi Dhinisi
6 Kuyyaqako pilekka ihholipa kuyyaqko hxaysinkitona manne ghissoote koro Ayhutattesa ixullipa isi kollisa,
haahakka qhawho toʼon ho xargho miskitto na thoonikki qagha.
7 Kollisampawhe hikkatepa Feresawaadhdhe Iyyesuseesi kasasenu qahti na gheqqa gheeqadhe maallay:
“Into eemni,
ata kuyyaqko hxaysinkitonkki dhinisnim?”
ki payeppa isi tiqthadha
8 Naqharray Iyyesuse olhu dhihadhe inna aripa qhawhossi xarghgho na toonina na payu:
“Haqpa kitteema shikkaaray!”
Qhawhossikka ihhaqipa shikkaaru.
9 Iyyesusekka inna payi:
“Into olho tookko an hune kasqadha;
kuyyaqko hxaysinkitona olho xeesam olho magha kodhakki payami?
Napse dhinisem patise?”
10 Iyyesuse korossi nakaaʼitha qagha kaasaasi iʼeemi tupettay qhawhossina inna payi:
“Into,
xarghgho haahu gheteʼis!”
Usokka qhamosi inna pay kula ighhgheteʼisina xarghgho huusu inna dhini.
11 Naqharray korossi uumi miiroodhipa Iyyesusesi mala qhamu paassineesi illena laaghadhonki.
Iyyesuse Erkampawhe 12 Sikki Qholadhi.
12 Kuyyaqko tookko Iyyesuse ghissadhenukki karo ghupito hadhdhi;
awne kaasay karo Haallikkito inni ghissadhana qhayasu.
13 Iqhaytina kolladhampawhe huusuusikki ooqipa usundhena kittatte qhawho hudhdhanpa lakkiisi na qholuppa makaxko huusundhikka erkampawhe na payuppa makaxu.
Hussa payyo he qhoota Iyyesuse kapa erkame.
14 Usundhissakka:
Simiʼoonessi Ippetʼiroose na payipa makaxuppa qaso huusu Intriyaasepa Yaykʼoopepa Yohannisepa Filipoosepa Pertʼelemewoosepa
15 Maathiwoosepa Thomaasepa miʼaye Ilfiyoose Yaykʼoopepa Simiʼoonessi piyye thuusunu yookapa
16 miʼaye Yayikʼoope Yihuta pana hossi Iyyesusessi likkasipa teexu Yihutassi Askʼoroothay.
Iyyesuse Qhamu Koro Kishaasi Kollisipa Dhinnisoy
17 Iyyesuse erkampawhe huusu illakki ghuponu ooodhdhipa leqqakkooma shikkaaru.
Kolladhampawhe huusupa koro uuma kisha xaytusana qagha,
holuppa koro apaqhasepa udhankito dhine woʼapa okayu waarsho uuma kisha xaytusana qagha.
Usundhisakka koro piyye Yihutappa koro kathama Iyyerusaalemenna,
holuppa koro paso dhammana hinaseete kathama Tʼirooseppa ho Sitoonannu okaye.
18 Henasso maghattay ghappameppa isi qotʼuyamakka iʼokayeppa isi dhinna.
19 Iyyesusena humna dhinisatte qhootinna lighipa kaasaasi isi dhinnisa maallay waarsho okayi kaasay usoosi ghappadhi woʼi.
Olho Hxasopa Azane Okaasa
20 Iyyesuse kolladhampawhe huusu kulakki emmadhdhipa hasa na payu:
“Hune xiyyawhe,
hehe poghatte,
Ahxase Haallikkito thaahundhi maallay!
21 Hune hehantu puffa,
hehe poghatte
adhalaxnanku maallay!
Hune hehantu oʼoya,
hehe poghatte,
akkishaqananku maallay!
22 Koro qhoota Ano Miʼaye Qhawhito maallay
hune shikkapa isi hune reehapa isi hune dhadhaghisapa
isi hunena makaxxe haahundhiisi olho maghattay patisa payni
hune hehe poghatte.
23 Olho Ammoonthito tayante ho dhammaye
kuyyaqkussana hxasoodhindhapa hirripanku,
moʼo maalla payni appaadhdhe huusundhi hxuumampawheesikka qhamussa kulakki kodheye.
24 Naqharray hune shorokke,
he oyadhindha,
hxaso haahundhiisi aʼakatteye.
25 Hune hehantu dhalaxte,
he oyadhindha,
ahholanku puffankuyye!
Hune he hantu kikishaqa
he oyadhindha,
ahholanku aʼazanaku,
a’oynanku!
26 Hune he koro qhoota haahundhi kaaʼitha olho xeesa torruyi he oyadhindha,
appaadhdhe huusundhi kedhdhay hxumampawhe ayyolawhenu qhamussa kulakki kodheye.”
Parakaraasi Cʼikadhe
27 “Naqharray hune heye apaqhasa an hunena paya.
Parakaraadhdhe haahundhiisi cʼikadhindha,
he hune shikkanukka olho xeesa kodha!
28 Hehune qhiicʼanu sakindha!
He hunena dhappanukka ghissadha!
29 Apayni qhawho hola qadho kanaqsadhi payni
tookkoosikka nanulaagh.
Apayni qhawho hola koothe ghutuusi akki payni
koothe kaluusikka nanu teex!
30 Ho hola ghissadha kaasannu teex!
Qhawho maahxatto haahuusi hola akki payni
qhamu ho holasninu olona kasqadhi!
31 Olho koro huneesi qhamu konninu wootesi hunekka koronu qhamussa kula kodha!
32 He hune cʼikaasi pattakka cʼikatte payni
Haallikkito kaanta olho ghula moʼo attayadhinte?
Cʼuppolawhekka he usundhe cʼikadha pattakki cʼikadheye!
33 Koro olho xeesa hune kodhanu pattakka aʼolho xeesa kotte payni
olho ghula moʼo attayadhinte?
Hussaasi cʼuppolawhekakki kodhaye!
34 He pasante thaahundhiisi hune holasnanu pattakki apasante payni
Haallikkito kaanta sake moyto attayadhinte?
Cʼuppolawhekka qhamu holle akkadhonkinukki cʼuppolawhenu pasaneyye!
35 Naqharray hune parakaaradhdhe haahundhiisi cʼikadhindhapa olho xeesa nukodhanku!
Annu pasanaani payni iʼine holasna olo payeppa isa kippadhanku!
Hussasikka kotte payni hxayye dhammakka tayanteyye,
Haallikkoossi Olho Kaasanna Ghulana Miʼaadhe Huusukkka kodhdhinte!
Moʼo maalla payni Uso he yenu kalatha teexeppa maghampawhenukka xorxittoye.
36 Paappo haahundhi moonthito ho koronu hxura maallay hunekka he koronu hxura kodhdha!”
Koro Pileema Oloqhaqhitte Qhaqhe
37 Iyyesusekka ihholipa hasa napayu:
“Qhamu yehuna qhaqhamintinu yaxamakka olo qhaqhitte qhaqhe.
Hibhaasi olo kutumemma huni kutumaminteye;
hxurakko kodhama huneesikka ihune hxuramnaye!
38 “Teexama ihune teexamnaye,
bhatʼolissay abhatʼtenkuttakki an holipa hune bhatʼoye,
laadhdhi hakina hayyini saasaki abhatʼoolle xesattay,
atiqinipa ahune teexu.”
39 Iyyesuse ihholipa lighnottay hasa payuppa nuqallu:
“Taafakko taafakkonu malaali intawe alkasni?
Apayini hasi kodhdhiti payni lakkintoy yeille ghapanepa hxohxno kitteema hayyonki?
40 Hokolladha hokollisanu yeghulikka ikkodhdhitama kapay ho kolladhipa dhikkisu kaasay ho kollisa kulakki kodhdhini.
41 “Moonukki aʼehxte qharunko taakinti qaso haahuna kittatte miisitte tikkisaasi eemtipa dhiptakussa ehxtte taahuna kittatte qaghaasi isi atuhela hiiti?
42 Holuppa dhiptakussa ehxtte taahuna qaghaasi atuhela eemuna moonuka iitina:
‹Qaso haayyu taakinti qharunko haayyu,
into miisitissay ehxtatte hola qaghaasi an hola yuka› mala paye alkasti?
Ato ho hepaseesa!
Qharitteema dhiptakussa ehxte taahuna qaghaasi hela yukma,
xaysa tupettay miisitisa qaso taakinti qharunko haahuna ehxtatte qaghaasi yukenu toomoomatte hiintiye.”
Kaarkko Qhamu Awshe Huusuttay Arami
(Maat. 7:16-20; 12:33-35)
43 “Kaarkko xeesa awsho maghaasi yeʼawshi,
qhamussa kula kaarkko maghaka awsho xeesasi yeʼawshikka.
44 Kaarkko kaasay awsho huusutakki arami.
Hussa maallay akkatate awsho kaarkko pelesattena oloyuuti;
qhamussa kula miise qhatʼme sheeghanakka awsho woynatteesic oloyuuti.
45 “Qhawho xeesa olho xeesa isaqakkooma illaholsadhinaki olho xeesa lihasi,
qhawho maghaka olhossi magha isaqakkooma illaholsadhinaki olho magha lihasi.
Moʼo malla payni qhawho olho saqakko huususa nahoqhipa haqhuusiki ipako huusuna qalladhi!
Lighino Manne Lakkina
(Maat. 7:24-27)
46 “Olhan hune qalliisi huni kotena moʼo maallaki ayyela ‹Pogholho haayyu!
Pogholho haayyu!›
Payteppa isaye ooqanku?
47 Qhawho ye kula okayapa Kʼaale thaayyu si isi apaqhasapa issi kodha qhamu mala lighiisi anhune qalla.
48 Qhawho moqhorkko sappeema manne ghupadhiisiki lighi,
shoqhshoqhakoka isorripa kollekka hoqhqhipa okayi mannessisi sughghuri,
naqharray qhooti anuhxohxonidhe uuma qhotipa ghupadhu maallay lehise ye alkasuka!
49 Naqharray qhawho Kʼaale thaayyu usi apaqhipa isiye kodhi qhawho qeepakko hotaxakko sappeema manne ghuptadhiisiki lighi.
Shoshoqhakoka isorripa kollekka hoqhqhipa mannessisi sughghurina minakalti ranepa illenakala pullamonki!”