Themmeme Iyyesuse
4
Xaysa tupettay Iyyesuse qhamu Orriththottay theemmininu Nasso Kʼulkʼullo mandho kulakki ashshittay.
2 Haamattekka kuyyaqko 40 pa awne 40 yiʼo male oladhuppa puffu.
3 Theemmampakosikka Iyyesuse kulakki okayipa hasa na payu:
“Dhuke Atho Miʼaye Haallikkito payni,
into awrighi qhamu dhilanko kodhdhinennu hay!”
4 Naqharray Iyyesuse hasi na payi:
“‹Qhawho Kʼaale pako Haallikkitona ligha kaasatakki qaaki dhiishoy,
yiʼottay patta qandhikka›a kippayamtipa tooxamoy.”
5 Xaysa tupettay Orriththo Iyyesuseesi karo kathamassi kʼulkʼullawwi Iyyerusalame kulakki ashshittappa Manne Kʼulkʼullawhatte qharo saappeema shikkaarashuppa hasa na payu:
6 “Dhuke Atho Miʼaye Haallikkito payni into xaynu kalasa he kʼur;
moʼo maalla payni hasi payamtipa tooxamoy:
‹Lughghe haahu awrughghettay qhamu ye kuththumanennu
Haallikko erkampatadhdhe huusuusi xarghghettay qhamu ho hellennu,
iʼhho hayna.b›”
7 Iyyesusekka ihholipa hasa na payu:
“‹Haallikko Pogholho haahuusi olo thethemmi› kippayamtipa tooxamoy.c”
8 Orriththokka ihholipa Iyyesuseesi ghupo uuma sikaapa sappeema hadhdhasuppa Ahxasaadhdhe piyye qhaatʼeetepa kaanaste thuusundhi kaasaasi nu hiʼaasuppa hasa na payu:
9 “Aghghulladhitipa ye sakata payni hisi kaasakki anho teexni.”
10 Xinkissana Iyyesuse hasinna payi:
“‹Hapat,
atho Seetʼana Haallikko Pogholho haahunu sakat,
usoosi patta kaanas!›
Kippayamtipa tooxamoy.d”
11 Xaysa tupettay Orriththo Iyyesuseesi ihxhxuri,
erkampatadhdhe Haallikkitokka okayonkippa nu kodhadhonki.
Iyyesuse Qhamu Kollise Paayyi
12 Yohannise qhamu shapamisa Iyyesuse iʼapaqhina piyye Kalila kulakki ashshi.
13 Kathama Nasrateesikka hela hxuruppa piyyessi Zaplooneppa Niftaleme paso Kalilanna kaanta qagha Kʼifrnahoome kula okayupa isi haaha qaaka.
14 Olissakka Kʼaalessi hxuumampakko Issayaase payina,
15 “Onkessi paso kula koorottay ashsha piyye kolle Yortanoosenna afeete qaghay
piyye Zaploonepa piyye Niftaleme pana piyyessi Kelilay koro Ayhutatte ye kodhdhu na qaaki,
16 waarshossi tukkankito kittatte qaaka hammakko dhamma ihhiʼi,
koro kaasse fartattena kalla qaakanukka hammakko nu llighi” qhamu dhikkadhintinu.e
17 Xaysannu paayyatti Iyyesuse hasi payipa torruye paayyu:
“Ahxase Moonthito itʼtʼuytiye cʼuppito kala hola.”
Iyyesuse Koro Hxaare Ghappaasikki Ooqi
18 Iyyesuse ippaso Kelilanna kaaʼitha lighghana,
qhawho lakki qasopa qharunkosikki tayi,
usundhisakka Simoonessi Petʼiroose ana payipa qaso huusu Intriyaase;
usundhekka koro hxaare ghappa qhooti kodhdhe maallay he pasooma marapadhdhe ghaasaasikki hiʼi.
19 Iyyesusekka inna payi:
“Yekaleema okayama qhama hxaare ghappite kula he koro ye ghappakki an hune konniye.”
20 Usundhekka hattakki marapadhdhe huusundhiisi helahxureppa nakala ashshonki.
21 Xaytusanakka iʼokotto tahxina,
dhelle Zeptiwoose Yaykʼoopepa qaso huusu Yohanniseesikki hiʼi.
Usundhekka he paappo huusundhi Zeptiwoose illay konkito saappeete marapadhdhe gharsadhaasi ooqu.
22 Usundhekka hattakki konkosiisi paappo huusundhi illay haama hela hxureppa Uso kaleema ashshonki.
Iyyesuse Koro Kishaasi Qhamu Kollisipa Dhinnisoy
23 Iyyesusekka piyye Kalilay kaasakki a’ashshipa mannadhdhe huusundhi ghissootattena kallakka isi kollisapa otessi xeesay Ahxase Haallikkitona isi thorruyapa qharaaropa koro udhanko pile pilettay udhdhamaasikka dhinnisoy.
24 Kodhmo huusu piyye Sooriya kaasay qhooti qhaskadhi maallay,
waarshokka koro qharaaro pile pilepa udhanko koro qootʼuyapa koro nassidhdhe maghoomattay ghappamipa koro udhanko kamaqatte naqaghi pana koro thoththooni kaasaasikki Uso kula okaasi,
Usokka dhinnisoy.
25 Koro kisha ho piyye Kalilappa Kathama-Hudhdhannapa kathama Iyyerusaalemeppa piyye Yihuta pana koro kolle Yortanoosenna afenu okayi Iyyesuse kaleema ashshi.