Iyyesuse Ghupomi Koro Kollisi
5
Iyyesuse waarsho kisha ho Uso kala ashshaasikki hiʼipa ghupo saappeema hadhdhuppa qakkadhdhu;
kolladhampawhe huusukka okayonkippa Uso kapeema qakkadhonki.
2 Hasa payuppa usundhe kollise paayyu.
3 “He Nassawinkottay teekunko nu dhakadhi qhooti Ahxase Moonthito thayne mallay,
hehe poghadhe.
4 He ooya Haallikko qhooti usundhe dhightisni maallay,
hehe poghadhe.
5 Laalawhe qhooti piyye tayne maallay,
hehe poghadhe.
6 He pare qaghunkonu puffapa isi dheepodha qhooti dhalaxne maallay,
hehe poghadhe.
7 He koronu hxurakko kodha qhooti hxurakko tayanne maallay,
hehe poghadhe.
8 He saqqe xeesa sheegha qhooti Haallikko hiine maallay,
hehe poghadhe.
9 He koro araarsapa isi nakayho kodha qhooti miʼaadhe Haallikkito payamne maallay,
hehe poghadhe.
10 He qhoota pare qaghunkitonu aʼusundhe ghoghori Ahxase Moonthito qhooti thuusundhi kodhdhiti maallay
hehe poghadhe.
11 “Koro qhoota haayyu maallakki hune dhaghghisipa isi hune ghoghorapa maghno kaasaasi aayyattay isi huna thorruya payni hune hehe poghatte.
12 Olho Aʼahxase Moonthitona tayadhinte ho dhamma qhooti kodhdhi maallay hxasoodhindhapa hxasottay hoqhqhanku.
Moʼo malla payni hxuumampawhe hunenna qharaʼita qaghaasikka qhamussa kulakki ghoghoreyye.”
Lighno Sooqhitopa Ho Hammakito
13 Nakalakka hasi payi:
“Hune sooqho kappinna,
naqharray sooqho soorno huususikki dhapni payni mali soore alkasni?
Ghintekata hela tuqhepa luhhettay oghe malettay mala paassini.
14 Hune hammakko piyye qhatʼeete,
katama aghupo saappeema ghupadhi bhadhdhame ye alkasi.
15 Qhawho hammakko qhawsisapa isinna thaanko qhupaapi ye qaghi,
laadhdhi koro manneete kaalla qagha kaasannu qhamu haahninu xayto armadha saappeema axawwadhi.
16 Qhamussa kula koro qhamu kodhmo haahundhi xeesaasi eemnipa Paappo haahundhi moonthitoosi kaanasunnu hammakko haahundhikka korito mintatte ihhaaha.”
Hikkepa Hxuumampawhe
17 “Ano ho Hikke Muusepa kollise hxuumampawhatte pullenu okayi inni hune lighu;
Ano qhamu dhikkannenukki an okayi dhiishoy pulenu qandhikka.
18 Dhuke an hune qalli,
moonthopa piyye haki lighghine saasa Hikke idhdhikkannay dhiishay tooxitte toʼotte taakki tooxitte tiikkisa kakki ye na haqhinti.
19 Hussa maallay qhawho hayyidhinna kittatte the qhacʼaasi pulapa korokka qhamu pullinu isi kollisa Ahxase Moontitona ho qhacʼa ikkodhdhini.
Naqharray qhawho hayyidhdhi kaasaasi kodhapa koro pilekka qhamu konninu isi kollisa Ahxase Moonthitona ho ghula ikkdhdhini.
20 Lammi pare qaghunko haahundhikki pare qaghunko kollisampawhe Hikkattenapa ho Feresawadheetena ye ghulu payni Ahxase Moonthito kula mookakki payni huni xullinte.
Qhawho Poghe Ye Gheeqasti
21 “Koro kedhdhanna ‹Olo poghi qhawho qhawho poghisa inna qhaqhamnaya› qhamu apayisa aʼapaqhte.
22 Ano naqharray anhunena payana:
qhawho qhawhoosi dhakisi kaasay inna aqhaqhamnay,
holuppa qhawho qhawhoosi ‹Qeepako› payipa dhaghisussa tanynyadhdhe na qhaqhitte qhaqhna,
qhawho qhawhito ‹Tarurko› payipa dhaghisu qhaqhitte hatte Kahannemattenakki uso gheqasa.
23 Hussa maallay atho xayto teexakitosa atteexakko teexenu itʼtʼuytipa qhawho anna dhappitgi isi qaghapa hela thaaya payni,
24 teexakko haahuusi xayto ana teexakko teexi kapa xawwadhpa qharitteema ashshoy qhahussa qale araaramay,
xaysa tupettay okayappa teexakko haahuusi Haallikkonu teexay.
25 Qhawho ho kasasipa manne qhaqhittate kula isa na qale onkatte ashsheette qagha payni waadhettay uso qale araaram.
Hasakki ye kodhdhu payni qhawhussa taanynyanukki ho teexni,
taanynyakka hoho shapnanukki ho teexnipa manne shappeetesa xullay.
26 Dhuke anho qalli,
pirradhdhe haka murtipa dhikkisa saasa shappeete athulighinti.
Maase Ye Gheeqase
27 “‹Olo maaseb› qhama paysa aʼapaqhte.
28 Ano naqharray an hunena payana:
qhawho xiskatho emmipa dharraʼu kaasay,
xinkissana saqako huusuttay immaasi payyo.
29 Apayni ehxtte thaahu miskitte ho dhappisa payni hela yukpa kʼuray,
dhakinte thaahu kaasay hatte yeʼime sheeghtisa kʼuramintina kaanta dhakinte thaahunakka karo tookko dhapintiki ho woyyina.
30 Apayni xargho haahu miskitto ho dhappisa payni hela ghoxpa kʼuray,
dhakinte thaahu kaasay hatte yeʼime sheeghtisa kʼuramintina kaanta dhakinte thaahunakka karo tookko dhapintiki ho woyyina.
Kollinko Qhoota Ille Ishighatte Akollisi
31 “‹Qhawho naxaye thuusu ishigha kaasay iwwarakʼate ishighateesi tooxipa nuteexuc›” qhamu payamtipa tooxamossa a’arankuy.
32 Naqharray Ano anhunena payana:
qhawho naxaye thuusu yeemaasunna ishshighi kaasay qhamu maasintinukki kodhi,
qhawho xiskaththo onke hasa lighattay ishghamtiisi akkikka immaaasi.
Kollise Qhoota Akuttatte
33 “Holuppa qhamu akoro kedhdhanna hasa payisa aʼapaqhte ‹Olo aayyettay akutadhi naqharray akutte thaahundhiisi Pogholhonu teexa.›d
34 Ano naqharray an hunena payana:
inna akutadhonku.
Moontho qakkaththe Haallikkito qhooti kodhdhi maallay,
moonthottay olo akutadhi;
35 piyyekka oghghaththe luhhe Haallikkitona qhooti kodhdhiti maallay piyyettakka olo akutadhi;
Iyyerusaalemekka kathamassi Nukusa dhammana qhooti kodhdhiti maallay olo akutadhettay;
36 kaso haahuna kittatte toʼokko kakki ho piqa taaki ho kumma kodhe qhoota athu alkasinti maallay hettakka olo akutadhi.
37 Hussa maallay qallithe thaahundhi,
“Ee” payni “Ee” taakki “Errayto” payni “Errayto” ikkodhdhita.
Naqharray qallithe xayna lighghiti the maghakkossinna.
Haalo Holase Yegheeqasti
38 “Qhamo ‹Ehxte kapa ehxtte,
ilghakko kapa ilghakko›e haaluye payamtisa aʼapaqhte.
39 Ano naqharray hasa an hunena payi,
koro huneema maghno kodhaasi olo haaluye.
Apayni qhawho hola qadho tookosi kanaqsadhi payni tookkoosikka nu laagh.
40 Qhawho hola koothe thaahu kaluusi akkadhe woʼapa isi ho kasasa payni the ghutuusikka naanuteex.
41 Apayni qhawho hola payana ‹Kilo methire tookkopa karo saasa ye qale ashsha› pa isi ho kittuya payni hussa kula ghaqqitti padhawpa naqale ashshoy.
42 Qhawho hola olo ghissadhanu teex!
Qhawho hola pasante kasqadhaasi olo dhawri.
Paarakara Cʼikadhe
43 “‹Dhaliththo haahuusi cʼikadha,f
paarakara haahuusi shikka› qhamo apayisa aʼapaqhte.”
44 Ano naqharray hasa an hunena payi,
paarakaradhdhe haahundhiisi cʼikadhindha,
koro hune qhiicʼanu sakindha,
koro hune shikkanu olho xeesa kodha,
koro hune maghno kodhapa isi hune ghoghoranu ghissadha.
45 Olissa kotte payni Paappossi haahundhi moonthito qaakana miʼaadhe Huusukka kodhdhinte.
Uso koro maghoomapa koro xeesoomanu oqhqhaye innulihasa,
holuppa koro pare qaghapa koro ye pare qaghinukka irrawoosi idhdhipasa.
46 Moʼo malla payni koro hune cʼikaasi pattakki acʼcʼikatte payni moʼo attayadhinte?
Cʼuppoolawhekka hussaasi ikkodha qandhi?
47 Dhaliththo haahundhisa pattakki axxaste payni olho ghula moʼo akkotte?
Koro ye Haallikko arikka olissaasi ikkodha qandhi?
48 Hussa maallay Paappo haahundhi moonthito qhooti pare kodhdhi maallay hunekka pare kodhdha.