Kollinko Qhoota Teekollawhe Kʼaarkʼaratte Ateexi
6
“He kodhmo xeesa koodha payamenu olo teekolloosi koro miinta kʼarkʼari,
qhamussa kulakka kotte payni Paappo haahundhi moonthitona kaanta olho attayadhinte ye qaghi.
2 Hussa maallay xinke attekollo kʼarkʼartenna korossi he paseesenu mannadhdhe ghissootattepa onkadhdheete kaththaame yoqha kula kaanasamenu olo he hiʼaase.
Dhuke an hune qalli,
usundhe olhu tayadhe usundhe gheeqastiisi qharriteemi akkadhe.
3 Atho naqharray atttekollonu teexanna olho xarghgho haahu miskitto teexisi pixxatte inni aru.
4 Hussa maallay atho teexakkoosi bhadhamtettay teex,
Paappo haahu olho abhadhamtettay kodhiisi hiʼa kodhmo haahu xeesana olhu tayadhe ho gheeqasiisi ihho teexnaye.
Qhoota Ghissootatte
5 “Aghghissadhanku payni qhamo korossi he paseesa kula olo kodhdhe,
usundhe koronu he hiʼaasenukki mannadhdhe ghissootattepa onkadhdheete hinaaseema shikkaarepa ghissadhe cʼikadhe.
Dhuke an hune qalli;
usundhe olhu tayadhe usundhe gheeqasiisi qharriteemi akkadhe.
6 Naqharray atho aghghissadha payni manne kala xullipa mankaxxe kʼupoppa Paappossi haahu xayto olo hiʼina qaghapa isi ye armadhiisi ghissadhay,
Paappossi haahu olho abhadhdhamthettay kodhiisi hiʼa,
kodhmo haahu xeesana olhu tayadhe hoqheeqasiisi ihho murraye.
7 “Hune aghghissadhankunna qhamossi koro ye koro Ayhutatte kodhdhu kula qallithe lathunna olo hohole,
usundhissa he qallithatte hoholettay Haallikko ghissoote thuusundhi na apaqhnikki nu lighti.
8 Hussa maallay qhamo huusundhi kula olo kodhdhe,
olho hune gheeqasaasi Paappo haahundhi haannay huni ghissadhonkunna qharaʼita iʼaraye.
9 Naqharray hune hasa ayapa ghissadhanku:
Appa haani moonthito qaaka,
Makaxko Haahu ikʼkʼulkʼullawwa,
10 Ahxase taahu iʼokayta,
woʼoko haahu qhamu moonthooma kodhdhi kula,
piyyeemakka ikkodhdha.
11 Yiʼo ine gheeqasa kuyyaqakitoosi kuyyu ine teex.
12 Koro inena dhappinu qhama annu hxurri kula,
dhappitte thaanisikka ine hxur.
13 Theemmatteema olo ine xulleesima
maghnito ine pinnis.
[Ahxasepa humnapa kaanaste
perre ye hume sheeghenna Haahuye;
Ameen.]
14 “Apayni koro hunena dhappinukki adhdhappitte thuusundhi hxurte payni,
Paappo haahundhi moonthitokka cʼuppo haahundhiisi ihhune hxurra.
15 Naqharray koronukki dhappitte thuusudhiisi huni hxurte payni Paappo haahundhikka cʼuppo haahundhiisi ye hune hxurri.”
Yiʼo Male Ghissadhe
16 Nakaleemakka Iyyesuse hasi payi:
“Korossi he paseesa xinke iyyiʼo male ghayyepa isi ghissadhana koro qhamu yiʼo male ghissadhe thuusundhiisi arrinu miinte thuusundhiisi hela oohepa isi asana kula hune miinte thaahundhisi olo hela oohe.
Dhuke an hune qalli:
usundhe olhu tayadhe usundhe gheeqasiisi iʼakkadhe.
17 Naqharray atho xinke ayyiʼo male ghissattina miinte thaahuusi hela shox,
pukkaqate thaahuusikka hela shiinay,
18 onke hasa lighattay yiʼo male ghissadhe thaahuusi Paappo haahu ye armadhi pattama yaxaka ye arri;
Paappossi haahu olho abhadhdhamthettay kodhiisi hiʼa olhu tayadhe ho gheeqasiisi ihho teexnaye.”
Shorokunko Moonthito
19 “Shorokunko hahundhiisi hassa piyyeema xayto itte yiintipa xayto ikʼkʼooripa xayto kerqekka ghoghondhintipa kereqossa olo illa holsadhe.
20 Hussana kaanta shorokunko haahundhiisi kuta monthooma xayto itte ye yintippa xaytu ye kʼoorrippa xaytu kerqqekka ye ghondhintippa kereqossa illa holsadha;
21 moʼo maalla payni xayto shorokunko haahu qaghina saqakko haahukka xaytussanaki qaghni.
Ehxte Hammakko Pishkito
22 “Ehxte hammakko pishkito,
hussa maallay ehxte thaahu thexeesa kodhdhi payni pishko haahu kaasay ho haaha ikkodhdhini.
23 Naqharray ehxte thaahu udhama payni pishko haahu kaasakka thukkanko ikkodhdhini.
Lammi hammakko hola kittatte qagha thukkani payni thukkankokka uumatti naqni!”
Qaako Piyyinnu Olo Rakkadhi
24 “Qhawho tookko pogholho lakkinu ayle kodhdhe ye alkasi.
Tookkoosi ishshikkina,
tookkoosi kapay icʼcʼikanna,
taaki tookkoosi ikkaanasna Tookkoosi kapay idhdhafna.
Haallikkopa kodhattenu ayle kodhdhe huni alkasinte.
25 Hussa maallay an hunena payana qagho haahundhinu ‹Moʼo ayyiinaani?
Ata moʼo an quknaani?›
Taakinti pishko hahundhinukka ‹Moʼo an urkynaani?›
Olo payeppa isa rakkadhanku.
Yithito kaanta qagho,
laallatte kaantakka pishko ye ghuli?
26 Into aaghe moonthito eemindha,
ye pooxadhe,
ye ghimadhe,
righteemakka ye yakadhe,
ikkodhdhitama kapay Paappo haahundhi moonthito usundhe yiʼasha;
emma hune aaghenu uuma huni ghulte?
27 Keenni hunena kittatte qhawho rakkadhipa perre huususa saate tootte padhaawadhe alkasu yaxa?
28 “Holuppa moʼo malaakka laallenu rakkatte?
Into pisussa liqqakkoʼita pisi qhamu malaala ghohi eemindha!
Ye tardhdhe,
ye saaqhuyekka;
29 ikkodhdhitama kapay an hunena payana Selemoonekaki kaanaste tuusuna usundhena kittatte qhamo pisitakko tookko kula ye urkuyyukka.
30 Hune he dhukkaysadhe hunena qhacʼti Haallikko qashkussa liqqakaʼitha kuyyu armadhapa qhayna isi hatteema yaknaasikki hasa siri payni,
huneesi malaalakki ye ghulasnippa hune siroy?
31 Hussa maallay olo payenna:
‹Moʼo ayyinaani?
Moʼo an quknaani?
Ata moʼo an urkuynaanippa?›
Isa rakkadhanku.
32 Moʼo maalla payni olissa kaasaasi koro Haallikko ye arikki tayadhenu gheeqa,
olissa kaasay qhamu hune gheeqasisa Paappo haahundhi moonthito iʼaraye.
33 Hune naqharray olho kaasanna inthoosapa Ahxase Haallikkitopa pare qaghunko Huusu gheeqankumma hussa kaasay ihhune padhaawamnaye.
34 Hussa maallay kuyyaqko qhaynanu olo rakkadhe,
moʼo maalla payni kuyyaqko qhayna pukkaqate thuusunukki rakkadhi;
kuyyaqko qagha kaasay rakko uso hxafnaasiki sheeghi.”