Koro Pileema Olo Qhaqhitte Qhaqhe
7
“Qhamu ye huna qhaqhamintinnu yaxaamakka olo qhaqhitte qhaqhe.
2 Moʼo maalla payni qhaqhitissay akkoro pileema qhaqhte huneemakka iqhqhaqhamnay,
bhatʼollissay abhbhatʼtʼettakki hhune bhatʼaminti.
3 Moʼo maallakki aʼehxte qhawho pileetena kittatte miisitte takkassaasi eemtipa dhiptakussa ehxte thaahuna kittatte qaghaasi isi athu hiiti?
4 Holuppa inni dhiptako ehxte thaahuna kittatte qaghana,
malaala qhawho pileete iitina:
Into miisitissa ehxtatte hola qaghaasi an hola yuka?
5 Atho hohe paseesa!
Qharitteema dhiptakussa ehxtte thaahuna qaghaasi hela yukma,
xaysa tupettay miisittissa ehxte qhawho pileetena qaghaasi yukenu toomoomatte ahiintiye.
6 Olho kʼulkʼullawiisi harrenu olo teexe,
fureesi luumadhdhe miinteema olo yake,
luumadhdhe fureesi luhhettakki hunena oghne,
harrekka ihhollapa hune qhawwonki.
Olho Ghissootettay Tayama
7 “Ghissadhama ahune teexnaye,
gheeqama attayanankuye,
mankaxxe kooxisama ahune qhaashnaye,
8 moʼo maalla payni qhawho ghissadha kaasannu itteexamna,
qhawho gheeqa kaasay ittayanna,
qhawho mankaxxe kooxisa kaasanu iqhqhaashamna.
9 Hunena kittatte qhawho miʼaye huusu inna dhilantakko kasqadhana honu awrukko teexa yaxa?
10 Taakinti inna hxaaritte kasqadhana tawwo innu teexna?
11 Lammi hune he maghawhe kodhdhitekki miʼaadhe haahundhinu olho xeesa teexe ara payni Paappo haahundhi moonthito qagha he Uso ghissadhanu olho xeesaasi mallaki ye ghulasnippa nu teexu.
12 Hussa maallay olho koro qhamu hune konninu woote kaasaasi hunekka koronu qhamussa kula kodha.
Matʼaafadhdhe Hikkattepa he Hxuumampawhattekka hasi koro kollise.
Mankaxxe Tʼulullapa He Ghandhaqa
13 “Mankaxxe tʼulullattay xulla,
moʼo maalla payni mankaxxe karo patittatte kula ana xulli he ghandhaqapa onkekka the ghandhaqqay.
Koro mankaxissattay xullakka ho kisha.
14 Naqharray mankaxxe karo qaghito kula ana xulli he tʼululla,
onkekka the koro rakkisay,
hena xullinakka he qhacʼa.
Hxuumampawhe Aayya
15 “Hxumampawhe aayya kittetay ooshe olo simidha kula kodhdheppa qullo qeemmeete urkuyonkippa isi hune kula okaynana he tiqithadhindha.
16 Usundheesi awsho huusundhittakki aʼupadhinte.
Akkattatte awsho woynatte taaki hxash-hxashshito awsho pelesatte ana yuuta?
17 Laadhdhi kaarkko xeesa kaasay awsho xeesa iʼawshi,
naqharray kaarkko magha awsho maghaasiki awshi.
18 Kaarkko xeesa awsho maghaasi awshe ye alkasi,
kaarkko maghakka awsho xeesaasi awshe ye alkasi.
19 Kaarkko awsho xeesa ye awshi kaasaasi aghoxnapa haththeema akʼuru.
20 Hussa maallay hxuumampawhe aayyaasi awsho huusundhittakki aʼupadhinte.
21 “Qhawho woʼoko Appa hayyu Moontitona kodha dhiishay ho yela Pogholho haayyu,
Pogholho haayyu payi kaasay Ahxase Moonthitosa ye xullinikka.
22 Kuyyaqko qhaqhittattena koro kisha hasi yela payni:
Pogholho haayyu,
Pogholho haayyu,
Makaxko Haahuuttay hxuuma ini qalladhooni?
Nassidhdhe maghoomaasi Makaxko Haahuuttay ini lihhasooni?
Dhahxhxotaadhdhe kishaasi Makaxakko Haahuuttay ini kodhooni?
23 Anokka kuyyaqakusana hasa anna payni:
‹Hune maghawhe moʼo kakki payni anu hune ari!
Yela kaanta sikaapuya.›
Manne Amoqhorkopa Taxakkooma Ghupadhi
24 “Hussa maallay yaxakka ho Kʼaali thaayyuusi apaqhipa isi kodha kaasay,
qhawho moqhorkoma manne ghupthadhiisikki lighi.
25 Irrawwo idhdhipi,
kollekka sorri,
uruurekka uruuruyippa mannessiisi sughghuri,
naqharray mannissa qhooti moqhorkkooma ghupthame maallay ye ranonki.
26 Naqharray yaxakka ho Kʼaale thayyuusi apaqhipa isi ye kodhi,
qhawho qeepakko ho thaxakkooma manne ghupthadhiisikki lighi.
27 Irrawwo idhdhipi,
kollekka sorri,
uruurekka uruuruyippa mannessiisi sughghuri,
mannisakka ranonki,
ranissakka he magha kodhdhonki.”