Qhawho Orxamampawhe Dhippa Rafisana Dhukkaysadhe Tuusu
(Maat. 8:5-13)
7
Iyyesuse olissa kaasaasi waarshonu iqallipa dhikkisu tupettay karo katama Kʼifrnahoome kulakki ashshipa haha hxafoy.
2 Xaytusana qhawho piyye Roomenna ho koro orxankito qhawho dhippa rafisa qagha.
Kodhampako huusu hu uuma cʼikadhiki udhamapa isi fara.
3 Qhawhossi orxamampawhe dhippa rafisakka ote Iyyesusessi iʼapaqhina hasi payipa xaadhighghe Ayhutatteesi eraku:
“Akko maʼala ashshindhapa Iyyesuse qhamu okaynipa kodhampako haayyuusi dhinisunnu yewaatadhanku.”
4 Usundhdhekka Iyyesuse kulakki ashshepa hasa payonkippa waatadhonki:
“Qhawhunnu oliisi kodhe igheeqasay.
5 Usokka waarsho haanisi icʼikadha;
manne ghissootattesikka iʼine ghupadhi.”
6 Iyyesusekka usundhe qali ashshi,
manne huusuna kaanta iitʼuyuna qhawhossi koro orxankito qhawho dhippa rafisakka hasi payipa dhalitto huusuusi namintaʼita eraku:
“Akko Pogholho haayyu,
Ato manne haayyu kaleema xullenu ano qhawho gheeqasa qaandhiye olo qodhdhi,
7 hussa maallay ano hokula okayenu huyeyegheeqasti,
kapay Kʼaale patta qallima kodhampako haayyu idhdhinnaye.
8 Qhamusa kula ano pukkaqate tayyuna rafisampawhe haayyunu ho hayama,
he orxanko qhipa he anhayi qagha,
usundhissana kittatte tookito ‹Ashsha› kanapayi payni iʼashsha,
tookitokka ‹Okay› kanna payi payni iʼokaya,
kodhampakko haayyunakka:
‹Olissaasi kodh› kanapay payni iʼkodha.”
9 Iyyesusekka iʼolissaasi apaqhina iʼusotta dhahxhxipa korossi nakala ashsha kula laaghghamuppa hasa na payu:
“Anhunena payana dhukkaysadhi hasa ghakitti dhammaasi koro Israeelatena kaki anu hiu.”
10 Korossi aʼerakikka immannessi qhawhossina kula hollina kodhampakosi ho dhiniki hiʼe.
Iyyesuse Xiskathosi Tʼiirakko Nafarina Miʼaye Hiisisi Qhamu Fartate Haqisi
11 Iyyesuse haqhayna sinkatho katamassi Nayne ana payi kulaki ashshi,
kolladhampawhe huusupa waarsho kishaki Uso qale ashshi.
12 Iyyesusekka ikatamassina xulleete qaghana koro pukkaqo dhooqhapa isi katamisanu lighatakki hiʼi,
qhawhusa farikka yaaye tuusu uso toʼoko ishsheeghti;
isekka tetʼiirakko nafari.
Koro katamisanakka ho kisha ise qalle ashsha.
13 Pogholho Iyyesusekka iʼise hiʼina iqhararrsadhipa hasa napayu:
“Haay,
olo ooyi!”
14 Xaysa tupettay Iyyesuse na kulaki itʼuyipa tʼarfesi ghappadhu,
korossi dhooqhakka ishikkarina hasa napayu:
“Ato ponkoritu,
hakq kanhola payi!”
15 Qhawhossi farikka ihaki qakkadhuppa qalladhe paayyu,
Iyyesusekka iʼakkipa yaaye tuusunu teexu.
16 Koro kaasakka ighghaapipa inti Haallikkoosi kaanasana hasa payu:
“Ata husi hxuumampakko dhamma inena kittatte hakiye.”
Koro hubhakka ipayana:
“Haallikko waarsho huusuusi dhinisenu okayi.”
17 Hussa maallay ote Iyyesuse piyye Yihutapa piyyaadhdhe nakaaʼita qagha kaasanaki qhaskati.
Shoxampakko Yohannise Kolladhampawhe Huususi Qhamu Iyyesuse Kula Eraki
(Maat. 11:2-19)
18 Kolladhampawhe Yohannisekka olho kaasaasikki usoosi torruye.
Usokka kolladhampawhessi huusuna kittatte qhawho lakki ooquppa hasa napayuppa Iyyesuse kula eraku:
19 “Hossi apayina iʼokayna ata Atom pilakko antiqanaani?”
20 Usundhdhekka Iyyesuse kulakki ashsheppa hasa napayonki:
“Shoxampakko Yohannise kulay iʼiyana ‹Hossi apayina iʼokayna ata Atom pilakko antiqanaani?›
Kippayipa ho kula inee eraku.”
21 Xinkissana Iyyesuse koro kishasikki udhanko pile pilepa udhanko koro qotʼuyana dhinnisi,
Nassidhdhe maghoomaasikka lihhasoy,
hetatafekka he kishaasiki emmateesi.
22 Iyyesusekka korossi aʼerakina hasina payi:
“Ashshindhapa olho ahiitepa aʼapaqhteesi Yohannisenu qallanku:
taafawhe xaytossi ihiʼanki,
tonnawhekka ihaqapa isi ashshanki,
heudhanko lamtʼate naqaghika iʼalheesama,
dhakkawhekka iʼapaqhanki,
koro farikka fartatte ihaqa,
xiyyawhenukka ote xesaasi anu torruyna.a
23 Qhawho Yeesi ye dhappu hohe poghadhi.”
24 Korossi Yohannise eraki iʼashshi tupettay Iyyesuse hasi payipa qhoota Yohannise waarshonu qalle paayyu:
“Moʼo eemenukka mandho kula okayte?
Ata shompokʼusa uruure lelehisti eemenum?
25 Emma moʼo eemenukka okayte?
Ata qhawho laalle xeesa urkuyiisi eemenum?
Kulay koro innughartipa isi laallaadhe xeesooma urkuya kisoole poghladheetenaki qaghe.
26 Moʼo eemenukka okayte?
Ata hxuumampakko eemenum?
Ee,
laadhdhi ho hxuumampakkonu ghulaasi eemenuka okaayte kanhunena payi.
27 Hussakka hossi ahasa payipa qhoota huusu tooxoy:
‹Erkampakko ho qharaʼita ashshinapa onke gharisusikki an erakni›b
28 Anhunena iyyana koro xiskeete dhaladhi kaasanna kittatte qhawho Yohannisenu ghulla ye qaghikka.
Naqharray Ahxase Haallikkitona qhawho koro kaasanna kalla qhacʼna usonu ghulla.”
29 Koro kʼaratʼtʼo sooqakaki yehaqhuna waarsho olissaasi apaqhi kaasay qhooti xarghgho Yohannisettay shoxadhi maallay kodhmo Haallikkito qhamu dhuke kodhdhisa iʼarasi.
30 Naqharray Feresawaadhdhe pana kollisampawhe Hikke Muusena xarghgho Yohannisettay innishoxanne kippayeppa woʼokosi Haallikko usundheesi sheeghiisi iishonki.
31 Nakalakka Iyyesuse hasinna payi:
“Lammi dhalati koro perrina lighno moytotakki anhi’aasni?
Moosiki lighi?
32 Dhelle mooriteema qakkadheppa isi ille ooqappa isihasa illena papaayyasiki lighi:
‹File anhune yoqhnina hunidhiite,
anhune kolanina huni ooyonku.›
33 Moʼo maalla payni Shoxampakko Yohannise yiʼosi qhooti yeyiʼipa tʼayye woynateesika isiye quki maallay a’iyankuna ‹Nasso magha naqagha!›
34 Ano Miʼaye Qhawhito anokayina qhoota yiʼo yiʼipa isan qukte quka maallay aʼiyankuna ‹Haadhi husi ho yiʼopa qukte tʼayye woynatte cʼikadha,
dhalitto koro kʼaratʼtʼo sooqapa ho cʼuppolawhatte!›
35 Ikkodhdhitama arnane qhamu dhuke kodhdhesa dhelle huusundhi kaasatakki arame.”
Xiskatakkosi Iyyesusena Lughghe Shittottay Shiinti
(Maat. 26:6-13; Mar. 14:3-9)
36 Feresawaadhdheete kittatte qhawho tookko Iyyesusessi yiito yiʼonu ooqi;
Iyyesusekka manne huusu kula okayuppa qakkadhu.
37 Katamissana xiskatakko tootte cʼuppolatte qagha.
Isekka Iyyesuse qhamu ho feresawtitona manneete yiito yiʼenu okayipa qakkadhusa iʼapaqhtina shitto hopilkʼaate awrukko alpastʼiroosenna akkodhitakki okayti.
38 Iyyesusena konnatho koray laaghamippa is ʼooyappa lughghe huususakka ilmaame tʼiqhasoppa kasottay isinna ooshay,
lughghe huususikka namamayoppa shittottakka na shiini. c
39 Feresawittosi Iyyesusessi yiitonu ooqikka olissaasi ihiʼipa hasa payuppa saqakko kata dhihadhoy:
“Qhawhu ahxay hxuumampakko ikodhdhi payni xiskatu Usoosi ghappadhay qhamu yaxa kodhdhitipa cʼuppo malaghakiti kodhisa iʼarra.”
40 Iyyesusekka hasinna payi:
“Simioone olho tookko anhoqallini qagha.”
Usokka inna payina:
“Kollisampako into ye qalli.”
41 Iyyesusekka hasinna payi:
“Qhawho lakki qhawho tookito kodhatte pasanadhi,
qhawho tookko pirre tinaare d 500 ki pasanadhi holankakka pirre tinaare 50 ki pasanadhi.
42 Usundhe lakkintoy kodhattesi ipasanadheesi qhootiye mure alkasonki maallay qhawhosi innu hxuri,
lammi qhawhu lakkina kittatte hunka uuma uso cʼikanaki ho lighi?”
43 Simioonekka ina payina:
“Qhawhusa anu kodhatte dhama hxuriki uuma uso cʼikanaki ye lighti” Iyyesusekka inna payi:
“Pare aholasti.”
44 Iyyesusekka xiskaththosi kulakki laaghamipa Simioonenna hasa payu:
“Xiskatuusi ahiay?
Ano ammanne haahu kula okayina qandhe lughgheetekaki atuye teexu,
naqharray ise lughghe hayyuusi ilmaametakki shoxtipa kasottay yelaʼooshi.
45 An haahu kula okayina atho atuye mayyukaki,
ise kapay haka ammanne haahu kala xullinu paayyatti lughghe haayyu mamaye yehxurukka,
46 Ato pukkaqate Taayyuusi shinankottay atuyela shiinukka,
kapay ise lughghe haayyuusi shittotakki yela shiinti.
47 Hussa maallay ise qhooti uuma cʼikatti maallay cʼuppo hiisi dhammaka innuhxurami kahola payi,
naqharray qhawho cʼuppo huusu okoto nuhxurami okoto icʼikadhi.”
48 Xaysa tupettay Iyyesusekka xiskaththosinna inna payi:
“Cʼuppo haahi ihhe hxurami!”