Iyyesuse Qhawho Tothooni Dhinisi
2
Kuyyaqqe qhacʼa tupettay Iyyesuse kathama Kʼifirnahoome kulakki holipa okayu,
qhamu haaha manneete kala qaghisa waarsho apaqhu.
2 Koro kisha Haki manne hoqhinpa ghintekka qhacʼnti saasa illeema holi,
Kʼaalesikka isi nu thorruya.
3 Xinkissana qhawho salaxsaki qhawho thoththonisi dhooqhaseppa Iyyesuse kula okayyonkittay.
4 Naqharray waarsho qhooti uuma naqi maallay Usooma iththa itʼtʼoose yenu alkasamu,
hussa maallay mannessi Uso naqaghi sappeemi hadhdheppa holoxko pootonkippa tukkonki,
tʼarfessi ina rafittay illi na miinteema oodhasonki.
5 Iyyesusekka dhukkaysadhe thuusundhisiki na hiʼipa qhawhossi thoththonina hasa payu:
“Ato miʼayi,
cʼuppo haahu ihho hxurami.”
6 Kollisampawhe Hikkattena kittatte tookke tookke xaytusanaki qakkadhepa saqqe huusundhina kittekata isi hasa dhihadhanki:
7 “Qhawhu moonuki dhaghghisatho hasa lighghaasi Haallikkooma qalladhi?
Haallikko toʼoko malettay ho koronu cʼuppo hxurase alkasa yaxa?”
8 Haattay Iyyesuse dhihattootesi saqqe huusundhina qaghaasi Nassottay inna aripa hasana payu:
“Moonukka saqqe haahundhitta hasa dhihatte?
9 Qhawhu thoththoonina ‹Cʼuppo haahu ihho hxurami› paye taakinti ‹Haqapa tʼarfe thaahu dhooqhadhoppa ashshoy› payeete qallithe thinkakki woyya?
10 Naqharray Ano Miʼaye Qhawhito piyyina qhamu cʼuppoto hxurakko tayasenu humna rafisatte sheeghiisian hune hiʼaasenukki ” payipa
11 qhawhossi thoththoonina hasa payu:
“Haqapa tʼarfe thaahuusi dhooqhadhoppa manne haahu kula qaakkoy.”
12 Qhawhossi thoththoonika minakali haqipa tʼarfe thuusuusi dhooqhadhoppa koro mintaʼitha lighghuppa qaakkoy;
hussa maallay koro kaasay idhdhahxhxipa hasa pauppa Haallikkoosi uuma kaanasu:
“Olho hasa ligha ho ini arri!”
Iyyesuse Matiwosessi Ana Payi Lewisiki Ooqi
13 Hantukka Iyyesuse ihholipa karo passo Kalila kula ashshoy.
Waarsho kaasakka Uso kapeema okayuppa usundhe kollisu.
14 Ixxaytusana lighghana miʼaye Ilfiyoose Lewi ho xayto kʼaratʼtʼitona qakkadhasiki hiʼipa hasana payu:
“Ye kala okay!”
Usokka haquppa na kala ashshoy.
15 Iyyesuse ihho Maatiwoosenna manneete iyyiʼo yi’ana waarsho kisha qhooti na kala ashshi maallay usundhisa na kittatte koro kʼaratʼtʼo sooqapa cʼuppolawhe okayipa Iyyesusepa kolladhampawhe Huusu qale isi yiʼo yiʼa.
16 He Fersawadhdhassi Hikke Muusena kollisana kodhdhe Iyyesuse ho koro kʼaratʼtʼo sooqapa cʼuppolawhe qale iyyiasiki hiʼeppa kolladhampawhe huusuna hasa payonki:
“Moonuki He kʼaratʼtʼo sooqapa cʼuppolawhe qale yiʼo yiʼi?”
17 Iyyesusekka olisa iqalladhesiki apaqhipa hasa na payu:
“Akimiththo koro udhdhamanu dhiishoy koro xeesoomanu ye gheeqasi,
Ano cʼuppolawhenuka okayi dhiishoy he pare qaghaasi ooqenu qandhikka.”
Kasqo Qhoota Yiʼo Male Qhissadhatte Itʼtʼuyi
18 Kolladhampawhe Yohannisepa he Fersawaadhdheetea qhooti yiʼo male ghayye maallay koro tookko tookko Iyyesuse kulakki okayipa hasana payu:
“Kolladhampawhe Yohannisepa he Fersaawadheete olhu nnu yiʼo male ghayyepa kolladhampawhe haahu isi ye yiʼo male ghayye moʼo?”
19 Iyyesusekka hasina payi:
“Akkampako iʼusundhe qale qaghana uyyaththadhe mali yiʼo male ghayyine?
Akkampako iʼusundhe qale qaghana yiʼo male ghayye ye alkanne,
20 naqharray kuyyaqako xaanthitusa usundhena kala akkamni okayna,
kuyyaqisana kapay yiʼo male ghayye iʼalkasna.
21 Qhawho laalle keeshshatteema muuqhatte qhawtite muuqha ye qaghi,
naqharray hasi kodhi payni muuqhatte qhawtitisay laalle keeshatisaasi ikkaaqanappa kaaqanisakka uuma ghandhaqi.
22 Qhamusa kula yaxakka ho tʼayye woynatte madhdheesi surpo keeshshakkoma tiigha ye qaghib naqharray qhamussa kulakki kodhi payni tʼayyisay woynatte surpusasi ikʼkʼoshnay,
tʼayyisay woynatteka tuqhami,
surpusakka xarkishamu,
hussa maallay tʼayye woynatte madhdheesi surpo qhawthitooma atiighi.”
Kasqo Kuyyaqako Hxaysinko Koro Ayihutattena Kaaʼita Itʼtʼuyi
23 Iyyesuse kuyyaqako hxaysinkitona ippasho kaspito kittaʼitha lighghana kolladhampawhe huusu Uso qale qagha thishi qhutʼtʼadhe paayye.
24 Fersawaadhdhekka inna payenna:
“kolladhampawhe haahu moonuki olho kuyyaqako hxaysinkitona kodha olo paayyuusi kodhe?”
25 Usokka hasi napayi:
“Taawite xinkessi puffina korossi uso qale qagha illi olhu kodhiisi huni napaponku inta?
26 Perresi Apiyatere kʼeesito kʼeesadheete ghula kodhdhina Taawite Manne Haallikkitosa ixxullipa dhilankossi kʼulkʼulawwi kʼeesadhdhe patta iʼyyie payamiisi yiʼoppa he uso qale qaghanukka teexu?c”