Kasqo Qhoota Kuyyaqako Hxaysinkito Itʼtʼuyi
12
Xaysa tupettay Iyyesuse kuyyaqko hxaysinkitona pasho kaspito kittaʼitha illighghi;
kolladhampawhe huusu qhooti puffe maallay tishe iqhqhutʼadheppa qhume paayyonki.
2 Feresawaadhdhe olissaasikki hiʼeppa Iyyesusena hasa payonki:
“Haadhi,
kolladhampawhe haahu olho kuyyaqko hxaysinkitona kodha olo payuusikki kodhe.”
3 Usokka hasina payi:
“Taawitepa korossi uso qale qagha xinkessi puffena Taawite olhu kodhiisi huni napaponku inta?a
4 Uso Manne Haallikkitosa ixxullipa dhilankosi kʼulkʼulawwi kʼeesadhe male usopa korussa uso qale qaghanu ye payamuusi yioy.b
5 Holuppa kʼeesadhe kuyyaqako hxaysinkitona Manne Kʼulkʼullawhette kittatte ikkodhmo kodhe payni dhappitte qhamu yenu kodhintisa Hikkatte huni napaponku inta?c
6 Naqharray an hunena payana:
ho Manne Kʼulkʼullawhenu ghula haadhi hassi qaghi.
7 Holuppa kʼaalessi iyyana ‹Ano teexakito kaanta hxurakko awwo’i› qhamu moʼo kodhdhitisa aʼarte payni ahxay koro dhappitte yena qaghtisa hunina qhaqhinte.
8 Moʼo malla payni Ano Miʼaye Qhawhito Pogholho kuyyaqako hxaysinkitona.”
Iyyesuse Qhawho Xarghgho Na Toonisikki Dhinisi
9 Iyyesuse haahanu ihhaqi ashshoppa manne ghissoote koro Ayhutattesa xullu,
10 haahakka qhawho toʼon ho xargho na tooni qagha,
koro tookko tookko ho Iyyesuse tʼalafenu na onke gheeqadha hasi payipa Uso kasqadhu:
“Inta kuyyaqako hxaysinkitona qhawho udhamaasi dhinise ippayamti?”
11 Iyyesusekka hasina payi:
“Keenni hunena kittatte qhawho qeemte tootte sheeghapa kuyyaqako hxaysinkitona hxohxono kitta na puqqi payni qhawho hxohxonusana kittatte ye kiiknipa yuku yaxa?
12 Emma qhawho qeemtenu uuma yeghuli?
Hussa maallay kuyyaqako hxaysinkitona olho xeesa kodhe ipayami.”
13 Nakala qhawhossinna hasa payu:
“Into xarghgho haahu gheteʼis!”
Usokka igheteʼisina xarghgho huusu ina dhiniisipa tookkosi xeesa kula kodhdhu.
14 Naqharray Feresawaadhdhe haahannu illigheppa Iyyesuseessi qhamu mala passineppa patisonkiisi suladhonki.
Kodhampakko Qhollammi
15 Naqharray Iyyesuse sulo huusundhiisi inna aripa laghghammu,
waarsho kishakka haquppa Uso kala ashshoy.
Usokka he udhdhama kaasaasi dhinnisoy.
16 Naqharray Uso yaxa qhamu kodhdhisa yaxanuka qhamu ye qallinenukki usundhe dhihaamu.
17 Husakka hxuumassi Issayaased hasa paypa qalladhu qhamu dhikkanninu:
18 “Haadhi kodhampakosi haayyu anqholladhi husi;
Usokka ho ano cʼikadhipa isiyye hxaseesa!
Nasso Haayyuusikka Uso saappeema an xawwani,
usokka qhaqhitte dhukateesikki waarsho koro ayhudhatte ye kodhdhu kaasannu saluyni.
19 Yekoro tamakannikka,
taakki ye riirikka,
onkadhdheetekka qhawho usona ikkitto apaqhna ye qaghinikka.
20 Shompokʼako bhaqhiisi kaki ye ghondhini,
Shaloote kutamasi kaki ye imasni,
olissasikka qhaqhitte dhukatatte haki puttinti saasa konni.
21 Waarsho ye koro ayhudhatte kodhdhu,
makaxko huusuusikki kippanni.”
Iyyesusepa Pielzepule
22 Xaysa tupettay koro qhawho nasso maghattay ghapami ho taafipa muumuttay Iyyesuse kula okayi.
Usokka dhinisu,
hussa maallay qhawhossikka qalladhuppa xayto hiʼe alkasu.
23 Waarsho kaasakka:
“Ata qhawhu miʼaye Taawitekki kodhdhinim?”
Kippayipa uuma dhahxhxuy.
24 Naqharray Feresaawaadhdhe iʼolissa apaqhenna hasi paye:
“Kulay rafisampako nassidhdhe maghana kodhdhi Pielzepuletakki ye kodhdhu payni Nassidhdhe maghaasi ye lihasni.”
25 Iyyesusekka dhihadhe thuusundhiisikki na aripa hasa na payu:
“Ahxase ille qhoqhoota kaasay ippannay;
qhamussa kula katama tookko taakinti ahxke tookke ille qhoqhoota payni kokisadhepa shikkaare ye alkasnekka.
26 Seetʼanakka ihholi isi Seetʼana lihasa payni iʼille qhoqhooti payyo,
hasi kodhdhiti payni ahxasisa thuusu mali shikkaare alkasinti?
27 Ano Nassidhdhe maghaasi Pielzepulettay lihasa payni dhelle haahundhi yaxattakki lihase?
Hussa maallay dhelle haahundhikki huneema qhaqhitte qhaqhna.
28 Naqharray Ano Nasso Haallikkitottay Nassidhdhe maghaasi lihasa payni Ahxase Haallikkito qhamu hune kula itʼtʼuytisa arindha.
29 Taaki qhawho tookko qharriteema tannapkoosi yeshapuna malaali manne huususa xullinipa olhu sheeghiisi nasare alkasu?
Naqharray ishshapi tupettay sare iʼalkasna?
30 Qhawho ye qale ye kodhdhu kaasay iyye toora,
qhawho ye qale ye illa holsadhikka ippulla.
31 Hussa maallay an hunena payana koro cʼuppo kodhipa koro dhaghghiso kaasannu innu hxuramna;
naqharray qhawho Nasso Kʼulkʼullo dhaghghisinu ye nu hxuraminti.
32 Qhawho Ano Miʼaye Qhawhitosa pako magha qalladhi kaasannukka innu hxuramna;
naqharray qhawho Nasso Kʼulkʼullo dhaghghisi hantukka ikkodhdha qhaatʼe qhawtawhessi okaynanakka ye nu hxuraminti.
Kaarkko Xeesa Awsho Huusutakki Arami
33 “Kaare kaasay awsho huusundhittay qhooti arame maallay,
awsho xeesa tayadhenu kaarkko xeesa sheeghindha,
naqharray kaarkko magha ashsheeghte payni awsho magha anna taayyadhinte.
34 Hune miʼaadhe puutatte,
karay hune maghawhena malaala olho xeesa qalladhe alkasinte?
Moʼo maalla payni qhawho olho saqako huususa nahoqhqhipa haqhuusikki pako huusuna qalladhi.
35 “Qhawho xeesakka olho xeesa issaqakkooma illa holsadhinakki olho xeesa lihasi,
qhawho maghakka olhossi magha isaqakkooma illa holsadhinaki olho magha lihasi.
36 Ano anhunena paya,
koro qalliite thaythe qalladha kaasay kuyyaqako qhaqhitatena ina kapa kasqatamna.
37 Hussa maallay qalliithe thaahuna payatti adhukampako kodhdhinti,
holuppa qalliithe thaahuna paayyattiki hooma qhaqhaminti.”
Kasqo Dhahxhxoote Eeme Kaaʼita Itʼtʼuyi
38 Xinkissana kollisampawhe Hikkattepa Feresaawaadhdheete kittatte tookke tookke,
Iyyesusena hasina paye:
“Kollisampako,
into olho koro dhahxhxisa ine hiʼaas.”
39 Naqharray Uso hasa na payi:
“Dhalatha maghaku yedhukkaysadhi dhahxhxooti hiʼe woʼi,
naqharray dhahxhxoote hxuumampakko Yonaase malettay pile olonu hiʼaasni.
40 Yonaase qhamu karaqito hxaaritte dhamma kitteema kuyyaqako izzaxpa awune izzax oladhi kula,
Ano Miʼaye Qhawhitokka hawle kitteema kuyyaqako izzaxpa awune izzaxki an olanni.
41 Kuyyaqako qhaqhitatena koro katama Nenewwenna ihhaqanapa dhalatisa qhaqhitte qhaqhu.
Moʼo maalla payni Kʼaale Yonaase nu qalliisi iʼapaqheppa Haallikko kula holonki,
naqharray haadhi ho Yonaasenu ghula hassi qaghi.
42 Pogholtesi piyye karo Hakalanna qhooti arnane Selemooneesi apaqhenu piyye sikaapanu hxafti maallay kuyyaqako qhaqhitatena dhalati qalli haqintipa na qhaqhitte qhaqhi.
Hantu kapay haadhi ho Selemoonenu ghula hassi qaghi.”
Nasso Magha Qhamu qhawhooma Holi
43 “Nasso magha qhawhito illighi payni xayto inna hxaysani igheeqipa xayto qandhe yena qaghe piyye haxawtina isi aʼashsha,
naqharray xayto inna hxayisaniisi ye tayi.
44 Hussa maallay hasi payi:
‹An ashshinapa mannessi anna lighi kula hola› Ihholina mannissa heheneqe kodhdhepa oshamonkippa gharonkisa ihxhxafi.
45 Xaysa tupettay iʼashshapa nassidhdhe magha pilawhe taxxan he usona maghnito ghula ooqupa heqale isi okayuttay.
Qhawhossi qharossa xullonkippa isi haaha qaaka.
Hussa maallay qagho qhawhusana hoqharona kaanta isi uuma xarkishami.
Dhalata maghakusakka olho hasa ligha na kodhdhamanna.”
Ahxke Iyyesuse Dhukatte
46 Iyyesuse ihhannay olissaasi waarshonu qallana yaayepa qassawhe huusukki ghinteema shikkaarippa isi Uso gheeqa.
47 Qhawho tookko Usona hasa payu:
“Kulay yaayepa qassawhe haahuki ghinteema shikkaaripa isi ho qale qalladhe woʼa.”
48 Iyyesusekka hasi payipa nu holasu:
“Yayye thaayyu yaxa?
Qassawhe haayyukka koro yaxay?”
49 Xarghghotakka kolladhampawhe huusuusi hiʼaasupa hasa payu:
“Haadhi yaaye thaayyupa qassawhe haayyu;
50 qhawho woʼoko Paappo haayyu moontitona dhikkisa kaasay qaso haayyupa alawte thaayyu pana yaayye thaayyu.”