Kasqo Qhoota Dhahxhxoote Hiʼe Kaaʼita Itʼtʼuyi
16
Feresawaadhdhepa Setukʼawaadhdhe Iyyesuse kula okayipa isi theemme woʼapa qhamu moontito olho koro dhahxhxisa nu hiʼasninu kasqadhonki.
2 Naqharray Uso hasi payipa nu holasu:
“Awne moonto iʼiidhipa hiʼanku payni appayankuna:
‹Immasanna.›
3 Holuppa apayni xayto qhaayyanakki urratte iitipa hiʼanku payni appayankuna:
‹Kuyyu irrawo idhdhipna.›
Eepa lammi malke moontoosi aʼeemankuppa qhamu mala lighiisi isa arankumma kapay milikitaadhe perrina upadhe hunialkaste.
4 Dhalatha maghaku yedhukkaysadhi dhahxhxooti hiʼe woʼi,
naqharray dhahxhxoote Yonaase malettay pileesi olonu hiʼasni.”
Xaysa tupettay Iyyesuse iʼusundhe hxuripa ashshoy.
Haqasiso Feresawaadhdheetepa Ho Setukʼawaadheete
5 Kolladhampawhe ye yiʼo kalqoosadhonkinakki pasito afe kora tahxhxe.
6 Iyyesusekka inna payi:
“Olho anhune qalliisi hela sheeghindha,
haqasiso Feresawaadhdheetepa ho Setukʼawaadheetena he tiqithadhindha.”
7 Naqharray usundhe hasi illena papaye:
“Peri qhooti ini dhilanko sheeghadhooni maallakki hasa inena payina.”
8 Iyyesusekka dhihattootte thuusundhisikki na ubhadhipa hasa na payu:
“Hune he dhukkaysadhe hunena qhacʼti!
Moonukka paytenna qhooti ini dhilanko sheeqadhooni maallaki hasa inena payipa isa dhihadhanku?
9 Ata moonuki huni hela thaayte qhari?
Dhilantakko hxupin qhawho kuma hxupiniisi qhamu hxafipa hona kalla haqhiisi koochcho meʼe haqisankusa huni hela thaayte?
10 Holuppa dhilantakko taxxan qhawho kuma salaxasi qhamu hxafipa koochcho meʼe nakalla haqhuppa haqisankuusi huni hela thaayte?
11 Lammi olissa anhunena payina:
‹Haqasiso Feresawaadhdheetepa ho Setukʼawaadheetena he tiqithadhindha!›
Qhoota dhilankito qhamu ye kodhdhusa malaki huni hela thaayte?”
12 Kolladhampawhekka olissa Iyyesuse na payi he tiqithadhindha:
kollise Feresawaadhdheetepa the Setukʼawaadhetena kala qhamu he tiqithanenu dhiishoy haqasiso dhilankitona he tiqithadhe qhamu ye kodhdhusa iʼupadhe.
Petʼiroose Qhamu Iyyesuse Masakkari
13 Iyyesuse piyye Filipʼoose Kʼisariya ana payina ihxafina hasi payipa kolladhampawheesi kasqadhu:
“Ano Miʼaye Qhawhitona koro yaxa yela payi?”
14 Usundhekka hasi napaye:
“Koro tookko tookko ‹Shoxampakko Yohannise› tookke ‹Eliyaase› Ihhola payi,
tookkeka ‹Ermiyaase taakinti hxuumampawhatte kittatte qhawho tookko› Ihhola payi.”
15 Usokka ina payi:
“Emma hune yaxa yela payte?”
16 Simoonessi Petʼiroose ana payi:
“Ato Kristoose Miʼaye Haallikko qaghampakito!”
17 Iyyesusekka hasi na payi:
“Miʼaye Yoonay Simoone atho hohe poghatti!
Ho oliisi ho hiʼaasi Paappo haayyu moontito dhiishay qhawho qandhikka.
18 Anokka anhola iyyana atho Petʼiroose,
awrukko siimikku saappeematteki ammanne haayyu kristanaasi ghupani;
humna fartattekaki ye alkasnipa putu.
19 Kʼulfaadhe Ahxase Moontitonaki anho teexni,
olho appiyyatte shapti kaasay moontitoka ho shapami ikkodhdhini,
ho appiyyatte ishighti kaasay moontitoka ho ishghami ikkodhdhini.”
20 Nakaleemakka uso Kristoose qhamu kodhdhisa yaxanukka qhamu ye qallinenu usundhe hayu.
Iyyesuse Rakkopa Farte Thuusu Qalli
21 Xaysanu paayyatti Iyyesuse kolladhampawhatte hasina paye paayyi:
“Katama Iyyerusaaleme kulakki anashshini,
haahakka xaadhighghe piyyattepa inthawampawhe kʼesadheete pana kollisampawhe Hikkatte yeema rakko okaasnapa yepoghonki.
Ikkodhdhitama kapay kuyyaqako isxanna fartatte anhaqana.”
22 Petʼiroose Iyyesuseesi qawnikki ghinaqakooma ooqipa hasa na payuppa qheeru:
“Pogholho haayyu,
olho hasa ligha ye hooma kodhdhamani!
Olissa aʼqalliti mooka payni ye hooma hxafnikka!”
23 Iyyesusekka Petʼiroose kulakki laaghghammipa hasa na payu:
“Ato Seetʼana yela kanta pat!
Ato olho qhawhito dhiishay ho Haallikkitoosi athu dhihatti maallay kuttumate ayye kodhdhiti.”
Kristoose Kaleema Ashshenu Olho Korito Gheeqama
24 Xinkisana Iyyesuse kolladhampawhatte hasina payi:
“Qhawho ye kallema ashshanto woʼa qagha payni ihhe marmadhipa maskʼalakko huusukka dhooqhadhoppa yekaleema okayu.
25 Qhawho napse thuusu pehsadhe woʼa kaasay ihhela patisa,
naqharray qhawho napse thuusuusi ye maallay hela patisa ippehisadha.
26 Qhawho piyye qhaatʼi kaasakki thuusu kodhdhinapa naqharray napse thuusuusi dhapu payni moʼonu gharra?
Taaki qhawho olhu napse thuusu kapa hela mure alkasni moʼo?
27 Ano Miʼaye Qhawhitokka kaanaste Paappo hayyutakki an kodhdhinipa erkampatadhdhe illay okaya,
kuyyakussana qhawho kaasay kodhmo huusu ikkodhina hxayye annumurri.
28 Dhuke anhune qalli,
koru xayna shikkaarana kittatte tookke tookke Ano Miʼaye Qhawhito kaanaste Ahxase thayyuttay an okaayana haki ye hiine saasa heye farrinekki qagha.”