Hayo Haallikkitopa Tampe Appadheete
15
Xaysa tupettay Feresawaadhdhepa kollisampawhe Hikkatte kathama Iyyerusaalemennu Iyyesuse kula okayipa hasa payonkippa Uso kasqadhonki:
2 “Kolladhampawhe haahu moʼonukki tampe appadheetesi ye tiqitadhe?
Haadhi xarghghe ye hela shoxonkinaki yiʼo yiʼe!”
3 Iyyesusekka hasi payipa nu holasu:
“Hune moʼonukka tampe thaahundhi tiqthadhe maallay hayo Haallikkito pulte?
4 Haallikko hasi payipa hayo teexu:
‹Paapopa yaaye thaahuusi kaanas,
qhawho paappo taakinti yayye tuusuusi dhaghghisi mooka payni iffara›.
5 Hune kapay aiyankunna qhawho tookko paappo taaki yayye thuusuna napayi:
‹Olho hunettay kʼarkʼare ye gheeqasi kaasay Haallikkonuka teexakko kodhdhipa itʼtʼoosa› payni,
6 qhawhussa paappapa yaaye thuusuusikki kaanasi apaytepa tampe thaahundhi kokkisenu isa kʼaale Haallikkitoosi pullanku.
7 Hune hehe paseesa,
hxuumassi Issayyaasea qhoota haahundhi kaaʼita hasa payipa qallu pare:
8 ‹Waarshu hxibhbhe huusutta pattakki ye kaanasi,
naqharray saqqe huusundhi iyyela kanta sikaapa,
9 aata koro kodhiisikki
hikke Haallikkito kodheppa isi koro kollisapa thayte isi ye kaanasa.›”
10 Waarshoosi he kulakki ooqipa hasa na payu:
“Apaqhasindha,
hela taayakka.
11 Olho qhawhosi loka ho pako qhawhitona ligha dhiishay ho pako kata xulla qandhikka!”
12 Xaysa tupettay kolladhampawhe Uso kulakki itʼtʼuyeppa hasa payoonkippa kasqadhonki:
“Feresawaadhdhe olissa qallitiisi qhamu apaqheppa kuttumadhonkissa aʼupatti?”
13 Naqharray Uso hasi payipa nu holasu:
“Dhishtakko Paappo hayyu moonthito ye dhishshu kaasay irroppamina.
14 Usundheesi hela hxurama usundhe taafawhepa holu isi taafawhe sitankiye,
apayni taafakko holi isi taafakkoosi sita payni lakkintoy iʼille ghapannapa hxohxno kata hayyonki.”
15 Naqharray Petʼiroose Iyyesusena hasinna payi:
“Into lighnusaasi ine ishigh.”
16 Iyyesusekka hasi payi:
“Hune hannaka huni hela taayte naʼa?
17 Olho pako kata xulla kaasay karqitho kitteema qhamu oodhdhipa holu isi seeto kula lighiisi huni hela sheeghte?
18 Naqharray olho pakito ligha saqakito kittatti lighi,
olho qhawhoosi lokaka hussa uso.
19 Dhihattoote maghappa qhawho poghepa paalakumepa maasopa kerquntepa aayya qalladhepa hxashaththo,
olissa kaasay saqko qhawhitona kittatti lighi.
20 He qhawho loka haadhi hisi dhiishay olo hela xarghghe shoxunna yiʼo yiʼe ye qhawho loki.”
Dhukkaysadhe Xiskatho Piyye Keneaanattena
21 Iyyesuse haahanu ihhaqipa piyye Tʼiroosepa te Sitoona kula ashshoy.
22 Hahaatikka xiskato Keneʼaanitte na kula okayipa riirettay hasa na payi:
“Akko Miʼaye dhaawite Pogholho haayyu,
maʼala ye qhararsadhma miʼaye thaayyu nasso maghattay yela ghapamipa isi qootʼo hiʼayye!”
23 Naqharray Uso olho toʼokokaki yenu holasu.
Hussa maallay kolladhampawhe Uso kulakki itʼtʼuyeppa hasa napayonkippa waatadhonki:
“Xiskatu kulay ine kaleemi ashshitipa isi riiraye akko maʼala hela laaghi.”
24 Usokka hasi payipa nu holasu:
“Ano ho anna maallay erkami korossi manne Israeelattena qhamo qeemmeete patti kula patta.”
25 Xiskathosi iʼokayti luhhe kala naranippa hasa napayi:
“Akko Pogholho haayyu maʼala ye kʼarkʼar!”
26 Usokka hasi payipa nu holasu:
“Yiitho miʼaadhetesi akkepa harrenu teexe ye gheeqasi.”
27 Isekka inna payti:
“Ee Pogholho haayyu,
harre kulay ghodhanaadhe taanko appa usundhe rafisana hayyeesi iyyianki.”
28 Xinkissana Iyyesuse xiskathosinna hasina payi:
“Atho xiskatu dhukkaysadhe thaahi the dhammaye olho wooti ihhe kodhdha!”
Satisana shettesi tiisika idhdhinti.
Iyyesuse Koro Kisha Ho Udhdhamaasikki Dhinnisi
29 Iyyesuse haahanu ihhaqipa xaytossi paso Kalilanna kaantha qagha kula ashshoppa ghupo saappeema hadhdhuppa qakkadhdhu.
30 Waarsho kishakka qoopawhepa taafawhepa thonnawhepa koro muumi pana koro udhanko pile pilettay udhdhamaasi dhodhooqhoppa Iyyesuse kula okayuttappa luhhe kaleema na xawwadhonki;
Usokka dhinnisoy.
31 Hussa maallay waarshossi koro muumi iqalladhapa thonnawhekka isi dhinnapa koro qoopikka tomooma isi oghadhapa koro tattafikka isi xayto hiʼana idhdhahxhxipa Haallikko Israʼeelateesi kaanasu.
Iyyesuse Qhawho 4000 Yiashi
32 Iyyesuse kolladhampawhe huusuusikki ooqipa hasa na payu:
“Waarshu kuyyaqko izzaxki ye qale oladhipa olhu yiini isi ye sheeghi maallay iyye ghadhasa.
Qhooti onkadhdheema xirkinipa mallalo maallay ye olo yiʼonkinna anu hasa laaghghini.”
33 Kolladhampawhekka hasi payeppa nu holasonki:
“Emma yiitho waarshu kaasaasi hxafna mandhunna kittatte xankanakka taynaani?”
34 Iyyesusekka inna payi:
“Dhilantakko meʼeka sheeghte?”
Usundhekka:
“Dhilantakko taxxanpa hxaare takkummay the qhacʼakki qagha.”
Kinna paye.
35 Usokka waarsho qhamu piyyeema qakkanninukki hayi.
36 Dhilantakko taxxanpa hxaaresiisi akkuppa Ihhaallikko kalataysadhi tupettay ghoodhdhuppa kolladhampawheema teexu,
usundhekka iʼakkeppa waarshossinnu qhootonki.
37 Koro kaasay yiʼoppa dhalaxu;
kolladhampawhekka ghodhdhanadhessi na kaalla haqhe kʼunna taxxan haqisonki.
38 Lammi koro yiʼikka xiskepa miʼaadhe ye dhihamonki male tʼiire patta qhawho 4000.
39 Iyyesuse waarshossiisi ihhela haqisi tupettay,
konko sappeemi hadhdhipa karo piyye Mekʼdhone kula ashshoy.