Korossi Xuske Moontito Eema
2
Iyyesuse perre nukusa Herotiise koro rafisina kathamassi piyye Yihutanna kittatte qagha Peteleheeme ana payisa idhdhaladhina koro xuske moonthito eema xayto oqhqhaye lighanna koru kathama Iyyerusaaleme kula okayi.
2 Usundhekka hasi payeppa kasqadhonki:
“Nukusassi Ayhutatte dhaladhi ahaate?
Xayto oqhqhaye lighanna korukki an xuskitte thuusu moonthito eemnipa Usoosi sakatenu okayaaniyye.”
3 Nukusa Herodhiise ihhussaasi apaqhina immuruki;
koro kathama Iyyerusaalemenna qaaka kaasakka murrukoy.
4 Intawampawhe kʼeesadheetepa kollisampawhessi Hikkatte kaasaasi illeema holasuppa hasa payuppa kasqadhu:
“Kristoose xankasa idhdhalanni?”
5 Usundhdhekka hasi payeppa nu holasonki:
“Hxuumampakkoa hasi payipa tooxoy,
Kristoose katamassi piyye Yihutanna kittatte qagha Peteleheemema idhdhalanni:
6 ‹Atho Peteleheeme,
the piyye Yihutanna kittatte qaghay
Hossi waarsho haayyu Israʼeelenu intawnapa tiqadhoy qhooti hela kittatte lighni maallay,
katamaadhdhesi kanooma piyye Yihutanna kittatte qaghana olho annakalla qhacʼtittay ye qaghi.›”
7 Xaysa tupettay Herodhiise hessi xuske moonthito eemaasi bhadhdhamtettakki ooqasipa kuyyaqakussa xuskittisa nu ximpattiisi uuma na kasqadhuppa nu xuli.
8 Hasa payuppa Peteleheeme kula usundhe eraku:
“Ashshindhapa qhoota Miʼayissana uuma qhothosadhanku,
attayte payni okaynanku ye qallankumma anokka an ashshinapa nu sakataye.”
9 Usundhdhekka olhossi nukusa nu qalliisi iʼapaqhe tupettay illigheppa ashshonki,
lammi xuskittessi xayto oqhqhaye lighanna koru iʼeeme xaytossi Miʼaye na qaghisa haki shikkaarti saasa innu inthawtipa isinna qharraʼita ashshay.
10 Xayto xuskitessi naa shikartiisi ihhiʼenna uumi hxasoodhe!
11 Manne kalakka xullonkippa Miʼayessi ho yaaye Thuusu Mariyaamena kaanta qaghaasi hiʼonki,
piyyeema ghulladhonkippa nu sakathonki;
saatʼinadhdhe huusundhiisikka qhaqhashonkippa teexakko warkʼattepa tankarepa olho oshooqa karpeb ana payi nu teexonki.
12 Herotiise kula qhamu ye hollenukka Haallikko ulsinkettay qhootinnu qalli maallay onke pilettakki holleppa karo piyye thuusundhi kula ashshonki.
Miʼayessi Kiptʼe Kulakki Aghoradhittay
13 Hessi xuske moonthito eema iʼashshe tupettay erkampatte Pogholhito ulsinkettay Yoosefenu ximpadhipa hasa na payi:
“Herodhiise Miʼayessiisi qhooti poghenu gheeqi maallay Miʼayissaasi yaaye Thuusu illay akkipa piyye Kiptʼatte kula ghoradhattay,
haka anho qallini saasa haama gheyyoy.”
14 Hussa maallay Yoosefekka awne parakitte ihhaqipa Miʼayessiisi yaaye thuusu illay akkuppa piyye Kiptʼate kula ashshottay.
15 Herotiise haki farri saasa haama gheyyoy,
hussakka K’aalessi cPogholho hxuumampakko huusuttay payina:
“Miʼaye Hayyuusi Kiptʼenukki an ooqi” qhamu dhikkadhintinu.
Herotiise Qhamu Miʼaadhe Paaxasi
16 Herotiise korossi xuske moonthito eema qhamu uso tatakessa iʼupadhina uumi miiroodhi.
Hussa maallay karo Petheleheemeppa ghodhdhadhissa nakaaʼitha qagha kaasa kula foolisadhdhe huusuusi eraku.
Qhamossi koro xuske moonthito eema nu qallipa nu xuli kula miʼaadhe shampidhdhe he perko lakki hxafaseppa he perko lakkinu kato qaghaasi paaxasu.
17 Xinkissana hxuumassi hxuumampakko Ermiyaase payi: d
18 “Raheele Miʼaadhe hiisi maallay iʼooyanna
ikkitto riirattepa ikkitto ooye maghanakki piyye Raamanna qhaskadhi;
Miʼaadhe hiisikka napsadhdhettay ye qaghe maallay adhiktisana ikkellitiki” dhikkadhi.
Piyye Kiptʼattenu Katama Naazrathe Kula Hole
19 Herotiise iffari tupettay erkampatte Pogholhito ulsinketakki Yoosefenu piyye Kiptʼattesa ximpattipa hasa na payi:
20 “Korossi Miʼaye poghenu gheeqa qhooti farri maallay haqpa miʼayessi yaaye thuusu illay akkappa piyye Israʼeelatte kula holattay.”
21 Yoosefekka ihhaqipa Miʼayessiisi yaaye thuusu illay akkuppa piyye Israʼeelatte kula holuttay.
22 Naqharray Arkelawoose qhamu paappo huusu Herotiise kapa piyye Yihutassa poghlumiisa iʼapaqhina haaha kula ashshe ighghaapi.
Ikkodhdhitama kapay qhoota aʼulsinkettay nu qalli maallay piyye Kalila kulakki ashshi.
23 Hossi hxuumampawhe payenna:
“Naazrawittoe ana payni” qhamu dhikkanninu kathama ana payi Naazrathe kulakki ashshipa issi haaha qaaka.