Iyyesusepa Nikʼotimoose
3
Qhawho feresawito ho rafisampawhessi Ayhutattena tookko kodhdhi ana payi Nikʼotimoose qagha.
2 Qhawhussakka kuyyaqko tookko awne Iyyesuse kulakki okaypa hasa na payu:
“Kollisampakko,
apayni Haallikkokki qhawho qale ye kodhdhu payni qhawho dhahxhxotadhdhi Atho kottiisi kodhe alkasna ye qaghnika.
Hussa maallay Atho Kollisampakko Haallikkito kaanta okayti qhama kodhdhitisa anho araani.”
3 Iyyesusekka ihholipa hasa na payu “Dhuke anho qalli,
apayni qhawho lankakki ye dhaladhu payni ahxase Haallikkitoosi hiʼe ye alkasnikka.”
4 Nikʼotimoosekka ihholi hasa payuppa kasqadhu:
“Emma qhawho ikkeshuy tupettay mali hollipa dhaladhe alkasu?
ihhollapa poorko yaayye thuusu kitta holuppa lanka dhaladhu?”
5 Iyyesusekka hasi payipa nu holasu:
“Dhuke dhuke anho qalli,
apayni qhawho qandhepa Nasso Kʼulkʼullottaakki yedhaladhu payni ahxase Haallikkitosa xulle ye alkasnikka.
6 Qhawho sakankito dhaladhi sakanko,
qhawho Nassito dhaladhikka nasso.
7 Qhoota an hunena payina lanka dhaladhe hune gheeqasa maallay olo dhahxhxe.
8 Urure xayto iwwooti kulakki ururuyti,
koxmakko hiisisikka aʼapaqhnay,
naqharray ahanu qhamu okaytipa isi aha kula ashshasi atuartika,
qhawho Nassito dhaladhikka qhamussa kula.”
9 Nikʼotimoosekka hasi payipa kasqadhu:
“Oli mali hasa kodhdhe alkasni?”
10 Iyyesusekka hasi payipa nu holasu:
“Atho mala kollisampakko Israʼeelatte kodhdhitipa isi athu oliisi arti?
11 Dhuke,
dhuke anho qalli:
olho an arisikki an qallini,
olho an hiinisikka an hela qallini naqharray hune olho an qalliniisi huni akkate.
12 Olho piyyinna an hune qallisikki huni dhukkaysadhonku payni,
olho moonthito an hune qallisi malaala adhdhukkaysadhe alkasinte?
13 Ano Miʼayessi Qhawhito moonthonu oodhdhi malettay aparay qhawho moontho kula hadhdhi ye qaghikka.
14 Muuse Qhamu mandhooma tawwoosia kaarkko saappeema rakku kula Miʼaye Qhawhitokka qhamussa kula kaarko saappa dhisame Uso gheeqasa.
15 Olissakka olhu namaallay hasa kodhdhi,
hoYettay dhukkaysadha kaasay qhamu qagho perre ye hume sheeghena taayyaninu.”
16 Ho Usottay dhukkaysadha kaasay qahgo perre ye hume sheeghenna qhmu tayyninu dhiishoy qhamu ye patninnu Haallikko hu Miʼaye huusu toʼokoosi teexi piyye qhaatʼesi qhooti uuma cʼikadhi maallay.
17 Haallikko Miʼaye Huususi olhu namaallay piyye qhaatʼe kula eraki,
piyye qhaatʼe Usottay qhamu dhintinu dhiishay qhamu na qhaqhamintinu qandhikka.
18 Ho Usottay dhukkaysadhasa yena qhaqhaminti,
naqharray ho Usottay ye dhukkaysadhussa qhooti Miʼayeesi Haallikkito toʼokottay ye dhukkaysadhu maallay qharaʼita inna qhaqhamti.
19 Qhaqhittissakka thisi:
hammakko piyye qhaatʼe kula okayi,
naqharray kodhmo korito homagha qhooti kodhdhi maallay hammakito kaanta thukkankoosikki cʼikadhe.
20 Moʼo malla payni qhawho kodhmo magha kodha kaasay Hammakkoosi ishshikka,
kodhmussa huusu magha qhamu yena armaninnu hammakko kula ye okayikka.
21 Naqharray qhawho olho dhukatte kodha hammakko kulakki okayi,
olhu namaallay hammakko kula okayikka olissa huusu ikodhi hayo Haallikkitottay qhamu kodhdhissa tomooma qhamu armaninu.
Shoxampakko Yohannise Qhoota Iyyesusekki qalli
22 Xaysa tupettay Iyyesuse kolladhampawhe huusu qali karo piyye Yihuta kula ashshi,
koro piyyisanasikka isi shoxatte shoxapa usundhe qale kuyyaqqe qhacʼa oladhu.
23 Xinkissana Yohannisekka xaytossi Henon ana payi Saalemena kanta qaghana qandhadhe qhooti qaghe maallay haamattekki korosi shoxatte shoxi,
korokka shoxatte shoxadhenu isi na kula okaya.
24 Olissa Yohannise haannay ye shappamunna qharaʼita ikkodhdhamadhi.
25 Kolladhampawhe Yohanniseppa koro Ayhutatte qhoota tampe alheessatte kaaʼitha illethamakkadhe.
26 Kolladhampawhe Yohannisekki Yohannise kula okayipa hasa na payonki:
“Kollisampakko kulay,
qhawhossi kora kolle Yortanoosenna afeete hoqale qaghapa athokka qhoota huusu torruyay koro kaasakki Uso kula ashshipa Usokka isi shoxatte shoxa.”
27 Yohannisekka hasi payipa nu holasu:
“Apayni Haallikkokki moonthonu yenu teexu payni qhawho olho thoʼokosikakki sheeghe ye alkasnikka.
28 Qhamo an hunena payina ‹Ano Uso qharaʼitha an erkami dhiishay ano Kristoose qaandhisa› hune aʼapaqhte.
29 Qhawho xaante sheegha usokki akampakko,
naqharray uyaththitto apaqhasenu nakapeemi shikkaari,
ikkitto akampakitosikki apaqhi payni ihxhxasoodha,
hussa maallay hxaso hayyukka haadhi husi,
hantu idhdhikkadhi.
30 Uso yela ghule gheeqasa,
ano nakala qhacʼe ye gheeqasa.”
31 Ho ghutanu okayna kasanna ghula,
ho piyyatekka ho piyynna,
olho piyyinakki Ithorruyi,
ho moontonu okayna ho kaasannu ghula.
32 Usokka olhu hiʼipa olhu apaqhisikki qalli,
naqharray qhawho misikirunko huusuusi akkadha ye qaghikka.
33 Qhawho thorre huususi akkadha kapay Haallikko qhamu dhukampakko kodhdhissa iʼarasa.
34 Haallikko Nasso huususi ye bhatʼunna qhooti koro teexi maallay,
qhawho Haallikko erakikka Kʼaale Haallikkitoosikki torruyi.
35 Paappo Miʼaye huusuusi icʼikadha,
olho kaasaasikka xarghgho huususa nu teexu.
36 Qhawho Miʼaye Haallikkito dhukkaysadha qagho ye hume sheeghisikki taayanni,
naqharray qhawho Usoosi ye dhukkaysadhu miira Haallikkito na qale qaakna dhiishay qaghosi ye taayyanikka.