Iyyesusepa Xiskattossi Piyye Semmariyanna
4
Feresaawadhdhe Iyyesuse kolladhampawhe Yohannisennu qhamu ghulasipa isi shoxatette shoxaasi i’apaqhe.
2 Ikkodhdhitama kapay he shoxatte shoxakka kolladhampawhe huusu dhiishay Uso qandhikka.
3 Iyyesusekka iʼolissaasi apaqhina piyye Yihutaasi ihxhxuripa karo piyye Kalila kula ashshoy.
4 Ihaaha kula ashshana piyye Semmariyanna kittaʼitha lighe uso gheeqasa.
5 Hussa maallay kathamassi piyye Semmariyanna kittatte qagha pashossi Yaykʼoope miʼaye huusu Yoosefenu teexina kaanta Sikar ana payi kula ashshoy.
6 Xaytusanakka hxohxno qandheete ho Yaykʼoopekki qagha,
Iyyesusekka qhooti onke sikaapannu okayi maallay ittardhdhipa hxohxnossi qandheete kapeema qakkadhu,
xinkisana saathe tappi hxafinti.
7 Xinkissana xiskatakko tootte semmarawite hxohxonussa kula qandhe meeghenu okayi.
Iyyesusekka xiskathossinna inna payi:
“Into qandhe ye teexma an quknaaye!”
8 Xinkissana kolladhampawhe huusu yiitho pitamenukki karo kathama kula ashshe.
9 Semmarawittessikka hasi paytipa Iyyesusenu holasi:
“Atho mala qhawho piyye Ayhutattena kodhdhitipa ano semmarawittatte isa qandhe quktatte kasqadhay?”
Hussa payyo koro piyye Ayhutattena koro piyye Semmariya illay iʼille shikka.
10 Iyyesusekka hasi na payi:
“Teexakko Haallikkitopa qhawhussa hela ‹qandhe qukeete kasqadha› qhamu yaxa kodhdhikki aʼarti payni ahxay ho Usona kasqannakki atho,
Usokka qandhe qaghitoosi he teexu”.
11 Isekka hasi paytipa nu holasi:
“Atho ho kaanasamti,
olho aqandhettay meeghghinti athu sheeghitikka,
hxohxnokka hakathakko uumattekki sikaapi,
emma ata qandhe qaghitoosi xankanna tayinti?
12 Kati Atho paappo haani Yaykʼoopesi hxohxnu qandheetesi ineteexnu aghghulay?
Usopa dhelle huusu pana qholadhdhe huusukka qaandhi hxohxnunakki quke.”
13 Iyyesusekka hasi payipa nu holasu:
“Qhawho qaandhi hxohxnunna quki kaasay ihhollapa dheepodhu,
14 kapay qhawho qaandhissa ano teexnina quki qelho qaghito perre ye hume sheeghikki poorko huusuna lighna.”
15 Xiskattosikka hasi paytipa Iyyesusesi kasqadhi:
“Xaynu koru qhamu anu dheeponnippa qandhe meeghghenu hassa kula holanu akko maʼala thaahu qaandhissa hasa lighaasi ye teex!”
16 Iyyesusekka inna payina:
“Ashshapa tʼiirakko haahisi ooqappa okayattay.”
17 Xiskattossikka hasi paytipa nu holasi:
“Tʼiirakko anu sheeghikka.”
Xinkissana Iyyesuse hasi na payi:
“Tʼiirakko anu sheeghi paye haahi pare,
18 qharro tʼiirakko hxupinki ashsheghti,
hussa hantu he qale qaghakka tʼiirakko haahi qaandhi,
hussa maallay dhuke aqqallatti.”
19 Xiskattossikka hasi na payiti:
“Atho hxuumampakko qhamo akkodhdhitisa haannakki anho upadhi.
20 Appadhdhe haani ghupunna saappeete isakate,
naqharray hune aʼiyyankunna koro xaytu nasakate gheeqasti Iyyerusaalemema.”
21 Iyyesusekka hasi na payi:
“Atho xiskattu,
kuyyaqko Haallikko Appanu ghupu saappa taakki kathama Iyyerusaalemessa huni nu sakatinte qhamu okaynisa ara.
22 Hune Semmarawadhdhe Waako huni artenukki assakatte,
naqharray ine dhinko qhooti koro Ayhutatte kaakkoru okayni maallay Waako an arrinukki an sakatni.
23 Kuyyaqko koro Haallikko Appanu dhukepa Nassottay innu sakkatnekki okayna,
hussakka hantu iʼokayi,
Haallikko Appakka koro hasa nu sakatnasikki iwwoʼi.
24 Haallikko Nasso,
koro Usoosi sakatnakka Nassopa dhukettay nu sakate usundhe gheeqasa.”
25 Xiskattosikka hasi payti:
“Kristoose qhamu okaynisa an ara,
Uso okayi payni olho kaasaasiki iʼine qallini”.
26 Iyyesusekka inna payi “Haadhi kulay qhawhussa hantu heema qalladha Ano Uso”.
27 Xinkissana kolladhampawhe huusu xaytossi inna kula ashshenu iholleppa okayonki,
Iyyesuse xiskatto qale torruyadhe thuusuttay dhahxhxonki.
Ikkodhdhitama kapay qhawho na payina:
“Mawwooti?”
Taakinti “Moonukka ise qale qallati?”
ye qaghikka.
28 Xaysa tupettay xiskatossi sighte thiisisi qandhe kapeemi ihela hxurtipa kathama kula ashshoppa korito hasa na payippa nu qalli:
29 “Akko into okayapa qhawho toʼon ho olho an kodhi kaasaasi yela qalliisi eemonku!
Yaxaray Kristoose kodhdhini perinna?”
30 Korokka kathamanu illighipa Iyyesuse kula ashshoy.
31 Xinkissana kolladhampawhe huusu Iyyesusena hasi na payeppa waatadhonki:
“Kollisampakko,
yiʼo yiʼa atam!”
32 Naqharray Uso hasi usundhena payi:
“Yiitho Hayyu Ano yiʼi ho huni arteki an sheeghi.”
33 Hussa maallay kolladhampawhessi hasi illena papaye:
“Akko peri qhawho toʼonki yiitottay nu okayina?”
34 Iyyesusekka hasi na payi:
“Yiʼo Hayyu hossi ye erakina woʼoko Huususi kodhepa kodhmo Huususi dhikkise.
35 Keenni huni paytenna ghimakkonu leeqayo salaxki ghayya?
Naqharray Ano an hunena paayyana into qila payapa ghimakko qhamu hxafisa pashsheesi eemonku.
36 Qhawho ghimakka hxayyi akkanni,
holuppa ibhbhisa ighghimikka qagho perre ye hume sheeghenu illa holasu,
Hussa maallay ho pooxipa ho ghimika illeqali hxasoonne.
37 Hussa maallay qhamosi payina:
‹Qhawho tookko ipooxa,
tokkokka ighghima› dhukke.
38 Anokka olho huni na tardhonkuusi ghimenukki an hune eraki,
tookke kodhmottaakki tardhe,
naqharray hune awshosssi usundhe na tardheesikki aghimte.”
39 Xiskkattosikka qhooti paytina “Olho an kodhi kaasaasiki yela qalli” pa masakarri maallay koro kisha kathamissa Semmariyanna Uso dhukkaysadhi.
40 Hussa maallay koro piyye Semmariyanna Iyyesuse kula okayipa qhamu usundhe qale gheyyininu waathadhonki.
Usokka kuyyaqko lakki usundhe qale ghayyoy.
41 Kollise thuusuna paayyatti koro pile ho kisha Uso dhukkaysadhi.
42 Korossika xiskathosinna inna payi:
“Lammi ine olho ana maallay dhukkaysanni qhoota ato ineesi qallitinu patta qandhikka,
ine pukkaqate thaanina an apaqhini karayka Uso dhinisisampakko piyye qhaatʼete qhamu kodhdhisa an arri.”
Iyyesuse Miʼaye Rafisampakitosiki Dhinisi
43 Kuyyaqako lakki tupettay ihholipa piyye Kalila kula ashshoy.
44 Iyyesuse pukkaqatuusuna qhamu “Hxuumampakko piyye thuusuna ye kaanasami” qharaʼitha iqqalli.
45 Ipiyye Kalilanna hxafina koro Kalilakka hxasotaakki Uso akkadhe,
momaalla payni usundhekka kuyyaqakossi Paale Fasikanna qhooti kathama Iyyerusaaleme kula ashsheppa olhossi Iyyesuse kodhi kaasaasi hiʼonki maallay.
46 Xaysa tupettay Iyyesuse kathamassi piyye Kalilanna kittatte qagha Ana kʼaana payipa qandhsi tʼayye woynatte kodhdhu kulakki holipa ashshoy.
Xinkissana piyye Kʼifirnahoomenna rafisampawhe mankistatena kittatte qhawho tookko ho mʼiaye huusu na udhami qagha.
47 Qhawhusakka Iyyesuse qhamu ippiyye Yihutannu karo piyye Kalila kula okayisikki apaqhipa Uso kula ashshoy.
Iyyesuse qhamu ippiyye Kʼifirenahoome kula oodhiniisippa miʼayeesi huusu farteema na itʼuyisi nu dhiniisisunu Iyyesuse waathadhu.
48 Iyyesusekka hasi na payi:
“Hune milikitepa dhahxhxootekki huni hiʼonku payni huni dhukkaysate!”
49 Rafisampakkossi Iyyesusena hasi na payipa waathadhu:
“Akko maʼala Pogholho hayyu,
miʼaye hayyu ye farunna qharraʼitha waadhpa dhaghghapay.”
50 Iyyesusekka inna pay:
“Manne haahu kula qaakama,
miʼaye haahu idhdhinnaye.”
Qhawhossikka qalliitessi Iyyesuse qallisikki dhukkaysadhipa ashshoy.
51 Immanne kula holana kodhampawhe manne huusunakki onkatte na lighipa na payonki:
“Miʼaye haahu kulay idhdhini”.
52 Usokka hasi payipa kasqadhu:
“Saathe mala lighanakki inna woyyi?”
Usundhekka hasina payeppa nu holasonki:
“Thornosi keeray saate taxxannakki na sali.”
53 Paappossi miʼaayyattekka saathessi keeray Iyyesuse na payina:
“Miʼaye haahu idhdhinna” qhamu kodhdhitisa iʼari,
hussa maallay xaysannu koru usopa ahxke huusu manneete kaasay Iyyesusessi dhukkaysadhonki.
54 Iyyesuse dhahxhxootisay ippiyye Yihutannu ashshipa piyye Kalilassa kodhu dhahxhxoote lankay.