Iyyesuse Qhawho ghoghopi Dhinisi
5
Xaysa tupettay paale koro Ayhutattena qhooti kodhdhiti maallay Iyyesuse karo kathama Iyyerusaaleme kulakki hadhdhi.
2 Kathamassi Iyyerusaalemenna xayto mankaxxe qemmeetena kaanta pako Ipraystʼatettay Peetesayta ana payinaki qandhe qelho tipatte qaghe.
Qaandhisana kaanta xayto ana kasuyadhi hxupinki qagha.
3 Koro kisha ho udhdhamapa taafawhepa thonnawhe pana qopawhe qaandhisa hxohxnito qagha kapeema rafeppa isi lehmakko qaandhisana tiqitadha.
4 Xeere tootte tootte Erkampatte Haallikkito qaandhisa kula iʼokayappa isi leehisti,
qaandhisa illeehe tupettay qhawho qharitteema na kitteema xuli udhanko kaasanna idhdhina.
5 Xaytusana qhawho perko hudhanko izexpa sette udhami qagha.
6 Iyyesusekka qhawhossi xaytusana rafaasi ihiʼina qhamu perre kisha udhamaasikki na aripa hasa na payu:
“Inta dhine awwoʼay?”
7 Qhawhossi udhamakka hasi payipa nu holasu:
“Pogholho hayyu,
kulay qandhissa illeehe payni qhawho ye akkinapa qaandhissa kitteema ye xulisu anu sheeghikka;
ano haannay anna oodhana qhawho pile iyyela inthawapa isina oodhi.”
8 Iyyesusekka hasi na payi:
“Haqpa qafte thaahu dhooqhadhoppa ashshoy!”
9 Qhawhosikka hattakki dhiniisipa qafte thuususi dhooqhadhoppa manne huusu kula qaakkoy.
Kuyyaqku na dhinikka kuyyaqko hxaysinko koro Ayhutattena,
10 hussa maallay inthawampawhessi koro Ayhutattena qhawhossi dhiniisina hasi na paye:
“Kuyyu kuyyaqko hxaysinkito qhooti kodhdhi maallay qafte thaahuusi dhooqhadhenu hikke ye paayyukka”.
11 Naqharray uso hasi payipa nu holasu:
“Kulay qhawhossi ye dhiniisikki ye lapayina ‹qafte thaahuusi dhooqhadhapa ashshoy›.”
12 Usundhdhekka hasi payeppa kasqadhonki:
“Qhawhusa yaxa holapayina qafte taahuusi dhooqhadhapa ashshoy?”
13 Naqharray xaytusana waarsho qhooti uuma naqi maallay Iyyesuse inna kaanta laaghamipa na minta dhapadhu,
qhawhossikka qhamu yaxa uso dhiniisisisa ye aruka.
14 Xaysa tupettay Iyyesuse qhawhossiisi Manne kʼulkʼullawhatena ghintate itayipa hasa na payu:
“Haadhi,
hantu adhintiye,
rakko husinu ghula qhamu ye hooma hxafninu xaynu koru cʼuppo olo kodhi”.
15 Qhawhossikka qhamu Iyyesuse uso dhiniisisa iʼashshipa Rafisampawhessi koro Ayhutattenu qallu.
16 Qhooti kuyyaqako hxaysinkitona dhiniisi maallay rafisampawhe koro Ayhutattena Iyyesusessi ghoghori paaye.
17 Naqharray Iyyesuse hasi payipa nu holasu:
“Paappo hayyu kuyyaqqe kaasakki kodhadhi,
Anokka an kodhanna.”
18 Lammi Rafisampawhessi Ayhutatte,
Iyyesuse qhooti kuyyaqako hxaysinkitoosi puli maalla patta qandhimma qhooti iyyina “Haallikko Paappo hayyu” pa Uso qale he hitaxisu maallay Uso poghenuki na haqe.
19 Iyyesusekka hasi payipa nu holasu:
“Dhuke dhuke an hune qalli,
olhossi Haallikko Paappo kodhdhipa hiʼuusi patta kikodhi dhiishay Miʼaye Huusu pukkaqatuusuna olho toʼokokaki kodhe ye alkasnika,
olhossi Paappo kodhiisi Miʼayeka usoosiki kodhi.
20 Paappo Miʼayeesi qhooti cʼikadhi maallay olhu konni kaasaasi innu hiʼasa,
hunekka qhamo adhahxhxintenu olho husinu ghulaasiki innuhiʼasni.
21 Haallikko Paappo koro farriisi qhamu iffartatte haqisipa isinu qagho teexa kula,
Miʼayekka qhawhu woʼinukki qagho teexi.
22 Paappo qhawho toʼokomakkakki qhaqhitte ye qhaqhni,
naqharray qhaqhitte kaasaasi Miʼayenukki teexi.
23 Olhunnu hasa kodhikka,
koro kaasay qhamu Ipaappo kaanasi kula,
Miʼayeesika qhamu kaanasnenu,
qhawho Miʼayeesi ye kaanasi,
Paapposi Miʼaye erakisika ye kaanasni.
24 “Dhuke dhuke an hune qalli,
qhawho Kʼaale thayyusi apaqhipa Hossi ye erakisi dhukkaysadhu qagho perre ye hume sheeghesikki taayyani,
usokka fartatte karo qaghito ittahxhxi dhiishay qhaqhitte kula ye okaynikka.
25 Dhuke,
an hune qalli,
kuyyaqku koro farri ikkitto Miʼaye Haallikkitona apaqhnikki okayna,
hussakka hantu iʼokay,
he apaqhekka qaghotaakki qaakne.
26 Paappo pukkaqatuusuna qhamu qelho qaghito kodhdhi kula Miʼayeesika qelho qaghito ikodhdhi.
27 Miʼaye Qhawhito (Kiristoose) qhooti kodhdhi maallay qhamu qhaqhitte qhaqhninuki humna nu teexi.
28 Olissattay olo dhahxhxemma koro faripa isi hawleete kaala qagha kaasay kuyaqkuna ikkitto Huususi apaqhnekki okaynaye.
29 Koro kodhmo xeesasi kodhi fartatte ihaqnapa qaghota qaakoy,
naqharray koro kodhmo magha kodhi fartatte ihaqanapa ana qhaqhitte qhaqhu.
30 Ano pukkaqte thayyuna qawni olho toʼokkokka kodhe anu alkasni,
naqharray qhamosi Paappona an apaqhisa an qhaqhitte qhaqhi,
Hossi ye erakina woʼoko huusu patta an kodhi dhiishay woʼoko hayyusi qhoota anu kodhi maallay qhaqhitte tayyu pare.”
Misikirunko Qhoota Iyyesuse
31 “Ano qhoota hayyu masakara payni misikirunko Hayyu dhuke ye kodhdhini.
32 Naqharray qhawho pile ho qhoota hayyu masakara qagha,
Usokka misikirunkusa iqhoota Haayyu masakari dhuke qhamu kodhdhisa An ara.
33 Hunekka Yohannise kula koro aʼerakte,
usokka dhukeesikki hela masakari.
34 Qhamu hune dhinisintenuki an hasa hunena pay dhiishay Ano misikirunko koritoosi anu woʼi.
35 Yohannisekka Hammakkosi sipinapa isi haaha,
naqharray hune kuyyaqqe qhacʼasa ahammakko huusuttay hxasoodhe woote.
36 “Naqharray Ano misikirunko Yohannisenu ho ghula an sheeghi,
hussakka kodhmossi qhama kodhninu Paappo Hayyu ye teexi,
kodhmu an kodhadhi qhamu Paappo ye erakkisa iyyeemasakara.
37 “Paapposi hayyu ye erakikka qhoota haayyu masakari,
naqharray hune ikkitto Huususi huni apaqhonku,
qhamo immala lighisaka huni hiʼonku.
38 Hossi Uso erakisi qhooti huni dhukkaysate maallay hunena kittatte Kʼaale thuusu ye qaghtikka.
39 Hune qagho perre ye hume sheeghesi Matʼaafaddhhe Kʼulkʼullawhatte kittatte attaayyadhinteki hune lightipa isa usundhe nanapapanku,
naqharray usundhekka qhoota haayyu thorruye.
40 Ikkodhdhitama kapay hune qagho tayadhenu Ye kula okaye huni woote.
41 “Ano kaanaste qhawho ye teexisi anu woʼi.
42 Saghghe haahundhina kittatte cʼikno Haallikkito qhamu ye qaghisa an hunena ara.
43 “Ano makaxko Paappo hayyutakki an okkayna huneye akkadhonku,
naqharray qhawho pile makaxko huusuttay okayna payni aʼuso akkannanku.
44 Hune he pukkaqte pukkaqteema illena kaanaste ghegheeqa,
naqharray kaanasteesi Haallikko toʼokitoosi isi huni woote,
malaala Yeesi dhukkaysadhe alkasinte?
45 “Ho Paappo Hayyu miinteema hune kasaasa Inti ano hunelighumma kulay Muuseesi akippo kodhatteki hune kasasa.
46 Muuse qhoota hayyu tooxi maallay usoosikki adhukkaysatte payni Yeesikka ayye dhukkaysannaku ahxay.
47 Hossi uso tooxisikki huni dhukkaysadhonku payni qalliithe Tayyusi malaala dhukkaysadhinte?”