Qhamu Foolisadhdhe Iyyesusena Xikke
19
Xaysa tupettay Pilatʼoose Iyyesuseesi ghapasipa thubhbhasoy.
2 Korossi orxankitokka qhatʼmi mareppa pukkaqteema na qadhdhonki,
laalle idhdhaasikka urkesonki.
3 Isi na hoholettay hasa na papaya:
“Nukusa Ayhutatte kaanasamti nakayho ihho kodhdha” pa isi kakanaqsadha.
4 Pilatʼoosekka ihholi lighuppa korossinna na payu:
“Ano qhawhunna dhappitte thoottekka qhamu anu natayuusi qhama artennu Usoosi ghinte kulakki an hune lihasni.”
5 Iyyesusekka qhatʼmesi ana maripa laalle idhdhaasikki urkuyipa ghinte kula lighu;
Pilatʼoosekka korossinna inna pay:
“Haadhi qhawhossi!”
6 Rafisampawhe kʼeesadheetepa korossi zape tiqadha Iyyesusesi ihiʼenna hasi payeppa riironki:
“Maskʼalaama dhis!
Maskʼalaama dhis!”
Naqharray Pilatʼoose inna payi:
“Ano dhappitte thoʼottekakki anu na tayu maallay awwoʼanku payni hune akkapa maskʼalaama dhisanku.”
7 Koro Ayhutattekka ippaya:
“Qhawhu Miʼaye Haallikkito ihekodhi,
hussa maallay ine hikke an sheeknippa qhamo tampe taani kula fare uso gheeqasa.”
8 Pilatʼoose olissa kaasaasi iʼapaqhina uumi ghaapi;
9 ghinte kula holuppa Iyyesusena hasa paayu:
“Atho ahanukka okayti?”
Naqharray Iyyesuse yenuh olasu.
10 Hussa maallay Pilatʼoose inna pay:
“Athu ye qallinti?
Ano ho dhiseenu takki ho ishighenu qhama ghulno sheeghisa athu arti?”
11 Iyyesusekka inna pay:
“Haallikkokki yeho teexu ghulno payni ahxay yela saappeete humna athu sheeghti;
ikkodhdhitama kapay hussa yeesi likkasipa ye teexuንna cʼuppo ho ghulakki naqagha.”
12 Hussa maallay Pilatʼoose qalliithessi Iyyesuse qalladhi iʼapaqhina ishighepa hxurre inna woʼi,
naqharray koro Ayhutatte hasi payeppa na riironki:
“Qhawhukka ishighti payni atho dhaliththo Kʼesaare qaandhi,a
ho pukkaqte thuususi nukusa kodha kaasay Kʼeesarena parakara.”
13 Pilatʼoose ihussaasi apaqhina Iyyesusesi ghintatte hinaase kulakki lihasipa xaytossi uso qhaqhittenu na qakkadhisa:
“Awruko Ghandhaqqa” ana payisa qakkadhu;
xaytusanakka pako Aramaykatettay Gapatha ana payi.
14 Kuyaqkussakka kuyyaqko Paale Faasikannu ana gharsadhina kuyyaqte saathe thappi kula ghaqitti ihxaft ina Pilatʼoose koro Ayhutattena hasi napayi:
“Haadhi Nukusassi haahundhi!”
15 Naqharray usundhe hasi payeppa riironki:
“Patis!
Patis!
Maskʼalaama dhis!”
Pilatʼoosekka inna payina:
“Nukusa haahundhiisi maskʼalaama an dhisna?”
Rafisampawhe kʼeesadheetekka hasi payeppa nu holasonki:
“Kʼesaare malettay nikusa pile ini sheeghni.”
16 Dhikkattatte Pilatʼoosekka qhamu maskʼalaama dhisnenukki likkasipa nu teexu.
Korossi orxankitokka Iyyesusesi ghapuppa ashshottay.
Maskʼalaama Dhisame Iyyesuse
17 Usokka maskʼalakko huususikki dhooqhadhipa xaytossi pako aramaykattettay Kolkoota ana payi xayto pukkaqate qhawhito ana asaappa hadhdhu;
18 Haamakka dhisoonki,
Uso qalekka qhawho lakki tookkosi pixxatte kaaqila tookkosikka misikitto kaaqila Iyyesusessi kitteqila kodhonippa dhisonki.
19 Pilatʼoosekka hasi payipa tooxoy “Nukusa Ayhutatte Iyyesuse Naazrathe” pa maskʼalana qharo sappa kutu rakku.
20 Xaytussa ana Iyyesusesi maskʼalakkooma dhisikka qooti ho kathamana kaanta qagha kodhdhi maallay koro Ayhutatte tooxessiisi inappape;
tooxisakka ho atooxi pako Aramaykatepa pako Girikatte pana pako Latinatettay.
21 Rafisampawhe kʼeesadhe koro Ayhutattena Pilatʼoosesi toorettay inna paye:
hasa paypa tooxoy “qhawhu iʼiyya ‹Ano Nukusa Ayihutatte,›
dhiishoy ‹Qhawhu Nukusa ayhutatte› olo payi.”
22 Pilatʼoosekka inna payi:
“Ano ho an tooxisi,
an tooxi.”
23 Foolissadhekka Iyyesusesi idhdhise tupettay laalle thuusuusikki akkeppa qhawho kaasannu qhamu hxafintinu xayto salaxsa qhootadhonki;
laallessi akkoothenu kalu qadhadhisikka qhamussa kulakki kodhe;
naqharray laallisakka the kutanu kalasa olo teelunna akkodhdhi.
24 Hussa maallay foolisadhdhessi iʼilena payenna:
“Qhamu yaxaasi dhaghapinti arenu itʼa na kʼuranipa kaaqe hxurri.”
Hussakka qhamossi Matʼaafa Kʼulkʼullito paayyamti:
“Laalladhe Hayyuusikka iqhootadhe,
thessi koothenu kalu aqadhadhisikka itʼa inna kʼuradhe”b kʼaalissa qhamu dhikkadhintinu;
Foolissadhekka hasi kodhe.
25 Xinkissana maskʼala Iyyesusena kaanta yaaye tuusupa qase tiisipa naxaye Kʼelopʼa Mariyaamepa Mariyaame piyye Mektelanakki shikkaara.
26 Iyyesuse kolladhampakkossi huusu icʼikadhi iyyaye thuusuna kaanta shikkaarapa hiʼunna yaaye thuusuna inna pay:
“Yayye thayyu,
haadhi miʼaye haahi!”
27 Xaysa tupettay Iyyesuse kolladhampakos ina pay:
“Haadhi,
yaaye taahu!”
Xinkisanu paayyatti kolladhampakosi iseesi iʼakkipa karo manne huusu kula ashshottay.
Farte Iyyesuse
28 Xaysa tupettay Iyyesuse olho kaasay qhamu dhikkadhisa iʼaripa kʼaalessi Matʼaafa Kʼulkʼullooma tooxamti qhamu dhikkadhintinuc “An dheepodhi” payu.
29 Xaysannakka maahxatho ho ana olho makasha hoqhqhashipa xawadhukki qagha;
usundhekka olho saaqhe lighaasikki akkeppa olhossi makasha kitteema qadhdhokippa kaarkko sikaapa ho ana hisopʼe payittay Iyyesusena pakooma itʼoosonki.
30 Iyyesusekka quktessi makashaaasi iqukki tupettay “Idhdhikkatti” ippayipa piyye kula hela amo hxurruppa napse thuusuusi hela teexu.
Qhamua Iyyesusena ghinaqqe Dhothi
31 Kuyyaqkusakka ho koro Ayhutatte kuyyaqko hxaysinkitonu ana gharsadhi qhooti kodhdhi maallay korussa amaskʼaladheema dhisi kuyyaqko xaxysinkitona maskʼala saappeema nakaye qhooti ye gheeqasti maallay qhamu an taffe ghoghondhinipa aʼodhdhasunukki Ippilatʼoose waatadhe.
32 Hussa maallay foolisadhdhe iʼashsheppa hessi Iyyesuse qale amaskʼaladheema dhisina taffe ghoghondhonki.
33 Naqharray Iyyesuse kula iʼokayenna Uso qhooti fari maallay Usona tafo yena ghondhonki.
34 Naqharray foolissadhisana kittatte tookko orxankotaakki ghinaqeema dhothina minakalti kʼeeqhtepa qandhe na lighe.
35 Hossi olissa hiʼikka hune qhama dhukkaysadhintenuki qalli,
qalliithe thuusukka dhuke,
dhukissay iqalladhikka uso iʼara.
36 Olhunnu hasa kodhdhikka kʼaalessi Matʼaafa Kʼulkʼullito iyyanna :
“Usona meqhte thoʼottekakki yena ghondhamnti”d qhamu dhikkadhintinu.
37 Holuppa Matʼaafa Kʼulkʼullito ipaayyana:
“Hossi idhdhoteesi ihiinanki.”e
Maayame Iyyesuse
38 Xaysa tupettay qhawho tooko Yoosefe ana payi ho piyye Armatiyannu okayi qagha,
ususakka qhooti koro Ayhudhatte ghaapi maallay bhadhdhamtettakki Kolladhampakko Iyyesuse kodhdhi,
qhawhussakka pukkaqqo Iyyesusesi akkininukki Pilatʼoose waathadhi;
Pilatʼoosekka inna payi ashshapa akkay,
usokka iʼashshipa pukkaqosiisi akku.
39 Haqharaʼitha qhawhossi awne Iyyesuse kula okayi ana Nikʼotimoose payi shiththo ho kaarko ho ana karpepa qarkakko payina akodhdhi ho kiilo 34 hxafasnaasikki ghapadhipa okayuttay.
40 Qhawhusa lakki pukkaqqo Iyyesusessi iʼakkeppa qhamo kollinko koro Ayhutatte kula qhatʼtʼonkippa shiththossittay shiinonkippa laalle xaffattettay maronki.
41 Xaysay ana Iyyesuse maskʼalaama dhisina kaanta xayto dhishtito qagha;
xaytusa dhishtitona kittatte hawle he apara olona qhawho maayyukki qagha.
42 Kuyyaqkusakka ho koro Ayhutatte kuyyaqko hxaysinkitonu ana gharsadhi qhooti kodhdhipa hawlekka he itʼtʼa kodhdhonki maallay pukkaqqo Iyyesusesi haami maaye.