Iyyesuse Fartatte Iʼhaqi
20
Mariyaamessi piyye Mektelana sanpatana sinkato awnetaakki haqtipa hawle Iyyesuse kula ashshoy,
ixaytossinna hxaftina awrukkosi ho hawleete saappete akkamisikki hiiti.
2 Hussa maallay,
isekka Simiʼoonessi ana payi Petʼiroosepa kolladhampakko tokkosi Iyyesuse cʼikadhi kulakki hermathottay ashshitipa hasa na payi:
“Kulay Pogholhossi hawleete kittatte iyyukeppa akkonki,
xayto inna xawadheesi ini arrikka.”
3 Xinkissana Petʼiroosepa kolladhampako tokkossi illigheppa hawlesi kula ashshonki.
4 Usundhe lakkintoy illeqali kiʼame,
naqharray kolladhampakko tokkossi Petʼiroosena inna inthawipa qhariteema hawlesinna hxafoy.
5 Hawlessi kula ikahipa emmona laallessi pukkaqqottay amarisikki hiʼi,
naqharray hawle kitteema ye oodhu.
6 Simiʼoonessi ana payi Petʼiroosekka inna kanta hxafipa hawlessi kitteema oodhu,
usokka iʼemmina laallessi apukaqottay marisikki xaytusana hiʼi,
7 kacʼaressi Aʼiyyesusena pukkaqe itha marisikki hiʼi,
kacʼarisakka the qawni illamaramtiisiki xayto pilakito hiʼi.
8 Nakaleemakka kolladhampakko tokkosi qharritteema okayika hawle kitteemaki xullipa hiʼuppa dhukkaysadhu.
9 Hussakka Kʼaalessi Matʼaafa Kʼulkʼullito payana:
“Fartatte haqe Uso gheeqasa” qhooti yenu xulunnu.
10 Xaysa tupettay kolladhampawhe lakkissi iholleppa mannadhdhe huusundhi kula ashshonki.
Iyyesuse Mariyaame Piyye Mektalanukki Armadhi
11 Mariyaamessi piyye Mektalana hawle kapeemi shikkaartipa isiʼ oyay,
kahhipap hawlessisi kittekata eemoy.
12 Xaytossi pukkaqo Iyyesuse qaghina erkampatte lakki he lalladhdhe piqiooma urkesadhe tootte kutakutuy toote kala kaluy qakkadhaasikki hiiti.
13 Usundhekka Mariyaamena inna paye:
“Atho xiskattu moʼonukka ooyti?”
Isekka inna payti:
“Pogholho hayyusikki akke,
xaytuna xawwadhesikka anu ari.”
14 Iʼhasa paytipa konankonnaye eemmadhdhinna Iyyesuse ho shikkarasikki hiiti,
naqharray Iyyesuse qhamu kodhdhisa ye arukka.
15 Iyyesusekka inna pay:
“Atho xiskattu,
moʼonukka ooyti?
Ata yaxaasikka gheeqti?”
Isekka qhawho dhishto tiʼqithadha innu lighipa hasa na payi:
“Akko qhawho hayyu,
maʼala thaahu,
atho akki payni xankassa qhama xawwatisa ye hiʼasma an akkinaye.”
16 Iyyesusekka inna payi:
“Mariyaame” isekka Uso kulakki laaghammitipa pako Ipraystʼatettay hasa napayi:
“Repuni” hussa payyo “Kollisampako.”
17 Iyyesusekka inna pay:
“Ano haannay Paappo haayyu kula qhooti anu hadhdhu maallay olo ye ghappadhi,
naqharray dhaliththo haayyu kula ashshapa napaayyana:
‹Paappo hayyupa Paappo haahundhi kula,
Waako hayyupa Waako haahundhi kulakka an hadhiniisi›”.
18 Mariyaamessi piyye Mektelanakka kolladhampawhessi Huusu kulakki ashshitipa hasa na payi:
“Pogholhosi kulay an hiʼi!”
Olhossi Uso napayisikka nu qalli.
Iyyesuse Kolladhampawhe Huusunukki Armadhi
19 Xinkesina torppana kuyyaqko paayyootatena,
sanpatana kalapo kolladhampawhessi Huusu Rafisampawhessi koro Ayhutattenakki ghaapeppa manne kaleema illa holonkippa heema mankaxadhdhe kʼuponkinna Iyyesuse iʼokayi usundhe kitta shikkaaruppa hasa napayu:
“Nakayho ihune kodhdha!”
20 Ihhasa napayi tupettay xarghghe huusupa ghinaqakko huusuusi nu hiʼaasu,
usundhekka ippogholho hiʼenna uumatti hxasoodhe.
21 Xaysa tupettay Iyyesuse ihholipa hasa na payu:
“Nakayho ihune kodhdha!
Qhamossi Paappo yeesi eraki kula Anokka an hune erakna.”
22 Ihhasa payi tupettay “Uff” kinna payipa inna iyyana:
“Nasso Kʼulkʼuloosi akkadha.
23 Hune koronu cʼuppo haahundhi ihune hxurama payi payni innu hxuramna apayni hune koronu cʼuppo haahundhi ihune hxurama huni payonkuyi payni yenu hxuramni.a”
Iyyesusepa Thomaase
24 Iyyesuse kuyyaqkossi ikkolladhampawhe huusu kula okayna Titimosessib ana Thomaase payi ye usundhe qale qaghikka.
25 Hussa maallay,
kolladhampawhe tookkessi Thomaasena hasi na paye:
“Ine kulay Pogholhossi an hiini!”
Naqharray Uso inna payina:
“Apayni payshesi xarghghe huusuna ana mismaare shoqhisikki anu hiʼuppa xaytossi mismaradhe nadhotessikki ghoqqe haayyusi anu naayyakuppa payshittessi aghinaqqe koru dhothisakki xargho anuna qadhdhu payni anu dhukkaysani.”
26 Kuyyaqako settena tupettay kolladhampawhe huusu manneete kalaki qaghe,
Tomaaseka usundhe qalli qaghi,
man kaxadheka he kʼupamena Iyyesuse iʼokayipa usundhe kitta shikkaaruppa hasa na payu:
“Nakayho ihune kodhdha!”
27 Xaysa tupettay Iyyesuse Tomaasena inna pay:
“Qoghakko haahu okaspa xarghghe hayyusi eemoy,
xarghgho haahuutaka shokkipa ghinaqe hayyusa qadhdhay dhukkaysadh dhiishay hoye dhukkaysadhi olo kodhdhi.”
28 Tomaaseka:
“Ato Pogholho hayyupa Waako hayyuka!”
Kina payipa nu holasu.
29 Iyyesusekka Tomaasena ina pay:
“Ato qhoota aye hiiti maallaki adhukkaysati,
naqharray heye hiʼonkina dhukkaysana hehe poghadhe.”
Mat’aafi Olhannu Tooxi
30 Iyyesuse dhahxhxootaadhe he matʼaafi kitteema ye tooxamonki hekishaasiki kolladhampawhe huusu miinteema kodhi,
31 Emma naqharray Iyyesuse qhamu Uso Kristoose Miʼaye Haallikkito kodhdhisa qhama adhukkaysattepa adhukkaysate payni makaxko huusuttay qagho perre ye hume sheeghe taayyadhankunuki atooxi.