Iyyesuse Kolladhampawhe Taxxannukki Armadhi
21
Xaysa tupettay Iyyesuse iholi paso Tʼipiriyatoosenna kaanta kolladhampawhe huusunu armadhu,
hessi innu armadhikka hisi:
2 Simiʼoonessi ana payi Petʼiroosepa Titimosessia ana Thomaase payipa Nathinaʼeelessi piyye Kalilanna kathama Kʼaanannnapa dhelle Zeptiwoose pana kolladhampawhe tookkesinna qhawho lakki na qale qagha.
3 Simiʼoonessi ana payi Petʼiroosekka inna payina:
“Ano an ashshinnipa hxaare ghappo.”
Usundhekka inna paye:
“Inekka ho qale an ashshinani.”
Xaysa tupettay ashshonkippa konko saappeema hadhdhonki,
naqharray kalapkusana hxaaritte tootte kakki ye ghapasonki.
4 Xayto iqhayana Iyyesuse pasito kaantaakki shikkaari,
naqharray kolladhampawhe qhamu Iyyesuse kodhdhisa ye upadhonki.
5 Iyyesusekka inna payina:
“Korunka hxaare aghghappite qaghay inta?”
Usundhekka inna paye:
“ye qaghti.”
6 Usokka inna pay:
“Marape thaahundhisi konkito karo miskittottay kʼurama hxaaresi attayanankuyye.”
Usudhekka marapesiisi paso kitteema ikʼkʼurenna hxaare kishaasi qhooti ghappasse maallay marapesiisi kiike malaale.
7 Kolladhampakkossi Iyyesuse cʼikadhikka Petʼiroosena inna pay:
“Pogholho kulay!”
Simiʼoonessi ana payi Petʼiroosekka ikkittossi Pogholho kulay payaasi apaqhnittay laalladhessi kodhmo maallay hela shaghiisi iʼakki yakadhuppa paso kitteema sorruy.
8 Naqharray kolladhampawhe tookkesi pasonu piyyeema hxafinu methire 100 kulaghaqqa patta qhooti sikaape maallay marapesi hxaare nahoqhitiisi ikkiikeppa konkottay okayonki.
9 Ikonkito oodhdhenna hxaare the porhxooma adhilli pana dhilanko ihiʼe.
10 Iyyesusekka inna pay:
“Into hxaaresi aʼhantu ghappastenna okaasa”.
11 Hussa maallay Simiʼoonessi ana payi Petʼiroose konko sappeemi hadhdhipa marapeesi hxaare kaanomay hxaaritte 153 na hoqhitiisi piyye kula kiiku,
hxaare kishaasi ighaptakakki payni marapisay ye kakkaqamukka.
12 Xaysa tupettay Iyyesuse inna pay:
“Okayapa yiʼonku”.
Pogholho qhamu kodhdhissa kolladhampawhe kaasay qhooti upadhe maallay qhawho napayina:
“Atho yaxapa?”
kasqadhu ye qaghikka.
13 Iyyesusekka iʼokayipa dhilankopa hxaaresiisi akkuppa nu teexu.
14 Lammi Iyyesuse iffartatte haqi tupettay kolladhampawhe huusunu husi isxa innu armadhi.
Iyyesuse Petʼiroosesikki Kasqadhi
15 Iyyiiʼeppa dhikkisadhonki tupettay Iyyesuse Simiʼoonessi ana payi Petʼiroosena hasi napayi:
“Miʼaye Yonay Simiʼoone hisinna aghghulasappa isaye cʼikadhay?”
Usokka inna payina:
“Ee Pgholho,
qhama ho cʼikadhissa Atho aʼaray.”
Iyyesusekka inna payi:
“Qeemmissa hayyu takkummaasi yiʼasha!”
16 Holuppa lankakka hasa napayu:
“Miʼaye Yonay Simʼioone,
ayye cʼikadhay?”
Usokka inna pay:
“Ee Pogholho,
qhama ho cʼikadhisa Atho aʼaray!”
Iyyesusekka inna pay:
“Qeemmissa haayyu qaghghomaasi pankadh”.
17 Isaxanakka napayu:
“Miʼaye Yonay Simiʼoone,
ayye cʼikadhay?”
Isaxanakka qhootinna payi “Aye cʼikadhay?”
Maallay Petʼiroose kitekati nu dhakaatipa hasa napayu:
“Pogholho,
Atho olho kaasakka arti,
anokka qhama ho cʼikadhisa aʼaray.”
Iyyesusekka hasi na payi:
“qeemme haayyusi kosha!
18 Dhuke,
dhuke anho qalli,
xinke aponkorumtina sakʼkʼe thaahuusi xarghghe haahuutakka shapattipa xayto awooti kula isa ashshiti,
naqharray xinke akeshuytina xarghghe haahuusi ashokisnappa qhawho pile ho shapuppa xayto athuwooti kula ho hotta ashshoy.”
19 Olhunnu hasa payikka,
Petʼiroose farte malalighattay qhamu Haallikkoosi kaanasni hiʼaasenu.
Xaysa tupettay Petʼiroosena inna pay:
“Ye kaleema okayi!”
20 Petʼiroosekka ihekala emmadhina kolladhampakossi Iyyesuse cʼikadhi ho usundhe kala okaaayyasikki hiʼi,
ususakka xinkessi eesse yiʼenna hossi Iyyesuse kula xighghipa hasa payuppa kasqadhu:
“Pogholho,
ata yaxa likkasnapa ho teexu?”
21 Petʼiroosekka usoosikki hiʼipa hasa payuppa Iyyesusessi kasqadhu:
“Emma qhawhu naana?”
22 Iyyesusekka inna payi:
“Xaysa Ano holli saasa qahgottay qakni patnni hoosi moho rakkisi?
Atho ye kala okayma.”
23 Hussa maallay olissa Iyyesuse payna:
“Kolladhampakku ye farrikka” ki korito kaanta hxafi,
naqharray Iyyesuse “Haka Ano holli saasa qhamu qakninu woʼoko haayyu kodhdhini payni hosi moho rakkisi?”
kippay dhiishay “Ye farri” ye paayyukka.
24 Ho oli kaasaasi qallipa ollikka tooxoy kolladhampakku Uso,
qallithe tuusukka dhuke qhamu kodhdhitisa an araani.
25 Olho Iyyesuse kodhi ho kisha pile holi isi qagha,
qhamu yeesi lighti kula payni,
olho Uso kodhi kaasaasikki atooxni payni ahxay,
matʼaafadhdhissa atooxnisi piyye qhaatʼi pukaqatisina yenu hxafntikka.