Iyyesuse Farttati Haqi
16
Kuyyaqako hxaysinko koro Ayihutattena illighghi tupettay Mariyaame kathama Mektelannapa Mariyaame yaaye Yaykʼoope pana Seloome ille qalli ashsheppa pukkaqo Iyyesusesi shiinenu shitto pithamoonki.
2 Torppana kuyyaqako payyoottattena sinkatto oqhqhaye lighana hawle kula ashshonki.
3 Isi illena papaya:
“Awrukussa hawleete sappeete qaghaasi yaxa ine laaghna?”
4 Olhu na maallay hasa illena kodhdhekka awrukusa qhooti uuma dhammi maallay;
iqqila payeppa emmadhonkinna awrukkosi ho laaghamiki hiʼe.
5 Ihhawlesi kitteema xullenna qhawho ponkorito ho laalle piqa urkuyipa karo miskitottay qakkadhuusiki hiʼeppa murrukonki.
6 Usokka inna payi:
“Olo ghaapemma Iyyesusessi Naazrate maskʼalamma dhisami aghgheeqete fartatte ihhaqi!
Hasa ye qaghikka,
xaytossi ana maayikka haadhi.
7 Naqharray ashshindhapa kolladhampawhe huusupa Petʼiroosena hasa payankuppa nu qallanku:
‹Piyye Kalila kulaki hune inthawni;
qhamosi hune qalli kula haahakka Uso hiʼinte.›”
8 Xiskesikka immurrukeppa inni dhahxhxapa isi xotholadhana xayto hawleetenu lighonkippa ghoradhonki;
qhooti uuma ghaape maallay yaxanukka olho toʼokokka ye qallonki.
Iyyesuse Maryaamessi Kathama Mektalanukki Armadhi
9 [Iyyesusekka torppana kuyyaqako payyootatena sinkato iffartatte haqi tupettay payyooteema Mariyaamessi Kathama Mektelana thessi inna nassidhe maghooma taxxan lihasinukki armadhe paayyi.
10 Iseka iʼashshitipa,
hessi qharo Uso qale qagha he azanapa isi ooyasa hxafoppa hasa payippa nu qalli.
11 “Iyyesuse qhamu fartatte haqipa qaghottay isi qaghasi ehxhxe haayyuttakki an hiʼi!”
Usundhe kapayi yena dhukkaysadhonki.
Iyyesuse Kolladhampawhe Lakkinukki Armadhi.
12 Xaysa tupettakka Iyyesuse kolladhampawhe huusu lakki he ghodhdhe kula ashshanukki onke piletta armadhi.
13 Usundhekka ihholeppa kolladhampawhessi haqhennu qallonki,
ikkodhdhitama kapay usundhe hisanakka yena dhukkaysadhonki.
Iyyesuse Hessi Pako Huusu Kapa Eraki 11 nukki Armadhi
14 Dhikkattatte Iyyesuse hessi 11 iyyiʼooma qakkadhenaki nu armadhi.
Hessi Iyyesuse iffartatte ihhaqi tupettay hi’eppa nuqallokina qhootiye yedhukkaysadhonkipa dhikitno saqqe huusundhi fafe maallay Iyyesuse iʼusundhe meethuyi.
15 Hasakka napayu:
“Piyye qhaatʼe kaasay ashshindhapa wonkelesi uumata kaasannu thorruyanku.
16 Qhawho dhukkaysadhipa shoxatte shoxadhu idhdhina,
naqharray hoye dhukkaysadhussa inna qhaqhamnay.
17 Heyeesi dhukkaysadha kaasay dhahxhxootaadhdhe hasa lighoomaki konne;
Makaxko Haayyuttay Nassidhdhe maghoomaasika illihasnanki;
pako qhawtito qallanne.
18 Tawwidheesika ighappina olho koro poghaasikkaki qukne payni ye usundhe kottaʼani.
Xarghghe huusundhiisi he udhdhama saappeema ina ghapanna he udhdhamakka idhdhinnina.”
Iyyesuse Moonto Kulaki Akkami
19 Pogholho Iyyesusekka usundhe qale ihhasa thorruyadhi tupettay karo moonthito iʼakkami.
Haallikko Appana miskitto kaaqila qakkadhu.
20 Kolladhampawhe huusukka illigheppa xayto kaasay wonkele thuusu kollisonki.
Pogholho Iyyesusekka usundhe qali kodhdhi,
qhamu dhahxhxootaadhdhe konnenukka alkase nutteexuppa kollise thuusundhi dhukateesika isi dhiktisa.]