Wəriy gawliy ngə Yesu maa gəɓ atalan saray
10
Pic takan, Yesu ɗefenma a wəriy gawliy ngetik gəɓ atalan saray. Maa ɗefentəma za, vəlenta gədan mordoy kə jan taniy kə gamiy musuruf aa kəsəm hidiy za. Taniy kə vəliy zoy kəsəm a hidiy njə məc maa par par cike wayza. 2 Anhi zlim ngə məzlənzləniy ngə Yesu maa gəɓ atalan saray səna: Diw a Simon mə cənta zlimi Piyer avə galmən Andire, za Yakuba avə galmən Yuhana, taniy wəriy Zebede, 3 za Filip, Bartelemi, Tomas, Mata hid mə kambal buhdu, Yakuba kər Alfa ɓəw Tade. 4 Simon hid mə njə kə jəgəm makavay hayək ngetik ɓəw Yahuda Iskariyot məv kə ɗef ngəra atalan Yesu hidiy kə kawta.Yesu zlən məzlənzləniy ngetik
5 A dəwən səna, Yesu zlən məzlənzləniy ngetik maa gəɓ atalan saray səna, ɗiya luwenta: ‹‹Hin mə gər kə va angər hidiy maa səban tan par a yahudiy kwən, mə gər kə pət a liɓdiy təm hayək Samariya kwən təm. 6 Say hin kə va ɗər angər hidiy Israyiligi. Taniy wa təmakiy mə leklekigi. 7 Mandal hin maa va, hin kə ceɗen a hidiy anhi: ‹Mandal Bayzlav tu kə zəm bay atalan təkəniy cike wayza mbeh kə hosohoh.› 8 Mə vəlen zoy a hidiy mə daldaligi, mə mbəlah hidiy mə məc məc kaɗ, mə mbəl kwalkwaliy kaɗ, za mə gam musurufiy tə kəsəm hidiy kaɗ. Bayzlav a vəlehin maymay, hin kə vəlen maymay a hidiy təm. 9 Mandal hin tu kəv səna, mə gər kə wət melenge avə suloy ɓəw suloy ma cicer am gabal kwən. 10 Mə gər kə wət gabal ngə ɗə mbuluk kwən. Hin kə wət ləkwət ngə təm takan dap. Mə gər kə wət kərap məpərmay asənkwən zlamblay məpərmay kwən. Kat tə luw atəgo , kadaban hid mə ɗiy kəzəɗ, law kə jan gədmazlən ngetik.
11 ‹‹Mandal hin maa pət a liɓde asənkwən a slalade, mə jar hid mə ngəm kə yəkehin a de ngetik. Mə ɗew ade ngə gawal səna hos am mandal hin tu kəv kin. 12 Mandal hin maa pət ade hidi, hin kə luw: ‹ Bayzlav mə vəlehin zoy.› 13 Mana hidiy tə de səna tu yəkiy hin, zoy hin mə tarenta angər Bayzlay səna, av kə ɗiy atalan tan! Amma mana a yəkehin bəgwən wər, Bayzlav av kə jəɓ zoy səna atalan kin. 14 Mana hin tu pət ade ngə hidi, asənkwən a liɓde, za hidiy səna a yəkehin bəgwən, asənkwən a zlimiy zləgam ngəkin bəgwən, mə tih kirbitil ngə liɓde səna təm ngaz kin kaɗ, məv kin aa bəgo zaª. 15 Mindiwin, kat aa ceɗehin, am pic Bayzlav tu kə zla dalgway ngə hidigi, dalgway ngə hidiy təm hayək Sodoma avə Gomoraª av kə ɗiy ɗəɗah day ngə hidiy tə liɓde səna.››
Yesu a luw hidiy mə səbiy mozlokotuf tik av kə siy takwan
16 A dəwən səna, Yesu ɗiya luwen a wəriy gawliy ngetik baha: ‹‹Kata zlənehin mana təmakigi a dab hazdonigi. Kadaban səna acin, mə ɗew ɓenɓen mana wənigi, za mə ɗew kə hidiy maa a ɗiyiy mə ngavngav ɗahkwən mana ɓaramigi.
17 Mə kaw talan kin law law a hidigi. Tə luw atəgo kadaban hidiy məpərmay av kə kawihin, kə tepehin a kibik hidiy mə zliy dalgway. Av kə zarihin am jik jəgwan ngatan. 18 Av kə tepehin a kibik mogroy ɓəw a kibik bayigi, makavay hin taa səb mozlokotuf ngaɗa. Asəna acin, hin məv kə jan mozlokotuf kə ceɗen a tanigi ɓəw a hidiy maa səban tan par a yahudigi, hin maa səb mozlokotuf ngaɗa. 19 Mana taniy tu tepehin a kibik mə zliy dalgway, hin mə gər kə den kə luw, yikwan məv kə luw aceki kwən asənkwən yikwan məv kə zləgam mi kwən. Zləgam hin tu kə zləgam Bayzlav av kə ceɗehin mandal hin mawan abəgo gəzza, 20 kadaban zləgam a pətah aa ngər kin za kwən, Mbiɗ ngə Bahbay kin Bayzlav av kə ceɗehin təkən hin tu kə zləgam səna.
21 ‹‹Mandal səna acin, hidiy məpərmay av kə kawiy galməniy tan, kə vəlenta a hidiy məpərmay kə wəzlta kaɗ. Bahbay ngə kərti av kə ɗiy tik a kərti tik atəgo təm. Wəriy təm av kə mbaɗiy kə cal mosum ngə bahbayiy ɓəw ngə mahmayiy tan, za av kə vəlenta aa hidiy kə wəzlta kaɗ. 22 Hidiy cike av kə zelihin makavay hin taa səb mozlokotuf ngaɗa. Amma hid mə ɓəs am takwan səna hos am pic məc ngetik, Bayzlav av kə mbəl tik.
23 ‹‹Mandal hidiy tu zlənehin takwan a liɓde hin mə ɗew tə bugo, mə sikin a liɓde məpərmay. Mindiwin, kata ceɗehin, mandal Kat Kər Hidmemblen tu kə jəɓahah, təv kə jan hin mə way kə ceɗ ləbar ngə Bayzlav a liɓdiy cike təm hayək Israyila gesin bəgwən.
24 ‹‹ Hid mə jəgwan təkən angər hidi, zay tik aa day hid mə jəgwanen təkən ɗahkwən. Hid mə ɗiy kəzəɗ zay ngetik a day hid məmar tik ɗahkwən. 25 Mana kər gawla tu hos prakprak a hid mə ɗiyen jəgwan, za hid mə ɗiy kəzəɗ tu hos prakprak a hid məmar tik wər, cay dap. Mana mə luwenta za a njə de: ‹Hoh Bay musuruf,› a riy hidiy tə de ngetik day kə sin ɗər kwən vu?››
Mə gər kə hovok a hidiy kwən
26 Yesu luwenta baha: ‹‹Mə hovok a hidiy kwən. Təkən mə ɓahɓah av kə pətah am lay maa varak. Wazwazay av kə pətah a caɗak. 27 Ləbar kat mə ceɗehin tavə ɓah, hin kə pətah kaɗ am lay ma varak. Za ləbar kat mə sisekehin am zlimi, mə gar am lay maa fal kə ca wəl tik. 28 Mə gər kə hovok a hidiy kwən, kadaban taniy kwəl kə wəzliy kəsəm ngə hidi a gendik dap. Taniy a hosiy gəga kə lek micin kin bəgwən. Mə hovok ɗər a hid mə hos gəga kə wəzl hidi ɓəw kə lek micin ngetik kaɗ. Za kə fək hid səna am kuhu maa a way ɗahkwən. 29 Hidiy ɗaw kə səkəmiy viginiy maa cəcer saray suloy takan kwən vu? Amma ko takan a ndəv a kayək kə məc kwən, səna bahbay kin Bayzlav mə ngəmah za. 30 Hin təm, ko susoniy talan kin cike, Bayzlav mə nəfta kaɗ. 31 Kadaban səna acin, mə hovok kwən, zay kin day viginiy cike wayza.
32 ‹‹Mana hid tu luw a kibik hidiy cike wayza, sin hid ngaɗa, kat təm kat təv kə luw tik a kibik Vay ngaɗ tə dibizlav, sin hid ngaɗa. 33 Amma, mana hid tu luw a kibik hidigi, a sənak ɗahkwən, kat təm təv kə ceɗ a kibik Vay tə dibizlav, kata sən gawal səna ɗahkwən.››
Yesu a dah pətar am talan mahayək
34 Yesu ɗiya luw baha: ‹‹Hin mə gər kə ɓən kat tə yah am talan mahayək kə dah zoy a hidiy kwən. Kat tə dah zoy kwən, amma tə dah jəgəm. 35 Mindiwin, kat tə yah kə pətar hidi a bahbay tik, kə pətar kərtaza avə mahmay tik, werti a mən zelen. 36 Hidiy təde takan av kə ɗewiy kə mosumigi.
Hid kə zel talan tik zagway kə diw kə səb Yesu
37 Yesu ɗiya luw baha: ‹‹Hid mə may bahbay tik, asənkwən mahmay tik day kə kata, kwəl kə səbak kwən. Hid mə may kərti tik kərtawəl asənkwən kərtaza day kə talan ɗa, a hos gəga kə səbak kwən. 38 Mana hid a ɓiy pay maa zləngrak ngetik, za kə səbak bəgwən wər, sin a hos gəga kə ɗew kə hid ngaɗ kwən. 39 Hid mə may kə puw micin ngetik av kə lek tik. Amma hid mə lek micin ngetik makavay kata, av kə jan micin ngetik səna angər Bayzlav. ››
Yesu a luw hid mə yək wəriy gawliy ngetik a yək sin
40 Yesu ɗiya luw baha: ‹‹Mana hid tu yəkehin, sin a yək kata. Zəni hid mə yəkakku, a yək hid mə zlənakku təm. 41 Mana hid tu yək mokotuf ngə Bayzlav, kadaban sin mokotuf ngə Bayzlav, Bayzlav av kə vəlen gədmazlən prakprak a ngə mokotuf ngə Bayzlav. Za hid mə yək hid maa tiɗtiɗe a kibik Bayzlav, kadaban sin hid maa tiɗtiɗe, Bayzlav av kə vəlen gədmazlən wa sin mə vəlen a hid maa tiɗtiɗe. 42 Mindiwin, kat a luwehin, mana hid tu vəlen yəm ngə sa maa lilen am kər kendek dap a hid mendez tə dab wəriy gawliy ɗa, kadaban sin kər gawla ɗa, hid səna av kə jan gədmazlən ngetik.››