Ləbar atalan pic nəp ngə hidi Yahudigi
(Mt 12:1-8; Mk 2:23-28)
6
Am pic nəp ngə hidi Yahudigi məpərmay, Yesu avə wəriy gawliy ngetik a tonigi am tuz Blə ngərimi ma ce ce ngərim hiziɗ. Mandal a tonigi, wəriy gawliy ngetik kar ta, humos humos, za a ham ta. 2 Farisigi ma lim tə za, luwenta: ‹‹ Məzugzug ngiykwan a luw kə ɗiy kəzəɗ am pic nəp ɗa law kwən. Ya za acin mə kar təkən ngə zəm nhi am pic nəp wər kemi?›› 3 Yesu ɗiya zlawenta acin: ‹‹ Talan kin tu zlay am ləbar təm deftere ngə Bayzlav atalan təkən bay Dawda mə ɗiy taməcek vu? Mandal səna mitis hamen a Dawda avə hidi mə ɗewiy tav sin. 4 Sin pət a jik Bayzlav wət bəret mə ɗerenta a Bayzlav, ham, za wət vəlen a hidi mə ɗewiy tav sin səka. Za ma məzugzugwa Bayzlav a luw: ‹Bret ngə Bayzlav nhi, hidi cike kə ham tə kwən, səna məmbəzlimigi təm jik Bayzlav kə ham ta a gandan.› Ko Dawda mə ham bəret ngə Bayzlav səna ma, Bayzlav a luwen kemi bugwən. Ya sakwanta təkən ngə zəm, wəriy gawliy ngaɗa mə kar tə nhi acin vu? 5 A talan pic nəp wər, kata ceɗe hin, kata Hidi mə yah ta ngər Bayzlav za, kata acin məmar pic nəp tugo.››Yesu avə hidi njə ngəra mə məc məc
(Mt 12:9-14; Mk 3:1-6)
6 Am pic nəp ngə hidi Yahudigi məpərmay, Yesu pət a jik jəgwan ngə Yahudigi, diw kə ceɗenta ləbar Bayzlav a hidigi. Yuhana hidi məpərmay abəgo, ngər zəm ngetik tə məc. 7 Mogroyiy jəgwan avə Farisigi təbəgo ci həriya atalan Yesu, kə saf ko av kə mbəl gawal səna am pic nəp vu. Kadaban a mayi kəjani mozlokotuf kə zeli Yesu atalan tu kə ɗiy kəzəɗ am pic nəp. 8 Njoɗ Yesu mə sən nəv tan za. ɗefenma a gawal tafnan nhi acin, luweni: ‹‹ A sliɗ za, ma yah ma gar a kibik hidigi .›› Gawal nhi vak sliɗ za, yah gar kaɗ. 9 Yesu luwenta a hidi səna acin: ‹‹ Məzugzug Bayzlav wər a ceɗe yikwan aceki ? Am pic nəp law kə ɗiyen malaw a hidi vu, kə ɗiyen mə ngavngav vu? Law kə mbəl micin ngetik kaɗ vu, kə geɗ kə məc vu?›› 10 Farisagi cike njay tan kaɗ tete. Yesu saf tə cike, za ɗiya luwen a gawal njə ngər mə məc məc nhi acin: ‹‹ A zər ngər koh.›› Gawal nhi zər ngər ngetik, njoɗ ngər ngetik lawlaw acin. 11 Hidi Farisagi avə mogroyiy jəgwan ma lim tə za, nəv ɗiya hamenta, za a zləgamigi am walan tan: ‹‹ Tanjinhi yikwan kə ɗiy mi a Yesu nhi?››
Wəriy gawliy ngə Yesu ma gəɓ atalan saray
(Mt 10:1-4; Mk 3:13-19)
12 Adəwən səna gwedek Yesu va tap atalan wərum kə tar Bayzlav a bəgo. Vuɗu vuɗu am lay tar Bayzlav. 13 Lay ma dan za, ɗefenma a wəriy gawliy ngetik kə yigi angər tik. Wel wel hidi tə dab tan gəɓ atalan saray. Vərək ta kə mə zlən zlən tikigi. 14 Anhi zlim ngatan: Simon, mə cen zlim ngetik Piyer, avə Andire, hidi avə galmən. Za hidi məpərmayigi Zak, Yuhana, Filip, Bartelemi, 15 Matiye, Tomas, Zak kər Halfe, Simon, mə cen zlim ngetik Zelot. 16 Yahuda kər Zak, ɓəw Yahuda Isikariyot məv kə ɗef ngəra atalan Yesu hidigi kə kaw ta.
Yesu avə hidi təm hayək ma par par
(Mt 4:23-25)
17 Yesu ma wel mə zlən zlən tikigi za, surohigi atalan wərum za, kə yigi am lay ma varak. Gbomi avə hidi məpərmayigi mə ɓas ɓasi dolom. Adab tan, hidi dolom mə njə kə səbiy Yesu hoyhoy a bəgo. Hidi məpərmay a yigi am liɓde Ursalima za, ɓəw am liɓde ma par par bay Yahuda məmaru. Za hidi sənan a yigi am hayək Tir avə hayək Sidon za, mə bi de ngatan a jagwar maz mordoy. 18-19 Hidi nhi cike a yigi angər Yesu kə zlimiy ləbar ngetik. Za Yesu kə mbəl ta am dal ngatan za. Ko yi a jar mozlokotuf kə jan kə mbəlem ngər ngetik a kəsəm Yesu, za kə jan kə mbəligi, kadaban gədan ngə mbəl mə dal dali a yah angər Yesu za. Sin mbəl ta cike, ko mocoɓəlonigi, Yesu tu gam musuruf a kəsəm ngatan kaɗ.
Ɗew malaw ɓəw ɗew təm banay
(Mt 5:1-12)
20 Yesu va angər wəriy gawliy ngetik, saf saf ta mgbaw kaɗ, za luwenta: ‹‹ Hin matakwanigi, nəv kin mə zəzay, kadaban məv kə ɗew a dab hidi Bayzlav məmar ta. 21 Hin hidi ta zlimiy mitis tanjinhi, nəv kin mə zəzay, kadaban mandal pic sən mə hoso za Bayzlav avə kə vəle hin təkən ngə zəm dolom, hin kə pas. Hin hidi ta hani tanjinhi, nəv kin mə zəzay, kadaban mandal pic sən mə hoso za, məv kə mbis. 22 Mana hidigi tu zeli hin, tu ri hin, tu safi hin mana təkən may may, za hin ma lap talan avə taniy ɗahkwən, kadaban hin ta njə kə səb mozlokotuf ngaɗa, kata Hidi mə yah ta ngər Bayzlav za wər, nəv kin mə zəzay. 23 Am mandal səna, mə zəzay, za mə mbis, kadaban gəd mazlən mordoy a puwe hin a dibizlav. Mə saf, ko didi ngatan tu ɗiyenta atəgo a mokotuf ngə Bayzlav ta micek. 24 Ta ceɗehin:Hin mə njənjigi, mandal pic sən mə hoso za, banay av kə yah atalan kin, kadaban aray ngikin hin ta njə kə zəzay avə sin am talan mahayək awənhi, av kə lek. 25 Hin njə təkən ngə zəm ma dolom tanjinhi, mandal pic sən mə hoso za, banay avə kə yah atalan kin, kadaban mitis av kə ɗiye hin. Hin mə mbis mbis tanjinhi, mandal pic sən mə hoso za, banay av kə yah atalan kin. Məv kə ngaɗ həriya, za məv kə han avə teweɗ. 26 Mana hidi tu zləgamigi atalan kin: ‹‘Mana, hidi malaw! Mana, hidi malaw !’› Kata ceɗe hin, mandal pic sən mə hoso za, banay av kə yah atalan kin, kadaban didi ngatan tu səbaniy mokofigi mə ɗiyi polkoy taməcek mana səna.››
May malaw acin, kə may mosum ngetik
(Mt 5:38-48; 7:12)
27 Za Yesu ɗiya luw: ‹‹ Ta luwe hin, a hin cike tə wənhi mə zlim ləbar ngaɗa. Mə may mosum ngikin, za mə ɗiyen malaw a hidi mə zeli hin. 28 Hidi mə njə kə ngave hin, mə tar Bayzlav kə geɗ micin ngatan zoɗ. Za hidi mə njə kə ɗiyi hin mə ngav ngav, mə gər kə ɗiyenta təm kwən. Səna mə tar Bayzlav kə vəlenta malaw ngetik. 29 A picah hidi tu ndoh ngər gəda am pokom ma takan, ma buwen pokom kav sənan, mə ndoh a kimin baha. Hidi tu moh ləkwət koh mordoy tə kəsəm, ma coken mendez ta liɓ za, ma capen a kimin. 30 Hidi tu tar təkən angər koh, ma vəleni. Hidi tu wət təkən koh, hoh gər kə luwen: ‹A vəlak təkən ɗa kaɗ kwən.’ 31 Təkən malaw hin ta njə kə may hidigi kə ɗiye hin, mə ɗiyenta təm. 32 Yo, apica mana hin ma may hidi mə maye hin a gendik, za ma may hidi məpərmay təm ɗahkwən wər, Bayzlav av kə həməne hin acin vu? A həməne hin kwən. Ko hidi ma a səbiy mozlokotuf ngə Bayzlav ɗahkwən ma, a njə kə mayi celen tan mə may ta dap. 33 Za ma ɗiy malaw sey a hidi mə njə kə ɗiye hin malaw a gendik, mətak ɗiyenta a hidi məpərmayigi təm wər, Bayzlav av kə həməne hin acin vu? Awwo, ko hidi mətak səbiy mozlokotuf ngə Bayzlav, a njə kə ɗiy ta a sən baha. 34 Za ma vəl dəwa sey a hidi hin ta ɓən av kə wərəke hin am lay tik wər, Bayzlav av kə həməne hin acin vu? Awwo. Ko hidi ma a səbiy mozlokotuf Bayzlav ɗahkwən, a njə kə vəlenta dəwa a celen tan məv kə jan kə wərəkenta am lay tik. 35 Amma ngikin, hin hidi mə səbiy mozlokotuf ngaɗ wər, ta ceɗe hin, mə may mosum kin, za mə ɗiyentə malaw. Mə vəl dəwa mətak ɓən a kimin a hidigi. Hin tu ɗiy atəgo , Bayzlav av kə vəle hin gəd mazlən mordoy, za məv kə ɗew kə wəriy Bayzlav məmar gədan mordoy. Kadaban Bayzlav a njə kə ɗiy malaw a hidi mə njə kə may ta a gendik kwən, a njə kə ɗiy malaw a hidi ma a ɓəni atalan tik ɗahkwən, ɓəw a hidi mə njə kə ɗiyi mə ngav ngav. 36 Tanjinhi mə saf kaymah ngə hidigi, mana Babay kin Bayzlav ta njə kə safu.››
Ɗew malaw ngə hidi mə səb mozlokotuf ngə Yesu avə hidi məpərmay
(Mt 7:1-5)
37 Za Yesu ɗiya luw: ‹‹ Mana hin ɗaw kə zəm madaba ngə cele kin wər, Bayzlav av kə zle hin dalgway. Mə gər kə zel hidi kwən, za hin təm Bayzlav a zelen hin kən. Hidi tu ɗiye hin təkən mə ngav ngav, hin kə geɗen kaɗ, za Bayzlav av kə geɗ ngikin kaɗ təm. 38 Mə vəlen təkən a cele kin, za Bayzlav av kə vəle hin təm. Av kə vəle hin day mana hidi ta njə kə bat ngirmi pe am waslak mordoy ha a yoɓ a kayək kə vəlen a hidi. Ta ceɗe hin, hin tu vəlen təkən a hidi, Bayzlav av kə sla tik a sla. Tu sla za, av kə vəle hin tiɗ tiɗe mana hin mə vəlen a hidi səna.›› 39 Yesu ɗiya luwenta avə ma məngaɓngaɓ: ‹‹ Huluf a ngazl celen huluf ɗaha vu? Awwo, ɗahkwən. Kadaban huluf tu ngazl celen huluf av kə ndəvigi a wili. 40 Mana kərti a sən sləgam gesin ɗahkwən, av kə day babay tik vu? Awwo, ɗahkwən. Səna tu jəgwan təkən angər babay tik, av kə hos gəga acin kə jəgwanen təkən a hidigi mana babay tik. 41 ‹‹ Mə zlim ləbar ngaɗa baha: kadaban mi, hoh ɗaw kə saf hiziɗ təm həriya ngə golmoco, za pay təm heriya ngəkoh, hoh lim ɗahkwən ? 42 Hoh ɓes kə luwen a galmoco: galmay, a geɗ kata kə ɓih hiziɗ təm həriya koh kaɗ. Za ma, pay təm həriya ngəkoh, hoh lim bugwən, a ɗiy a ciki? Hoh hidi mə pəlafas, a diw a kə ɓih pay təm həriya ngəkoh zagay. Za acin həriya ngəkoh avə kə lim law law, za hoh jan kə ɓih hiziɗ həriya ngə galmoco.››fcc
Hidi mə səb mozlokotuf ngə Yesu wa pay mə mbu ma dindem
(Mt 7:16-20; 12:33-35)
43 Yesu ɗiya luw baha: ‹‹ Hin mə sən za, pay malaw a mbuw ma taɓak ɗahkwən. Za pay mə ngavngav a mbuw ma dindem ɗahkwən . 44 Pay cike yikwan mə njə kə sən tik nek wər am mə mbu mbu tik za. Mə safu, hidi mə njə kə ket sikwiɗ am pay kidigiɗ ɗahkwən. Za baha hidi mə njə kə ket pay a pay ganjiga ɗahkwən . 45 Asəna hidi malaw a njə kə ɗiy kəzəɗ malaw, kadaban nəv ngetik law. Hidi mə ngavngav a njə kə ɗiy kəzəɗ mə ngav ngav, kadaban nəv ngetik mə ngav ngav. Nəv ngə hidi a njə kə sən am zləgam ta kəma tik za. A zləgam mə malaw, məv kə sən nəv ngetik law, a zləgam ma mə ngav ngav, məv kə sən nəv ngetik mə ngav ngav.››
Ma məngaɓngaɓ atalan hidi saray mə ndəni jik ngatan
(Mt 7:24-27)
46 Yesu ɗiya luw: ‹‹ Mə njə kə ɗefekma Mordoy Mordoy, za ma ɗiy təkən kata ta njə kə luwe hin ɗahkwən, kemi? 47 Kata cede hin, hidi mə yah angər ɗa, za mə zlim ləbar ngaɗa, za kə ɗiy mana səna, 48 sin wa hidi mə ndən jik ngetik am lay ma fal. Ma sla za, la lə wili za, wət gugun, sləb sləb a kimin, mgbaw kaɗ kə diw kə ndən. Ma ndən za, pic takan von diw kə za, za za day day, za yəm tu wek a maza, də gawal nhi cike a liɓ yəm. Ko a gom ɓabəgwən, kadaban mə ndəna lawlaw atalan gugun. 49 Amma hidi mə zlim ləbar ngaɗa, za a ɗiy a səna bugwən, sin wa hidi mə ndən jik ngetik am hayək mətak sləb gugwən a madaba za. Pic takan von diw kə za, za za day day, za yəm tu wek a maza godokwən, də ngə gawal nhi cike a liɓ yəm. Njoɗ gomoy tik kurup wayza.›› c 6:42 Mə saf am Mt 7:3