Ləbar Malaw atalan Yesu Kristu,
MARKUS
mə ɗəɗefu
Pət am Deftere nhi
Markus mə ɗəɗef Deftere nhi, a ɗəɗef zlim ngetik a kimin bugwən. Zəni hidiy məpərmay wər a luwta sin acin kər gawal mə fək godo ngetik mandal mə kawiy Yesu a Gecemane (mə saf am mogroy tik 14. 51). A luwta baha; sin acin Yuhana Markus, hidi mə taliy avə Pol ɓəw avə Barnabas (mə saf am ɗerewel KMY 13. 5, 13; 15. 37-39; Kolosi 4. 1-11; 2 Timote 4. 1-11). Piyer hidi takan tə dab wəriy gawliy ngə Yesu aa sən de ngə Markus lawlaw (KMY 12. 12), za Markus tu ɗewiy avə Piyer (1 Piyer 5. 13). Hidiy a luwta, ləbar Markus mə ɗəɗef təm ɗerewel nhi, a zlim angər Piyer.
Hidiy məpərmay a luwta baha, Markus mə ɗəɗef Ləbar Malaw atalan Yesu Kristu nhi, sin acin mə ɗəɗef tik məpəlpəla, za Mata, ɓəw adəwən səna Luka avə Yuhana. A ɗəɗefiy ɗerewel nhi a hidiy ngə Kristu səban tan ma par a Yahudigi, ta zləniy takwan kadaban ta səbiy mozlokotuf ngə Kristu. Markus aa may kə ceɗen a hidiy nhi mana Yesu məmar gədan, kadaban sin Kərti ngə Bayzlav. A may kə ceɗenta ma atalan Yesu kə jan hidiy səna kə ɓəsigi mətak hovok. Yesu aa mar gədan ngə mbəl mə dal daligi, ngə gam musuruf a kəsəm hidigi, ngə geɗ mə ngavngav ngə hidiy kaɗ, ɓəw ngə jəgwanen təkən a hidigi avə bərngəzl talan malaw.
Təkən mə ɗiy avə səb tik am ɗerewel Markus mə ɗəɗef nhi
Ɗew ngə Yesu am hayək Galili avə kəzəɗ ngetik sin mə ɗiy təbəgo (mogroy tik 1-9).
Mbuluk ngə Yesu a Ursalima (mogroy tik 10).
Ɗew ngə Yesu a Ursalima hos am pic məc ngetik ɓəw pic mbəlah ngetik am məc za (11. 1-16).
Ɗerewel ngə Markus nhi, a way avə ləbar atalan Yesu mana sin mə pətahah am həriya ngə hidiy ngetik ɓəw mana sin məv tik a wəzlav kə ɗew a jagwar babay tik. Hidiy a luwta, Markus acin mə ɗəɗef meciceriy nhi kwən, luw ngatan hidiy məpərmay acin mə ɗəɗefta (mogroy tik 16. 9-20).