Ləbar Malaw atalan Yesu Kristu,
MARKUS
mə ɗəɗefu
Yuhana mə juroɓ baptisma aa ceɗ ləbar ngə Bayzlav a hidigi
1
Ləbar təm ɗerewel nhi, diw Ləbar Malaw tə talan Yesu Kristu Kərti ngə Bayzlav. 2 Ləbar malaw nhi a diw mana Esaya, mokotuf ngə Bayzlav tamicek, mə ɗəɗef am ɗerewel ngetik. Sin a luw:‹‹ Bayzlav a luw a kərti tik Kristu:
A nhi kata zlən mokotuf ngaɗa məpəlpəla a kibik koh,
kə sləsləɓoh mozlokotuf gesin.
3 Hidi a cə wəla a dab donu, a luw:
Mə zaɓ mozlokotuf sək sək a Məmar Hidi tu kə yah.''
4 Yuhana mə juroɓ baptisma a wan a dab donu, za hidiy aa viy angər tik. A ceɗenta ləbar ngə Bayzlav, za a juroɓenta baptisma. Sin ɗiya luwenta: ‹‹ Mə geɗ ɗiy mə ngavngav kaɗ, hin kə yək baptisma, za Bayzlav av kə geɗ mə ngavngav ngəkin kaɗ.›› 5 Hidiy dolom tə Ursalima təm hayək Yahudiya avə hidiy dolom sənan təm hayək Yahudiya, viy angər Yuhana. Taniy ɗiya ceɗiy mə ngavngav ngatan mgban mgban, zəni Yuhana ɗiyenta baptisma am torok Urdun. 6 Yuhana a kwəl ləkwət ngə matakwan hidi, ləkwət mə bəba avə suson zlogomo, sin a jaw maslapa bugula am gben. Zəm ngetik acin təkəniy tə donu. Sin ɗaw kə ham wayək ɓəw kə zləɓ njəzlem ɓəɓam tə donu.
7 Am sin ta ceɗ ləbar ngetik, sin ɗiya luw: ‹‹ Hidi av kə yah, sin mordoy day kə kata, tə hos gəga kə mbaɗ kə baalam ngə pəsl mbiseh kərap ngetik bugwən. 8 Kata wər tə juroɓeh hin baptisma avə yəm dap. Sin wər, av kə juroɓeh hin baptisma avə Mbiɗ ngə Bayzlav››.
Yuhana ɗiyen baptisma a Yesu
9 Mandal Yuhana ta juroɓ baptisma səna, Yesu sliɗ a Nasaratu, slalade təm hayək Galili za, va am torok Urdun. Za Yuhana ɗiyen baptisma a Yesu a maza səna. 10 Ma pəta a liɓ yəm za, lim dibizlav zlər, Mbiɗ ngə Bayzlav səroho a wəzlav za mana ɓaram, yah ɗew atalan tik. 11 Sin zlim wəl ngə Bayzlav, a luwen a wəzlav za: ‹‹ Hoh acin Kərti ɗa malay, kata mə mayu day day››.
Bay Musuruf tu lebeɗ Yesu
12 Njoɗ Mbiɗ ngə Bayzlav taken wəla a Yesu, ngazl a dab donu. 13 Wan ngər foɗ abəgo, Sayɗanu, bay musuruf ɗaw kə lebeɗ tik kə ɗiy mə ngavngav. Yesu a ɗew a dab donu səna avə təkəniy tə donu, za mbaslayiy ngə Bayzlav a njə kə məniy Yesu.
Yesu ɗefenma a hidiy foɗ kə səbta
14 Adəwən sojiy ngə Hirudus ma kawiy Yuhana mə juroɓ baptisma za, pekta kaɗ am jik jaw. Yesu jəɓ vətik a liɓde par par təm hayək Galili, kə ceɗ Ləbar malaw mə yah ta ngər Bayzlav za a hidigi . 15 Ɗiya luw: ‹‹ Tanjinhi pic ngə Bayzlav tu sla, bay ngə Bayzlav mbeh avə hin. Mə geɗ ɗiy mə ngavngav kaɗ, za hin kə yək Ləbar ngetik malaw››.
16 Yesu sliɗ vətik atalan torok tə Galili. Mandal sin ta tal səna, lim Simon avə galmən Andire hidiy mə kawiy kilif. A fəkiy jəva a liɓ yəm kə kaw kilif. 17 Yesu ɗiya luwenta: ‹‹ mə yah səbakku. Təv kə ɗiye hin kə hidiy məv kə ɗefenma a hidiy kə səbiy mozlokotuf ngaɗa.›› 18 Njoɗ geɗiy jəviy ngatan kaɗ, taniy ɗiya səbta acin.
19 Yesu ma va a kibik gwedek za, lim hidiy saray baha, hidi avə galmən, Yakuba avə Yuhana wəriy Zebede. Taniy a waniy am payª ngə zlan maza. A zaɓiy jəviy ngatan mə kwah kwah. 20 Njoɗ Yesu ɗefentəma kə səbta. Taniy geɗiy babay tan Zebede avə hidiy mə ɗiyiy kəzəɗ təm pay ngə zlan maza kaɗ, sliɗigi, viy avə Yesu.
Yesu gam musuruf a kəsəm hidi
21 Adəwən səna, Yesu avə wəriy gawliy ngetik sliɗigi, viy a Kafarnahum liɓde mendez. Sin va pət am jik jəgwan ngə Yahudigi. Ɗiya ɗiy jəgwan ɓəw ɗiya ceɗ ləbar ngə Bayzlav a hidigi . 22 Hidiy mə zlimiy ləbar ngetik, jəgwan səna tu prasl talan tan, kadaban sin a ɗiy jəgwan mana ngə mogroy jəgwan ɗahkwən, ɗaw kə ɗiy jəgwan avə gədan Bayzlav mə vəlenni.
23 Mandal səna, mədədəngəlan təm awan am jik jəgwan ngə Yahudigi abəgo, ɗiya cə wəla: 24 ‹‹ Hoh Yesu tə Nasaratu, mə lapak avə hoh mi? Hoh yah kə lek yikwan vu? Kata mə sən za, hoh acin Hidi Bayzlav mə zlənahah am talan mahayək kə ɗiy kəzəɗ ngetik.›› 25 Ya za acin, Yesu nap ndəl musuruf tə kəsəm gawal nhi, ɗiya luw: ‹‹ A pek mə koh kaɗ. A pətah a kəsəm gawal nhi za.›› 26 Mbiɗ mə ngavngav səna kəz kəz gawal nhi avə gədan, ɗiya cə wəla day day, za pəta tik a kəsəm gawal səna za.
27 Tu prasl talan ngə hidiy mə limta. Ɗiya zləgamigi am walan tan: ‹‹ Təkən nhi a ɗiya aceki ? Yikwan mə lim təkən mana nhi gesin bugwən, nhi jəgwan ndawyan. Ma ngetik a ndəv am lay maymay ɗahkwən. Mana sin tu luwen a musurufigi kə pətiy tan a kəsəm hidiy za, a njə kə zlimiy mə ngetik kə pətiy tan angaw.›› 28 Njoɗ kəzəɗ ngə Yesu a zlim mgbaw hayək Galili məmar cike wayza.
Yesu mbəl mə daldaliy dolom
29 Yesu ma pətah tik a mə jik jəgwan ngə Yahudigi za, njoɗ adəwən səna, va a de ngə Simon avə Andire. A lapigi avə Yakuba ɓəw Yuhana. 30 Ma hosigi za, janiy mənnjeh ngə Simon a dal. Mə wana kaɗ, kəsəm tik kwak. Njoɗ hidiy tə jagwar mə daldal səna a ceɗenta dal tik a Yesu. 31 Yesu va angər werti səna, kaw am ngəra, kaf kaɗ. Njoɗ talan geɗ kə nden kaɗ. Sin sliɗ za, ɗiya vəlen zəm avə təkən ngə sa a Yesu ɓəw avə wəriy gawliy ngetik.
32 Pic ma ndəv za, lay kələw kələw, Yesu a wəlen gesin a de Simon avə Andire. Hidiy məpərmay aa dahiy hidiy mə dal daligi avə hidiy njə mbiɗ mə ngavngav tə kəsəm ngatan dolom angər Yesu kə mbəlta kaɗ. 33 Hidiy tə liɓde mendez səna cike wayza ɓasigi a mədigiɗ Simon avə Andire. 34 Yesu mbəl mə daldaligi dolom am dal ngatan ma par par. Adəwən səna baha, gam musurufiy dolom kə pətiy tan a kəsəm mədədəngəlanigi za. A geɗen mozlokotuf a musurufiy kə zləgamiy ko gwedek bugwən, kadaban mbiɗiy mə ngavngaviy mə sənta za, Yesu nhi Kərti ngə Bayzlav.
Yesu a tal am hayək Galili kə ceɗ ləbar ngə Bayzlav a hidigi
35 Yesu wan kaɗ, za gbəm tik, zla zlalay sliɗ va a dab donu am lay ma lew lew mətak hidigi. Ma hos abəgo za, ɗiya tar Bayzlav.
36 Simon avə hidiy mə njə kə ɗewiy avə sin, viy kə jarahta. 37 Ma janta za, ɗiya luwenta acin: ‹‹ Mordoy, hidiy cike wayza a jarigi.›› 38 Yesu ɗiya zlawenta: ‹‹ Nəmkwan am lay məpərmay, am slaladiy ma mbeh tattah. Kata kə va kə ceɗ ləbar malaw a hidiy tə bugo, kata tə luw atəgo kadaban kata tə yah makavay kəzəɗ səna.›› 39 Zəni Yesu va kə ceɗ ləbar ngə Bayzlav am jik jəgwan ngə Yahudigi am hayək Galili cike wayza. Za ɓəw a njə kə gam musurufiy tə kəsəm hidigi .
Yesu ɗiz mbəla ngə kwalkwala
40 Pic takan, kwalkwala yah angər Yesu, gbəlih tətəmbiz kaɗ a kibik tik, ɗiya cen ngəra: ‹‹ Mordoy, kata mə sən za, mana hoh mə may za, hav kə ɓəs kə way kwalkwala tə kəsəm ɗə kaɗ.›› 41 Yesu saf kaymah ngə gawal səna, zər ngəra , mbəlem gawal səna. Luwenni acin: ‹‹ Kat aa mayu, kwalkwala mə way a kəsəm koh za.›› 42 Ma luwen atəgo za, njoɗ kwalkwala tə kəsəm tik way, tu ɗiz.
43-44 Zəni Yesu ɗiya luwenni avə ndəl: ‹‹ Av koh! A teh zlim law law, təkən kata mə ɗiyoh nhi, hoh gər kə ceɗen a hidiy kwən. Amma, a va angər masay təm jik Bayzlav, ma va ɗefen kəsəm koh. Mana masay səna tu saf kəsəm koh, ma feten təkən a Bayzlav mana Musa mə luwa yikwan ta micek, hidiy cike wayza kə sənta kwalkwala koh tu way››.
45 Zəni gawal səna va tik, ɗiya cakway ləbar səna ko a ki. Kadaban səna, Yesu a jan kə pət a liɓde ɓahbugwən. Zəni ɗewey tik gaf a liɓde am lay ma lew lew. Hidiy təm lay ma par par yiy angər tik.