Ləbar Malaw atalan Yesu Kristu
MATA mə ɗəɗefu
Pət am deftere nhi
Deftere nhi, awan a dab defteriy maa foɗ taa luwta Ləbar Malaw atalan Yesu. Zlim ngə hid mə ɗəɗef Deftere nhi, mə ɗəɗefeh kaɗ a liɓ tik ɗahkwən. Amma hidiy mə səbiy Yesu taməcek mə sənta za, Mata hid takan tə dab wəriy gawliy ngə Yesu maa gəɓ atalan saray acin mə ɗəɗef deftere nhi. Mata səna njə Yahuda. Amma sin ɗaw kə kambalen buhdu a bay roma mə zəm hayək ngatan. Mandal sin taa ɗiy kəzəɗ səna acin, pic takan Yesu ɗefenma kə ɗiy kəzəɗ ngetik (Mt 9.9). Sin a ɗəɗef Deftere səna a galməniy tik yahudiy mə səbiy Yesu. Sin a ɗəɗef kə jan kə ceɗenta mindiwin, Yesu acin hid Bayzlav mə luw a didiy tan avə kə zlənenta. A ɗəɗefenta səna, kadaban yahudiy a yəkta Yesu acin Hid Bayzlav tu kə zlənah səna bəgwən. Taniy wər, aa puwiy Hid Bayzlav tu kə zlənah səna nha tanjinhi. Ɓən ngatan wər, hid səna av kə yah kə lerta aa mə ngər ngə bay roma za avə ɗiy jəgəm. Aska Yesu a yah kə ler hidiy aa mə ngavngav za, kə jan taniy kə pətiy am bay ngə Bayzlav (5: 3). Am ɗerewel nhi, Mata a zləren zlimi a yahudigi, atalan təkən mokotufiy ngə Bayzlav mə luwta am jaw bərngəzl tamicek, kə jan kə ɗefenta Yesu nhi a yah kə ɗiy kpekpe mana mokotufiy səna mə luwta (5: 17-18). Mokotufiy səna a luwta, avə kə ɗefenta zlimi a Yesu Emanuwela, mana kə luw kaɗ, Bayzlav awana avə yikwan (1.23). Anhi acin, Yesu səna atalan tik mə luwen za a wəriy gawliy ngetik, sin awana avə tanigi hoyhoy hos am way ngə talan mahayək (28.20). Sin acin Emanuwela mindiwin.
Mana ɗerewel nhi mə wəzak avə səb tik avə səb tik:
Deheniy ngə Yesu 1.1-17
Mbuw ngə Yesu 1.18-25
Təkəniy mə toniy par par, diw a Yuhana mə juroɓ baptisma hos am Yesu 2-4
Yesu ɗiyen jəgwan a hidiy atalan wurum məpərmay 5: 1-7: 29
Gədan ngə Yesu, Kər hidmemblen 8: 1-9: 34
Yesu wel wəriy gawliy ngetik gəɓ atalan saray, za zlənta kə ɗiyiy kəzəɗ 9: 35-11: 1
Yesu zləgam a ma mə ngaɓngaɓ atalan bay ngə Bayzlav 11: 2-13: 53
Kər Hidmemblen acin mozlokotuf ngə pət am bay ngə Bayzlav 13. 54-19.2
Yesu Kristu acin bay, amma hidiy a yəkta bəgwən 19: 3-26: 5
Yesu Kristu tu sa takwan, za məc am pay maa zləngrak, za Bayzlav mbəlah kaɗ aa mə məc za 26: 6-28: 20