Yesu tu hos gəga kə mbəl hidi mə daldal, za kə geɗ mə ngavngav tik kaɗ
2
Wan gwedek adəwən səna, Yesu jəɓ a Kafarnahum liɓde mendez. Ma hos za, hidiy zlimta, sin a wan a de. 2 Zəgədiy ɓas ɓasiy njəsl njəsl a terde ɓəw a bər mədigiɗ. Ko lay jak ngaz gwedek ɗahkwən. Yesu a ceɗenta zləgam ngə Bayzlav.3 Am lay səna, hidiy wətiy gawal mə mgbəru mgbəru avə lay wan tik, taniy foɗ acin mə ɓiyta, tepta angər Yesu. 4 Jar jariy mozlokotuf kə hosta angər Yesu, za ko lay və ɗahkwən. Hidiy njəsl njəsl day. Ɗiyiy wir wir acin, wətta, za tapigi atalan jik avə gawal mə mgbəru mgbəru. Wəraɗiy talan jik am lay Yesu mə ɗew cek cek. Ma buluf tə za, wətiy mbiseh, jawta am lay wan ngə hidi mə mgbəru mgbəru tafnan, surohta atalan jik mə buluf buluf tafnan hos a kibik Yesu. 5 Yesu ma lim kəzəɗ ngə hidiy nhi za, tu sən tik hidiy nhi, mə vəlenta nəv ngatan za. Luwen a hidi mə mgbəru mgbəru: ‹‹ Kərti ɗa, hoh tu jan geɗ mə ngavngav››.
6 Mogroy jəgwan a waniy mə ɗew ɗew abəgo . Taniy ma zlimiy zləgam atəgo za, ɗiya ɓəniy a mə nəv za: 7 ‹‹ Gawəl nhi a zləgam mə ngavngav atalan Bayzlav kemi? Hidi a hos gəga kə geɗ mə ngavngav ngə hidi bugwən, səna Bayzlav a gendik.›› 8 Gwedek, Yesu mə sən ɓən ngatan za. Ɗiya nehta: ‹‹ Mə ɓən atəgo kemi? 9 Ma tuwnha kə luw acin mi? Kə luw ‹Hoh tu jan geɗ mə ngavngav vu, asənkwən kə luw ‹A sliɗ za, a ɓiy lay wan koh ma vəkoh vu?› 10 Tə luw atəgo kə jan hin kə sən tik, Kərti Hidmambəlen a mar gədan kə geɗ mə ngavngav ngə hidiy təm talan mahayək kaɗ.›› Zəni ɗiya luwenni a hidi mə mgbəru mgbəru: 11 ‹‹ Ta luwoh, a sliɗ za, a wət lay wan koh, av koh a de.›› 12 Njoɗ, sin sliɗ a kibik hidiy təbəgo cike wayza, wət lay wan tik, a kibik hidiy cike wayza, və tik a de. Wələk talan ngə hidiy mə limta cike wayza. Ɗiya luwta: ‹‹ A micek yikwan mə lim anhi ɓaabəgwən.›› Nap səbaniy Bayzlav acin.
Yesu ɗefenma a Lewi kə səbtik
13 Zəni Yesu jəɓ tik baha atalan torok Galili. Adəwən səna, hidiy dolom yigi, ɓas ɓasigi angər tik, za Yesu jugwanenta zləgam ngə Bayzlav.
14 Mandal a va a mozlokotuf, lim Lewi kərti ngə Halfa. Hidi mə yək buudu, mə ɗewe kaɗ am lay ɗiy kəzəɗ ngetik. Yesu luweni: ‹‹ A sliɗ ma səbakku.›› Lewi sliɗ za, ɗiya səb tik.
15 Zəni Yesu va avə wəriy gawliy ngetik kə zəmiy gəda a de ngə Lewi. A de Lewi səna, hidiy dolom mə yəkiy buudu avə hidiy mə njə kə ɗiyiy mə ngavngav cike wayza zəmiy gəda avə ta Yesu abəgo . 16 Mogroy ngə jəgwan njə Farisigiª a waniy abəgo təm, limiy Yesu a zəm gəda avə hidiy mə yəkiy buudu ɓəw hidiy mə ɗiyiy mə ngavngav. Taniy ɗiya luwenta a wəriy gawliy ngə Yesu: ‹‹ Mordoy kin a njə kə zəm gəda avə hidiy təgo wər kemi?›› 17 Yesu ma zlim atəgo za, ɗiya luwenta: ‹‹ Hidiy məmariy zoy tə kəsəm aa viy angər hidi mə ɗiy maazlaª ɗahkwən, səna hidiy mə daldaligi. Kata təm wa səna. Kata tə yah kə ɗefenma a hidiy njə nəv ma kweɗek kwən. Kata tə yah kə ɗefma a hidiy mə ɗiyiy mə ngavngav kə mbəlta kaɗ.››
Məzugzugwa ngə dalyam angər Yesu par avə məzugzugwa ngə Farisigi
18 Pic takan, wəriy gawliy ngə Yuhana mə juroɓ baptisma avə Farisigi aa ɗiyiy dalyam. Hidiy məpərmay sliɗigi, yiy angər Yesu, ɗiya nehta: ‹‹ Mordoy, wəriy gawliy ngə Yuhana avə Farisigi a ɗiyiy dalyam. Ya za acin, wəriy gawliy koh a ɗiyta ɗahkwən wər kemi?›› 19 Yesu zlawenta a məngaɓngaɓ: ‹‹ Mana hidi mə dəm werti tu ɗefenma a hidigi kə zəm gəda, zəni taniy yigi. A zəmiy gəda kwən vu? Awwo! A ɗiyiy dalyam kwən, kadaban hidi mə dəm werti a wan a dab tan. 20 Mandal pic tik tu hos, av kə wətiy hidi mə dəm werti a dab tan za. Am pic səna acin, hidiy av kə ɗiyiy dalyam.››
21 Yesu ɗiya luw baha: ‹‹ A wətiy maslaga ndawyan kə mbok mbusur ləkwət avə sin ɗahkwən. Mana tu mbokta atəgo , maslaga ndawyan av kə dəɗ mbəsur ləkwət kə kwah kibik kibik. 22 Za baha, a zekiy movu ma didem am mbəsur vəram kwenekweneª ɗahkwən. Mandal movu səna tu kə nah za, av kə basaha, zəni av kə kwah mbəsur vəram kwene kwene, za movu təm av kə zekey tik baha. Law law say hidi kə zek movu am vəram kwene kwene ndawyan.››
Yesu acin bay ngə pic nəp ngə Yahudigi
23 Am pic nəp ngə Yahudigi, Yesu avə wəriy gawliy ngetik aa tonigi a liɓ tuz ngirmi məpərmay ma ceh ngirmi hiziɗ. Mandal ta toniy səna, wəriy gawliy ngetik ɗiya karta kə ham. 24 Farisigi ma limta za, ɗiya tariy Yesu: ‹‹ Mordoy, Musa a luw: ɗa law kə ɗiy kəzəɗ am pic nəp kwən. Za acin, wəriy gawliy koh a kariy təkən ngə zəm təgo am pic nəp wər kemi?›› 25-26 Yesu ɗiya zlawenta: ‹‹ Hin mə saf am ɗerewel ngə Bayzlav təkən Dawda mə ɗiy taməcek bəgwən vu? Mandal Abiyatar acin mordoy ngə masayiy təm jik ngə Bayzlav, pic takan mətis hamen a Dawda avə hidiy mə ɗewiy tav sin. Zəni təkən ngə zəm angər tan ɗahkwən. Dawda pət am jik ngə Bayzlav, ham bret mə ɗerta ngə Bayzlav. Za wətª vəlen a hidiy mə ɗewiy tav sin. Za ma bretª mə ɗerenta a Bayzlav nhi, mə taktak ngə Bayzlav a vəlen kotuf a hidiy cike wayza kə hamta bugwən, say masayigi a gandan.›