Ləbar Malaw atalan Yesu Kristu,
LUKA
mə ɗəɗefu
Pət am deftere nhi
Luka mə ɗəɗef deftere nhi, sin hidi ta njə kə taligi avə Pol am sin ta ɗə mbuluk am hayək ma par par, za tu ɗewiy avə sin am hayək Roma. Sin doktor mə njə kə saf mə daldaligi (mə saf am Kolosi 4:14). Sin tu neh hidiy par par atalan ɗew ngə Yesu, za adəwən səna kə diw kə ɗəɗef deftere nhi. A talan mbuw ngə Yesu wər, hidiy a luw ta sin a neh angər Mari mamay ngə Yesu. A luw tə baha, mandal sin ta ɗəɗef deftere nhi, Pol a wan jik dangay tə liɓde Kaysariya.
Luka a ɗəɗef deftere nhi a ngwalay tik Tewofil. Hidi səna təm səban Yahudigi kwən, mana kə luwa kaɗ, Luka a ɗəɗef deftere ngetik a hidiy ma səban Yahudiya kwən. Sin avə talan tik baha səban ngə Yahudigi kwən.
Luka hidi mə njə kə saf kaymah ngə hidigi, a njə kə zləgam day atalan sanha yigi mana matakwan hidigi, mə daldaligi, wərigi, wertigi, ɓəw muwəligi. A njə kə ceɗ mgban mgban mana Yesu mə yah am talan mahayək kə mbəl hidi mana tanigi.
Təkən mə ɗiy avə səb tik təm deftere Luka:
Ləbar atalan təkən ma par par mə ɗiy zagway za cin Yesu kə mbuw, ɓəw atalan mbuw Yesu (mə saf am mogroy tik 1 avə 2).
Ləbar atalan Yuhana baptis a hidigi, ɓəw atalan Musuruf mə təl kə lebeɗ Yesu (mogroy tik 3:1-4:13).
Ləbar atalan kəzəɗ, Yesu mə ɗiyu təm hayək Galili. Am diw tik, sin tu pət a jik jəgwan ngə Yahudigi za sin tu jangi am deftere ngə Bayzlav atalan kəzəɗ sin tu kə ɗiyu, mana sin tu kə ceɗenta Ləbar Malaw a matakwan hidigi ɓəw a hidi təm nəv ngər Musuruf, za mana sin tu kə mbəl hidi njə sanha tə kəsəm (4:17-19). Za Yesu tu ɗiy kəzəɗ səna tiɗ tiɗe mana mə jangu səna (mogroy tik 4:14-9:50).
Yesu sliɗ am hayək Galili za kə va am liɓde Ursalima. A mozlokotuf, sin tu jugwanenta təkən par par a hidigi (mogroy tik 9:51-19:27).
Ləbar atalan təkən mə hosoho atalan Yesu mandal sin mə ɗew am liɓde Ursalima hos am məc tik (mogroy tik 19:28-23:56).
Ləbar atalan mbəl ngə Yesu am məc za, ɓəw mana Yesu mə ɗef həriya ngetik a hidi par par, za mana mə vətik a dibizlav kə ɗew a jagwar Cin (mogroy tik 24).