Yesu mə mbəlah za a mə məc
16
Pic nəp ngə Yahudigi ma ton za, Mari tə Magdala, Salome ɓəw Mari mamay Yakuba mendez va səkəmiy dorson ma njif tik ma nek kə va kə zekenta a Yesu a kəsəm.2 Am pic alat gbəm za, diw ngə wan zəm luma, sliɗiy kə va kə safiy talan civi ngə Yesu. 3 Mandal a viy a mozlokotuf, a zləgamigi am walan tan. Ɗiya luwta: ‹‹ Hid ngayi məv kə goɗiy yikwan kəlam mordoy tə talan civi səna acin yi?›› 4 Ma kafiy talan ciy heriya za, wertiy səna limiy kəlam mordoy səna mə goɗoh kaɗ atalan civi za.
5 Pətigi a liɓ civi səna. Limiy kərti gawla mə ɗewe kaɗ abəgo, a mə ngər zəm za avə ləkwət ma baran. Nəv ngatan tu mbir. 6 Gawal səna ɗiya luwenta: ‹‹ Mə hovok kwən! Hin mə jar Yesu tə Nasaratu mə kpawta təm pay ma zləngərak, ɗah a wənhi ɗaba. Mə mbəlah tik am məc za, mə saf am lay mə ndəɗta. 7 Tanjinhi məvkin, mə ceɗen a Piyer avə wəriy gawliy dagaytik avə ləbar nhi: ‹‹Av kə hos məpəlpəla am hayək Galili, hin məv kə lim tik bəgo mana sin mə luwe hin. ››
8 Wertiy səna pətiy tan a mə civi za, nəv ngatan kwir, a hovokigi, za ɗiya siy tan. A ceɗiy ləbar səna a hidi ɓaabəgwən, kadaban mindiwin a hovokigi dayday.
Hidiy par par limiy Yesu
[ 9 Pic alat gbəm za, Yesu mbəlah a mə məc za. Adəwən ma pətah a mə məc za, Mari tə Magdala acin mə lim tik məpəlpəla. Amicek, Yesu a gam musuruf par par cisaray a kəsəm tik. 10 Adəwən səna, werti səna va ceɗen a hidiy mə njə kə lapiy a Yesu. A janta a hanigi kadaban a deniy məc ngə Yesu. 11 Wertiy səna luwenta: ‹‹ Yesu a wan avə micin, kata mə lim za››! Ma zlimiy zləgam werti səna mə luwenta za, a yəkiy ma ngetik bugwən.
12 Adəwən səna, Yesu ɗef talan ngetik a hidiy saray tə dab wəriy gawliy ngetik ta viy tə mozlokotuf ngə Ursalima. A ɗef kəsəm tik par a mana mə ɗefen a Mari tə Magdala. 13 Ma jəɓiy a Ursalima za, ceɗenta a celeniy ngə Yesu tə bugo. Zəni hidiy səna a yəkiy ma ngatan ɓaabəgwən.
14 Adəwən səna, Yesu ɗef talan ngetik a wəriy gawliy ngetik ma gəɓ atalan takan mandal a zəmiy gəda. Ɗiya ndəlta, kadaban a yəkiy zləgam ngetik bugwən. Sin ɗiya ngəzta, kadaban nəv tan toy toy, a yəkiy ləbar hidiy mə luwenta mə limta za adəwən sin mə pətah ta mə məc za anhi bugwən.
15 Zəni sin luwenta: ‹‹ Mə va am talan mahayək cike wayza, mə ceɗen Ləbar Malaw a hidiy cike wayza. 16 Hidi mə yək ləbar səna, mana tu yək baptisma, av kə jan mbəl angər Bayzlav. Zəni ngə hidi mə ɓon kə yək ləbar malaw, Bayzlav av kə zlen dalgway. 17 Hidiy mə yəkiy ləbar ngaɗa, av kə ɗiyiy təkəniy mə kpah talan. Təv kə vəlenta gədan, taniy kə gamiy musurufigi avə zlim ngaɗa. Av kə zləgamiy avə ma ma asənta aməcek ɗahkwən . 18 Ko mana tu kawiy wən avə ngəra ngatan, asənkwən mana tu siy mbət am yəm, a ɗiyenta ko mi kwən. Avə zlim ngaɗa, av kə kafiy ngəra tan atalan hidiy mə dal dal, zəni hidiy səna av kə janiy zoy.
Bayzlav ɓiy Yesu kə va dibizlav
19 Adəwən Məmar Hidi Yesu ma way kə zləgamen a wəriy gawliy ngetik za, Bayzlav ɓiy kaɗ kə va dibizlav. Sin ɗewey tik am ngər zəm ngə Bayzlav. 20 Wəriy gawliy ngetik wər viy kə ceɗiy ləbar ma law am lay par par. Məmar Hidi Yesu mə ɗiy kəzəɗ za avə tanigi. Təkəniy mə kpah talan taniy mə ɗiyta tu ɗef mana taniy mə ceɗiy zləgam ma mindiwin.]