Yesu a wan a kibik bay Pilatu
15
Gbum za, mogroy ngə masayigi, talan mbalgamigi ngə yahudigi, mogroy jəgwan ɓəw mə zliy dalgway tə dab Yahudigi ɓas ɓasiy kaɗ kə zləriy ma ngə zla dalgway a Yesu. Jawiy Yesu kaɗ, za tepta a kibik Pilatu. 2 Pilatu təm neh Yesu, ɗiya luw: ‹‹ Hoh acin bay ngə Yahudigi vu?›› Yesu zlaweni: ‹‹ Mana hoh mə luwu.›› 3 Mogroy ngə masayiy ɗiya slenta ma par par kə jan dalgway kə kaw tik. 4 Adəwən səna, Pilatu neh baha, ɗiya luw: ‹‹ Hoh zlaw atalan zləgam ngə hidiy nhi kwən vu? A zlim lawlaw mana mə ciy wəla dolom am dalgway atalan koh nhi.›› 5 Yesu wər tete tik. Kadaban səna, tu kpah talan ngə Pilatu.Dalgway ngə wəzl Yesu tu zla
6 Kə di kə di, mandal məmbəlwa ngə Paska, Pilatu a njə kə fəkah hidi takan təm jik jaw kaɗ. A njə kə fəkah kaɗ mana hidiy mə may ta. 7 Anhi hidi məpərmay zlim tik Barabas, mandal səna a waniy am jik jaw avə mandaltigi. A pekta makavay mə gboriy ma a liɓde ɓew lay wəzliy hidi. 8 Adəwən səna, zəgudu viy a midigiɗ Pilatu, ɗiya luwta kə ɗiy mana ma hoyhoy . 9 Pilatu ɗiya nehta: ‹‹ Hin mə gər kata kə fəke hin bay ngə Yahudigi vu?››
10 Sin mə sən za, mogroy ngə masayiy a centa wəla a Yesu kadaban a ɗiyiy ngərak. 11 Zəni mogroy ngə masayigi a vəlenta gədan a zəgudu kə luwta geleɓe sin kə fəkenta Barabas. 12 Pilatu jəɓ neh hidiy baha: ‹‹ Ya hidi hin mə njə kə luw bay ngə Yahudigi wər kata kə ɗiyen mi?›› 13 Taniy ciy wəla, ɗiya luwta: ‹‹ A kpaw kaɗ am pay ma zləngrak!›› 14 Pilatu nehta, ɗiya luw: ‹‹ Mə ngav ngav ngemi sin mə ɗiyu?›› Jəɓ ɗiya ciy wəla day day: ‹‹ A kpaw kaɗ am pay ma zləngrak! A kpaw kaɗ am pay ma zləngrak!›› 15 Pilatu a gər kə fet nəv ngə zəgədiy, kadaban səna, fəkah Barabas kaɗ. Zəni luwen a sojiy kə zariy Yesu. Sin vəlenta Yesu taniy kə kpawta am pay ma zləngrak.
Sojigi mbisenta a Yesu
16 Sojigi tepiy Yesu a terde ngə bay Pilatu. Ma tep tə za, ɗefentama a celeniy sojigi kə ɓasiy cike way kaɗ. 17 Taniy kwəlenta ləkwət ma wizek,ª kə jan kə mbisenta. Taniy bəbiy kidigiɗ, zəni təmenta atalan mana falfala ngə bay. 18 Adəwən səna, ɗenta mbeli: ‹‹ Mbeli bay Yahudigi.›› 19 Wəzlta am talan avə zlambəlay. Tifenta giden a kəsəm. Gbəliy titimbiz kaɗ kə səbanta. 20 Ma wayiy a kə mbisenta za, cokiy ləkwət ma wizek tə kəsəm tik səna kaɗ, za təmenta ləkwət tik. Zəni tepta gaf a liɓde za, kə va kə kpawta kaɗ am pay ma zləngrak.
Kpawiy Yesu am pay
21 Mandal a viy a mozlokotuf, gbomigi avə Simon tə liɓde Sirene, babay ngə Aleksandre avə Rufus. Sin a yətik a donu za. Sojigi takənta wəla a gawal səna kə ɓiy pay ma zləngrak ngə kpaw Yesu. 22 Tepiy Yesu am lay ta luwta a ma ngatan Golgota, mana kə luw kaɗ: ‹‹ lay ngə kukuɗum talan››. 23 A gəriy kə vəlenta movu mə nəna mə ngaɗ ngaɗ avə təbu zlim tik mirª, zəni Yesu ɓon kə sa tik. 24 Zəni ɗiya kpawta am pay ma zləngrak. Taniy ɗeweriy metentenge kə sənta hidi ngayi acin tu kə zəm lukwət. Za acin wəzakiy ləkwət səna am walan tan. 25 Am masa ngərafkatakan acin taniy mə kpawiy Yesu am pay ma zləngrak. 26 Taniy a ɗəɗefiy dalgway ngetik am pay ma kaslaprap anhi, a luwta: ‹‹ Bay ngə Yahudigi.››
27 Kpawiy məhəliy saray a jagwar Yesu am payiy ma zləngrak. A kpawiy hidi takan am ngər zəm, sənan am zlaɓay. [ 28 Təkən nhi tu ɗiy mana ɗerewel ngə Bayzlav mə luwu: ‹‹ A kpawta mana sin təm məhəl.››]
29 Hidiy mə toniy ta bəgo ɗiya kəziy talan tan bazla bazla, ɗiya zləgamiy ma mə ngavngav atalan tik. Ɗiya luwta: ‹‹ Hoh ta! Hoh luw hav kə gom jik ngə Bayzlav kaɗ, zəni hav kə ndən tik am wan makaɗ kwən vu?. 30 Tanjinhi a surohoh am pay ma zləngərak za, a mbəl talan koh!›› 31 Mogroy ngə masayiy təm jik Bayzlav ɓəw mogroy jəgwan ɗiya mbisenta. Ɗiya zləgamiy am walan tan, ɗiya luwta: ‹‹ Sin mbəl hidigi, zəni a ɓəs kə mbəl talan tik bugwən! 32 Mana hoh Kristu, bay ngə Israyila, a sorohoho mbeh mbeh nhi am pay ma zləngərak za, kə jan yikwan kə yək ma ngəkoh.›› Hidiy ma saray mə kpawta tə jagwar tik a rə ta təm.
Məc ngə Yesu
33 Dab dab pic, kpizliɓ ɗiy am talan mahayək cike, hos am masa makaɗ ngə sukoh. 34 Am masa makaɗ ngə sukoh səna acin, Yesu cə wəla day day a mə ngetik, sin luw: ‹‹ Eloyi, eloyi, lama sabakətani?›› Mana kə luwa kaɗ ‹‹ Bayzlav ɗa, Bayzlav ɗa, hoh buwak dəwən kemi?›› 35 Hidiy mə gar gariy təbəgo zlimta, ɗiya luwta: ‹‹ A ɗefenma a Eliya mokotuf ngə Bayzlav tamicek.›› 36 Njoɗ hidi takan tə dab tan siy, va wət mbusur lukwət, juroɓ am təkən ngə sa ma kwerek ngə mə mbumbu ngə pay. Zəni cəɓ am pay, gboren a Yesu am ma kə seɓ tik. A luw: ‹‹ Nəmkwan kə puw tik, yikwan məv kə saf tik koh Eliya av kə yah kə sərohoh tik am pay ma zləngərak nhi za vu.›› 37 Zəni Yesu cə wəla day day, cəɓah, sin məcay tik.
38 Am jik Bayzlav səna, godo ɗaha mə njə kə təteh lay ɗew ngə Bayzlav. Ɗiya kwah a dab daba dəga wəzlav za kula mahayək, mandal Yesu mə məc səna.
39 Mordoy ngə sojigi roma mə gar gar tə jagwar pay ma zləngərak, ma lim məc ngə Yesu atəgo za, ɗiya luw: ‹‹ Mindiwin gawal nhi kərti ngə Bayzlav.›› 40 Wertiy a waniy am lay mə kpawiy Yesu səna təm, a safiy mana təkəniy səna taa toniy a gaf tik. Adab tan, Mari tə Magdala, Salome ɓəw Mari mamay ngə Yakuba mendez avə Yoses. 41 Taniy a səbiy yesu, ɗaw kə ɗiyenta kəzəɗ mandal a wani a Galili. Wertiy məpərmay ɗahiy dolom abəgo, a yiy avə Yesu a Ursalima za.
A kahiy Yesu
42 Pic mə ɗiya sukoh, a fəs wan takan pic nəp ngə Yahudigi kə hos. Hidiy ɗaw kə sləsləɓiy təkəniy par par ngə pic nəp am mandal səna. 43 Gawal ɗaha təm slalahde Arimatiya, zlim tik Yusufu. Sin a wan a dab talan mbalgamiy ngə Yahudigi. Sin hidi mə njə kə daɓenta talan a dab talan mbalgamiy ngə Yahudigi mə zliy dalgway. A puw pic Bayzlav tu kə yah kə mar lay. Sin jan gədan, va angər Pilatu kə nehe kəsəm ngə Yesu. 44 Pilatu ma zlim Yesu mə məca za, tu prasl talan tik godokwən kadaban a saf wa mə məca angaw day. Ɗefenta ma a mordoy sojigi, ɗiya neh tik: ‹‹ Mə məc səna mə vaha za vu?›› 45 Adəwən mordoy ngə sojigi ma ceɗen ləbar səna za, Pilatu geɗen mozlokotuf a Yusufu kə wət kəsəm ngə Yesu. 46 Za acin Yusufu səkəma maslaga. Sin sərohoh mimci am pay za. Sin paɗ paɗ kaɗ. Za kahiy mimci am civi mə nguh nguh am talagwən. Adəwən səna, sin goɗ goɗoh kəlam mordoy pek mə civi səna avə sin. 47 Mari tə Magdala avə Mari mamay Yoses a waniy bugo. Taniy limiy lay mə kahiy Yesu təbəgo səna.