Hidiy mogroy a zleriy ma kə wəzl Yesu
14
A fəs wan saray məmbəlwa ngə Paska ɓəw məmbəlwa hidiy mə njə kə hamiy bret mətak njem kə hosohoh. Mandal səna, mogroy ngə masayiy təm jik Bayzlav ɓəw mogroy jəgwan a jariy mozlokotuf kə kawiy Yesu avə ɓah, kə wəzl kaɗ. 2 Luwta: ‹‹ Geleɓ yikwan mə gər kə kaw tik am məmbəlwa nhi kwən, asənkwən hidiy av kə ɓeriy yikwan.››Werti zeken dorson a Yesu a talan
3 Yesu a wan a slalahde Baytaniya a de Simon hidi ma məc kwalkwala a kaw zaba. Mandal Yesu a zəm gəda, werti məpərmay pət angər tan avə vəram ngə Albatirª wek avə dorson. Zlim dorson səna Nar, njif tik nek, zəni səkəm tik tuwnha godokwən. Sin wət vəram ngə dorson səna, nga wəla tik kaɗ. Zeken dorson səna a Yesu a talan. 4 Hidiy sənan ma limta za, nəv tan bas. Taniy zləgamigi, ɗiya luwta am walan tan: ‹‹ A ngav dorson səna kaɗ kemi? 5 Geleɓ a ber za kə jan suloy dolom a kimin kə mən hidiy təm sanha avə sin kwən vu? Gasenta ma a werti səna. 6 Zəni Yesu luwenta acin: ‹‹ Mə gasen ma a werti nhi kemi? Sin mə ɗiyak təkən ma law za. 7 Mə njə kə ɗew hoyhoy avə hidiy təm sanha. Mana hin ma may, hin məv kə vəlenta təkən koh a pu. Zəni kata wər, kata tə ɗew a hin ɗaba. 8 Werti nhi tu ɗiy təkən sin mə ɓəs kə ɗiyakku. A zekek dorson a kəsəm ɗa kə sləsləɓ ngəv wili. 9 Ta ceɗehinmindiwin, am talan mahayək cike, mandal hidiy ɗa a ceɗiy Ləbar Malaw, av kə nəfiy kəzəɗ werti nhi mə ɗiyu, zəni zlim tik av kə zlim mgbaw talan mahayək.››
Yahuda vəl Yesu a mosumiy ngə Yesu
10 Mandal səna, Yahuda Iskariyot, hidi takan tə dab wəriy gawliy ngə Yesu ma gəɓ atalan saray, sliɗ va angər mogroy ngə masayigi kə vəl Yesu angər tan.›› 11 Ma zlimiy ma ngə Yahuda za, nəv ngatan ɗiya zəzay. Sləsləɓiy kə vəlenta suloy makavay gəd mazlən tik. Kadaban səna, Yahuda a puw pic tik kə hosohoh za kə ɗef ngəra atalan Yesu, za hidiy kə kawta.
Yesu avə wəriy gawliy ngetik a zəmiy gəd ngə Paska
12 Am tizin wan ngə diw məmbəlwa ngə bret mətak njem ma hos za, ɗaw kə fatiy kərti təmak ngə məmbəlwa ngə Paska. Wəriy gawliy ngə Yesu nehta: ‹‹ Hoh may yikwan kə va kə sləsləɓ gəda məmbəlwa ngə Paska aki?›› 13 Zəni Yesu zlən wəriy gawliy ngetik saray, luwenta: ‹‹ Mə va a liɓde Ursalima. Məv kə mgbamen a gawal a siɗe ngə yəm a talan. Mə səbu. 14 A de sin tu kə pət səna, hin kə luwenni a hidi njə de səna acin: ‹Mordoy ngiykwan acin mə zləna yikwan kə nehe: A kway jik gaɗa kata tu kə zəm gəd məmbəlwa ngə Paska a wəriy gawliy ngaɗa?› 15 Av kə ɗefe hin jik mordoy jongolon, mə sləsləɓakaɗ law law. Hin təm, hin kə tə gəd ngə məmbəlwa ngiykwan acin.›› 16 Wəriy gawliy səna sliɗigi, za vigi acin a liɓde səna. Va janiy təkəniy səna cike wayza tiɗ tiɗe mana sin mə ceɗenta. Zəni taniy ɗiya sləsləɓiy gəd məmbəlwa ngə Paska abəgo .
17 Pic ma ndəv za, Yesu a wəriy gawliy ngetik hosigi am jik səna. 18 Mandal mə ɗewiy kaɗ a zəmiy gəda, Yesu ɗiya luw: ‹‹ Kata ceɗehinmindiwin, hidi takan tə dab kin ta zəm gəda avə kata av kə vəlak a hidiy kə wəzlakta.›› 19 Zləgam səna tu nəs nəv ngə wəriy gawliy ngə Yesu. Koh yi a neh tik a səb tik a səb tik, hidi ngayi kata vu? Hidi ngayi Kata vu?›› 20 Yesu zlawenta: ‹‹ Hid takan tə dab kin ma gəɓ atalan saray nhi, hidi ta təm ngəra am kaslak lap avə kata kə zəm gəd anhi, sin acin hidi səna. 21 Mindiwin, Kərti Hidmambəlen, av kə məc mana mə ɗəɗefta tə talan tik. Zəni tuwnha ɗaha a hidi məv kə vəl Kərti Hidmambəlen a hidiy kə wəzlakta kaɗ səna. Geleɓ a mbuwiy hidi səna bugwən.››
Gəda ngə Məmar Hidi
22 Mandal a zəmiy gəda ngə məmbəlwa, Yesu ɓiy bret, luwen soko a Bayzlav, zəni wəɗak wəɗak bret kaɗ. Sin vəlen a wəriy gawliy ngetik. Sin ɗiya luwenta: ‹‹ Mə wətu, nhi acin kəsəm ɗa.›› 23 Adəwən səna, sin ɓiy təkən ngə sa am kendek, luwen soko a Bayzlav, za vəlenta. Taniy cike wayza səta. 24 Sin luwenta: ‹‹ Nhi acin ɓiɓiz ngaɗa mə zek makavay hidiy dolom. Avə ɓiɓiz nhi acin Bayzlav a jawma avə hidigi . 25 Kata ceɗehinmindiwin, kata tə sa yəm ngə mə mbumbu ngə Inaboje avə hin ɗaba hos am pic kata tu kə sa yəm ngə mə mbumbu ngə Inaboje ndawyan am bay ngə Bayzlav avə hin.›› 26 Zəni adəwən səna, taniy ɗiya jəkiy drifiy kə səban Bayzlavª. Za sliɗigi, vi tan atalan wərum Jaytun.
Yesu luw, Piyer av kə luw a sən ɗahkwən
27 Yesu luwen a wəriy gawliy ngetik: ‹‹ Hin cike, hin məv kə siy kin kə geɗek a gendik, mana mə ɗəɗefta am ɗerewel ngə Bayzlav: ‹Təv kə wəzl mə gəlgəla kaɗ, za təmakiy av kə cakwayigi.› 28 Zəni mana kata tu mbəlaha am məc za, kata təv kə hos məpəlpəla am hayək Galili, hin kə janak abəgo .››
29 Piyer ɗiya luweni: ‹‹ Koh hidiy cike wayza tu geɗigi, kaɗ wər tə geɗe kwən.›› 30 Yesu zlaweni acin, sin ɗiya luw: ‹‹ Mindiwin kata ceɗe, a vuɗu nhi, dəga gomzok a cə wəla mə saray tik gesin bugwən, hav kə luw a kibik hidigi jəɓ makaɗ, hoh sənak ɗahkwən .›› 31 Kadaban səna, Piyer luw day day baha: ‹‹ Koh a sla ngə məc, yikwan məv kə məc a jəjoɗ, tə buw ma kwən.›› Adəwən səna, wəriy gawliy ngə Yesu mə fəs fəs cike wayza ɗiya luwta atəgo təm.
Yesu a tar Bayzlav a Gecemane
32 Yesu avə wəriy gawliy ngetik hosiy am lay ta luwta Gecemane, zəni sin luwen a wəriy gawliy ngetik: ‹‹ Mə ɗew a wənhi gesin. Təv kə tara Bayzlav.›› 33 Zəni sin ngazl Piyer, Yakuba ɓəw Yuhana. Mandal səna Yesu diw kə nənəh a hovok, nəv tik tu mbirª. 34 Kadaban səna, ɗiya luwen a wəriy gawliy ma makaɗ səna: ‹‹ Ɓən təm nəv ngaɗa av kə wəzlakku, mə ɗew a wənhi gesin, mə ɗew a variya mə puwakku.›› 35 Sin və gaf gwedek, ndəv a kayək, ɗiya tar Bayzlav, mana a jan za wər, kə tak banay tu kə hosoho atalan tik nhi kaɗ. 36 Sin ɗiya luw: ‹‹ Aw Vay ɗa! Aw Vay ɗa! Hoh ɓəs kə ɗiy təkəniy cike. A tak banay ta hosoh tə talan ɗə nhi kaɗ. Ko asəna, hoh gər kə ɗiy mana nəv ngaɗ mə may kwən, a ɗiy mana may ngəkoh.››
37 Adəwən səna, sin jəɓ tik angər wəriy gawliy ngetik ma makaɗ tafənan. Va jan ta mə waniy za. Sin ɗiya luwen a Piyer: ‹‹ Simon, hoh wanay koh vu? Hoh ɓəs kə puw koh masa takan bəgwən vu? 38 Mə ɗew avə variya, mə tar Bayzlav, kə jan ta musuruf kə lebeɗe hin kə ɗiy mana may ngetik. Mana ɓən ngə hidi mə mayu, kəsəm təm aa ɓəs kə ɗiy tik ɗahkwən, kadaban kəsəm a wana avə kukuɗ.››
39 Adəwən səna, Yesu jəɓ vətik kə tara Bayzlav baha mana tafənan. 40 Sin ma jəɓah a mə tar Bayzlav za angər wəriy gawliy ma makaɗ tafnan, jəɓ jan ta a wanigi baha, kadaban həriya ngatan cike wayza ɓilik ɓilik avə wan. A səniy kə zlawenta a ciki bugwən, lay janta a waniy tan səna. 41 Yesu ma jəɓaha mə makaɗ tik za, sin luwenta: ‹‹ Hah tanjinhi hin ma wan vu? Hin ma nəp vu? Tanjinhi gəga acin, pic tik mə hosoh za tanjinhi! Av kə vəlenta Kərti Hidmambəlen a hidiy mə ɗiyiy mə ngavngav. 42 Mə sliɗ za, nəmkwan! Anhi hidi məv kə ɗef ngəra a mosumigi atalan ɗah kə kawakta, sin mbeh kə hosohoh.››
A kawiy Yesu
43 Mandal Yesu a wəlen, a zləgam zagway, njoɗ Yahuda hidi takan tə dab wəriy gawliy ngetik ma gəɓ atalan saray hosohoh. Zəgədiy dolom lapigi avə sin avə maslalamigi am ngəra ɓəw zlambəlayigi. Mogroy ngə masayigi təm jik Bayzlav, mogroy jəgwan ngə mə taktak avə talan mbalgamigi tə dab Yahudigi acin mə zlənata kə kawiy Yesu. 44 Yahuda tu kə vəl Yesu, a ceɗen a hidiy tu kə kawiy Yesu anhi : ‹‹ Hid kata tu kə tərlak avə sin kə ɗen mbeli, sin acin hidi səna. Mə kawu, mə tepu, hin kə puw tik law law.››
45 Yahuda ma hosohoh za, sin kərəɓ a jagwar Yesu, ɗiya luwenni: ‹‹ Mordoy!›› Zəni tərlak avə sin, ɗen mbeli. 46 Adəwən səna, hidiy mə yigi avə sin kawiy Yesu. 47 Hidi takan tə dab wəriy gawliy ngə Yesu, pəɗ maslalam tik, kac, sin cel zlim ngə baalam ngə mordoy ngə masayiy təm jik Bayzlav.
48 Yesu ɗiya luwenta: ‹‹ Mə yah kə kawakku avə masalam avə zlambəlay mana mə kawiy məhəl anhi kemi? 49 Hoyhoy kata ɗaw kə ɗiye hin jəgwan witikwitik am jik ngə Bayzlav, mə kawak bugwən. A ɗiy anhi kə jan kə ɗiy kpekpe mana mə ɗəɗefta am ɗerewel ngə Bayzlav.›› 50 Zəni wəriy gawliy tik cike wayza siy tan geɗ ta a gendik.
51 Kərti gawal sənan səb Yesu, sin pak godo a kəsəm a gendik. Hidiy tə dab mə kawiy Yesu kawta. 52 Sin lerey tik, geɗ godo, siy tik kəsəm maymay.
Yesu awan a kibik mogroy Yahudigi mə zliy dalgway
53 Hidiy mə kawiy Yesu tepta angər mordoy ngə masayiy təm jik Bayzlav. Mogroy ngə masayiy cike wayza avə talan mbalgamigi ɓəw mogroy jəgwan mə səniy mə tak tak, mə ɓasiy dolom angər mordoy ngə masayigi. 54 Ngə Piyer wər ɗiya səb Yesu gaf adəwən za. Sin va pət a terde ngə mordoy ngə masayiy səna. Ɗewey tik avə hidiy mə puwiy de. A sif kuhu avə tanigi.
55 Mogroy ngə masayigi ɓəw talan mbalgamigi mə zliy dalgway tə dab Yahudigi cike wayza a jariy hidiy kə ngawenta ma a Yesu kə jan kə centa wəla am dalgway. Zəni a janta ɓahbugwən. 56 Kadaban səna, hidiy dolom a ngawenta ma a Yesu kə jan kə ɗiyenta dalgway, zəni a zleriy ma tan kaɗ takan bugwən. 57 Adəwən səna, hidiy sənan tə dab tan sliɗigi, ɗiya ngawiy ma atalan Yesu. A luwta: 58 ‹‹ Yikwan mə zlim za avə zlim ngiykwan, sin a luw: ‹Jik ngə Bayzlav hidiy mə ndən ta avə ngər ngatan nhi, təv kə kurop kaɗ, zəni təv kə ndən məpərmay am wan makaɗ. Tə ndən jik səna avə ngəra ngə hidi kwən.›› 59 Zəni taniy təm a zleriy mə tan kaɗ takan bugwən.
60 Kadaban səna, mordoy ngə masayiy təm jik ngə Bayzlav sliɗ, gar a dab hidigi. Ɗiya neh Yesu: ‹‹ Hoh ɗa kə zlawen a hidiy ta zləgamiy mə ngavngav atalan koh nhi kwən vu? ‹‹ 61 Zəni Yesu wər njaytik tete. Adəwən səna, mordoy ngə masayiy ɗiya luwenni a Yesu baha:›› Hoh acin Kristu hidi Bayzlav mə welu yikwan ta njə kə səban tik nhi vu?›› 62 Yesu ɗiya luw: ‹‹ Yaw, kata hidi səna. Ta ceɗe hin, hin məv kə lim Kərti Hidmambəlen mə ɗewe kaɗ am ngər zəm ngə Bayzlav məmar gədan. Sin av kə yah am gazlavay za.››ª 63-64 Mordoy ngə masayiy ma zlim atəgo za, kwah ləkwət tə kəsəm tik kaɗ, ɗiya luw: ‹‹ Tanjinhi, hin avə talan kin, hin mə zlim za mana sin mə ra Bayzlav. A luw sin acin Bayzlav. A ma nhi gəga.›› Yikwan cike wayza ma may hidiy məpərmay kə centa wəla am dalgway ɗaba. Tanjinhi may ngəkin wər yikwan kə ɗiyen mi?›› Taniy cike wayza ɗiya zlawta: ‹‹ Kay, mə ɗiy mə ngavngav za, say kə wəzl kaɗ.››
65 Hidiy məpərmay tə dab tan tifentə giden a Yesu a kəsəm. Dupenta həriya kaɗ, ɗiya gbifta avə ngəra, ɗiya luwenta: ‹‹ A sənu, hidi ngayi mə gbifeh yi?››ª Adəwən səna, hidiy mə puwiy de ɓiy ta, ndenta ngər gəda.
Piyer luw sin aa sən Yesu ɗahkwən
66 Mandal Piyer a wilen mə ɗewe kaɗ a terde, werti takan tə dab mə ɗiyiy kəzəɗ ngə mordoy ngə masayiy təm jik Bayzlav yah, 67 sin jan Piyer a sif kuhu. Ma lim za, ɗiya luweni: ‹‹ Hoh təm hoh a wan avə Yesu tə Nasaratu.›› 68 Zəni Piyer ɓon, ɗiya zlaweni: ‹‹ Awwo! Tə sən bugwən, hoh luw mə ngemi tə zlim bugwən.›› Sliɗ və tik am jik tə bər mədigiɗ. Mandal səna gomzok cə wəla. 69 Werti mə ɗiy kəzəɗ səna lim Piyer baha, ɗiya luwen a hidiy tə bugo: ‹‹ Gawəl nhi, celen Yesu.›› 70 Zəni Piyer ɓon ma ngetik. Adəwən səna gwedek, hidiy təbəgo luwenta a Piyer: ‹‹ Mindiwin, hoh hidi takan tə dab tan, kadaban hoh təm hoh njə Galili.›› 71 Kadaban səna, Piyer diw kə luw: ‹‹ Kata luw mbeɗi, ta sən gawal hin ta luw səna ɗahkwən. Mana tə ngaw ma wər, Bayzlav mə ɗiyak dalgway.›› 72 Mandal Piyer ta zləgam səna, njoɗ gomzok cə wəla mə saray tik. Piyer ɓən atalan zləgam Yesu mə luwenni. Anhi mana sin mə luwenni: ‹‹ Gomzok a cə wəl mə saray tik gesin kwən, hav kə luw a kibik hidigi jəɓ makaɗ, hoh a sənak ɗahkwən .›› Zəni Piyer ɗiya pətik caɗak, nap han.