Ləbar atalan takwan ma par par tu kə hosoho
13
Yesu ma pətah tik a terde ngə jik Bayzlav za, kərti gawla ngetik takan ɗiya luw: ‹‹ Mordoy, a safu mana mə sləbiy gugwəniy ma lawlaw nhi ɓəw mə ndəniy jik mordoy nhi.›› 2 Yesu zlaweni, ɗiya luw: ‹‹ A saf mana mə ndəniy jik ma mordoy lawlaw nhi ! Mindiwin, atalan jik nhi, gugwən a zlaɓ atalan gugwən ɗaba. Av kə gomiy lay cike way kaɗ.››Tuwnha avə gadaray tu kə hosigi za talan mahayək kə way
3 Adəwən səna gwedek, Yesu mə ɗewe kaɗ a wərum Jaytun, dəzdəz a jik Bayzlav. Piyer, Yakuba, Yuhana ɓəw Andire yigi a gandan angər tik. Ɗiya nehta: 4 ‹‹ Aw a ceɗe yikwan may, təkəniy ngemi tu kə tonigi zagway? Zəni yikwan kə sən wan ngə təkəniy səna tu hosohoh.›› 5 Adəwən səna, Yesu diw kə zləgamenta, sin ɗiya luw: ‹‹ Mə puw talan kin law law, hidi kə jəkeh hin kwən. 6 Hidiy dolom av kə yigiy avə zlim ngaɗa, av kə luwta: ‹Kata acin Kristu.› Av kə jəkiy hidiy dolom. 7 Mana hin tu zlim a zləgamiy ma ngə vərumigi mbeh a hayək kin, ɓəw mana hin tu zlim ləbar tik guduk a hayək kin baha, mə gər kə hovok kwən. Təkəniy səna mə tonigi. Zəni talan mahayək a way gesin kwən. 8 Hidiy təm hayək məpərmay av kə ɗiyiy vərum a hidiy təm hayək məpərmay. Bay məpərmay av kə moh hayək ngə celen bay mana sin. Hayək av kə kəz am lay par par, a səna təm mətis av kə ɗiy day day. Təkəniy səna av kə hosigi mana diw ham liɓi ngə werti ta juway kə mbuw. 9 Zəni ngəkin wər, mə kaw talan kin law law. Kadaban av kə kawiy hin, za kə tepeh hin a kibik hidiy mə zliy dalgway. Av kə zariy hin am jik jəgwan ngə Yahudigi. Hin məv kə gar a kibik talan mbalgamigi ɓəw a kibik bayigi, makavay hin ta yək zləgam ngaɗa. A nhi acin hin məv kə ɗef kəzəɗ kin mana hin ta səbakku a kibik tan. 10 Hidiy cike wayza kə zlimiy Ləbar Malaw zagway za talan mahayək kə way. 11 Mana tu kawiy hin, zəni tu tepiy hin a kibik hidiy mə zliy dalgway kadaban hin wəriy gawliy ɗa, mə gər kə hovok atalan ma hin tu kə zləgam a kibik tan kwən. Mana pic tik mə hosoh za, mə zləgam ɓən mə yehe hin tə talan kin dap. Mandal səna, hin acin tu kə zləgam mana ɓən ngəkin kwən, Mbiɗ ngə Bayzlav acin məv kə ceɗehinmana hin tu kə zləgam tik.
12 ‹‹ Hid ma aa yək zləgam ɗa ɗahkwən av kə vəl galmən a hidi məpərmay kə wəzl kaɗ. Zəni wa səna babay av kə ɗiyen a kərti tik. Wəriy av kə buwəntadəwən a babay tan ɓəw a mamay tan. Av kə vəliy babay tan avə mamay tan təm hidiy kə wəzlta kaɗ. 13 Hidiy cike wayza av kə zeliy hin makavay hin ta səb mozlokotuf ngaɗa. Zəni hidi məv kə ɓəs takwan səna hos am way micin ngetik, Bayzlav av kə mbəl tik.››
Takwan mordoy tu kə hosohoh
14 Yesu ɗiya luw baha: ‹‹ Mana pic tik mə hosoh za, hin məv kə lim təkən mə njə kə luwta mə ngav ngav, mə ngav lay. Sin mə gara kaɗ am jik Bayzlav am lay ɗah law sin kə ɗew kwən. (Zəni koh hidi ngayi mə saf ləbar nhi, mə ɓən atalan zləgam səna law law.) Am pic səna, hidiy təm hayək Yahudigi mə siy tan a wərum. 15 Hidi mə ɗew ɗew təm lay nəp tə talan jik, mə gər kə pət a de kə gasah təkəniy tik kwən. 16 Hidi mə biz tə donu, mə gər kə jəɓ a de kə ɓiya ləkwət tik kwən. 17 Am pic səna, takwan ɗaha a wertiy mehemigi ɓəw wertiy njə wəriy ma mbəlɗek av kə ruruhigi day day. 18 Mə tar Bayzlav kə jan təkəniy səna mə gər kə toniy a viya kwənª. 19 Kata tu luw atəgo kadaban am mandal səna, takwan tik day godokwən. Takwan mana təgo a ɗiy ɓahbugwən dəga ndən ngə talan mahayək hos a pica. Zəni takwan mana səna a ɗiy ɗaba təm. 20 Mana Bayzlav Məmar hidi a gəgəc wan tik kaɗ bəgwən wər, hidi məv kə mbəl koh takan ɗahkwən .
21 ‹‹ Am mandal səna, mana hidi tu luwe hin: Kristu a wan awnhi, asənkwən, mə safu sin a tattah; mə gər kə yək mə ngetik kwən. 22 Tə luw anhi kadaban hidiy mə mbaɗiy talan tan kə Kristu aska ma hidiy mə ngawiy ma ɓəw mokotufiy mə mbaɗiy talan tan kə mokotufiy ngə Bayzlav av kə pətigi am mandal səna. Av kə ɗiyiy təkən ma tuwanh, ɓəw av kə ɗiyiy təkəniy godokwən mə pərasl talan ma par par kə jan kə lebeɗ koh hidiy Bayzlav mə welta, mana a jan za. 23 Hin, mə kaw talan kin law law! Kata mə ceɗehinza dəga am diw tik mana təkəniy səna tu kə tonigi.››
Zləgam atalan jəɓaha ngə Kərti Hidmambəlen
24 Zəni Yesu ɗiya luw bah: ‹‹ Adəwən ngay səna tu ton,
pic av kə kpizlik,
zəni təra təm a zləzlaɗ ɗaba.
25 Cəwzlerek tə dibizlav av kə yoɓigi, a səna baha təkəniy məmariy gədan tə wəzlav av kə kəzigi za kə yoɓigi. 26 Za acin hidiy av kə limiy Kərti Hidmambəlen. Kata təv kə yah a liɓ gazlavay za avə gədan mordoy ɓəw avə zləzlaɗ ngaɗa ma cəcay. 27 Təv kə zlən mbaslayiy ngə Bayzlav am lay mgbaw kaɗ, kə ɓasiy hidiy Bayzlav mə welta am talan mahayək cike.››
Ma məngaɓngaɓ atalan sikwiɗ
28 Yesu ɗiya luwenta baha: ‹‹ Mə zlimu, təv kə ceɗehinma məngaɓngaɓ atalan sikwiɗ, hin kə jan jəgwan a kimin. Mana hin tu lim sikwiɗ a ɗiy jəngər, zəni a diw kə ca vidiɗ ndawyan, kuɗuf kuɗuf, van matakan mbeh. 29 Wa səna baha, mana hin tu lim təkəniy kata mə ceɗehinnhi a tonigi, hin məv kə sən tik Kərti Hidmambəlen mbeh kə yah. 30 Ta luwe hin mindiwin: hidiy təm talan mahayək nhi a məciy cike wayza kwən, av kə limiy təkəniy səna cike wayza avə həriya ngatan zagway. 31 Dibizlav avə talan mahayək av kə way, zəni zləgam ngaɗ wər koh a pu a way kwən.
Bayzlav a gendik acin mə sən pic way ngə talan mahayək
32 Yesu ɗiya səb a zləgam, ɗiya luw: '' Koh hidi takan mə sən pic tik ɓəw masa ngə təkəniy səna tu kə ɗiy ɗahkwən. Koh mbaslayiy ngə Bayzlav a sənta kwən, koh kata kərti ngə Bayzlav avə talan ɗa tə sən kwən. Səna Babay ɗa a gendik acin mə sən tik.'' 33 Mə kaw talan kin law law. Mə gər kə wan kwən, kadaban mə sən pic kata tu kə jəɓaha səna bugwən. 34 Təv kə jəɓahah mə ndumndum mana hidi ta njə kə va a mbuluk. Gawal səna sliɗ kə va tik, geɗ de ngetik a hidi kə puw tik. Sin vəl kəzəɗ təm a wəriy gawliy ngetik takan takan. Sin luwen a hidi mə puw mijijik kə puw jəɓahah ngetik law law, zəni sin və tik. 35 Adəwən səna, Yesu luwen a wəriy gawliy ngetik: '' Mindiwin mə puwu, kadaban hin mə sən hidi məmar de av kə jəɓah tik a pu bugwən. Av kə yah a səku vu, av kə yah dab dab vuɗu vu, av kə yah zlalay vu, asənkwən a gbəm vu? Aw səɗay. 36 Mana tu yah mə ndumndum, ezen av kə janeh hin, hin tu wan. 37 Təkən kata mə ceɗehinnhi, kata ceɗen a hidiy cike wayza təm: Mə gər kə wan.