Yesu a sla mogroy ngə Yahudigi avə hidiy mə ngavngav mə puwiy pay mə mbu mbu
12
Adəwən səna, Yesu diw kə zləgam ma məngaɓngaɓ a mogroy ngə Yahudigi. Sin ɗiya luw: ‹‹ Hidi ngəɓ ngəɓ pay Inabojeª, zəni sin cak cak kaɗ mgbaw. Adəwən səna, sin lut lut gugwən ngə ɗic mə mbumbu ngə pay kə mbaɗ kə movu. Sin ɗiy zəray fal a wəzlav ngə puw. Adəwən səna, sin geɗen a hidiy mə biz biz kə puwta zəni taniy kə vəlenta makavay ngetik təm. Sin ɗə mbuluk və tik gaf.2 ‹‹ Pic ngə ket mə mbu mbu ngə pay Inaboje ma hos za, hidi məmar payiy tafnan zlən mə ɗiy kəzəɗ ngetik angər hidiy ta puwiy pay. Za taniy kə batenta mə mbumbu ngə pay makavay ngetik təm səka. 3 Zəni hidiy mə puwiy pay səna, kawiy mə zlən zlən nhi, bazl bazlen tə wəzl, gamta ngər maymay. 4 Adəwən səna, hidi məmar pay zlən hidi mə ɗiy kəzəɗ ngetik məpərmay. Jəɓ kawta baha, wəzlta am talan, ɗiyenta məcəcew. Taniy gamta kaɗ. 5 Zəni hidi məmar pay səna zlən hidi məpərmay baha. Taniy wəzl wəzliy mə zla zlən nhi mimci. Adəwən səna, hidi məmar pay zlən hidiy dolom. Hidiy mə puwiy pay tafnan zəɓ ɗiyenta banay wa mə ɗiyenta a hidiy ngə tizin. Zar zariy hidiy məpərmay, zəni a hidiy mepərmay wəzl wəzlta mimci. 6 A fəs kərti takan dap ngə hidi məmar tuz ngə zlən. Kərti tik sin mə mayu a gendik. Am way tik, sin zlən kərti tik səna təm. Sin ɗiya ɓən, luw acin: ‹Av kə daɓenta talan a kərti ɗa.› 7 Ko asəna, hidiy mə puwiy pay tafnan ma limiy kərti tik səna za, ɗiya zləgamigi am walan tan: A nhi mə zəm de ngə hidi məmar payiy səna acin. Nəmkwan kə wəzl kaɗ, za yikwan kə mar pay inaboje mə mbu mbu nhi gingin.› 8 Njoɗ va kawiy kərti nhi, wəzlta kaɗ mimci, zəni wət fiyta kaɗ adəwən tuz ngə pay inaboje, gbimgbiriv!››
9 Adəwən səna, Yesu ɗiya luw bah: ‹‹ Mə ɓən wər hidi məmar pay inaboje nhi av kə ɗiy aceki ? Yaw, av kə yah kə lek micin ngə hidiy mə puwiy pay səna kaɗ, zəni kə vəlen payiy səna a hidiy məpərmay.
10 ‹‹ Mindiwin, hin mə saf mana zləgam ngə Bayzlav ta luwu təm ɗerewel ngetik za. A luw:
‹Gugwənª hidiy mə sləbiy gidivilª mə fək tə kaɗ nhi,
mə mbaɗa kə gugwən ma law njə gədan ngə ndən.
11 Bayzlav acin mə ɗiy tik, mə mbaɗa kə təkən ma law am həriy ngiykwan. › ‹‹
12 Mogroy ngə Yahudigi nap jariy kə kawiy Yesu, kadaban mə sənta za, a zləgam a ma məngaɓngaɓ nhi atalan tan. Zəni hovokigi a hidiy mə ɓas ɓas. Geɗiy Yesu kaɗ, sliɗiy viy tan.
Neh atalan buudu ngə vəlen a bay
13 Pic takan, mogroy ngə Yahudigi zləniy Farisigi avə hidiy ngə bay Hirudus angər Yesu. A gər kə ɗəfta avə neh kə jan sin kə zləgam ma mə ngav ngav. 14 Yigi, luwenta: ‹‹ Mordoy, yikwan mə sən za, hoh ɗiy polkoy ɗahkwən, angər koh, hidiy cike pərak pərak. Kadaban səna, hoh njə kə ɗiy jəgwan ma mindiwin a hidigi. A ceɗe yikwan may, law yikwan kə vəlen buudu a bay Roma məmar hayək roma cike wayza vu, ɗah law kə vəlen kwən vu?››
15 Yesu aa sən nəv ngatan, a joviy ma kə jan kə ton ɓən atalan Yesu a ɗiy təkən a mozlokotuf tik ɗahkwən. Sin luwenta: ‹‹ Hin mə slak kemi? Mə dahak suloy takan awnhi, kata kə saf tik.›› 16 Taniy dahenta. Yesu nehta, ɗiya luw: ‹‹ Am suloy nhi, hin mə lim həriy ngayi avə zlim ngayi?›› Taniy ɗiya zlawenta, luwta: ‹‹ Ngə bay Roma məmar hayək roma cike .›› 17 Zəni Yesu luwenta: ‹‹ Mə vəlen a bay Roma təkəniy mana sin mə luwu, za mə vəlen a Bayzlav təm makavay ngetik.›› Anhi acin, zlaw ngə Yesu tu kpah bərngəzl talan ngə hidiy nhi.
Neh ngə Sadukigi atalan hidiy tu kə pətiy a mə məc za
18 Adəwən səna, Sadukigi mə njə kə ɓənta mimciy a mbəliy am məc za ɗaba, yigi angər Yesu. Taniy ɗiya nehta, luwta: 19 ‹‹ Mordoy, aməcek Musa a ɗəɗefiy yikwan mə taktak anhi : ‹Mana hidi tu dəm werti, za məc mətak geɗ kərti adəwən, galmən mə sərəɓ werti tik, za kə jan kə mbuwen a galmən mə məc məc.› 20 Mandal səna, hidi ɗaha avə galmənigi kərtawəl taniy cisaray. Bece dəm werti, adəwən səna məcay tik mətak jan kərti. 21 Kadaban səna, zərmba sərəɓ werti səna, sin təm məc mətak jan kərti bah. Wa səna avə deli təm. 22 Wa səna, taniy cisaray tik mə dəmiy werti səna məciy tan, a geɗiy wəriy ɓahbugwən. Adəwən tan, werti təm məc acin. 23 Mana anhi wər, mandal pic hidiy mə məc məc tu kə mbəligi a mə məc za, werti nhi av kə mbaɗ kə werti ngayi acin? A luwta anhi kadaban hidiy cisaray tik mə dəmiy werti səna za.›› 24 Yesu zlawenta, sin luw: ‹‹ Hin ma jək talan kin day day! Kata tə luw atəgo kadaban hin ma sən ɗerewel ɗahkwən, hin ma sən gədan ngə Bayzlav ɗahkwən təm. 25 Mana hidiy mə məc məc tu mbəligi am məc za wər, ma ngə dəm kəsəm ɗahɗaba. Taniy av kə ɗewiy mana mbaslayiy ngə Bayzlav, kə ɗewiy mətak dəm werti a dibizlav. 26 Nəmkwan kə zləgam atalan hidiy mə məc məc avə hidiy məv kə mbəligiª am məc za. Hin mə saf zləgam təm Ɗerewel Musa mə ɗəɗef za. Ɗerewel səna a zləgam atalan pay gidigiɗ kuhu mə zlaw tə kimin zəni a kəɗaw pay səna ɗahkwən. Abəgo Bayzlav zləgamen a Musa, ɗiya luw: ‹Kata acin Bayzlav ngə Ibrahima, ngə Isiyaku, ɓəw ngə Yakubu.› 27 Yesu ɗiya zləgam baha, ɗiya luw: Bayzlav wər ngə hidiy məmariy micin, sin Bayzlav ngə hidiy mə məc məc kwən. Kadaban səna, hin ma jək talan kin day day.››
Mə tak tak mordoy tə dab mə tak takigi
28 Mordoy ngə jəgwan takan zlim gəɓəz ngatan. Sin zlim mana Yesu mə zlawen a Sadukiy nhi law law. Kadaban səna, sin ɗiya neh Yesu: ‹‹ Adab mə jaw jawiy ngə Bayzlav cike wayza, ceki acin mordoy ?›› 29 Yesu zlawenni, ɗiya luw: ‹‹ Mə tak tak mordoy acin ta luw: ‹Hin Israyiligi mə zlimu, Bayzlav ngiykwan, məmar Hidi sin a gendik pal pal yikwan cike kə mbəzl tik. 30 A may Məmar Hidi, Bayzlav kohª avə nəv koh cike, avə micin koh cike, avə bərngəzl talan koh cike, zəni avə gədan koh cike.› 31 Mə zlimu, mə taktak mə saray tik a luw: ‹A may coloh wa hoh ta may talan koh.› Mə tak tak məpərmay ma day kə ma saray nhi ɗahkwən .›› 32 Zəni mordoy ngə jəgwan tafnan ɗiya luwen a Yesu: ‹‹ Law mordoy ɗa! Hoh mə luw za mindiwin: Məmar yikwan Bayzlav sin a gendik pal pal, Bayzlav sənan ɗahkwən sin a gendik. 33 Ko hidi ngayi cike kə may Bayzlav avə nəv tik takan, avə bərngəzl tik cike, avə gədan tik cike, zəni sin kə may coloh mana sin ta may talan tik. Mana sin mə kaw mə taktak səna za atəgo , day kə faten vəren a Bayzlav ɓəw day kə vəlen təkəniy ma par par cike wayza.›› 34 Yesu ma zlim mana gawal nhi mə zlaw avə bərngəzl za, ɗiya luwenni acin: ‹‹ Yaw, bay ngə Bayzlav mbeh avə hoh.››
Adəwən səna, koh hidi ngayi a hovok kə neh Yesu atalan təkən məpərmay acin.
Kristu avə Dawda
35 Mandal Yesu a ɗiy jəgwan a hidigi am jik Bayzlav, sin ɗiy neh, ɗiya luw: ‹‹ Mogroy jəgwan a njə kə luwta Kristu acin kərti ngə bay Dawda wər kemi? 36 Avə gədan ngə Mbiɗ ngə Bayzlav, bay Dawda mə luw za atalan Kristu:
‹Bayzlav Məmar Hidi tu luwen a məmar kata:
A yah, a ɗew kaɗ am ngər zəm ɗa za,
hos am pic kata tu kə vəl cal mosumiy koh am nəv ngər koh.›
37 ‹‹ Dawda avə talan tik tu ɗefenma a Məmar Hidi kə hidi məmar tik. Ya za acin, Kristu a mbaɗ kə kərti ngə bay Dawda a ciki?››
Mə puw talan kin avə mogroy ngə jugwan
Hidiy mə ɓas ɓasiy dolom nəv ngatan tu zəzay kə zlim jəgwan Yesu ta ceɗ səna. 38 Am jəgwan Yesu ta ɗiyen a hidigi, sin luw: ‹‹ Mə puw talan kin avə jəgwan ngə mogroy ngə jugwan. A njə kə may kə taligi avə ləkwət ma cip mordoy. Am lay ɓas, a njə kə mayiy hidiy kə daɓiy kaɗ kə ɗenta mbeli. 39 Am jik jəgwan ngə Yahudigi, a njə kə jariy lay ɗew ngə mogroyigi. Zəni mana tu ɗefentəma kə zəm gəda am məmbəlwa, a njə kə jariy lay ɗew ma law təm. 40 Za baha, a njə kə mohiy aray ngə wertiy mə cupcup. Taniy a njə kə vahigi am tar Bayzlav kə jan hidiy kə safta mana hidiy malaw. Mandal pic ngə zla dalgay, av kə janiy dalgway mordoy day kə hidiy məpərmay.››
Vəl ngə werti mə cupcup
41 Zəni Yesu va tik, sin mə ɗewe kaɗ a jagwar lay zek suloy təm jik Bayzlav. Sin aa hezl hidiy ta dahiy suloy ngə vəlen a Bayzlav. Hidiy dolom mə njənjigi vəliy suloy godokwən. 42 Matakwan werti mə cupcup ɗaha, sin yah. Sin wət suloy ngetik saray fəceɗek sin məmar cike wayza zek təm. 43 Za acin, Yesu ɗefenma a wəriy gawliy ngetik, ɗiya luwenta: ‹‹ Mindiwin kata ceɗe hin, matakwan werti mə cupcup nhi tu vəl suloy a Bayzlav day kə hidiy sənan cike wayza. 44 Kata tə luw anhi kadaban taniy a vəliy gwedek am taniy məmarta ma dolom, zəni ngə matakwan werti nhi, ko sin hidi təm sanha, tu vəl təkən cike wayza sin məmaru ngə kaw micin ngetik mə tak fəs kaɗ.››