Yesu hos a Ursalima mana bay
11
Yesu avə wəriy gawliy ngetik a viy a Ursalima. Mandal Yesu avə wəriy gawliy ngetik mbeh kə hosigi a liɓde Ursalima, taniy wilenigi a mozlokotuf ma mbeh a slalade Baytifaji ɓəw slalade Baytaniya tə bər wərum Jaytun. Abəgo, Yesu zlən wəriy gawliy ngetik saray, 2 luwenta: ‹‹ Mə va a slalade tə kibik kin. Mana hin mə hosoh za abəgo, hin məv kə jan kərti nden nden ma hidi a ɗew adəwən tik gesin bugwən, mə jawa kaɗ a bər mədigiɗ. Hin kə pəslahah, mə dahakku. 3 Mana hidi tu nehe hin: ‹Mə pəsl nden nden təgo kemi?› Hin kə luwenni: ‹Mə mar Hidi acin mə gər tik. Za av kə jəɓoh kaɗ njoɗ.›››4 Kadaban səna, taniy və janiy kərti nden nden səna, mə jawa kaɗ a bər mədigiɗ. Taniy pəslta. 5 Hidiy məpərmay təbəgo ma limta za, ɗiya nehta: ‹‹ Hin mə ɗiy mi? Mə pəsl kaɗ kə ɗiy tav sin mi?›› 6 Taniy zlawta mana Yesu mə luwu. Zəni hidiy səna geɗenta taniy kə pəslta. 7 Ngazlenta kərti nden nden səna a Yesu. Ɓiyiy ləkwət tə kəsəm tan, dəp dəp ta adəwən nden nden səna. Zəni Yesu ɗew adəwən tik. 8 Hidiy dolom gar gariy a mozlokotuf. Ndəɗ ndəɗiy ləkwət tan a mozlokotuf kə vəlenta mordoy a Yesu. Zəni ngə hidiy sənan təm bəzloh bəzlohiy vidiɗ təm tuz, ndəɗ ndəɗta a mozlokotuf. 9 Hidiy sənan ciy kibik ngə Yesu, zəni hidiy sənan a səbta adəwən za. Taniy cike wayza ɗiya ciy wəla avə zəzay, a luwta: ‹‹ Hozanna!ª Nəmkwan kə səban Bayzlav məmar gədan mordoy. Bayzlav mə ɗəyen ngər bay a gawal mə yah avə zlim ngə Məmar Hidi. 10 Mandal hoh tu kə zəm bay ngə babay ngiykwan Dawda, Bayzlav mə ɗiyoh ngər bay. Nəmkwan kə səban Bayzlav tə dibizlav!››
11 Zəni Yesu hos a Ursalima. Sin pət am jik Bayzlav. Adəwən sin ma saf saf təkəniy təm jik Bayzlav səna cike wayza, mandal səna vuɗu a hos. Sin sliɗ və tik a slalade Baytaniya avə wəriy gawliy ngetik ma gəɓ atalan saray.
Yesu ngav pay
12 Apat tik, Yesu avə wəriy gawliy ngetik ma pətiy tan a slalade Baytaniya za, mitis ɗiya hamenni a Yesu. 13 Sin lim pay vigir vigir. Sin va kə safa tik ezen mə mbuw mbuw tik ɗaha. Adəwən sin ma hos a madaba tik za, sin a jan vidiɗigi a ngendik, kadaban pic tik a hos ngə mbuw gesin bugwən. 14 Zəni Yesu ngav pay səna, luweni: ‹‹ Hoh pay, hoh jan kə mbuw wərigi za hidiy kə hamiy ɗaba!›› Sin ma luw atəgo za, wəriy gawliy ngetik zlimta.
Yesu gam hidiy mə beriy təkəniy təm jik Bayzlav
15 Yesu avə wəriy gawliy ngetik hosigi a Ursalima. Ma hosiy za, Yesu pət a terde ngə jik Bayzlav. Abəgo hidiy a beriy təkənigi, kadaban səna, sin diw kə gam hidiy mə beriy təkənigi avə hidiy mə səkəmiy təkəniy təbəgo səna. Sin goɗ goɗ layiy ngə hidiy ta zlambaɗiy suloy avə ngə hidiy mə beriy ɓaram debin cike way kaɗ. 16 Zəni sin a geɗ koh hidi takan kə pət avə təkən ɗiy terere ngetik am jik Bayzlav səna ɓaabəgwən. 17 Za sin diw kə ɗiyen jəgwan a hidigi, ɗiya luw: ‹‹ Tu ɗəɗefta: ‹Bayzlav a luw, jik ngaɗa acin jik ngə hidiy səban ma par par cike wayza ngə tarakta.› Zəni ngəkin, hin mbaɗ gingin kə jik ngə ɓah məhəligi.››
18 Mogroy ngə masayigi ma təm jik Bayzlav avə mogroy jəgwan zlimiy ma səna. Ɗiya jariy wir wir kə lek micin ngə Yesu. Zəni a hovokigi avə sin. A hovokiy avə sin kadaban jəgwan ngetik tu fet nəv ngə zəgədiy.
19 Pic ma ndəv za, Yesu avə wəriy gawliy ngetik viy tan a liɓde Ursalima səna za.
Ləbar atalan tar Bayzlav
20 Apat tik gbum za, Yesu avə wəriy gawliy ngetik a tonigi a mozlokotuf, limiy pay mətak mbuh səna tu kwal hos am zem tik. 21 Piyer slek talan am pay Yesu mə ngav səna, luwen a Yesu: ‹‹ Mordoy, a saf pay hoh mə ngav nhi mə kwala za.›› 22 Zəni Yesu zlawen a wəriy gawliy ngetik. Ɗiya luw: ‹‹ Mə vəl nəv ngəkin a Bayzlav. 23 Mindiwin, kata luwe hin: ‹‹ Mana hidi tu luwen a wurum nhi: A sliɗ a wənhi za, ma gom a liɓ yəm.›› Mana sin a ɓən səsaray bugwən, za mana sin tu vəl nəv ngetik a Bayzlav, av kə ɗiy mana sin mə mayu. 24 Kadaban səna, kata luwe hin, mana hin ma tar Bayzlav, hin mə ɓən səsaray bugwən, hin kə mar yək atalan təkən hin mə tar səna, wa hin mə jan za, za Bayzlav av kə vəle hin mindiwin.››
25 ‹‹ Za bah mandal hin mə gara kə tara Bayzlav, mana hoh tu ɓən atalan hidi mə hamoh nəv, a geɗen mə ngavngav ngetik kaɗ zagway, kə jan Babay ngəkin tə dibizlav kə geɗ mə ngavngav ngəkin kaɗ təm. [ 26 Mana hin mə geɗ mə ngavngav ngə celeh kin bəgwən wər, Babay kin tə dibizlav a geɗ mə ngavngav ngəkin kaɗ kwən.››]
Gədan ngə Yesu a yah za ki?
27 Zəni Yesu a wəriy gawliy ngetik jəɓiy a Ursalima za, jəɓiy am jik Bayzlav. Mandal Yesu a tal a terde ngə jik Bayzlav, mogroy ngə masayigi təm jik Bayzlav ɓəw mogroy jəgwan avə talan mbalgamigi yiy angər tik. 28 Ɗiya nehta: ‹‹ Avə gədan ngayi hoh ta ɗiy təkəniy nhi? Za hidi ngayi mə zlənoh yi?›› 29 Yesu zlawenta, ɗiya luw: ‹‹ Kat təm təv kə nehe hin təkən takan. Mana hin tu zlawakku, kata təm təv kə ceɗehinhidi mə zlənakku. 30 Mə zlimu: hidi ngayi mə zlənah Yuhana kə ɗiy baptisma yi? Bayzlav vu asənkwən hidigi vu? Mə vəlak zlaw.›› 31 Taniy ɗiya zləgamigi am walan tan kə jariy wir wir: ‹‹ Mana yikwan luw: ‹Bayzlav acin mə zlənah tik, › av kə luwiy yikwan: ‹Ya asəna wər hin mə yək ma ngə Yuhana kway?› 32 Mana yikwan tu luw: ‹Hidiy acin mə zlənahta›, hidiy tə jagwar yikwan a yikiy ma nhi kwən. Yaw, hidiy nhi a luwta atəgo kadaban a hovokigi avə hidiy ta safiy Yuhana kə mokotuf ngə Bayzlav ma mindiwin. 33 Zəni zlawenta a Yesu, luwenta: ‹‹ Yikwan mə sən hidi mə zlənah tik bugwən.›› Yesu təm luwenta: ‹‹ Kat təm tə ceɗehinhidi mə zlənak kwən.››