Mawəl avə werti mə gər kə pətari kwən
10
Yesu sliɗ tik a Kafarnahum liɓde mandez. Sin zlan maza Urdun, va tik am hayək Yahudiya. Abəgo, hidiy dolom ɓasigi angər tik baha. Sin ɗiya jugwanenta zləgam ngə Bayzlav mana sin ta ɗiy ma hoyhoy . 2 Farisigi yiy am lay səna kə sliy Yesu. Taniy ɗiya nehta: ‹‹ Mə tak tak ngə Musa wər, mə geɗen mozlokotuf za a hidi kə gam werti tik kaɗ vu?›› 3 Yesu zlawenta, ɗiya luw: ‹‹ Mə tak tak ngə Musa a luwe hin aceki ?›› 4 Ɗiya luwta: ‹‹ Musa a luw : ‹Mana mawəl tu may kə gam werti tik kaɗ, səna sin kə ɗəɗefen ɗerewel ngə pətar am ngəra , za acin taniy kə pətarigi.››› 5 Yesu luwenta: ‹‹ Mə zlimu, Musa mə geɗe hin mozlokotuf kə gam werti kin kaɗ nhi, makavay talan kin toy toy kə zlim ma ngə Bayzlav. 6 Zəni mə safu, am diw ngə talan mahayək, Bayzlav ndən mawəl avə werti. 7 Kadaban səna acin, mawəl av kə geɗ babay tik avə mamay tik kaɗ, kə lapigi avə werti tik. 8 Taniy saray tik av kə lapigi, kə mbaɗiy kəsəm takan.› Anhi acin, taniy saray tik ɗahiy par par ɗaba, mə mbaɗiy kəsəm tan takan acin. 9 Asəna acin, təkən Bayzlav mə lap takan, hin mə gər kə pətar kaɗ kwən.››10 Adəwən səna, Yesu avə wəriy gawliy tik pətigi a de za. Za wəriy gawliy ngetik jəɓ nehta atalan pətar ngə mawəl avə werti tafnan baha. 11 Yesu ɗiya ceɗenta: ‹‹ Mana mawəl tu gam werti tik kaɗ, za kə dəm məpərmay, sin a ɗiy vərndew a kibik werti tik tizin. 12 Wa səna, mana werti tu geɗ zelen kaɗ, va dəm mawəl məpərmay, sin a ɗiy vərndew təm.››
Yesu ɗiyen ngər bay a wərigi
13 Hidiy dahiy wəriy ma cicer angər Yesu kə jan sin kə ɗiy ngəra atalan tan kə ɗiyenta ngər bay. Zəni wəriy gawliy ngetik ɗiya ndəl hidiy səna. 14 Yesu ma lim atəgo za, tu nusen nəv. Zəni ɗiya luwen a wəriy gawliy ngetik: ‹‹ Mə geɗ wəriy mə yiy angər ɗa, mə gər kə takta kaɗ kwən kadaban bay ngə Bayzlav a ngəmen a hidiy məmariy nəv mana wəriy nhi. 15 ‹‹ Mindiwin ta ceɗe hin, mana hidi a vəl talan tik Bayzlav kə mar tik mana kər mandez bugwən, a pət am bay ngə Bayzlav kwən. 16 Adəwən səna, Yesu humbut wəriy səna am ngər ngetik, zəni ɗiy ngər ngetik atalan tan, za ɗiyenta ngər bay.
Hidi mə njə nja neh Yesu atalan micin mətak way
17 Mandal Yesu a va a mozlokotuf, hidi sehe avə si, yah gbəlih titimbiz tik a kibik Yesu. Ɗiya neh tik: ‹‹ Aw Mordoy malaw, kata kə ɗiy aceki kə jan micin mətak way ?›› 18 Yesu zlaweni: ‹‹ Hoh luwak kə hidi ma law kemi? Hidi malaw wər Bayzlav a gendik. 19 Hoh sən mə taktak wayza: ‹Hoh gər kə wəzl hidi kwən. Hoh gər kə ɗiy vərndew kwən. Hoh gər kə həl kwən. Hoh gər kə ɗiy polkoy atalan hidi kwən. Hoh gər kə ɗiy wirwir kə zəm təkən ngə hidi kwən. A zlimen ma a babay koh ɓəw avə mamay koh.› ‹‹ 20 Gawal səna ɗiya zlawenni: ‹‹ Mordoy, mə taktak nhi cike wayza, kata mə kawta za ngər səsaray dəga kata wəlen kərti.›› 21 Yesu ɗiya saf tik avə may təm nəv. Zəni ɗiya luwenni: ‹‹ A fəsoh təkən takan ngə ɗiy: A va ber təkəniy koh cike, zəni ma vəlen suloy tik a hidiy təm sanha. Zəni mana hoh tu ɗiy atəgo , hav kə jan gəd mazlən koh a dibizlav, za acin ma yah səbakku.›› 22 Gawal nhi ma zlim atəgo za, gərəs məzəroh. Sin gas kəsəm, kadaban sin məmar aray dolom, zəni a may kə vəlen cike wayza a hidiy bugwən. Za sliɗ va tik.
23 Yesu saf saf wəriy gawliy tə jagwar tik, zəni luwenta: ‹‹ Tuwanh godokwən a hidi mə njə nja kə pət am bay ngə Bayzlavª.›› 24 Zləgam nhi tu wələk bərngəzl ta godokwən a hidi kə pət am bay ngə Bayzlav! 25 Yaw tuwnha a zlogomo kə ton am wili ngə jerɓel. Wa səna təm, tuwnha tik day godokwən a hidi mə njə nja kə pət am bay ngə Bayzlav.››
26 Wəriy gawliy ngə Yesu ma zlimiy ma nhi za, tu praslenta talan day baha. Taniy ɗiya zləgamigi am walan tan, ɗiya luwta: ‹‹ Mana anhi wər, hidi ngə ɓəs kə mbəl micin tik am dalgway acin yi?›› 27 Yesu ca həriya atalan tan, ɗiya luw: ‹‹ Hidiy ɓəsiy kə mbəliy am mə ngavngav za kwən, a Bayzlav wər təkəniy cike wayza sin mə may kə ɗiy tik av kə ɗiy mana may ngetik.››
28 Piyer ɗiya luweni: ‹‹ Ya ngiykwan wər, yikwan geɗ təkəniy ngiykwan cike way kaɗ kə səboh.›› 29 Yesu zlawenni, sin ɗiya luw: ‹‹ Mindiwin, kata tə luwe hin, hidi məv kə geɗ de ngetik, galməniy wertigi avə galməniy mawəligi, mamay tik, babay tik, wəriy ngetik, asənkwən tuziy ngetik kadaban sin ta səb mozlokotuf ngaɗa ɓəw kadaban sin ta ceɗ Ləbar Malaw a hidigi, 30 hidi səna av kə jan təkəniy bələk atalan səna baha am ɗew ngetik ma tanjinhi. Asəna, av kə jan digi, galməniy wertigi avə mawəligi, mamayigi avə wərigi, av kə jan lay bizigi am ɗew ngetik təm talan mahayək nhi. Zəni hidiy av kə zlənenta takwan kadaban sin ta səb mozlokotuf ngaɗa. Am ɗew tə kibik baha, sin av kə jan micin mətak way angər Bayzlav. 31 ªKata ceɗe hin, hidiy tə kibik dolom av kə ɗewiy kə hidiy ta dəwən. Zəni hidiy tadəwən təm av kə mbaɗiy kə hidiy tə kibik.››
Yesu ceɗ mə makaɗ tik, av kə məc, za Bayzlav av kə mbəla kaɗ am məc za
32 Yesu avə wəriy gawliy ngetik aa vigi a mozlokotuf kə tap a liɓde Ursalima. Sin acin mə cə kibik. Wəriy gawliy tik nəv tan tu kwir. Zəni hidiy sənan ta ngazlta ɗiya hovokigi. Mandal ta viy tə kotuf səna, Yesu ngazl wəriy gawliy ngetik ma gəɓ atalan saray avə sin pətariy par a hidigi. Sin ɗiya ceɗenta təkən məv kə hosohoh atalan tik. 33 Ɗiya luwenta: ‹‹ Mə zlimu, tanjinhi yikwan cike wayza yikwan ma va a Ursalima. Abəgo, av kə kawiy Kərti Hidmambəlen, za kə vəlenta a mogroy ngə masayiy təm jik Bayzlav ɓəw am ngər ngə mogroy jugwan. Taniy acin məv kə zliy dalgway ngetik kə wəzlta kaɗ. Av kə vəlta am nəv ngər ngə hidiy ma a səniy Bayzlav ɗahkwən . 34 Hidiy səna av kə rə ta, av kə tifenta giden a kəsəm, av kə zarta, asəna baha, av kə wəzlta mimci. Zəni adəwən wan saray, mə makaɗ tik Bayzlav av kə mbəlah kaɗ am məc za.››
Pəl ngə Yakuba avə Yuhana kə ɗewiy kə hidiy mogroy
35 Adəwən səna, wəriy Zebede Yakuba avə Yuhana yigi kə centa ngəra a Yesu. Luwenta: ‹‹ Mordoy, yikwan ma may hoh kə ɗiyiy yikwan təkən mana yikwan tu kə toroh nhi.›› 36 Yesu ɗiya nehta, luwenta: ‹‹ Hin mə may kata kə ɗiye hin mi?›› 37 Taniy zlawenta, ɗiya luwenta: ‹‹ Mordoy, mandal hoh tu kə ɗew am bay koh avə gədan koh mordoy, may ngiykwan hoh kə vərək ªhid takan tə dab yikwan am ngər zəm koh, məpərmay am zlaɓay koh.›› 38 Kadaban səna, Yesu ɗiya luwenta: ‹‹ Hin ma sən təkən hin tu kə tar tik ɗahkwən. Hin məv kə ɓəs takwan mana kata tu zlən tik nhi vu? Asənkwən hin məv kə yək ªbaptisma ngə ruruh mana kata tu kə yək tik nhi vu ?›› 39 Taniy ɗiya zlawta, luwta: ‹‹ Mindiwin, yikwan məv kə ɓəs tik.›› Yesu luwenta acin: ‹‹ Yaw mindiwin, hin məv kə zlən takwan mana kata, za hin məv kə yək baptisma ngə takwan mana kata tu kə yək tik təm. 40 Zəni hidi məv kə ɗew am ngərzəm ɗa za, ɓəw hidi məv kə ɗew am zlaɓay ɗa za wər, kata acin məv kə welta kwən. Bayzlav acin mə wel hidiy məv kə ɗewiy am lay sin mə may taniy kə ɗewiy səna.››
41 Adəwən wəriy gawliy ngə Yesu ma gəɓ məpərmay ma zlimta atəgo za, ɗiyenta nəv a Yakuba avə Yuhana. 42 Zəni Yesu ɗefenma a taniy cike wayza. Ɗiya luwenta: ‹‹ Hin mə sən za, hidiy hin mə njə kə vərəkta kə talan mbalgam, a njə kə zəmiy bay tan atalan hidigi avə tak wəla. Zəni mogroy tan təm a njə kə ɗiyiy gədan ngatan atalan tan. 43 Law law ngəkin wər, mə gər kə ɗiy atəgo kwən. Mana hidi a may kə mbaɗ kə hidi mordoy a dab kin, sin mə ɗew kə hidi mə ɗiyen kəzəɗ a hidigi . 44 Mana hidi a may kə mbaɗ kə talan mbalgam a dab kin, səna sin kə gəgəc talan tik kə ɗiyen kəzəɗ a hidiy cike wayza mana baalam. 45 Za Kərti Hidmambəlen təm, a yah am talan mahayək kə jan hidiy kə ɗiyenta kəzəɗ kwən. Sin a yah kə ɗiyen kəzəɗ a hidigi, kə vəl micin ngetik kə mbəl micin ngə hidiy dolom.››
Yesu zlər həriya ngə huluf
46 Yesu avə wəriy gawliy ngetik hosigi a Yeriko. Mandal ta sliɗigi a liɓde sən za kə viy tan a kibik, hidiy dolom lapigi avə sin. Am ta toniy səna, huluf mə ɗewe kaɗ a bər mozlokotuf, a jəwayay tik avə tar. Zlim tik Bartime, sin kərti ngə Time. 47 Sin ma zlim ləbar Yesu njə Nasaratu acin ta ton za, diw kə cə wəla. Ɗiya luw: ‹‹ Aw Yesu, kərti ngə bay Dawdaª, a saf kaymah ngaɗa may!›› 48 Hidiy mə ɓas ɓas ndəlta. Luwenta kə njə teete, zəni sin ɗiya cə wəla day day, ɗiya luw: ‹‹ Kərti ngə bay Dawda, a saf kaymah ɗa may!›› 49 Yesu gar kaɗ, ɗiya luwen a hidiy tə jagwar tik: ‹‹ Mə ɗefen ma.›› Ɗiya luwenta a huluf səna acin: ‹‹ A dik nəv kaɗ, a sliɗ za, Yesu a ɗefeh ma.›› 50 Njoɗ, huluf səna fiy godo mə pak pak tə kəsəm tik kaɗ. Sliɗ za, va angər Yesu. 51 Yesu nap neh tik, ɗiya luw: ‹‹ Hoh gər kata kə ɗiyoh mi?›› Huluf səna zlawenni, ɗiya luw: ‹‹ Aw mordoy ɗa, a zlərak həriya kaɗ kata kə lim lay baha.›› 52 Yesu ɗiya luweni: ‹‹ Həriya koh tu zlər makavay hoh mə vəl nəv koh a kata, av koh, hoh tu mbəl.›› Njoɗ həriya ngetik zlər acin, a lim lay law law. Zəni sin səb Yesu.