9
Yesu luwenta baha: ‹‹ Ta ceɗehinmindiwin, hidiy sənan tə dab kin awnhi a miciy kwən, av kə limiy bay ngə Bayzlav avə gədan ngetik mordoy zagway, za acin kə məcigi.››Yesu zlambaɗ kəsəm tik a kibik wəriy gawliy ngetik
2 Adəwən wan kwəh, Yesu ɗefenma a Piyer, Yakuba ɓəw Yuhana, zəni tapigi atalan wərum ma zoɗ, taniy a gandan abəgo . Yesu ɗiya zlambaɗ kəsəm tik am həriya ngatan. 3 Ləkwət tə kəsəm ngetik zlambaɗ kə ləkwət ma baran, zləzlaɗ tuwek tuwek. Yo ko hidi takan ngə ɓəs kə zləzlaɗ ləkwət tik tuwek tuwek anhi am talan mahayək ɗahkwən . 4 Njoɗ wəriy gawliy ngə Yesu ma makaɗ səna limiy Eliya avə Musa, mokotufiy ngə Bayzlav tamicek, a zləgamigi avə Yesu. 5 Piyer diw kə luwen a Yesu: ‹‹ Mordoy ngaɗa, law yikwan cike wayza kə ɗewey kin awənhi. A geɗ yikwan kə la mazlaɓ makaɗ, takan ngəkoh, takan a Musa, za takan təm a Eliya.›› 6 A luwta atəgo , kadaban nəv ngə wəriy gawliy ngə Yesu səna tu mbir, a hovokiy lay limiy təkəniy mə toniy səna, zəni a sənta kə luw a ciki bugwən.
7 Za məsinsineh ɗiy, kəlak, atalan tan. Zlimiy wəla ngə Bayzlav a liɓ gazlavay səna za. A luw atalan Yesu: ‹‹ Gawəl nhi acin Kərti ɗah, kata a ndelek tik. Kata mə mayu day day. Mə zlim ma ngetik.›› 8 Njoɗ wəriy gawliy ngə Yesu ɗiya ciy həriya, wik wik wik, a limiy hidi məpərmay ɓahbugwən, səna Yesu avə taniy a gandan.
9 Zəni Yesu avə wəriy gawliy ngetik ma makaɗ, sliɗigi, a surohigi Yesu ɗiya ngəz ta. Takta kə ceɗiy təkəniy taniy mə limta nhi a hidiy kwən, səna pic Kərti Hidmambəlen, tu kə mbəlaha am məc za.›› 10 Wəriy gawliy ngə Yesu səna njiy tan tete mana sin mə luwu mətak ceɗenta a hidigi. Za ɗiyiy neh am walan tan, luwta: ‹‹ Mbəla am məc za nhi, a gər kə luwa kaɗ a ciki?›› 11 Zəni ɗiya nehi Yesu: ‹‹ Mogroy jəgwan ngə mə taktak ngə yahudigi ɗaw kə luwta lawlaw Eliya mokotuf ngə Bayzlav kə yah məpəlpəla kə Kristu zagway wər kemi?›› 12 Yesu ɗiya zlawenta: ‹‹ Mindiwin, Eliyaª av kə yah məpəlpəla kə zaɓ təkəniy cike wayza am lay tik zagway. Zəni am ɗerewel ngə Bayzlav a luw: ''tak wəla, Kərti Hidmambəlen av kə zlən takwan day day. Za hidiy av kə safta kə təkən may may.'' Kadaban mi? 13 Za kata ceɗehinkaɗ ɗər, Eliya wər mə yah za, zəni hidiy tu ɗiyenta mə ngavngav mana nəv ngatan mə mayu, mana ɗerewel ngə Bayzlav mə luwu.
Yesu gam mbiɗ mə ngavngav tə kəsəm kərtawəl
14 Yesu avə wəriy gawliy ngetik Piyer, Yakuba ɓiy Yuhana tafnan ma surohigi angər celenigi za, limiy hidiy mə ɓasiy dolom mgbaw celeniy tan kaɗ. A gəɓəzigi avə mogroy jugwan. 15 Hidiy mə ɓas ɓas ma limiy Yesu mə ndum ndum za, ɗiya wələk bərngəzl talan tan. Sliɗigi, sigi kə va kə gbomigi avə Yesu kə ɗenta mbeli. 16 Yesu neh wəriy gawliy ngetik, sin ɗiya luw ‹‹ Hin mə gəɓəz tafnan avə hidiy nhi atalan mi?›› 17 Hidi takan tə dab hidiy mə ɓas ɓas ɗiya zlawen a Yesu: ‹‹ Mordoy, kata tə dah kərti ɗa angər koh. Mbiɗ mə ngavngav mə njə kə tak hidi kə zləgam awan a kəsəm tik. 18 Za mbiɗ səna ɗaw kə mgbav tik ko a ki am mahayək kə sigiɓ tik. A njə kə kəraw ndin, za ko a ki mbiɗ a njə kə singil kəsəm ngetik, cukrok cukrok baha. Kata tep angər wəriy gawliy koh, zəni kata pəlta kə gamiy musuruf tə kəsəm tik kaɗ, təl təlta gbak, a ɓəsiy kə gamta bugwən.›› 19 Yesu ɗiya luwenta: ‹‹ Hin hidiy ma tanjinhi mətak vəlakta nəv kin, hin kə yək ləbar ngaɗa lawlaw wər, kata kə ɗew avə hin ɓəw kə ɓəs avə hin bah wan nu? Mə dahak kərti səna.›› 20 Za dahta acin. Kərti səna ma lim Yesu za, mbiɗ tə kəsəm tik ɗiya kəz kərti səna, tuwələk ndəv a kayək, tingil tingil misligif, bif bif. 21 Yesu ɗiya neh babay ngə kərti səna: ‹‹ Dəga a pu mbiɗ mə pət a kəsəm kərti koh nhi?›› Babay ngə kərti səna zlawenni: ‹‹ A diw kə ruroh tik dəga sin wəlen ndezze. 22 Mbiɗ səna a njə mgbav tik am kuhu ɓəw a liɓ yəm kə gər kə wəzl tik. Mana hav kə ɓəs kə mbəl tik wər, mbuw dap mordoy, a saf kaymah ngiykwan, a məni yikwan may! ‹‹ 23 Yesu zlawenni, ɗiya luw: ‹‹ Hoh luw: ‹Mana hav kə ɓəs kə mbəl tik !› Hoh luw atəgo kemi? Hidi mə vəl nəv tik za a Bayzlav, av kə ɓəs kə ɗiy təkəniy cike wayza.›› 24 Njoɗ babay ngə kərti səna ɗiya han, za ca wəla a gədan: ‹‹ Kata mə vəl nəv ngaɗ za a Bayzlav. Amma kata a wan a fəsək, a mənakku.››
25 Yesu ma lim hidiy dolom a yiy angər tik kə safiy təkən sin ta ɗiy tik za, nap ndəl mbiɗ mə ngavngav tafnan, ɗiya luw: ‹‹ Hoh mbiɗ mə njə kə tak hidi kə zləgam, ɓəw mə njə kə tak hidi kə zlim, a pətah a kəsəm kər nhi za. Hoh gər kə jəɓ a kəsəm tik ɗaba.›› 26 Zəni mbiɗ mə ngavngav tafnan ɗiya cə wəla, vəvoh vəvoh kər nhi day day, pətah tik a kəsəm tik za. Kərti nhi wanay tik fəlen, wa mə məca za. Hidiy dolom a luwta kərti nhi tu məc.›› 27 Zəni Yesu va kaw ngər ngə kərti səna, kaf kaɗ. Sin garay tik.
28 Adəwən Yesu ma pət jik avə wəriy gawliy tik za, taniy a gandan, wəriy gawliy tik ɗiya neh ta, za luwenta: ‹‹ Yikwan mə ɓəs kə gam mbiɗ mə ngavngav tə kəsəm kərti nhi ɓahbugwən kemi?›› 29 Yesu zlawenta, ɗiya luw: ‹‹ Hin kwəl kə gam mbiɗ man anhi atəgo kwən, səna hin kə tar Bayzlav.››
Yesu a ceɗ mə saray tik, sin av kə məc, za Bayzlav av kə mbəlah kaɗ am məc za
30 Yesu avə wəriy gawliy ngetik sliɗiy tan a mə lay səna zaª, tonigi am hayək Galili. Yesu a may hidiy kə səniy lay taniy mə viy kwən, 31 kadaban aa may kə pəslen ma a wəriy gawliy ngetik a gandan›. A luwenta acin: ‹‹ Hidiy av kə kawiy Kərti Hidmambəlen, kə vəlenta a hidiy kə wəzlta kaɗ. Zəni mana kata tu məc, wan saray mə makaɗ tik, Bayzlav av kə mbəlak am məc za.›› 32 Wəriy gawliy ngə Yesu a zlimiy madaba ma səna lawlaw bugwən, a hovokiy kə nehta.
Hidi ngayi acin mordoy tə dab wəriy gawliy ngə Yesu?
33 Yesu avə wəriy gawliy ngetik hosigi a Kafarnahum, liɓde mandez. Ma hosigi za, pətiy tan a de. Yesu neh wəriy gawliy ngetik acin, luwenta: ‹‹ Hin mə ngəway tə mozlokotuf tafnan atalan mi?›› 34 Zəni njitan teete, kadaban tu ngiway a mozlokotuf atalan ngə mbaɗ kə mordoy tə dab tan yi. 35 Yesu ɗew kaɗ acin, ɗefenma a wəriy gawliy ngetik ma gəɓ atalan saray kə yiy a jagwar tik. Zəni ɗiya luwenta: ‹‹ Mana hidi a may kə ɗew kə hidi mordoy a dab hidigi, mə mbaɗ talan tik kə hidi mandez a dab hidiy cike, za sin kə mbaɗ kə hidi mə ɗiyen kəzəɗ a hidigi cike.›› 36 Zəni Yesu wət kərti mandez tə dab tan, vərək a dab dab tan, za kaw humbut. Nap luwen a wəriy gawliy ngetik: 37 ‹‹ Kata ceɗe hin, hidi mə yək kərti mandez mana kərti nhi makavay sin ta səb mozlokotuf ngaɗa, hidi səna a yək kata təm. Za hidi səna a yək kata a gendik kwən baha, a yək Bayzlav məmar hidi mə zlənakku.››
Hidi mətak zel yikwan cike, sin acin hidi ngiykwan
38 Zəni pic takan Yuhana luwen a Yesu: ‹‹ Mordoy, yikwan mə lim hidi a gam musuruf a kəsəm hidi za avə zlim koh. Yikwan gər kə tak tik kadaban sin a lap avə yikwan cike wayza bugwən.›› 39 Zəni Yesu ɗiya zlawenni, sin luw: ‹‹ Mə gər kə tak kwən. Hidi mə njə kə ɗiy təkən mə wələk bərngəzl talan ma law avə zlim ngaɗa, za adəwən səna kə zelekku ɗahkwən . 40 Kadaban səna, hidi mətak zel yikwan sin a wan avə yikwan. 41 Asəna acin, kata ceɗehinlaw law, mana hidi tu vəle hin yəm gwedek ngə sa kadaban hin hidiy ngaɗa, hidi səna av kə jan gəd mazlən ngetik mindiwin.››
Mə kaw talan kin a təkən mə njə kə lebeɗ hidiy kə ɗiy mə ngav ngav
42 Yesu luwen a wəriy gawliy ngetik: ‹‹ Mana hidi tu lebeɗ hidi takan ma kukuɗ tə dab hidiy mə yəkiy zləgam ngaɗa kə ndəv am mə ngav ngav, geleɓe mə zenenta gunuhuz a hidi səna am wəla, za mə goɗ ta a liɓ yəm ma kpum.››
43 Mana ngəra koh av kə lebeɗeh kə ɗiy mə ngav ngav, ma mban kaɗ. Aavə hoh kə pət am kuhu ma a way ɗahkwən avə ngəra koh saray tik, geleɓe hoh kə jan micin angər Bayzlav avə ngəra koh takan dap. [ 44 Abəgo gukwəɗiy av kə hamiy hidi, za aa məciy ɗahkwən, za kuhu təm a məc ɗahkwən koh a pu]. 45 Mana ngaz koh tu ngazloh kə ɗiy mə ngavngav wər, ma mban kaɗ. Avə kə fəkiy am kuhu ma a way ɗahkwən avə ngaziy koh saray tik makavay mə ngav ngaviy koh, geleɓe hoh kə jan micin a ngəra Bayzlav avə ngaz koh takan. [ 46 Abəgo gukwəɗiy təm a məciy ɗahkwən, za kuhu a məc ɗahkwən koh a pu.] 47 Wa səna, mana həriya koh tu lebeɗeh kə ɗiy mə ngav ngav, ma huzloɗ kaɗ. Avə kə fəkiy am kuhu ma a way ɗahkwən avə həriyiy koh saray tik makavay mə ngav ngaviy koh, geleɓe hoh kə va am bay ngə Bayzlav avə həriya koh takan. 48 Abəgo, ‹‹ gukwəɗiy a məciy ɗahkwən za kuhu təm a məc ɗahkwən koh a pu.››
49 ‹‹Kata ta luw atəgo kadaban hidiy cike wayza av kə toniy a mə takwan ngə kuhuª. ››
50 ‹‹ Məngahay təkən malaw. Zəni mana mbaɗay tik laham laham wər, hov kə ɗiy tik a ciki, kə mbaɗ kwerek kwerek baha? A jan za, hin kə ɗew lawlaw am walan kin. Anhi, hin məv kə ɗiy nek mana məngahay ma kwerek am gəda.››