Yesu vəlen zəm a hidiy day ngərbək foɗ
8
Gwedek adəwən Yesu mə vəlen zoy a wəya, hidiy dolom ɓasiy angər Yesu baha. Zəni a mariy təkən ngə zəm bugwən. Yesu ɗefenma a wəriy gawliy ngetik, luwenta: 2 ‹‹ Kaymah ngə hidiy nhi a gasakku. Mə ɗiya wan makaɗ yikwan ma wan a wənhi a dab donu avə tanigi. Zəni zəm ngatan ɗah ɗaba. 3 Mə safu, hidiy məpərmay a yigi a mə lay ma guduk za. Mana kata luwenta kə jəɓiy tan a de mətak zəmiy gəda, av kə ndəvigi a mozlokotuf.›› 4 Wəriy gawliy ngetik ɗiya luwenta: ‹‹ Anhi hidi a wan a dab donu. Ya kə jan zəm ngə pas hidiy ma dolom man anhi a ki?›› Jan tik tuwnha. 5 Yesu nehta acin, luwenta: ‹‹ Hin məmar bret wər nu am ngər kin?›› Nap zlawenta: ‹‹ Bret cisaray dap.›› 6 Zəni Yesu ma zlim atəgo za, luwen a hidiy mə ɓas ɓas kə ɗewiy kaɗ a kayək acin. Ma ɗewiy kaɗ za, Yesu wət bret cisaray tafnan nhi, luwen soko a Bayzlav, nga nga kaɗ, zəni vəlen a wəriy gawliy ngetik kə wəzakenta a hidigi. Wəriy gawliy ngetik wəzak wəzakenta acin. 7 Za kilif ma cicer ɗaha gwedek angər tan baha. Yesu luwen soko a Bayzlav makavay kilif səna, za Yesu vəlen a wəriy gawliy ngetik. Sin luwenta kə wəzakenta a hidiy cike wayza bah. 8 Hidiy səna cike wayza ham hamta pas nha fəs. Wəriy gawliy ngetik kambal kambaliy mə fəs tik kaɗ, zek zekta am paskar kpew kpew cisaray. 9 Hidiy mə hamta səna, mə ɗiya hidiy day ngərbək foɗ. Adəwən səna, Yesu luwen a hidiy mə ɓas ɓasiy tafnan kə viy tan a de. 10 Ma viy tan za, njoɗ Yesu avə wəriy gawliy ngetik pətigi a liɓ pay ngə zlan maza, viy tan am hayək Dalmanuta.Yesu aa ngəm kə ɗiy təkən mə wələk bərngəzl a Farisigi kə limta kwən
11 Pic takan Farisigi məpərmay sliɗiy yigi angər Yesu kə sləta. Ma yigi za, diwiy kə ngiway avə sin. Nap luwenta: ‹‹ A ɗiyiy yikwan təkən mə wələk bərngəzl talan, hoh ta njə kə ɗiy nhi, yikwan kə sən aa kimin za, Bayzlav acin mə vəloh gədan kə ɗiy tik vu, asənkwən Bayzlav kwən vu?›› A luwenta atəgo nhi, kə jan kə ɗəfta. 12 Yesu ma zlim atəgo za, sigif avə gədan kadaban sin tu dangar avə hidiy mətak yəkiy ma ngetik. Sin luwenta acin: ‹‹ Hin hidiy ma tanjinhi, mə gər kata kə ɗiye hin təkən mə wələk bərngəzl hin kə lim tik vu? Ta ceɗehinkaɗ law law, tə ɗiye hin təkən mə wələk bərngəzl məpərmay hin kə lim tik ko takan kwən.›› 13 Yesu ma luw atəgo za, geɗta kaɗ. Taniy sliɗigi avə wəriy gawliy ngetik, va pətiy a liɓ pay ngə zlan maza, zlanigi adəwən torok Galili.
Ma məngaɓngaɓ atalan jəgwan ngə Farisigi ɓəw ngə Hirudus
14 Mandal Yesu avə wəriy gawliy ngetik a waniy a liɓ pay ngə zlan maza, wəriy gawliy səna zlayiy kə ɓiyiy təkən zəm. A ɓiyiy bret takan angər tan dap. 15 Yesu ɗiya ngəzta avə ma məngaɓngaɓ: ‹‹ Mə kaw talan kin lawlaw avə njem ngə Farisigi ɓəw njem ngə bay Hiridus.›› 16 Wəriy gawliy ngetik ma zlimta atəgo za, ɗiya zləgamigi am walan tan kadaban a mariy bret bugwən. 17 Zəni Yesu sən gendik a zləgamiy atalan bret taniy mə zlayta kaɗ nhi. Sin luwenta acin: ‹‹ Mə zləgam am walan kin: ‹Bret ɗah angər yikwan kwən› wər kemi? Hin mə ɓən day atalan bret ma ɗahkwən angər kin kemi? Hin mə zlim zləgam ngaɗa gesin bəgwən vu? Bərngəzl talan kin mə peke kaɗ nha tanjinhi. 18-19 Hin mawana həriya, hin ma lim ɗahkwən vu? Hin mawana zlimi, hin ma zlim ɗahkwən vu? Ya am pic kata mə wəɗak bret joɓən, za kə vəlen a hidiy ngərbək joɓən nhi, hin ɗah abəgo kwən vu? Maa hamta za, mə fəs tik hin mə kambal ndel nu?›› Zlawta: ‹‹ Ndel gəɓ atalan saray .›› Yesu ɗiya luwenta: ‹‹ Ya tanjinhi, talan kin mə zlaya za njoɗ dap vu?›› 20 Zəni mandal kata mə wəɗak bret cisaray kə vəlen a hidiy ngərbək foɗ, mə fəs tik hin mə kambal, paskar nu?›› Zlawta: ‹‹ Paskar cisaray .›› 21 Yesu nap luwenta acin: ‹‹ Hos am tanjinhi, hin mə sən bəgwən vu?››
Yesu zlər həriya ngə huluf a Baytisayda
22 Yesu avə wəriy gawliy ngetik hosigi a slalade Baytisayda. Zəni hidiy təbəgo tepiy huluf angər tik. Ma tepta za, ɗiya centa ngəra a Yesu, luwenta: ‹‹ Mordoy, a ɗiy ngər koh atalan huluf nhi, sin kə jan kə lim.›› 23 Zəni Yesu kaw huluf səna am ngəra , viy tan gaf a slalade. Ma hosiy abəgo za, ɗiy giden am həriya ngə huluf tafnan, bər ngəra a kəsəm tik. Sin ɗiya neh tik, luweni: ‹‹ Hoh lim lay vu?›› 24 Huluf səna kaf həriya ngetik, ɗiya luw: ‹‹ Ta lim hidigi mana pay a vigi.›› 25 Yesu jəɓ ɗiy ngər am həriya tik baha. Njoɗ həriya huluf səna zlər, kwəlek kwəlek, sin tu jan zoy, a lim lay law law. 26 Yesu ɗiya luwenni acin: ‹‹ Hoh gər kə jəɓ am slalade kə ceɗen ma ngə həriya ngəkoh nhi a hidiy kwən. A gar, ma va koh a de dap.››
Piyer ceɗ Yesu acin Kristu
27 Pic sənan, Yesu avə wəriy gawliy tik aa viy am slalahde ma par par tə liɓde Kaysariya Filipi. Mandal aa viy a mozlokotuf, Yesu ɗiya nehta: ‹‹ Hidiy a njə kə luwta kata yi?›› 28 Taniy zlawenta: ‹‹ Hidiy məpərmay a luwta, hoh acin Yuhana mə juroɓ baptisma. Hidiy məpərmay baha a luwta, hoh acin Eliya mokotuf ngə Bayzlav tamicek. Za hidiy məpərmay təm a luwta, hoh acin mokotuf ngə Bayzlav məpərmay tə dab mokotufiy mə yigi tamicek.›› 29 Yesu ɗiya nehta: ‹‹ Yah hin wər, mə vərəkkak kə yi?›› Piyer zlawenni: ‹‹ Hoh acin Kristu, Hidi Bayzlav mə welu.›› 30 Za Yesu luwenta avə ndəl: ‹‹ Mə gər kə ceɗen a hidiy kə sənakta kwən.››
Yesu ceɗ av kə məc, za Bayzlav av kə mbəlah kaɗ a mə məc za
31 Yesu diw kə jəgwanen təkən a wəriy gawliy ngetik. Ɗiya luwenta: ‹‹ Ko a ɗiy aceki, kata Kərti Hidmambəlen, təv kə zlən takwan day day. Talan mbalgam ngə yahudigi, mogroy ngə masayigi təm jik Bayzlav ɓəw mogroy jəgwan av kə zelekta, za av kə wəzlakta kaɗ. Mana kata tu məc, wan saray mə makaɗ tik Bayzlav av kə mbəlak kaɗ am məc za.›› 32 Yesu tu ceɗ ləbar səna mgban mgbanª. Zəni Piyer ngazl a gozlum za, ɗiya mbəzlen ma. 33 Yesu ca həriya kə va ngər wəriy gawliy ngetik. Zəni ɗiya ndəl Piyer: ‹‹ A jel za! A jəɓ kə vadəwən, Sayɗanu bay musuruf cah! Zləgam koh nhi ngə musuruf. Ɓən ngəkoh ɗah mana ngə Bayzlav kwən, nhi ɓən ngə hidmambəlen.››
Ləbar atalan hidi mə may kə səb mozlokotuf ngə Yesu
34 Adəwən səna, Yesu ɗefenma a wəriy gawliy tik avə hidiy mə ɓas ɓas kə yigi angər tik. Ɗiya luwenta: ‹‹ Ta ceɗe hin, hidi mə may kə səbak wər, mə geɗ təkən həriya ngetik ta may kaɗ, mə sləsləɓ kəsəm tik kə sa takwan mana kata tu kə sa tik am pay ma zləngrak, za mə səbakku acin. 35 Kadaban səna, ko hidi ngayi mə may kə mbəl micin tik am talan mahayək nhi, av kə lek micin ngetik angər Bayzlav. Zəni hidi mə vəl micin tik kə lek makavay sin taa səb mozlokotuf ngaɗa, ɓəw makavay sin ta ceɗ Ləbar Malaw a hidigi, av kə jan mbəl micin ngetik angər Bayzlav. 36 Mana tanjinhi hidi tu jan təkəniy cike wayza təm talan mahayək mana sin mə mayu, za adəwən səna, sin lek micin tik kaɗ. Zəni zay ngə təkəniy səna av kə dahen micin vu? 37 Anhi wər, aray mə hosoh za gəga kə zlambaɗ micin ngə hidi a kibik Bayzlav vu? Awwo! A hos gəga bugwən.
38 Ya ta ceɗe hin, mə zlimu: ‹‹ Hidiy təm talan mahayək tanjinhi a ɗiyiy mə ngavngav a kibik Bayzlav, za aa buwenta dəwən. Ko hidi ngayi a ɗiy weli a kata asənkwən a kə səb zləgam ngaɗa a kibik hidiy mə ɗiyiy məplafas avə mə ɗiyiy mə ngavngav, mandal kata Kərti hidmambəlen, kata tu kə yah avə gədan mordoy ngə Vay ɓəw avə mbaslayiy mə ɗiyiy kəzəɗ ngetik, təv kə zen weli təm.››