Ləbar atalan məzugzugwa ngə Bayzlav ɓəw atalan məzugzugwa ngə hidiy tamicek
7
Farisigi avə mogroy jəgwan sənan a yiy a liɓde Ursalima za, ɓas ɓasigi angər Yesu. 2 Taniy limiy wəriy gawliy ngə Yesu sənan a zəmiy gəda avə liya am ngəra, mana kə luw kaɗ məzugzugwa ngatan a tak zəm gəda mətak pan ngəra. 3 Yaw ! Farisigi avə Yahudigi sənan cike wayza a səbiy mə zugzugwa ngə didi ngatan. Aa zəmiy gəda mətak paniy ngəra ɗahkwən . 4 Wa səna, mana tu yiytan a luma za, ɗaw kə paniy ngəra zagway za kə diw kə zəmiy gəda. Taniy a waniy a məzugzugiy məpərmay dolom baha ta səbta. Taniy ɗaw kə gohiy kaslak zagway za kə sa yəm. Ɓəw ɗaw kə gohiy siwli ngə ɓuzu avə siwli masa ma wəzek kə jan kə ɗew kə hidiy mətak liya.5 Kadaban səna acin, Farisigi avə mogroy jəgwan ɗiya nehiy Yesu: ‹‹ Wəriy gawliy koh a səbiy məzugzugwa ngə didi ngatan ɗahkwən kemi? Ɗaw kə zəmiy gəda mətak paniy ngəra, kadaban mi?›› 6 Yesu luwenta: ‹‹ Hin hidiy mə joviy ma. Aməcek Esaya mokotuf ngə Bayzlav tu zləgam tiɗtiɗe atalan kin. Mindiwin mandal Bayzlav mə zləgamu am mə ɗerewel ngetik. Sin a ɗəɗef:
Bayzlav a luw:
‹Hidiy nhi a njə kə zləgamiy malaw atalan ɗa a gendik,
zəni a vəlak tə nəv tan mindiwin bugwən, viy tan gaf avə kata.
7 Mə njə kə ɓasiy kə tarakta, a njə kə tarakta may may kadaban a ɗiyiy jəgwan avə ɓən ngə hidiy a gendik.› ‹‹
8 Yesu nap luw baha: ‹‹ Hin Farisigi avə mogroy jugwan, hin mə njə kə geɗ mə taktak ngə Bayzlav kə səb məzugzugwa ngə hidigi . 9 Sin ɗiya luwenta baha, hin mə njə kə fiy məzugzugwa ngə Bayzlav kaɗ kə ɗiy məzugzugwa ngəkin. 10 Yaw! Musa mə luw za amicek:
‹A daɓen talan a babay koh ɓəw a mamay koh.›
Za a luw baha:
‹Hidi mə rə babay tik avə mamay tik, səna kə wəzlta kaɗ.›
11 Zəni ngəkin, hin ɗaw kə luwen a hidi: ‹Mana hidi tu luwen a babay tik asənkwən a mamay tik: Təkən kata mə may kə vəloh nhi, kata tə ɓəs kə vəloh kwən kadaban korbanª,› mana kə luw kaɗ ‹kat mə vəlen təkən səna a Bayzlav.› 12 Anhi acin, hin mə luwen a hidigi ɗah law kə mən babay tik avə mamay tik kwən. 13 Asəna acin, hin ɗaw kə ngav zləgam ngə Bayzlav a mə zugzugwa kin hin ta njə kə jəgwanen a hidigi. Za hin mə njə ɗiy təkəniy mana səna dolom.››
Təkən mə njə kə ngav hidi
14 Adəwən səna, Yesu ɗefenma a hidiy kə yigi angər tik baha. Ma yiy za, ɗiya luwenta: ‹‹ Hin cike wayza mə teh zlimiy, za mə zlim law law. 15 Təkən hidi ta njə kə zəm kə va liɓi, aa ɗiyen liya ko gwedek a hidi a kibik Bayzlav ɗahkwən. Təkən mə njə kə pətah ta mə nəv za acin, mə njə kə ngav hidi ɗər. [ 16 Hidi məmar zlimi, mə zlim law law.››]
17 Yesu avə wəriy gawliy tik sliɗiy kə va de. Geɗiy hidiy mə ɓas ɓas kaɗ. Ma hosiy a de za, wəriy gawliy ngetik ɗiya nehi madaba ma məngaɓngaɓ sin mə luw tafnan. 18 Yesu ɗiya zlawenta: ‹‹ Hin təm, hin ma zlim ɗahkwən vu? May ngaɗa hin kə sən tik, təkən hidi ta njə kə zəm kə va liɓi nhi a dəbəz hidi a kibik Bayzlav ɗahkwən . 19 Kadaban səna acin, zəm a pət am nəv ɗahkwən. Ɗaw kə garay tik am gadabəlak, za adəwən səna gwedek, kə ca kaɗ.›› Mana kə luw kaɗ, Yesu a ceɗ təkəniy ngə zəm cike wayza kwəl kə zəmta, a dahenta mə ngavngav a hidi kwən. 20 Yesu nap luw baha: ‹‹ Təkən mə njə kə pətah am nəv ngə hidi za acin mə njə kə dəbəz hidi a kibik Bayzlav. 21 Yaw, kadaban ɓən mə ngavngav ɗaw kə pətah a mə nəv ngə hidi za, kə lebeɗ tik am gugoɓ, kə lebeɗ tik am həl ɓəw am kə wəzl duwa, 22 kə ɗiy vərndew, kə ɗiy tamah kibik kibik am təkən ngə hidi, kə ɗiy mə ngav ngav, kə jək hidigi, kə ɗiy təkən weli hayya, kə ɗiy ngərak, kə zləgam ma mə ngavngav atalan hidigi, kə kaf kocofron, za kə ɗiy təkən mətak bərngəzl. 23 Yaw ! Kadaban səna acin, təkəniy mə ngavngav nhi cike wayza a njə kə pətiy aa mə nəv ngə hidi za, za kə dəbəz hidi a kibik Bayzlav.››
Werti səban tik ma par a Yahudigi yək ma ngə Yesu
24 Yesu gar abəgo za, və tik am hayək ma mbeh mbeh a liɓde Tirus. Sin pət tik a de, a may hidiy kə sənta kwən. Zəni a ɓəs kə ɓah talan tik bugwən, hidiy sənta. 25 Abəgo, werti ɗaha, kərti tik kərtaza a wan avə mbiɗ a kəsəm, zlim ləbar atalan Yesu. Ma zlim za, njoɗ sliɗ va gbəlih titimbiz a kibik tik. Ɗiya cen ngəra a Yesu, ɗiya luw: ‹‹ Aw mbuw dap! A gam musuruf tə kəsəm kərti ɗa kaɗ may.›› 26 Werti səna səban tik par a Yahudigi. Sin njə Sirofinikigi. Kərti tik a wan avə mbiɗ mə ngavngav a kəsəm. Sin pəl Yesu kə gam mbiɗ mə ngavngav tə kəsəm kərti tik səna kaɗ. 27 Yesu ɗiya zlawenni avə ma məngaɓngaɓ: ‹‹ A geɗ wəriy mə pasiy zagway, kadaban ɗah law kə ɓiy gəd ngə wərigi kə vəlen a haziy kwən.›› 28 Werti səna zlawenni: ‹‹ Mindiwin Məmar Hidi, am lay zəm, haziy təm a njə kə felekiy zəm mə njə kə ndəviy ta kəma wərigi.›› 29 Yesu ɗiya zlaweni: ‹‹ Werti cah, makavay zlaw koh nhi, tanjinhi mbiɗ mə ngavngav tu pətah tik a kəsəm kərti koh za. Av koh a de.›› 30 Wer səna və tik. Ma hos a de za, jan kərti tik mə wana kaɗ am kombon, mbiɗ mə ngavngav ɗah a kəsəm tik ɗaba.
Yesu mbəl wəya
31 Adəwən səna, Yesu sliɗ tik am hayək ma mbeh mbeh a liɓde Tirus za. Sin ton a liɓde Sidon, səb a liɓde ma par par hidiy ta njə kə luw ta Liɓde Gəɓ, hos atalan torok Galili. 32 Hidiy dahenta wəya ma aa zləgam lawlaw ɗahkwən. Za ɗiya pəlta sin kə ɗiy ngəra ngetik atalan gawal səna kə vəlen zoy. 33 Yesu ngazl gawal səna gaf a hidigi. Təm kərti ngəra ngetik am zlim ngə gawal səna, tif giden am ngəra tik, za mbəlem gana ngə wəya səna. 34 Zəni sin kaf həriya kə va wəzlav, sigif, za luw: ‹‹ Efata›› mana kə luw kaɗ ‹‹ A zlər››. 35 Njoɗ, zlim ngə gawal səna zlər, pən, mana sin mə luwu. Za madaba gana ngetik ɗiya pətar kə zləgam peɗen peɗen. 36 Yesu ɗiya ngəzta kə ceɗenta ko a hidi ngayi kwən. Zəni ko asəna, Yesu aa tak hidigi, hidiy aa ceɗta kibik kibik. 37 Hidiy mə zlimiy ləbar nhi, bərngəzl talan tan tu prasl day day. Ɗiya luwta: ‹‹ Gawəl nhi, mindiwin tu ɗiy təkəniy cike wayza law law. Sin ɗiy mədəgəzliy kə zlimigi, za wəyigi kə zləgamiy law law.