Hidiy tə Nasaratu a yəkiy ma ngə Yesu ɓaabəgwən
6
Yesu sliɗ am lay səna za, və tik a Nasaratu, slalade sin mə gəl tə bugo. Wəriy gawliy ngetik səbta kə va bugo. 2 Am pic nəp ngə Yahudigi, Yesu va pət am jik jəgwan zləgam ngə Bayzlav a yahudigi kə ɗiyenta jugwan. Hidiy dolom ɓasigi kə zləmiy ləbar. Ma zlimiy ləbar Yesu mə ceɗ sən za, ləbar səna tu wələk bərngəzl talan tan. Ɗiya luwta: ‹‹ Kay! Gawal nhi a jan bərngəzl talan ngə ceɗ ləbar man anhi a ki? A janah gədan ngə ɗiy təkən mə wələk bərngəzl talan nhi angər yi? 3 Yikwan mə sən za, sin a njə kə cəm pay, sin kərti ngə Mariyama kwən vu? Sin galmən Yakuba, Yoses, Yahuda ɓəw Simon kwən vu? Za galməniy wərzigi baha a waniy a slalahde ngiykwan a wənhi kwən vu? Kadaban səna, aa may kə yəkiy ma ngetik kwən. 4 Yesu ɗiya luwenta avə ma məngaɓngaɓ acin: ‹‹ Hidiy ɗaw kə zlimiy ma ngə mozlokotuf ngə Bayzlav miya ta mə hayək məpərmay za. Zəni ngə mokotuf sənan, am lay mbuw ngetik avə angər vənenhigi, ɓəw hidiy tə de ngetik aa yəkiy mə ngetik ɗahkwən .›› 5 Asəna acin, a jan kə ɗiy təkən mə wələk bərngəzl talan abəgo bugwən, səna a ɗiy ngər tik atalan mə dal daligi kə mbəl tə kaɗ a gendik dap. 6 Yesu wələk wələk, kadaban hidiy nhi a yəkiy ma ngetik ɓaabəgwən. Adəwən səna, Yesu tal talah liɓdiy ma par par tə jagwar slalade Nasaratu mgbaw kaɗ. A ceɗ ləbar ngə Bayzlav a hidigi .Yesu zlən wəriy gawliy ngetik kə viy saray saray kə ceɗ Ləbar Malaw a hidigi
7 Mandal səna, Yesu ɗefenma a mə zlən zləniy ngetik ma gəɓ atalan saray. Za vəlenta gədan kə gamiy musuruf a kəsəm hidigi. Zəni zlənta saray saray am hayək ma par par, 8 ɗiya ngəzta: ‹‹ Məv ngər maymay. Mə gər kə ɓiy təkən ngə zəm kwən, mə gər kə ɓiy gabal kwən, mə gər kə ɓiy ko suloy kwən təm. Səna hin kə wət dagdaga am ngəra ngəkin a gendik. 9 Mə təm kərap kin am ngaz, za mə kwəl ləkwət takan a kəsəm dap, mə gər kə kwəl ləkwət saray kwən. 10 Sin jəɓ luw baha, mana hin mə hosoh za a liɓde səna, zəni hidi njə de təbəgo tu yəkiy hin ngər səsaray wər, mə ɗew abəgo kula am pic hin tu kə sliɗ kə va kin a kibik. 11 Mana hidiy təbəgo a yəkiy hin ɓaabəgwən, za a zlimiy mə ngəkin ɓahbugwən wər, mə gar kin, məv kin abəgo za. Am mandal hin tu kə gar kə va kin, hin kə mbic kirbitil təm ngaz kin kaɗ, kə jan hidiy səna kə sənta a kimin, mə ɗiye hin mə ngavngav za.››
12 Wəriy gawliy sliɗigi, za viy am hayək ma par par kə ceɗ ləbar ngə Bayzlav a hidiy kə buwiy ngar kaɗ. 13 Zəni tu gamiy musurufiy dolom a kəsəm hidigi, tu pəziy ɗawa atalan mə dal daligi dolom, za tu vəliy zoy a hidiy dolom.
Ləbar atalan məc ngə Yuhana mə juroɓ baptisma
14 Aa nəfiy zlim ngə Yesu am liɓde ma par par. Bay Hirudus təm mə zlim ləbar səna za. Hidiy məpərmay a zləgamigi atalan tik, a luwta: ‹‹ Sin acin Yuhana mə juroɓ baptisma mə mbəlaha a mə məc za a wan avə micin. Kadaban səna acin, mə jan gədan kə ɗiy təkən mə wələk bərngəzl talan nhi.›› 15 Zəni hidiy sənan a luwta: ‹‹ Sin acin Eliya.›› Hidiy məpərmay təm a luwta: ‹‹ Sin mokotuf ma takan tə dab mokotufiy ngə Bayzlav tamicek.›› 16 Bay Hirudus ma zlim ləbar səna za, ɗiya luw: ‹‹ Sin acin Yuhana mə juroɓ baptisma, kata mə mban talan tik kaɗ, zəni sin mbəlaha a mə məc za, a wan avə micin.››
17-18 Mandal səna, bay Hirudus wət Hirudiya werti ngə galmən, zlim tik Filip. Yuhana luweni: ‹‹ Ɗa law hoh kə wət werti golmocoh kwən.›› Makavay Yuhana mə luwen atəgo səna acin, bay Hirudus vəl kotuf a sojigi kə kawiy Yuhana, kə fiyta am jik jaw. 19 Hirudiyas ma zlim mana Yuhana mə juroɓ baptisma mə luw za, nəv tik tu ham atalan Yuhana. Aa may kə wəzl kaɗ, zəni bay Hirudus a ngəm kə wəzl tik bugwən. 20 Bay Hirudus a hovok avə Yuhana, kadaban Yuhana hidi malaw, mə njə kə ɗiy kəzəɗ ngə Bayzlav. Sin ɗaw kə puw Yuhana law law. Kadaban səna aa may kə mbəlemen ngəra a kəsəm kwən. A njə kə may kə zlim ləbar Yuhana ta ceɗ tik, zəni mana mə zlim za, nəv ngetik aa wəzən godokwən.
21 Yaw ! Pic məmbəlwa lay mbuw ngə bay Hirudus ma hos za, mə mbaɗa kə pic ma law təm a Hirudiya ngə wəzl Yuhana kaɗ. Bay Hirudus tu təh gəda dolom ngə məmbəlwa a hidiy mogroyigi, bayigi, talan mbalgamiy ngə sojigi ɓəw hidiy tə Galili mə njə kə safta kə hidigi . 22 Mandal a zəmiy gəda, kərti Hirudiyas kərtaza pət angər tan avə dar a kibik hidiy cike wayza. Dar səna tu fet nəv ngə bay avə hidiy ngetik. Asəna acin, bay ɗiya luweni: ‹‹ Hoh may kata kə vəloh mi? A ceɗekku kata kə vəloh.›› 23 Bay luw mbeɗi, ɗiya luw: ‹‹ Təkəniy hoh mə mayu cike wayza, təv kə vəloh. Ko a njə kə wəɗak hayək ngaɗa avə hoh pərak pərak, təv kə vəloh.›› 24 Kərtaza səna ma zlim atəgo za, sliɗ va neh mamay tik: ‹‹ Kata kə neh sin kə vəlak mi?›› Mamay tik ɗiya zlaweni: ‹‹ A luwen mə vəloh talan ngə Yuhana mə juroɓ baptisma.›› 25 Jəɓ va angaw angər bay, luweni: ‹‹ Tə may hoh kə vəlak talan ngə Yuhana mə juroɓ baptisma am kaslak tanjinhi.›› 26 Neh səna tu nus nəv ngə bay. Zəni a may kə kərndək tik avə təkən sin mə tar səna bugwən, kadaban mə luw mbeɗi za avə ma ngetik a kibik hidiy mə yigiy təm məmbəlwa.
27 Zəni bay zlən soje angaw kə va kə mban talan ngə Yuhana, za kə dah tik. Soje səna sliɗ, va mbana talan ngə Yuhana am jik jaw. 28 Zəni dah talan səna am kaslak. Vəlen a kərtaza tafənan, sin təm yək, tepen a mamay tik.
29 Wəriy gawliy ngə Yuhana ma zlimta Yuhana ma məca za, vigi, wətiy kəsəm ngetik, kah tə kaɗ.
Yesu vəlen zəm a hidiy day ngərbək joɓən
30 Njoɗ məzlənzləniy ngə Yesu ma gəɓ atalan saray səna jəɓiy a mə lay zlən za, lapiy angər Yesu. Nap ceɗiy təkəniy taniy mə ɗiyta cike wayza ɓəw mə jugwanenta ləbar ngə Bayzlav a hidigi .
31 Hidiy dolom, cip cip cip, aa yigi angər Yesu, sənan a viy tan a de. Kadaban səna, Yesu avə wəriy gawliy ngetik a janiy lay kə zəm gəda ɓaabəgwən. Yesu ɗiya luw: ‹‹ Mə sliɗ, nəmkwan am lay ma lew lew, hidiy ɗahiy abəgo kwən kə jan hin kə nəp gwedek .›› 32 Sliɗigi acin, pətigi a liɓ pay kə zlan maza, kə va am lay ma lew lew taniy a gandan. 33 Mandal ta ɗiy mbuluk avə pay ngə zlan maza səna, hidiy dolom limta. Taniy sənta am lay Yesu ta vigi. Hidiy ɗiya siy avə ngaz kə səb ta. Zəni hosigi məpəlpəla am lay Yesu avə wəriy gawliy ngetik taviy səna.
34 Yesu ma hosiy za, sərohoh am pay ngə zlan maza za, za sin lim hidiy dolom mə ɓasiy kaɗ abəgo . Ma lim za, kaymah gesenni, kadaban taniy wa təmakiy mə lek lek mətak mə gəlgəla. Zəni sin diw kə ɗiyenta jəgwan dolom. 35 Wəriy gawliy ngə Yesu ma limiy pic mbeh kə ndəv za, viy angər tik, za luwenta: ‹‹ Mordoy, lay kələw kələw, za yikwan ma wan am lay hidiy ɓaaɗakwən. 36 Geleɓ a zlən hidiy nhi mə viy a liɓdiy mendezigi, ɓəw a liɓde ma mbeh a wənhi kə səkəmiy təkən ngə zəm.›› 37 Yesu ɗiya zlawenta: ‹‹ Hin avə talan kin, mə vəlenta təkən ngə zəm.›› Taniy zlawenta: ‹‹ Mordoy, hoh may yikwan kə lek suloy bələk sarayª kə səkəm təkən ngə zəm a hidiy səna acin vu?›› 38 Yesu ɗiya nehta: ‹‹ Bret nu hin məmaru? Mə va safu.›› Ma saf tə za, zlawenta: Bəret joɓən avə kilif saray.›› 39 Zəni Yesu luwen a wəriy gawliy tik kə luwenta a hidiy kə ɗewiy njuk njuk atalan hiziɗ ma njeɓek. 40 Zəni taniy ɗewiy kaɗ avə səbtik avə səbtik. Am lay sənan hidiy bələk bələk, am lay məpərmay hidiy ngər joɓən ngər joɓən. 41 Adəwən ma ɗewiy kaɗ za, Yesu wət bret joɓən avə kilif ma saray tafnan, kaf həriya kə va wəzlav, luwen soko a Bayzlav. Zəni wət bret joɓən tafnan, ngah ngah kaɗ, vəlen a wəriy gawliy ngetik kə wəzakenta a hidigi. Sin ɗiy mana səna baha avə kilifiy ma saray tafnan. 42 Hidiy cike wayza tu hamta pas pas, 43 zəni kambal kambaliy mə fəs fəs ndel kpew kpew gəɓ atalan saray. 44 Mawəliy mogroyª mə hamiy bret səna mə ɗiyiy ngərbək joɓən.
Yesu va atalan yəm tə torok Galili
45 Adəwən mawəliy mogroy ngərbək joɓən ma zəmiy za, Yesu taken wəla a wəriy gawliy ngetik kə pətiy a liɓ pay ngə zlan maza, kə zlaniy mə pəlpəla adəwən maza, a pal liɓde Baytisayda tə jagwar maza mordoy. Zəni sin wər a way ɗə mbeli avə hidiy mə ɓas ɓas zagway, za kə luwenta a hidiy nhi mə buwiy tan a de tan.›› 46 Adəwən hidiy ma cakwayiy za, Yesu sliɗ və tik atalan wərum kə tara Bayzlav.
47 Vuɗ ma hosoh za, wəriy gawliy ngə Yesu a waniy am pay ngə zlan maza a dab dab maza, mandal səna, Yesu wər ɗah a jagwar tan kwən, a wilen atalan maza za. 48 Sin lim wəriy gawliy ngetik, taniy a mbəlamiy avə takwan kə kəzer pay ngə zlan maza, taniy dəzdəz a həriya ngə mbiɗ, za mbiɗ a ca. Adəwən səna gwedek, zlalay tu hos. Yesu ɗiya va angər tan atalan yəm avə ngaz. Sin mbeh mbeh a pay ngə zlan maza, za a gər kə tonta kaɗ. 49-50 Ma limiy Yesu a va atalan yəm nhi, a ca gandan musuruf. Taniy cike wayza ɗiya ciy wəla kadaban tu hovokiy day day. Zəni Yesu ɗiya luwenta: ‹‹ Nhi kata, mə hovok kwən, mə sok nəv kin kaɗ.›› 51 Adəwən səna, sin pət a liɓ pay ngə zlan maza angər tan. Njoɗ mbiɗ geɗ kə ca kaɗ. Təkən səna tu ngə talan tan day day, 52 a səniy təkən Yesu mə ɗiyu atalan bret avə kilifiy nhi bugwən. Hidiy nhi bərngəzl talan ngatan toy toy.
Yesu mbəl mə daldaligi am hayək Genezaret
53-54 Adəwən səna, Yesu avə wəriy gawliy ngetik hosigi a gozlum maza, am hayək ma mbeh a hayək Genezaret. Taniy surohiy kaɗ, wətiy pay ngə zlan maza tan kpawta kaɗ atalan maza. Njoɗ hidiy təm hayək səna səniy Yesu. 55 Aa cakwayiy ləbar yah ngetik am lay par par, za hidiy a sigi angər tik avə mə daldaligi. A səbiy Yesu avə mə daldaligi mə wan wan təm haypah sin kə mbəl tə kaɗ. 56 Am lay sin ta va cike: ko a liɓde mendez, ko a liɓde mordoy, hidiy a njə kə dehenta mə daldaligi am lay hidiy mə njə kə ɓasiy səna. A njə kə centa ngəra a Yesu, hidiy mə daldaliy səna kə jan kə mbəlemiy ngəra am ləkwət ngetik a gendik. Zəni hidiy cike wayza mə mbəlemiy ləkwət səna a njə kə janiy zoy.