Yesu mbəl hidi mə wək wək
5
Adəwən ma zlaniy maza za, Yesu a wəriy gawliy tik tu hosigi atalan maza məpərmay təm hayək Gerasenigi. 2 Yesu ma pəta a liɓ pay ngə zlan maza za, njoɗ hidi njə mbiɗ mə ngavngav pətaha atalan civiy za, ya kə gbamiy avə Yesu. 3 Hidi səna a njə kə wan atalan civigi. Hidi ngə ɓəs kə jaw kaɗ ɗahkwən, koh avə njalalaw. 4 Jəɓ ndas hidiy mə jawta avə massa am ngaz ɓəw avə njalalaw, zəni a njə kə ndoh tik way kaɗ. Zəni ko hidi takan mə ɓəs kə jaw tik ɗahkwən . 5 Hoyhoy vuɗu avə pic a njə kə talay tik a dab talan civigi ɓəw atalan wərum. Mandal sin ta tal, a njə kə cə wəla, za kə ɓor kəsəm tik avə gugun.6 Ma lim Yesu a gaf tik za, nap siy angər tik, va gbəlih titimbiz a kibik tik. 7 Za sin ɗiya cə wəla day day: ‹‹ Hoh Yesu, Kərti ngə Bayzlav məmar gədan, təkən mə lapak avə hoh mi?›› Kata toroh, hoh gər kə ɗiyak takwan kwən! 8 A luw anhi kadaban Yesu a luw: ‹‹ Hoh musuruf, a pətah a kəsəm gawal nhi za.›› 9 Adəwən səna, Yesu ɗiya neh tik: ‹‹ Zlim koh mi?›› Hidi mə wəkwək səna zlaweni: ‹‹ Zlim ngaɗ zəgədiy, kadaban yikwan musurufiy dolom.›› 10 Mbiɗiy mə ngavngav tə kəsəm gawal səna ɗiya pəliy Yesu dolom kə jan Yesu kə geɗta kaɗ mətak gamta gaf a hayək səna za.››
11 Am lay səna, hidiy a gəliy guldomiy dolom a bər wərum. 12 Mbiɗiy mə ngavngav tə kəsəm gawal tafnan centa ngəra a Yesu, nap ciy wəla, ɗiya luwta: ‹‹ Mbuw dap! A geɗe yikwan mozlokotuf, yikwan kə pət a kəsəm guldomiy tadtigi may.›› 13 Zəni Yesu geɗenta mozlokotuf.›› Kadaban səna, mbiɗiy pətiy tan a kəsəm gawal səna za. Taniy va pətiy a kəsəm guldomigi. Za guldomiy cike wayza siy kə va bər wərum. Taniy pətiy, sirif, a liɓ yəm mordoy, lekiy tan a kimin. Mə ɗiya guldomiy ngərbək saray.
14 Mə gəlgəliy ngə guldomigi ma limta atəgo za, nap siy tan kə va a de. Za va ceɗiy ləbar tik a hidiy tə liɓdigi ɓəw a hidiy tə jagwar donu. Kadaban səna, hidiy ma zlimta za, viy kə safiy təkəniy mə ɗiy səna avə həriya ngatan. 15 Taniy hosiy angər Yesu, janiy gawal njə mbiɗ mə ngavngav tə kəsəm nhi mə ɗewe kaɗ avə ləkwət a kəsəm. Bərngəzl talan lawlaw acin. Ma lim ta atəgo za, nəv ngatan tu mbir. 16 Hidiy təbəgo mə limiy təkəniy nhi avə həriy ngatan, ɗiya ceɗenta a hidiy mə yiy kə safta, təkən mə ɗiy atalan hidi mə wək wək ɓəw atalan guldomigi tafənan. 17 Zəni hidiy səna ɗiya pəliy Yesu kə va tik a mə hayək tan za. 18 Yesu sliɗ vətik.
Mandal aa pət am pay ngə zlan maza, gawal Yesu mə gam mbiɗ mə ngavngav tə kəsəm tik səna ɗiya cen ngəra a Yesu: ‹‹ Mordoy, a geɗek kata kə va avə hoh.›› 19 Yesu a geɗen mozlokotuf sin kə səb tik ɓaabəgwən. Ɗiya luweni: ‹‹ A sliɗ, a va ceɗen a hidiy koh a de təkəniy ma law Bayzlav mə ɗiyoh ɓəw mana sin mə saf kaymah koh.›› 20 Njoɗ gawal səna sliɗ za, va ceɗen təkən Yesu mə ɗiyeni a hidiy a liɓde ma par par, liɓde ta luwta Liɓde Gəɓ. Hidiy cike wayza ma zlim tə za, janiy zəzay dolom am nəv ngatan.
Yesu day məc avə gədan
21 Yesu jəɓah atalan maza za avə pay ngə zlan maza. Sin ɗewey tik a gozlum maza za. Hidiy dolom ɓasigi angər tik.
22 Zəni hidi məpərmay zlim tik Zayirus, mordoy ngə jik jəgwan ngə Yahudigi yah angər Yesu. Ma hosoh angər Yesu za, gbəlih tətəmbiz a kibik tik, 23 ɗiya cen ngəra dolom, luweni: ‹‹ Kərti ɗa a gər kə məc. Ta coh ngəra, a yah, ma ɗiy ngəra koh atalan tik, ma mbəl kaɗ may.›› 24 Njoɗ, Yesu sliɗ, vigi avə sin. Hidiy dolom ɗiya səbta a njəsliy Yesu mozlokotuf mozlokotuf.
25 Werti a wan abəgo . Wan ngə zla vidiɗ tə cəcoh. A zlim takwan day day. Hoyhoy ɓiɓiz a pətaha. Di gəɓ atalan saray ɓiɓiz a kwaray tik dap. 26 Tu tal angər mə ɗiyiy maazla dolom kə juway kəsəm ngetik, za tu ngav suloy dolom am juway səna. Za a jan geleɓe ɓahbugwən, məc səna ceh cehe kaɗ bah. 27 Sin ma zlim ləbar atalan təkəniy Yesu mə ɗiy tik za, yah adəwən Yesu za, a dab hidiy mə ɓas ɓasigi, za mbəlem ləkwət tik. 28 Sin a ɓən aa nəv za: ‹‹ Mana kata tu jan kə mbəlem ləkwət ngetik a gendik, təv kə mbəl.›› 29 Ma mbəlem ləkwət səna za, njoɗ ɓiɓiz a kwarah ɗahɗaba. Sin sən gendik, sin tu mbəl a mə takwan tik. 30 Njoɗ Yesu təm sən gendik, gədan tu pətah a kəsəm tik za. Cə həriya a dəwən, za ɗiya luwen a hidiy mə ɓas ɓas: ‹‹ Hidi ngayi mə mbəlem ləkwət ɗa nhi yi?›› 31 Wəriy gawliy ngetik ɗiya zlawenta acin: ‹‹ Mordoy, a saf mək, hidiy dolom a njəsligi, za hoh kə neh mə mbəlemeh nhi acin aceki ?›› 32 Zəni Yesu ɗiya cəh həriya mgbaw kaɗ kə sən hidi mə mbəlem ləkwət tik səna.
33 Wer tafnan ma sən Yesu acin mə vəlen zoy za, nəv tik tu mbir. Za ɗiya nənəh tu hovok. Kadaban səna, sin va gbəlih tətəmbiz a kibik Yesu, za nap ceɗen avə mindiwin təkən mə ton tə talan tik. 34 Yesu ɗiya luwenni acin: ‹‹ Kərti ɗa, hoh tu mbəl, kadaban hoh mə vəl nəv ngəkoh za a Bayzlav. A sliɗ, av koh avə zoy, tanjinhi takwan koh tu way.››
35 Mandal Yesu awəlen kə way zləgam a werti səna, hidiy tə de Zayirus, mordoy ngə jik jəgwan ngə Yahudigi yigi. Ɗiya luwenta a Zayirus: '' Kərti koh tu məc, hoh dangar Mordoy avə ma ɗaba.›› 36 Zəni Yesu ma zlim za, a ɓəɓəl atalan zləgam səna ɓaabəgwən. Luwen a Zayirus mordoy ngə jik jəgwan ngə Yahudigi: ‹‹ Hoh gər kə hovok kwən. A yək am nəv koh Bayzlav kwəl kə mbəl kərti koh, kərti koh av kə mbəl.››
37 Zəni Yesu wər a ngəm hidiy kə viy avə sin bugwən, səna a ngazl Yakuba avə galmən Yuhana ɓəw Piyer kə viy avə sin dap. 38 Ma hosiy a de Zayirus mordoy ngə jik jəgwan ngə Yahudigi za, janiy hidiy dolom a hanigi, a sigifigi day day, za a ciy wəla. 39 Yesu pət a de, ɗiya luwen a hidigi : ‹‹ Mə han kemi? Mə jəgwan ma kemi? Kərti nhi a məc bugwən, a wanay tik dap.›› 40 Ma zlimta atəgo za, ɗiya mbisenta a Yesu, a safta kə hidi mə cokoɓ ma. Zəni Yesu ɗiya gam hidiy cike way kaɗ a caɗak. Sin ngazl babay kərti avə mamay tik ɓəw wəriy gawliy ngetik ma makaɗ tafənan. Pətiy am jik mə ndəɗiy kərti səna. 41 Yesu va kaw ngəra ngə kərti səna, za ɗiya luw: ‹‹ Talita kumi,›› mana kə luw kaɗ ‹‹ kərti ɗa ta luwoh, a sliɗ za.›› 42 Njoɗ kərtaza səna tu mbəl am məc za, sliɗ za ɗiya va. Wələk bərngəzl talan ngə hidiy cike wayza. Di ngə kərtaza səna gəɓ atalan saray. 43 Yesu ɗiya luwenta: ‹‹ Mə vəlen təkən ngə zəm, sin kə zəm tik. Za ɗiya ngəz ta:›› ‹‹ Mə gər kə ceɗ ma nhi a hidiy kwən.››