Ma məngaɓngaɓ atalan hidi mə biz biz
4
Adəwən səna, Yesu jəɓ atalan torok, ɗiya ceɗ ləbar ngə Bayzlav a hidiy atalan torok Galili. Hidiy dolom tu ɓasiy angər tik. Kadaban səna, ma lim hidiy a ngərəɗta za, sin gəjeh tik. Sin pət am pay ngə zlan maza, za ɗewey tik a kimin. Za hidiy mə ɓas ɓasigi wər mə ɗewiy kaɗ a kayək tə talan maza za. 2 A jugwanenta təkəniy dolom avə ma məngaɓngaɓ. Am jəgwan səna, ɗiya luwenta: 3 ‹‹ Mə zlimu: Pic məpərmay, hidi mə biz biz va a donu kə gəgara sisin am tuz ngetik. 4 Am sin ta gəgar sisin səna, sisin məpərmay yoɓiy a mozlokotuf. Viginiy yiy camta kaɗ. 5 Sisin məpərmay yoɓiy am de gugwən. Njoɗ sisin təvigi, hayək tə madaba tik gəɗak. 6 Adəwən kwalay ma gar gwedek za, pic ɗiya rəngəzl day day. Taniy kwaligi, kuyoh, kadaban zem a jan kə pətiy kula kaɗ kaɗ bugwən. 7 Za sisin məpərmay yoɓigi a digidigiɗ. Kidigiɗ səna ma gəl za, ɗiya sa təkən mə təv təv tafnan, za a jan kə dah talan lawlaw bugwən. 8 Sisin məpərmay yoɓigi am lay malaw. Ma təviy za, gəlgəligi law law, za tu ceɗiy həriya godokwən. Məpərmay ceɗiy həriya gwedek anhi, məpərmay tu ceɗiy həriya law law, za məpərmay tu ceɗiy həriya mana nəv mə mayu.››9 Yesu ma way kə ceɗ ma məngaɓngaɓ a hidiy səna za, luwenta acin: ‹‹ Hidi məmar zlimi kə zlim tik, mə zlimu.››
Yesu ɗaw kə zləgam avə ma məngaɓngaɓ kemi?
10 Adəwən hidiy ma viy tan za, Yesu mə ɗewe kaɗ avə hidiy sənan, za wəriy gawliy ngetik ma gəɓ atalan saray vigi angər tik. Ɗiya nehiy madaba ma məngaɓngaɓiy tafnan. 11 Yesu luwenta: ‹‹ Hin, Bayzlav tu zlər bərngəzl talan kin kaɗ, hin kə sən ɓən mə ɓahɓah ngə Bayzlav mana sin tu kə mar hidiy təm bay ngetik. Ngə hidiy məpərmay wər, səna kə ceɗenta avə ma məngaɓngaɓ. 12 Kadaban səna:
‹Hidiy nhi a ciy həriya,
za a limiy ɗahkwən .
A zlimigi,
za a sənta ɗahkwən .
Mana tu pət am bərngəzl talan wər,
av kə jəɓigi angər Bayzlav.
Za Bayzlav təm
av kə geɗ mə ngavngav ngatan kaɗ.›
Yesu pəsl madaba ma məngaɓngaɓ
13 Za Yesu ɗiya luwenta: ‹‹ Hin mə zlim ma məngaɓngaɓ kata mə ceɗehintafnan bəgwən vu? Ya hin mə zlim ma məngaɓngaɓ məpərmayiy za acin vu? 14 Hidi mə gəgar sisin nhi, sin wa hidi ta gəgar zləgam ngə Bayzlav. 15 Asəna acin, nəv ngə hidiy məpərmay wa mozlokotuf sisin mə yoɓiy tə kimin nhi. Njoɗ, zlimiy mə ngə Bayzlav, njoɗ Musuruf yah wət kaɗ am nəv tan za. 16 Hidiy məpərmay təm, nəv tan wa de gugun. Mana tu zlimiy ma ngə Bayzlav, nəv ngatan ɗaw kə yəkta angaw avə zəzay. 17 Zəni hidiy səna a geɗiy ma ngə Bayzlav səna kə jan kə pət am nəv ngatan ma nder nder ɗahkwən, wa zemiy a janiy kə pət kula kaɗ kaɗ bugwən. Mana banay tu jan ta, za hidiy tu gborenta ma kadaban mə yəkiy ləbar ngə Bayzlav, av kə geɗiy səb mozlokotuf ngə Bayzlav kaɗ angaw. 18 Ngə hidiy məpərmay, yək zləgam ngə Bayzlav am nəv ngatan wa sisin mə yoɓiy am digidigiɗ. Mana tu zlimiy zləgam ngə Bayzlav, 19 zəni tamah ngə təkəniy ma par par təm talan mahayək nhi a ɗiyenta. Mana tamah ngə ɓas aray za ɓəw tamah ngə təkəniy ma par par, av kə pətiy am nəv ngatan, za av kə takiy ma ngə Bayzlav təm nəv ngatan kaɗ. Kadaban səna, hidiy nhi a ɗiyiy kəzəɗ ngə feten nəv a Bayzlav kwən. 20 Zəni ngə hidiy məpərmay a yikiy zləgam ngə Bayzlav avə nəv takan mana sisin mə yoɓ am lay malaw. Taniy a zlimiy ma ngə Bayzlav, za a yəkta avə nəv takan. A ɗiyiy kəzəɗ avə gədan ngatan, mana nəv ngə Bayzlav ta mayu. Zləgam səna ɗiya təv am ɗew ngatan, mana sisin mə təv za kə huv ngirmi ngər makaɗ, sənan ngər kwəh, za sənan təm bələk.
Yesu a ceɗ ləbar tə talan tik a hidiy kə zlim ta
21 Yesu ɗiya luwenta baha: ‹‹ Mana hidi mə nef kuhu am cəbelbel za, aa wət kaslak kə jəɓ kaɗ ɗah vu? Awwo! Law law wər ɗaw kə zlaɓta am lay ma fal. 22 Mana kə luw kat, təkən mə ɓahɓah av kə pətaha mgban mgban, təkən wazwazay av kə ɗiy mgban mgban a hidiy kə zlimta. 23 Mana hidi a wan avə zlimi kə zlim ma, mə zlimu.››
24 Zəni Yesu ɗiya luwenta baha: ‹‹ Mə kaw bərngəzl talan kin lawlaw a zləgam hin ta zlimu avə zləgam hin ta kawu. Kata tə luw anhi kadaban Bayzlav av kə vəle hin pərak pərak avə gədan hin ta ɗiyu kə zlim jəgwan ngaɗa baha. 25 Kadaban səna, mana hidi tu yək zləgam ngə Bayzlav, Bayzlav av kə mənen kə yək tik a kimin a kimin. Zəni mana hidi a yək zləgam ngə Bayzlav bugwən, ko zləgam ngə Bayzlav ma mendez təm nəv ngə tik, Bayzlav av kə ɓiy kaɗ.››
Ma məngaɓngaɓa talan sisin mə njə kə təvay tik nguray
26 Yesu ɗiya luw ma məngaɓngaɓ baha: ‹‹ Zəm bay ngə Bayzlav atalan hidigi a njə kə fuful mana hidi mə njə kə zləg sisin am tuz. 27 Hidi ma zləg za, vuɗu vuɗu sin a wan za kə fəɗah a pic. Mandal səna, ngirmi a təvigi, a gəliy tan, zəni hidi mə zləg tik wər, a sən mana mə təvigi ɓəw mana mə gəligi bugwən. 28 Hayək acin mə ɗiy kəzəɗ kə mbuw təkən ngə zəm nguray tik. Gəl gəligi avə gədan ngə hayək, ɗiyiy liɓi, dahiy sefel, ceɗ ceɗiy həriya. ‹‹ 29 Za ɗiya na. Ma nə za, pic tik tu hos kə zla təkən ma ceh ngirim hiziɗ səna acin.
Ma məngaɓngaɓ atalan siseh venjeh
30 Yesu ɗiya ceɗ ma məngaɓngaɓ a hidiy baha: ‹‹ Yikwan kə sla Zəm bay ngə Bayzlav atalan hidigi wər a mi? Kə sla zəm bay ngə Bayzlav avə ma məngaɓngaɓ ceki? 31 Yaw, kata sla mana a ciki zəm Bay ngə Bayzlav ta gəl mana siseh venje, hidi ma wət za mə zləg am tuz ngetik. Siseh səna cicer cicer, sin acin ma mendez a dab siseh təkənigi tə talan mahayək cike. 32 Zəni mana hidi mə zləg za, a njə kə gəl day kə məzəgəneh payiy sənan ngə zəm. A njə kə ɗiy jəngər day day. Za ma viginigi a njə kə biy de tan a kimin.››
33 Yaw, Yesu a njə kə ceɗ ləbar ngə Bayzlav a hidigi avə ma məngaɓngaɓiy mana nhi, a hidiy ma kwəl kə zlimta. 34 A njə kə zləgamenta hoyhoy avə ma məngaɓngaɓ. Zəni a wəriy gawliy tik, sin a njə kə ɗew avə taniy a gandan, za kə ceɗenta madaba ma məngaɓngaɓ səna.
Yesu ndəl mbiɗ avə yəm kə njiy teete
35 Am pic səna ngə səku, Yesu luwen a wəriy gawliy ngetik: ‹‹ Nəmkwan kə zlan atalan maza ta wəta.›› 36 Kadaban səna, geɗiy zəgudu kaɗ, pətigi a liɓ pay ngə zlan maza Yesu mə ɗew tə kimin. Payiy məpərmay ngə zlan maza ɗahigi abəgo dolom.
37 Njoɗ mbiɗ ɗiya diw kə ca day day atalan yəm. Yəm ɗiya kəz, nha ɗiya wac kə va liɓ pay ngə zlan maza. 38 Yesu wər mə wana kaɗ a liɓ pay ngə zlan maza adəwən za. Mə wana fəlen. Talan tik mə ndəɗa kaɗ am lay ndəɗ talan. Wəriy gawliy ngetik nap fəɗah tə kaɗ. Ɗiya luwenta: ‹‹ Aw Mordoy, yikwan cike wayza ɗaɗaba. Hoh saf kaymah ngiykwan kwən vu?›› 39 Yesu ma fəɗah za, ndəl a ndəl mbiɗ, za ɗiya luwen a yəm təm: ‹‹ A njə teete.›› Njoɗ mbiɗ geɗ kə ca kaɗ. Təkəniy njitan teete.