Yesu mbəl hidi ngəra mə məc məc am pic nəp ngə Yahudigi
3
Adəwən səna, Yesu jəɓ va tik am jik jəgwan ngə Yahudigi. Ma pət za, jan hidi ngər mə məc məc abəgo . 2 Hidiy məpərmay tə dab Farisigi ɗiya ciy həriya atalan Yesu kə saf ta, ko av kə mbəl gawal nhi am pic nəp vu. A ɓənta atəgo kadaban a jariy wir wir kə centa wəla. 3 Gwedek, Yesu ɗefenma a gawal ngər mə məc məc səna, ɗiya luw: ‹‹ A sliɗ, a gar a kibik hidiy cike wayza.›› 4 Zəni Yesu luwen a hidiy mə ɓas ɓasiy nhi acin: ‹‹ Mə taktak ngə Bayzlav wər a ceɗe yikwan aceki ? Am pic nəp wər, law kə ɗiy malaw a hidi vu, asənkwən kə ɗiy mə ngavngav law day vu? Law kə mbəl micin ngə hidi vu, asənkwən kə geɗ hidi kə məc vu?›› Njitan teete. 5 Yesu ɗiya safta cike wayza avə nəv mə bas bas. Nəv tik tu nus kadaban nəv ngə hidiy sən toy toy. Za sin luwen a gawal ngər mə məc məc tafnan: ‹‹ A zər ngər koh.›› Gawal səna zər ngər tik, pəlan! Sin lawlaw tik acin.6 Farisigi tafnan ma limta ngər ngə gawal nhi lawlaw tik, za acin sliɗiy viy tan a caɗak. Taniy va ɗiyiy ɓas avə hidiy ngə bay Hirudus. A zleriy ma am walan tan kə janiy wir wir ngə wəzl Yesu kaɗ.
Hidiy dolom viy angər Yesu
7-8 Yesu sliɗ a Kafarnahum liɓde mendez za, va tik avə wəriy gawliy ngetik atalan torok Galili. Hidiy dolom tə liɓde ma par par ɗiya səbta. Adab hidiy səna, sənan a yiy a Galili za, sənan a yiy a liɓde Ursalima za, sənan bah a mə hayək Yahudiya za. Za məpərmay a yiy am hayək Idumaya a kav ta maza Urdun. Hidiy məpərmay baha a yiy a mə hayəkiy ma mbeh mbeh a liɓde Tirus ɓəw liɓde Sidon. A ɓasiy dolom angər tik nhi, kadaban a zlimiy ləbar atalan kəzəɗ sin ta ɗiyu.
9-10 A talan maza səna, Yesu mbəl mə daldaliy dolom. Hidiy njə məc tə kəsəm a wəraɗiy lay kə janiy mozlokotuf kə va angər tik kə mbəlementa ngəra a kəsəm kə janiy zoy. Kadaban səna, Yesu ɗiya luwen a wəriy gawliy ngetik acin: ‹‹ Mə jarak pay ngə zlan maza, kata kə ɗewey ɗa a kimin.›› A luw anhi, kə jan ta hidiy kə reɗta. 11 Hidiy məmariy musuruf tə kəsəm gbəliy titimbiz tan a kibik Yesu, ɗiya ciy wəla: ‹‹ Hoh acin Kərti ngə Bayzlav.›› 12 Zəni Yesu ɗiya ngəzta avə ndəl day day: ‹‹ Mə gər kə ceɗ kəzəɗ ngaɗa a hidiy kə sənakta kwən.››
Yesu wel wəriy gawliy gəɓ atalan saray
13 Adəwən səna, Yesu və tap atalan wərum. Abəgo, ɗiya ɗefenma a hidiy nəv tik mə mayu, za hidiy səna yigi angər tik. 14 Wel wel hidiy gəɓ atalan sarayª a dab tan kə ɗewiy avə sin, kə mbaɗiy kə məzlənzləniy ngetik ngə ceɗ ləbar ngə Bayzlav a hidigi, 15 zəni vəlenta gədan kə gamiy musuruf a kəsəm hidiy za.››
16 Zlim ngə hidiy ma gəɓ atalan saray sin mə wel səna: Simon, Yesu mə cen zlim tik Piyerª. 17 Yakuba avə galmən Yuhana wəriy Zebede, Yesu mə centa zlimiy Bowanerges, mana kə luw kaɗ ‹‹ wəriy ta zləgamiy day day wa van ta ndəl,›› 18 Andire, Filip, Bartolome, Mata, Tomas, Yakuba, kər Halfa, Tade, Simon njə Kanana 19 ɓəw Yahuda Iskariyot məv kə ɗef ngəra atalan Yesu kə jan mosumiy ngetik kə kawta.
Mə lap Yesu avə musurufiy mi?
20 Adəwən Yesu ma way kə wel wəriy gawliy ma gəɓ atalan saray za, sliɗ a wurum za, yah tik a de. Njoɗ hidiy ɓas ɓasiy dolom baha, za ɗər Yesu avə wəriy gawliy ngetik a janiy layª ngə zəm gəda ɓaabəgwən. 21 Vənenhiy ngə Yesu zlimta mana ta luwta: ‹‹ Sin wəya.›› Yigi kə ngazl tə kaɗ.
22 Mogroy ngə jəgwan mə yiy ta Ursalima ɗiya zləgamiy atalan tik: ‹‹ Gawəl nhi wər Belzebul, bay musuruf, a wan a kəsəm tik. ‹‹ Bay musuruf acin mə vəlen gədan kə gam musuruf a kəsəm ngə hidiy nhi.››
23 Yesu ma zlim atəgo za, ɗefenta ma. Ɗiya luwenta avə ma məngaɓngaɓ: Sayɗanu, bay musuruf a gam celen musurufigi ɗah vu?››. Awwo! A gam ɗahkwən . 24 Mana hidiy təm hayək ma bay takan acin məmarta a jəgəmiy am walan tan wər, hayək səna av kə cakway. 25 Asəna baha, mana hidiy təm terde maa takan a jəgəmiy am walan talan wər, de səna av kə cakway təm. 26 Wa səna, mana Sayɗanu bay musuruf a jəgəm avə talan tik, za hayək aa cakway wər, sin a ɗew kə bay ɗaba. 27 Hin mə sən za, məhəliy a pətiy a de ngə hidi məmar gədan za kə moh təkəniy ngetik ɗahkwən. Səna kə jawiy gawal səna kaɗ zagway, kə jan kə gasiy təkəniy tə de ngetik cike wayza acin.
28 ‹‹ Mindiwin kata ceɗe hin, hidi mə ɗiy mə ngavngav, asənkwən hidi mə zləgam ma mə ngavngav atalan Bayzlav, Bayzlav av kə geɗ mə ngavngav ngetik cike way kaɗ. 29 Zəni ngə hidi mə zləgam ma mə ngavngav atalan Mbiɗ ngə Bayzlav, a jan geɗ mə ngavngav angər Bayzlav kwən, av kə ɗew atalan tik ko a pu.›› 30 Yesu a luw atəgo nhi, kadaban hidiy ta luwta: ‹‹ Musuruf a wan a kəsəm tik.››
Hidiy ngayi acin mamay avə galməniy ngə Yesu?
31-32 Adəwən səna, Yesu a wan avə hidiy dolom. Mamay ngə Yesu avə galmənigi hosigi. Taniy a yiy kə saf ta. Zəni gariy tan kaɗ a caɗak. Zləniy hidi kə ɗefenma a Yesu. Hidi səna ɗiya luweni: ‹‹ Mordoy, mamay koh avə golmocoyiy mawəligi avə wertigi a ɗefiy ma a caɗak.›› 33 Yesu ɗiya zlawenni: ‹‹ Hidi ngayi acin mamay ɗa? Zəni hidiy ngayi acin galmayɗigi?›› 34 Sin saf saf hidiy mə ɗew ɗewiy avə sin mgbaw kaɗ. Ɗiya luwenta acin: ‹‹ mamay ɗa avə galmayɗigi acin hidiy nhi. 35 Mana kə luw kaɗ, hidi mə ɗiy təkən Bayzlav ta mayu, sin acin galmay ɗa werti, galmay ɗa mawəl ɓəw sin acin mamay ɗa.››