Ləbar Malaw a talan Yesu Kristu
YUHANA mə ɗəɗefu
Pət a liɓ deftere nhi
Yuhana kərti Zebede acin mə ɗəɗef deftere nhi. Sin kər gawal ngə Yesu. Hidigi a luw ta mandal Yuhana a ɗəɗef deftere nhi, sin tu ɗiy mbusur. A luw ta sin tu ɗəɗef adəwən mbuw Yesu, day di ngər ngərafkatakan. Mana kə luw kaɗ Matiye, Markus avə Luka a ɗəɗefi ngatan məpəlpəla kə sin.
A liɓ deftere nhi, Yuhana a njə kə luw a talan kər gawal ngə Yesu məpərmay, Yesu ma ta may day day. Mana kə luw kaɗ, a luw a talan tik.
Yuhana a ɗəɗef deftere nhi kə mən a hidigi kə sən ta, Yesu acin Kər Bayzlav, za kə sən ta, sin acin Hidi mə njə kə mbəl hidigi. Hidi mə yək Yesu səna avə kə lek kwən, avə kə jan micin mətak way.
Yuhana a ceɗi yikwan baha, kəzəɗ cike, Yesu mə ɗiyu, a ɗiy, hidigi kə sən ta a kimin za, ko sin acin hidi ngayi wər. Mə saf am mogroy tik kwəh. A bəgo Yesu tu vəlen bretiy a hidi wujine joɓən za tu diw kə jugwanenta hidigi, a luwenta: ‹‹Kata acin gəda mə njə kə vəl micin a hidigi. ›› Za mə saf baha am mogroy tik gəɓ a talan takan. A bəgo Yesu a mbəl Lazarus am məc za, za tu jəgwanen a hidigi, a luw: ‹‹Kata acin hidi mə njə kə mbəl hidigi am məc za, za mə njə kə vəl micin. ›› Yesu luw baha: ‹‹Kata acin lay ma kweɗek ngə hidi tə talan mahayək›› (8: 12), ‹‹Kata acin mijijik ›› (10: 9), ‹‹Kata acin məmar hidi cike ›› (10: 11), ‹‹Kata acin mozlokotuf ngə sən mə ma mindiwin ɓəw ngə jan micin mətak way ›› (14: 6), ɓəw ‹‹Kata acin madaba pay, za hin acin ngər tik ›› (15: 5).
Yesu ta njə kə jəgwanen təkən a hidi atəgo, hidi məpərmay a njə kə yək ta, hidi məpərmay a njə kə zel ta. Tu ɗiy tiɗe mana Yuhana mə ɗəɗef am mogroy tik 1: 11-12. A bəgo a luw: ‹‹Tu sliɗ, tu va a liɓde tik, za hidi ngetik tu zel ta. Amma hidi ngetik məpərmay tu yək tə ngər səsaray, za tu yəki mə ngetik. Sin təm vəlenta gədan a hidi mə yəkiy mə ngetik səna kə mbaɗi kə wəriy Bayzlav. ››
Təkən mə ɗiy tav səb tik təm deftere Yuhana :
Ləbar a talan ɗew Yesu Kristu a dab hidigi, za mana mə jəgwanentə təkən a hidigi kə sən ta a kimin za ko sin acin hidi ngayi (mə saf am mogroy tik 1-12).
Ləbar a talan təkən ma par par, Yesu Kristu mə jugwanenta a wəriy gawliy ngetik, za mana sin mə may ta (mogroy tik 13-17).
Ləbar a talan məc Yesu Kristu avə mbəla tik am məc za, za mana mə pətaha a kibik wəriy gawliy ngetik (mogroy tik 18-21).