Kəzəɗ Yesu mə vəlen
a wəriy gawliy ngetik
Pət am deftere nhi
Hid mə ɗəɗef deftere nhi, sin acin mə ɗəɗef deftere ngə Luka. Gawal mə ɗəɗef tik səna, sin njə yunanin mə mbaɗ kə kər gawla ngə Kristu. Sin a ɗəɗefen a hid taa njə kə ɗefenma ‹‹Mordoy Tiyofil››, mana sin mə ɗəɗef təm deftere ngə Ləbar Malaw atalan Yesu. Am deftere ngə Ləbar Malaw səna, sin a ceɗen a Tiyofil, təkəniy Yesu mə diw kə ɗiy tik ɓəw mə jəgwanen a hidiy am diw kəzəɗ ngetik (1.1). Am deftere ngə Kəzəɗ ngə Mə zlənzləniy ngə Yesu, Luka a ceɗ kəzəɗiy Mə zlənzləniy ngə Yesu mə səbiy a ɗiy tik, kəzəɗ səna Yesu acin mə diw tik, a ɗiyta avə gədan ngə Mbiɗ ngə Bayzlav. Mbiɗ səna vəlen gədan a Mə zlənzləniy ngə Yesu kə tepiy kəzəɗ ngə Məmarta kibik kibik. Avə kəzəɗ taniy mə ɗiyta səna, zləgam ngə Bayzlav ɗiya cakway mgbaw talan mahayək cike wayza. Am deftere nhi təm, Luka a ceɗ mana aceki Pol mə tal lay parpar, kə ceɗ Ləbar Malaw a hidigi, za sin tu diw mgbəw ngə hidiy ngə Kristu am lay par par ndas. Təkən mordoy yikwan tu jəgwan tik a liɓ deftere nhi acin, kə ceɗ zləgam ngə Bayzlav a hidiy mgbaw talan mahayək cike wayza (1.8).
Mana deftere nhi mə wəzak avə səb tik avə səb tik :
Mbiɗ ngə Bayzlav vəl gədan a wəriy gawliy ngə Yesu kə ceɗiy ləbar ngetik a hidigi 1.1-2.47.
Diw ngə mgbəw ngə mə səbiy Yesu a liɓde Ursalima 3.1- 8.3
Hidiy mə səbiy Yesu aa ceɗiy ləbar malaw a hidiy təm hayək Yahudiya ɓəw təm hayək Samariya 8.4-12.25.
Luka a jəgwaniyikwan mana aceki Pol mə ceɗ Ləbar Malaw a hidiy tə liɓdiy par par, hos am hayək Roma 13.1-28.31.