Tizin ɗerewel Pol mə ɗəɗefen a
TIMOTE
Pət am ɗerewel nhi
Pol a ɗəɗef Deftere nhi a kərgawla tik Timote. A saf Timote ‹‹kə kərti tik ma mindiwin ››. Hidiy a luwta, Pol a njə kə luwen kə kərti tik ma məndiwin nhi kadaban sin acin mə mən Timote kə yək zləgam ngə Kristu, za Timote mbaɗ kə kərti tik ma mindiwin. A micek Pol tu lapiy a Timote am hayək Listəra, mandal sin mə ɗa mbuluk mə saray tik. Məv kə jan ləbar səna am deftere ngə (KMY 16. 1-3). Babay ngə Timote wər njə Yunanin, mamay təm njə yahuda (KMY 16. 1). Dəga Timote awəlen kərti mendez, mamay tik avə dehen tu jəgwanenta zləgam ngə Bayzlav təm Jawma Tamicek (2 Tim 3. 15). Mamay ngə Timote avə dehen Timite səna mbaɗiy kə hidiy mə səbiy Yesu (2 Tim 1. 5). Adəwən səna Timote təm yək zləgam ngə Yesu. A yək zləgam səna mandal Pol mə ɗa mbuluk tizin tik a Listəra (KMY 14. 6-7). Mandal Pol ta ɗa mbuluk mə saray tik, sin ton a Listəra baha. Sin wel Timote kə mbaɗ kə hidi tu kə mənenni am kəzəɗ. Za Timote diw kə ɗa mbuluk avə Pol acin (KMY 16. 1-5). Taniy tu ɗiy mbuluk jəɓ dolom witikwitik kə va kə ceɗ ləbar atalan Kristu. Hidiy məpərmay a luwta, mandal Pol ta ɗəɗefen ɗerewel nhi, tu fəkkata kaɗ a mə jik dangay təm hayək Roma za, a tal am hayək Makedoniya bah, za Pol a ɗəɗefen ɗerewel nhi abəgo za. Amma Timote wər a wan am hayək Efesus. Pol a luwen aməcek zaba, sin kə puw hidiy Eklesiya tə bugo.
Hayək Efesus səna, hayək mordoy a jagwar maz mordoy. Hidiy dolom a njə kə viy abəgo kə ɗəyiy terere. Pol a ɗəɗefen ɗerewel nhi kə vəlen musuf a Timote am kəzəɗ ngetik. Sin zlim hidiy məpərmay am hayək Efesus a gəɓəziy atalan səb mə taktak ngə Musa, ɓəw atalan təkəniy mə toniy taməcek ma par par. Ma zlim atəgo za, ɗəɗefen ɗerewel nhi acin.
Mana ɗerewel nhi mə wəzak a səb tik a səb tik: Pol a luwen a Timote kə kaw ləbar ngə Bayzlav ngər səsaray, kə jəgwanen a hidigi mana sin atalan tik mə jugwanenta. Za kə tak hidiy mə njə kə jəgwaniy ɗiy polkoy kaɗ (mə saf am mogroy tik 1). A luwen a Timote mana hidiy Eklesiya tu kə ɗewigi, za mana tu kə weliy talan mbalgam ngə Eklesiya (mogroy tik 2 avə 3). Pol a ngəz Timote kə kaw talan ngetik am ɗew ngetik kə jan kə ɗew kə hidi malaw, za kə kaw talan tik a ləbar sin ta njə kə jəgwanen a hidigi (mo guroy tik 4). A ngəz tik bah atalan ɗew ngə wertiy mə cupcup, ɗew ngə mbusur hidigi, ɓəw ɗew ngə baalamiy tə dab hidiy Eklesiya (mo guroy tik 5. 1-6: 2). Am way ɗerewel nhi, Pol a ngəz Timote atalan aray mə njə kə lebeɗ hidi ɓəw atalan ɗew ngetik avə jəgwan təkən ngetik (mo guroy tik 6: 3-21).