Tizin ɗerewel Pol mə ɗəɗefen a
TIMOTE
Pol a ɗen mbeli a hidigi
1
Kata Pol, kata mə ɗəɗefeh ɗerewel nhi, kata məzlənzlən ngə Yesu Kristu,ª mana Bayzlav mə mbəl yikwan, ɓəw mana Yesu Kristu yikwan taa bəbəc atalan tik mə vərəkakta. 2 Kata tə ɗəɗef ɗerewel nhi a hoh Timote, hoh wa kərti ɗa maa mindiwin lay hoh mə vəlen nəv a Yesu mana kata. Kata tar vay Bayzlav ngiykwan avə Məmar yikwan Yesu Kristu mə ɗiyiy ngər bay, mə safiy kaymah koh, za mə vəliy zoy!Zləgam atalan hidiy mə jugwanenta polkoy a hidigi
3 Mandal kat taa va am hayək Makedoniya, kata tə luwoh hoh kə ɗew a liɓde Efesus. Kata tə luwoh hoh kə ɗew abəgo səna, kə jan hoh kə tak hidiy mə ɗiyiy jəgwan avə ɗiy polkoy. 4 Hoh kə luwenta bah, taniy mə gər kə ɓəɓəliy am mələmbra hidiy mə ɓənta a ɓən, ɓəw mə gər kə zlayiy talan kə nəf zlimiy ngə didi ngatan maa a way ɗahkwən səna kwən. Kata tə luw atəgo , kadaban av kə dah gəɓəz may may, zəni a mən hidiy kə səbiy may ngə Bayzlav avə yək zləgam ngetik kwən. 5 Hoh kə luwenta kə jan taniy kə mayiy hidiy məpərmay. Taniy kə mayiy hidiy məpərmay wər say taniy kə mariy nəv maa kweɗek, ɓuw taniy kə vəliy nəv ngatan a Bayzlav. 6 Hidiy məpərmay geɗiy mozlokotuf malaw kaɗ. Taniy ɗaw kə zlayiy talan tan am cokoɓma. 7 A mayiy kə mbaɗiy kə hidiy mə jəgwaniy mə taktak ngə Musa a hidigi, amma a səniy təkəniy taniy ta luwta ɗahkwən, zəni a səniy təkən taniy ta njə kə luwenta a hidiy avə gədan cike wayza ɗahkwən . 8 Yaw, yikwan cike wayza təm, yikwan mə sən za, mə jawjawiy Bayzlav mə vəlen a Musa law, mana hid a səbta law law. 9 Nəmkwan kə sən təkən sənan, a ɗiyiy mə jawjaw Bayzlav mə vəlen a Musa makavay hidiy mə ɗiyiy malaw a kibik Bayzlav kwən. Amma mə jawjaw wər a hidiy maa aa səbiy mə jawjaw ɗahkwən, ɓəw a hidiy mə ɓoniy kə zlim zləgam ngə Bayzlav, a hidiy mə zeliy Bayzlav, mə ɗiyiy maa lem a hidiy ta ɗiyiy mə ngavngav. A ɗiyiy mə jawjaw a hidiy mə riy Bayzlav, asənkwən a hidiy mə zeliy təkəniy maa kweɗek ngə Bayzlav. A ɗiyta a hidiy mə wəzliy bahbayiy tan, mə wəzliy mahmayiy tan avə mə wəzliy celeniy tan. 10 A ɗiyta təm bah a hidiy mə ɗiyiy gugoɓ, mə waniy mawəl avə mawəl asənkwən werti avə werti, a mə beriy hidi kə bahlam, a mə ɗiyiy polkoy, za ɓəw a mə luwiy mbeɗi am polkoy, yaw za a mə ngaviy zləgam maa mindiwin ngə Bayzlav. 11 Jəgwan nhi a wan am Ləbar Malaw mə njə kə ɗef Bayzlav ma cəcay məmar gədan mordoy. Bayzlav acin məmar zoy ngə hidigi, sin acin mə luwak kata kə ceɗtik.
Səban a Yesu Kristu makavay ndelek ngetik
12 Ta luwen soko a Yesu Kristu Məmar yikwan, mə vəlak gədan ngə ɗiy kəzəɗ, sin a safak gəga kə ɗiy kəzəɗ ngetik mana sin taa mayu. Asəna acin, sin ɓiyak kə ɗiy kəzəɗ ngetik.
13 Aməcek kat tu rətik, za kat tu ruroh tik, kat tu ɗiyenta ngərəh. Amma sin tu saf kaymah ɗa, kadaban mandal səna tə yək zləgam ngə Kristu gesin bugwən, kəzəɗiy cike kat mə ɗiyu, tə ɗiyta mətak sən. 14 Məmar yikwan tu saf marɓən ngaɗa day godokwən. Sin vəlak gədan ngə yək zləgam ngə Yesu ɓəw kat kə may hidigi kadaban kat awana avə Yesu Kristu. 15 Asəna acin, kat ceɗehin zləgam maa mindiwin ngə yək mətak wəzən. Kata tə luw nhi, Yesu Kristu a yah am talan mahayək kə mbəl hidiy mə ɗiyiy mə ngav ngav. Adab hidiy səna, kata acin mə ɗiy mə ngavngav maa day. 16 Amma Bayzlav saf kaymah ɗa. Kat mə ɗiy mə ngavngav maa day hidiy sənan səna, Yesu Kristu ɗef musuf ngetik maa day godokwən atalan ɗa, kə jan kə ɗef sla tik a hidiy mə yəkiy zləgam ngetik, hidiy tu kə janiy micin mətak way.
17 Hidiy cike mə səbaniy Bayzlav ɓəw mə vəlenta mordoy hoyhoy.
Sin acin bay ko a pu maa a məc ɗahkwən, za maa hid a lim ɗahkwən təm.
Sin acin Bayzlav a gendik pal pal. Amina!
Pol a ngəz Timote
18 Hoh kərti ɗa Timote, anhi ngəz kat taa vəloh. A ɓən atalan zləgam mokotufiy ngə Bayzlav taməcek mə ceɗta mana təkəniy tu kə toniy atalan koh. Zləgamiy ngatan səna mə vəloh gədan, kə jan hoh kə səb a ceɗ Ləbar Malaw avə gədan səna, ko hidiy a gbezlerima, hoh gər kə geɗ kwən. 19 A səb a kə vəlen nəv koh a Bayzlav, ɓəw avə ɓən maa kweɗek am nəv koh. Səb a kə vəl nəv a Bayzlav nhi, hidiy dolom mə geɗta kaɗ. Asəna acin, vəl nəv ngatan a Bayzlav mə mbaɗa kə təkən may may. 20 Himeneyus avə Aleksandire, awaniy a dab hidiy səna. Kat geɗta am ngər ngə Bay Musuruf, kə jan taniy kə janiy ngəz, kə ɗewiy mətak ra Bayzlav baha.